ดอ โฆว 28

ลอง อาโกบ โลว เตา ฮาว ปอ โปละ

1ปัน ตี อาแซก ตึอน วี แดะ อาโกบ. อัน วี ม็องการา ดัว ดี อาโกบ. อัน มืร ดัม อาโกบ ต็อห, 2“แกวะ แตห แม ดึห อีบึณ อาโมยว กานัณ. แม โลว ฮาว แคง มืง พาดานอาราม โดง กอย อาเบด, อี มูห ฆูณ มา แม. แตห แม คัด ดึห อีบึณ อู วี อี มูห ฆอน อาลับ, อี มูห อีกัด มา แม. 3เฌาพรา อี อึบ โตต ดอน โมยว, แตห อัน ม็องการา ดัว ดี แม. เฌาพรา แตห แม มึห ฆอน บอ หลูกหลาน, แตห เฆ กืน, แตห เฆ แบน อาโมยว ดูอี แบน โมยว แบน โมยว. 4แตห อัน เฌา ม็องการา ดัว ดี แม ปี อัน แฮะ ม็องการา ดัว ดี อาบราฮัม ตึอน. บอ แม บอ หลูกหลาน แม, แตห เบ แบน ดา กาณา แคง มืง ปี ดึอม ฮาว อาบราฮัม, กอย แบน แคต.” 5ปาย ตี อาแซก ควาง อาโกบ เลห โดง กอย อัน. อาโกบ บอ ฮาว โดบ อึณเตณ ฌัม มืง พาดานอาราม, แตห อัน ฮาว โดง กอย อาลับ อี มูห ฆอน อาเบด. อาเบด ยี มูห อาโมยว ดูอี อาราม. อาลับ บอ มูห อีกัด นาง แบก อี มูห มา อาโกบ ฆาย อาโซว.

6ปัน ตี อาโซว ตึอน บอ นับ ลอง อาแซก แฮะ วี ม็องการา ดัว ดี อาโกบ, ควาง อัน ฮาว มืง พาดานอาราม, แตห อัน คัด ดึห อีบึณ แคง มืง ตี. อัน บอ นับ ลอง อาแซก แฮะ หมาณ ดี อัน, “แกวะ แตห แม คัด ดึห อีบึณ อาโมยว เฮทีด.” 7อัน บอ นับ ลอง อาโกบ แฮะ โทม โฆรห ฆูณ มา อัน, ฮาว มืง พาดานอาราม ตึอน. 8ดอ ยึร อัน ลอง อัน ตี, อัน บอ นับ, เฆ อีบึณ อัน อี มูห อาโมยว กานัณ, เฆ ตู ล็อะ น็อห ฆูณ อัน. 9โคว, อาโซว วี ฮาว โดง กอย อาซามาน. อัน วี คัด ดึห อีบึณ ปอ อู วี อี จืร นาง มาฮาลาด, อี มูห ฆอน อาซามาน. อาซามาน ยี มูห ฆอน อาบราฮัม. นาง มาฮาลาด บอ มูห วา อาเนยาโบด.

ลอง อาโกบ อึณบาว

10อาโกบ แฮะ เลห มืง บีราเซบา ตึอน, ฮาว โดบ อึณเตณ มืง ฮาราน. 11ซีแง แฮะ เฆต, อัน บอ ฌัม อู โปละ บอ วี ตัม ดี ตี. อัน ดึห มาว อู โบ็ง, แตห อึณ แบน หมอน อัน บอ อีด. 12ดอ อีด อัน, อัน อึณบาว. อัน ยึร อึณแตง อี กอย แดง กาดาย. กาแดะ อัน ยี จา กอ ฌัม ฆางหราว. อามู อามาด เฌาพรา บอ โลง อี ครึม, วี โฮะ นา แดง. 13อู เฌณ เฌาพรา วี กอย รึม โดบ อัน. อัน ต็อห, “โอว มูห เฌาพรา ปี กรึบ ดา แม, อี จืร อาบราฮัม. โอว บอ มูห เฌาพรา ปี กรึบ อาแซก. กาดาย โดง อีด แม ดอ ตี นี, โอว ดี ดัว ดี แม บอ ดี หลูกหลาน แม, แตห อึณ แบน มืง เบ. 14หลูกหลาน แม, เฆ ดี กืน ปี กาปูห อี กอย แดง กาดาย. เฆ ดี ฮาว กอย นา เฆต ซีแง, นา เลห ซีแง, นา เตต บอ นา กัว. โกบ ปี โบง แม บอ หลูกหลาน แม, อึณ แตห โอว ม็องการา ดัว บอ เฆ ดูอี ดอน โมยว อี กอย แดง กาดาย. 15โอว ดี บอ ฮาว รึม โดบ แม. แม บอ ฮาว นา เหมา, โอว ดี บัร รีด แม เซเซ. แฮะ ฮอต, โอว ดี แตห แม วี ตัห ดี ตี. โอว ตู แวน แม, แตห โอว กอ โบง โตต ปี ต็อห โอว ดี แม ดอ ตี นี.”

16เฌาพรา แฮะ ฮอต กาลาง ปาย ตี อาโกบ ตึอน วี อึณซึห. อัน ต็อห, “แฮะ หมาน อาคาคัร, เฌาพรา แฮะ กอย โดง กอย โอว นี. โอว ยี ตู นับ ลอง อัน ตี.” 17ปัน ตี อัน บอ โยว. อัน ต็อห, “โดง กอย โอว นี แฮะ หมึอม อาม, หมึอม โยว. แฮะ มูห, โดง ตี มูห โดง กอย เฌาพรา. อึณ มูห มาโลห แตห อี ลึบ ฆางหราว.”

18ปัน ตี ซีณวัห อัน เจว ยีต, ดึห มาว อี แฮะ แบน หมอน อัน, เบลห โดง ตี, แตห อัน แบน กาอูน. อัน มืร โหลว นามัน แดง มาว ตี 19อัน แตห โดง ตี ดี จืร เบดาเอน.#28:19 ‘เบดาเอน’ แคง โฆรห แฮแบร, ลอง ดาง อัน มูห ‘กาง อี มูห โดง กอย เฌาพรา’ คา อาต โดง ตี แฮะ จืร มืง ลูซา.

20ดี ตี อาโกบ ตึอน บอ ดัว กาดีก ซัดฌา ดี อัน เฌา. อัน ต็อห, “เซ อึณ หมาน ปี ต็อห เฌาพรา, เซ อัน ดี ฮาว รึม โดบ โอว, ดัว โอว มึห ปี ดี โฮม ปี ดี ตา, 21เซ โอว ฮี วี ฌัม แคง กาง ฆูณ โอว ปอ อู เฌณ, เฌาพรา ตี ดี มูห เฌาพรา ปี กรึบ โอว. 22มาว ปี เบลห โอว ดอ ตี นี, แตห อึณ แบน กาอูน, แตห อึณ แบน โดง ดี กรึบ เอ เฌาพรา. แคะ ปี ดัว อัน เฌา ดี โอว, โอว ดี วี หลู ดี อัน ฆึร บูน อู บูน.”

Currently Selected:

ดอ โฆว 28: pce

Highlight

Copy