ดอ โฆว 16

ลอง นาง ซาราย ฆาย นาง ฮาฆา

1อึณ ยี มึห นาง ซาราย อี มูห อีบึณ อาบราม ตึอน. อัน หณัม มึห ฆอน. อัน ยี มึห หมาย อู วี อี ตัห มืง แอฆึบ อี จืร นาง ฮาฆา. 2อู ซีแง, นาง ซาราย ตึอน ยี กาลาง โฆรห ดี อาบราม. อัน ต็อห, “แม ยึร, เฌาพรา ตู แตห โอว มึห ฆอน. โคว, แตห แม ฮาว ลาย หมาย โอว ตึอน, แตห อัน ฆอน ดาง โอว, แตห ฆอน อัน แบน ฆอน โอว.” อัน แฮะ ฮอต กาลาง ปาย ตี ดา อาบราม วี โทม โฆรห อัน.

3ปัน ตี นาง ซาราย, อี มูห อีบึณ อาบราม ตึอน, อัน แดะ หมาย อัน อี จืร นาง ฮาฆา อี ตัห มืง แอฆึบ ตึอน. อัน บอ แตห นาง ฮาฆา แบน อีบึณ อาบราม อาดา อู กาจัน. ดอ อัน ตี อาบราม แฮะ ฮอต กอย แคง มืง กานัณ อาดา ฆึร ซีนัม. 4ดา อาบราม บอ ลาย นาง ฮาฆา ตี. แฮะ ฮอต, นาง ฮาฆา แด บาดีก ซันเท.

นาง ฮาฆา บอ นับ, อัน แฮะ แด บาดีก ซันเท, อัน ตู วี โฆม ยา กาณา อัน. อัน บอ ปีคึก น็อห อัน. 5ปัน ตี นาง ซาราย ตึอน วี ต็อห ดี อาบราม, “อี ตู หมึอม ปี โบง อัน ดี โอว, อึณ มูห หมาบ แม. โอว แฮะ ดัว อีบึณ ตี ดี แม. ดอ ตี นี, อัน บอ นับ, อัน แฮะ แด บาดีก ซันเท, อัน วี ปีคึก น็อห อัน. อัน มืร โบง นา ตู หมึอม ดี โอว. แตห เฌาพรา ซูงพยาด ดารา ดี แม โกบ โบง แม ปาย ตี.”

6อาบราม วี ต็อห ดี นาง ซาราย, “อีบึณ ตึอน, อัน มูห หมาย แม. แตห แม โบง ปี อึง แม.” แฮะ ฮอต ปัน ตี นาง ซาราย วี เอห นาง ฮาฆา. นาง ฮาฆา ยี ตู คัม, วี เตา ตัะ โดง กอย ยา กาณา อัน.

7อึณ ยี มึห อามู อามาด เฌาพรา, อัน วี ยึร นาง ฮาฆา ตึอน, ดอ กอย อัน โคบ อึม คึม แคง แปร กาฮ็อห. อึณ มูห อึม คึม อี กอย ดี โคบ อึณเตณ ฮาว มืง ซูรา. 8อามู อามาด เฌาพรา กาลาง โฆรห ดี นาง ฮาฆา ตึอน ต็อห, “อึย นาง ฮาฆา, แม มูห หมาย นาง ซาราย. นา เหมา แม ตัห? นา เหมา แม ดี ฮาว?”

อัน ต็อห, “โอว แฮะ เลห เตา แคง กาง นาง ซาราย อี มูห ยา กาณา โอว.”

9อามู อามาด เฌาพรา วี ต็อห ดี อัน, “แตห แม วี เวณ ดี กาง ยา กาณา แม, วี โทม โฆรห อัน, โบง ปี จัร อัน.” 10แฮะ ฮอต, อามู อามาด เฌาพรา วี ต็อห, “โอว ดี แตห หลูกหลาน แม กืน กอ ฮู แป ดี ตีห.”

11อัน บอ ต็อห, “แม แฮะ มึห ฆอน แคง วัต แม. ฆอน ตี, อึณ มูห ฆอน อีมาย. แม โลว แตห อัน จืร อาซามาน. โคว, เฌาพรา แฮะ ฮอต โทม แปะ แฮะ หมาณ แม ดี อัน.#16:11 จืร ‘อาซามาน’ แคง โฆรห แฮแบร มูห ‘เฌาพรา ยึร’

12ฆอน ตี ยี ปี มังปร็อง แปร. อัน ดี กาโฆห ดี ดอน อี. เฆ ดอน อี ดี วี กาโฆห ดี อัน. อัน ดี กอย รึม โดบ เฆ บีนอง อัน. อัน ยี หล็อก หลึอม เฆ ดอน อี.”

13นาง ฮาฆา แฮะ ฮอต โทม โฆรห อามู อามาด เฌาพรา ตี, อัน บอ นับ, อึณ มูห เฌาพรา อี กาลาง โฆรห ดี อัน. อัน ต็อห, “เฌาพรา มูห อัน เฌา อี ยึร โตต. อัน เฌา แฮะ ยึร โอว. อึณ ปี โอว มืร แฮะ ยึร อัน.” 14ปัน ตี อึม คึม อี มูห โดง กอย อัน ตึอน, เฆ อี เฮา แตห อึณ จืร อึม คึม เฌาพรา อี อีม, เฌาพรา อี ปึอน ยึร. โดง กอย อึม คึม ตี, อึณ กอย ดี กาแต มืง ซาเดด ฆาย มืง เบเรด.

15ปัน ตี นาง ฮาฆา บอ ฆึอด ฆอน อีมาย อี มูห ฆอน อาบราม. อาบราม บอ แตห ฆอน อัน ตี จืร อาซามาน. 16ดอ ฆึอด นาง ฮาฆา อาซามาน ดัว ดี อาบราม ตึอน, อาซาก อาบราม แฮะ โนะ ดา ฆึร ดี เดา ซีนัม.

Currently Selected:

ดอ โฆว 16: pce

Highlight

Copy