ดอ โฆว 17

ลอง เฌาพรา ดัว กาดีก ซัดฌา ดี อาบราม

1อาบราม ตึอน, ดอ แฮะ โนะ อาซาก อัน ดีม ฆึร ดี ดีม ซีนัม, อู ซีแง เฌาพรา วี กาปลูห ดี อัน ต็อห, “โอว มูห เฌาพรา, โอว จืร เฌาพรา อี อึบ โตต ดอน โมยว. แคะ ปี โบง แม, แตห อึณ โดบ ปี อึง โอว, แกวะ แตห อี เฮา ปึอน ดี กาลาง นา ตู หมึอม ลอง แม. 2โอว ดี ดัว กาดีก ซัดฌา ดี แม. แตห อาย ลาย โพรม. โอว ดี โบง แตห หลูกหลาน แม กืน กาเซา.”

3เฌาพรา แฮะ ฮอต กาลาง ปาย ตี อาบราม วี ครึบเครา ดี อาต อัน เฌา. อัน เฌา วี กาลาง ดี อัน ต็อห, 4“อึณ มูห โอว อี กาลาง ดี แม. แตห แม นับ, โอว แฮะ ฮอต ดัว กาดีก ซัดฌา ดี แม. แม ดี แบน ฆูณ ดัง เฆ อาโมยว ดูอี กืน. 5คา อาต เฆ แฮะ แตห แม จืร อาบราม. โอว ยี แตห แม วี จืร อาบราฮัม. ลอง ดาง อัน ตี, อึณ มูห, ‘แม มูห ฆูณ ดัง อาโมยว ดูอี กืน.’ 6โอว ดี แตห แม มึห หลูกหลาน กืน กาเซา. โอว ดี แตห เฆ แบน อาโมยว ดูอี แบน โมยว แบน โมยว. แม ดี บอ แบน ฆูณ ดัง คูนดีคัม แบน กาดัง แบน กาดัง. 7กาดีก ซัดฌา ปี ดัว โอว ดี แม, โอว ตู บยอง ดอ เหมา. อึณ หมาน อาคาคัร อาดา ดอน ฌาด ดอน บาน. กาดีก ซัดฌา ตี, อึณ ดี หมาน อาคาคัร อาดา แม บอ อาดา เฆ หลูกหลาน แม ดอน โจว. ปาย ตี โอว แฮะ มูห เฌาพรา ปี กรึบ แม. โอว ดี บอ มูห เฌาพรา ปี กรึบ เฆ หลูกหลาน แม. 8มืง โดง กอย แม ดอ ตี นี, มืง ปี แบน แม แคต ดอ ตี นี, โอว ดี ดัว ดี แม บอ ดี หลูกหลาน แม. อึณ ดี แบน มืง เฆ กอ ฌัม ดอน ฌาด ดอน บาน. โอว ดี บอ แบน เฌาพรา ปี กรึบ เฆ.”

9ปัน ตี เฌาพรา วี กาลาง โฆรห ดี อาบราฮัม ตึอน ต็อห, “บอ แม โลว โบง ปี จัร โอว ดี แม, แตห อึณ แบน ลักซานา ปี ลาย โพรม อาย. บอ แม, บอ หลูกหลาน แม ดอน โจว เบ โลว โบง แคะ ปี จัร โอว ดอน โมยว. 10โอว จัร เบ โบง ปาย ตี แตห เบ โหลห กาดีก ซัดฌา ปี ดัว โอว ดี เบ ดอน โจว. อีมาย อี กอย โดบ เบ ดอน อี, เบ โลว ซัวะ แวน ฮูน ลัะคานา เฆ. 11ฮูน อี กอย ดี ลัะคานา อีมาย, เบ โลว ซัวะ แวน. อาตี, อึณ มูห ลักซานา ปี โพรม เบ ดี โอว, แตห เบ โทม โบง ปี จัร โอว เซเซ. 12อาเซ มูห อีมาย แคง อาโมยว เบ, บอ เฆ ฆอน หมาย เบ อี กอย แคง กาง เบ บอ ฆอน หมาย ปี จึห เบ ดี อี เฮา, เซ อาซาก เฆ แฮะ โนะ ดา ซีแง, เบ โลว ซัวะ แวน ฮูน ลัะคานา เฆ. เบ บอ โลว โบง ปาย ตี อาดา ดอน โจว ฮาว นา อาต. 13ปาย ตี โอว แฮะ แตห เบ โบง, แตห เบ โหลห กาดีก ซัดฌา ปี ดัว โอว ดี เบ เซเซ กอ ฌัม ดอน ฌาด ดอน บาน. บอ หมาย อี ฆึอด แคง กาง เบ, บอ หมาย ปี จึห เบ, เบ โลว ซัวะ แวน ฮูน ลัะคานา เฆ. 14เซ อึณ ยี มึห อีมาย อู วี, อี ตู ซัวะ แวน ฮูน ลัะคานา อัน, เบ โลว เบลห แวน อัน, แกวะ แตห เบ มาด อัน มูห ดูอี อาโมยว เบ. อัน แฮะ ฮอต ปยาต ปี ลาย กาแซณ เอ.”

15ปัน ตี เฌาพรา วี กาลาง โฆรห ดี อาบราฮัม ต็อห, “อู โป็ง อาตึร นี, อีบึณ แม อี จืร นาง ซาราย ตึอน, แกวะ ฮู แตห อัน จืร นาง ซาราย. แม โลว แตห อัน จืร นาง ซารา. 16โอว เฌาพรา ดี ม็องการา แตห ดี อัน. โอว ดี แตห อัน มึห ฆอน. ฆอน ตี มูห ฆอน อีมาย แม. โอว ดี ม็องการา แตห นาง ซารา, แตห อัน วี แบน มา ดัง เฆ อาโมยว ดูอี แบน โมยว แบน โมยว. เฆ คูนดีคัม อาโมยว ดูอี แบน โมยว แบน โมยว ดี วี ต็อห, นาง ซารา มูห มา ดัง เฆ.”#17:16 ‘ซารา’ แคง โฆรห แฮแบร, ลอง ดาง อัน มูห ‘มา ดัง อาโมยว ดูอี’

17เฌาพรา แฮะ ฮอต กาลาง ปาย ตี อาบราฮัม วี ครึบเครา บอ กาณัห. อัน ต็อห แคง น็อห อัน. “อาซาก โอว แฮะ โนะ อู มาย็อห ซีนัม. โอว ดี บอ มึห ฆอน? บอ นาง ซารา, อาซาก อัน แฮะ โนะ ดีม ฆึร ซีนัม. เหมา อัน ดี บอ ปึอน ดี ฆึอด ฆอน อางัะ?” 18อาบราฮัม ยี กาลาง โฆรห ดี เฌาพรา. อัน ต็อห, “แม เฌา, แตห อาซามาน ตึอน แบน ดูอี อี ปลูะ โอว.”

19เฌาพรา วี ต็อห, “อาว มูห ปาย ตี. อีบึณ แม, อี จืร นาง ซารา, อัน ดี มึห ฆอน. แม โลว แตห ฆอน ตี จืร อาแซก. กาดีก ซัดฌา ปี ดัว โอว ดี แม, โอว ดี บอ ดัว ดี อัน, แตห อึณ หมาน อาดา ดอน โจว ฮาว นา อาต. 20อึณ บอ มึห อาซามาน ตึอน, โอว มืร แฮะ โทม ปี หมาณ แม. โอว ดี ม็องการา แตห บอ ดี อัน. โอว ดี แตห บอ อัน มึห หลูกหลาน กืน กาเซา. ฆอน อัน ดี แบน ดา กาณา ฆึร ดี อา กาดัง อี อึบ มืง. โอว ดี แตห เฆ แบน ดูอี อาโมยว ตาง กาเซา. 21กาดีก ซัดฌา ปี ดัว โอว ดี แม, ปี ลาย กาแซณ อาย ตึอน, โอว ยี ดี ดัว ดี อาแซก. ซีนัม ดี ตัห, ดอ วี ฌัม มาเฆียน นี, นาง ซารา ดี ฆึอด ฆอน อีมาย ตี, ดัว ดี แม.” 22เฌาพรา แฮะ ฮอต กาลาง โฆรห ตี, อัน วี เลห โดง กอย อาบราฮัม ตึอน.

23เฌาพรา แฮะ ฮอต กาลาง โฆรห ดี อาบราฮัม ตึอน, อัน วี โบง ปี ดัม เฌาพรา อู เฌณ. ซีแง ตี อัน ดึห อาซามาน อี มูห ฆอน อัน, บอ หมาย อี ฆึอด แคง กาง อัน, บอ หมาย ปี จึห อัน. แคะ มึห อีมาย อี โดบ อัน, อัน ดึห ดอน อี, ซัวะ แวน ฮูน ลัะคานา เฆ. 24อาบราฮัม ตึอน, อาซาก อัน แฮะ โนะ ดีม ฆึร ดี ดีม ซีนัม ดอ ซัวะ แวน อัน ฮูน ลัะคานา อัน. 25อาซามาน อี มูห ฆอน อีมาย อัน, อาซาก อัน แฮะ โนะ ฆึร ดี โอย ซีนัม ดอ ซัวะ แวน เฆ ฮูน ลัะคานา อัน. 26ซีแง ตี อาบราฮัม บอ ฆอน อีมาย อัน แฮะ คัม ดี ซัวะ แวน ฮูน ลัะคานา ฆาย. 27บอ เฆ อีมาย ดอน อี, อี กอย รึม โดบ อัน, เฆ อี กอย แคง กาง อัน ซีณ ดอ ฆึอด เฆ, บอ เฆ หมาย อี ตัห แคง มืง เฮา, เฆ อี ปี จึห อัน, เฆ ดอน อี บอ คัม ดี ซัวะ แวน ฮูน ลัะคานา เฆ ดอ อัน ตี.

Currently Selected:

ดอ โฆว 17: pce

Highlight

Copy