ดอ โฆว 15

ลอง อาบราม ยึร โฆรห เฌาพรา

1แฮะ ฮอต ปัน ตี อาบราม ตึอน ยึร เฌาพรา กาลาง โฆรห ดี อัน. อัน เฌา ต็อห,

“อึย อาบราม, โอว มูห อี บัร แม ปี มัง ฆ็อง. โอว ดี บอ ดัว รูห กืน ดี แม.”

2อาบราม วี ต็อห, “อึย แม เฌา อี อึบ โอว, ปี ดัว แม ดี โอว, อึณ ตู มึห อาฆยึร กืน. เซ โอว ตู มึห ฆอน, อึณ ดี มูห แดเจณ โอว อี จืร อาเอลีเอฌา อี ตัห มืง ดามาคู, อัน ดี ปลูะ โอว. 3แม เฌา, แม ตู ดัว โอว มึห ฆอน. โคว, ดอ ตี นี แดเจณ โอว ดี ปึอน โตต แคะ ปี มึห โอว.”

4ปัน ตี เฌาพรา วี กาลาง โฆรห ดี อาบราม ตึอน. อัน ต็อห, “แดเจณ แม ตึอน, อัน ตู ปลูะ แม. อึณ ดี มึห ฆอน อีมาย แม, อัน ดี ปึอน โตต โกรว แม.” 5เฌาพรา แฮะ ฮอต กาลาง ปาย ตี อัน วี แดะ อาบราม, แตห อัน เลห ดี ฆลัะ. อัน บอ ต็อห, “แตห แม ยอด แคง เบลณ บอ เทว ดี ตีห ซีมัณ, โยว แม แป ดี ตีห. หลูกหลาน แม, เฆ ดี กืน แคะ ตี.”

6เฌาพรา แฮะ ฮอต กาลาง, อาบราม มืร หณึม เฌาพรา. โกบ หณึม อัน ปาย ตี เฌาพรา มืร ต็อห อัน แฮะ มึห น็อห ลูย.

7เฌาพรา วี กาลาง ดี อัน ต็อห, “โอว มูห เฌาพรา อี แฮะ แดะ แม เลห แคง มืง อูรัะ ตึอน อี กอย แคง มืง ตาง อี จืร มืง กาลาเด. โอว มืร แฮะ ต็อห ดี ดัว มืง นี ดี แม, แตห อึณ แบน มืง แม.”

8อาบราม ยี ดีหมอด ต็อห, “อึย แม เฌา, เหมา โอว ดี ปาย ดี นับ, มืง อี มูห โดง กอย โอว นี, อึณ ดี แบน มืง โอว?”

9เฌาพรา วี ต็อห, “แตห แม ดึห มามัก บอ มาแป บอ มาบู อาโล็ง, อู โมยว อู โดว. อาซาก ดอน โดว ตี โลว โนะ โอย ซีนัม. ดึห บอ มาโบลย บอ มาโบลย แปร, อู โมยว อู โดว.”

10อัน มืร ดึห โดว เฆ ตี, กาแดบ กาแต แบน อา บลาก, เบลห ลาย กาซืร ดี อาต เฌาพรา. มาซีม อา โดว, อัน ยี ตู กาแดบ.#15:10 เฆ โบง ปาย ตี แตห ดอน อี นับ ลอง ปี ดี ลาย โพรม เฆ 11แฮะ ฮอต ปัน ตี เฆ มาฆลาง ตัห โลง, ต็อห ดี โฮม โดว ปี เบลห อัน. อาบราม ยี ณอน เตา เฆ.

12บา ดี อับ อาบราม บอ อีด ปีว อู เฌณ. อัน บอ โยว กาเซา, อึณ บอ ปี แฮะ อับ ว็อง กาเซา แคง น็อห อัน. 13ดอ อัน ตี เฌาพรา ต็อห ดี อัน, “โอว แตห แม นับ ปี ดี โบง โอว. หลูกหลาน แม, เฆ ดี กอย แคง มืง อี เฮา, มืง อี ตู มูห มืง เบ. เฆ ดี แบน หมาย แคง มืง ตี. อาดา พวน มาย็อห ซีนัม เฆ ดี โลว คัม ดูก ตาง ดี อี เฮา. 14อาโมยว ดูอี อี จัร เฆ หลูกหลาน แม, โอว ยี ซูงพยาด ดารา ดี เฆ. แฮะ ฮอต, เฆ หลูกหลาน แม ดี ปึอน ดี เลห แคง มืง ตี. ดอ อัน ตี เฆ ดี วี มึห โกรวกราม กืน. 15แม ยี ดี ยัม ดาคึย. แม ดี วี กอย รึม โดบ ฆูณ แม เฆ ดา แม อี แฮะ กอย ดี อาต แม. อาซาก แม ดี โต็ง กาเซา. แฮะ ฮอต, เฆ ดี บอ ดีบ โดว โบ็ง แม.

16เฆ ฮี ฮอต กอย แคง มืง อี เฮา อาดา พวน โจว, เฆ ดี วี ตัห ฌัม แคง มืง แม นี. โคว, หมาบ ปี โบง เฆ ดูอี อาโมวรีด, อี กอย แคง มืง แม นี, อึณ หณัม กืน, หณัม ปึอน ดัม หมาบ ดี เฆ, แตห เฆ ชึม.”

17วาย อัน ตี แปร แฮะ ฮอต อับ, อึณ บอ อับ ว็อง กาเซา, โพว อี มึห ดัก เงา บอ กาปลูห ดี อัน, บอ มาซีบลาว เงา ฮาว ดี กาแต โดว ซัดดาวา ปี เบลห อูน อาบราม ตึอน. 18ซีแง อัน ตี เฌาพรา ดัว กาดีก ซัดฌา ดี อาบราม ตึอน. อัน บอ ต็อห, “โอว แฮะ ดัว มาน มืง นี, แตห อึณ แบน มาน มืง หลูกหลาน แม. อึณ จูห ดี แบลง อึม กาตัด มืง แอฆึบ กอ ฌัม แบลง อึม ตาง อูพาราด. 19อึณ มูห มืง เฆ ดูอี อาโมยว เคนีด, เฆ ดูอี เคนาซีด บอ ดูอี คาโดวมีด 20บอ เฆ ดูอี เฮทีด, ดูอี เพเรซีด, เฆ ดูอี ราพาด 21บอ เฆ ดูอี อาโมวรีด, ดูอี กานัณ, ดูอี ฆีฆาซีด บอ ดูอี เยบูซีด. มืง เฆ ดูอี ดอน โมยว ตี, เฆ หลูกหลาน แม ดี ปึอน.”

Currently Selected:

ดอ โฆว 15: pce

Highlight

Copy