MAHTE 8
8
Yesu Masha Langai Mi Hpe Shamai Ya Ai
(Mrk 1:40-45; Luk 5:12-16)
1Yesu dai bum de nna yu hkrat wa yang, Masha wunawng wuwa kaba shi kaw hkan nang ma ai. 2Dai shaloi manggang kap ai masha langai mi sa du nna shi a man e dingnyawm let, “Madu e, nang hkraw n-yang gaw, ngai hpe shapra ya lu na rai nga ndai,” ngu wu ai.
3Yesu gaw shi a lata ladawn nna, shi hpe ahtawk let, “Ngai hkraw nga nngai, san pra wa nu!,” ngu wu ai. Dai shaloi jang, shi a manggang ana san pra mat lu ai. 4Shaloi Yesu gaw, “Madat u! Ndai lam kadai hpe mung hkum tsun dan et, pru wa nhtawm na a hkum hkinjawng agyi wa hpe jep yu shangun u; dai hpang, nang san pra mat sai lam shanhte a man e sakse tai u ga, Mawshe hkang tawn da ai hkungga nawng ya u,” ngu shi hpe tsun wu ai. #Jaw 14:1-32; Mrk 5:43; Luk 5:14.
Yesu Gaw Roma Hpyen Du A Shangun Ma Hpe Shamai Ya Ai
(Luk 7:1-10)
5Kaperna-um mare de shang bang wa yang, hpyen ma latsa hpe up ai hpyen du langai mi shi kaw sa du nna, 6“Madu e, nye a shangun ma gaw katsing si ai ana hte nta e yup ra hta n lu shamu hkra aja awa machyi hkrum sha nga ai,” ngu nna shi hpe hpyi nem wu ai.
7Yesu gaw, “Ngai sa nna shi hpe shamai shatsai ya na we ai,” ngu nna tsun wu ai.
8Shaloi dai hpyen du wa gaw, “Madu e, nye nta de nang sa shang na gaw, ngai n ging n dan nngai, na a ga hkaw mi sha tsun dat rit, shaloi nye a shangun ma mai mat na ra ai. 9Ngai mung du kaba ni a ahkang aya npu na masha langai mi rai nga nngai. Nye lawu de mung hpyen ma ni nga ma ai rai nna, marai langai mi hpe, ‘Sa su’ ngu yang, shi sa wa ai; kaga wa hpe ‘Wa rit’ ngu yang shi wa ai; nye a mayam wa hpe mung, ‘Ndai galaw u’ ngu yang shi galaw nga ai,” ngu nna htan wu ai.
10Dai ga hpe Yesu na ai shaloi shi mau nna shi kaw hkan nang ai ni hpe, “Nanhte hpe ngai teng teng tsun made ga, Israela amyu hta pyi dai hte wa kam sham ai gaw langai mi muk n mu hkrup ga nngai. 11Bai ngai nanhte hpe tsun made ga, sinpraw maga de na hte, sinna maga de na masha ni law law wa du sa wa nna, sumsing lamu a Mungdan hta e, Abraham, Isak, Yaku hte hte rau lusha poi hta dung lu na mara ai. #Esa 11:10; Mal 1:11; Luk 13:29; Kas 10:45. 12Rai ti mung dai mungdan a kashu kasha tai ai ni chyawm gaw, shinggan de na nsin hta shaden bang kau ai hkrum na mara ai; dai yang e, hkrap ngu hkrap ngoi ai hte wa wurin wudik rai na mara ai; ngu mu ai. #Luk 13:28; 2Pe 2:17; Yud 13. 13Dai hpang Yesu gaw, dai hpyen du wa hpe, “Nta de wa su, nang kam sham ai hte maren, nang hta byin u ga,” ngu dat wu ai.
Dai ahkying hta nan dai shangun ma gaw mai mat lu ai.
Machyi Ai Masha Law Law Hpe Shamai Ya Ai Lam
(Mrk 1:29-34; Luk 4:38-41)
14Yesu gaw Petru a nta de shang yang, Petru a kani yup ra hta hkali bu taw nga ai hpe mu hkrup wu ai. 15Shi a lata hpe ahtawk ya wu yang, dai hkali kawp mat nna, shi rawt nhtawm Yesu hpe galaw daw wu ai. 16Ya shana de du yang, masha ni gaw nat kap ai ni law law hpe Yesu hpang de woi sa wa mu ai rai nna, ga hte sha, dai nat ni hpe shi shaden kau mu ai; machyi makaw hkrum ai ni yawng hte hpe mung shamai ya mu ai. 17Dai gaw, “Shi hkum nan anhte a machyi makaw hte ana ahkya ni hpe gun la kau nu ai,” nga nna myihtoi Esaia tsun ai ga dik wa u ga, byin wa ai rai nga ai. #Esa 53:4; 1Pe 2:24.
Yesu A Sape Tai Mayu Ai Ni
(Luk 9:57-62)
18Ya, Yesu gaw shi hpe shinggrup nga ai masha wunawng wuwa hpe mu mu yang, nawng wora hkran de rap sa wa na shi hkang da nga ai. 19Shaloi tara sara langai mi sa du nna, “Sara e, nang sa ai shara shagu de ngai nang kaw hkan nang na nngai,” ngu wu ai. 20Yesu gaw, “Chyahkyawn ni nhkun lu ma ai, ntsa malen pyen ai u ni mung u tsip ni lu ma ai, dai Masha Kasha chyawm gaw baw tawn na shara pyi n lu nga ai,” ngu shi hpe tsun wu ai. 21Sape ni hta na langai mi wa mung, “Madu e, nye wa hpe wa makoi na ahkang shawng jaw rit,” ngu nna shi hpe tsun wu ai. 22Yesu gaw, “Ngai kaw hkan nang rit, masha chyasi ni gaw shanhte a chyasi ni hpe lup makoi mu ga,” ngu wu ai.
Yesu Nbung Laru Jasim Ai Lam
(Mrk 4:35-41; Luk 8:22-25)
23Yesu gaw li langai mi hta shang wu ai. Shi a sape ni mung shi kaw hkan nang sa ma ai. 24Shaloi dai nawng e akajawng sha laru kaba ru wa nna, hka leng ni dai li hpe ka-up wa mu ai rai nna lup mat magang wa nga ai; rai ti mung Yesu gaw yup pyaw nga ai. 25Dai rai nna Sape ni shi kaw sa nhtawm jasu let, “Madu e, hkye la mi, anhte si na sha rai saga ai!,” ngu mu ai. 26Shi gaw, “Kam sham myit n law la ai ni e, hpa rai hkrit nga myit ta?,” ngu nna shanhte hpe tsun mu ai. Shaloi shi rawt nna nbung ni hte hkaleng ni zim mat na matu hkang da wu ai, shing rai nachying atsin sim rai nga ai.
27Sape ni chyawm gaw mau mahka nga nna, “Ndai wa gaw kaning re ai wa rai nga a ta? Nbung hte hkaleng ni pyi shi hpe madat mara nga ma hka!,” nga shajang ma ai.
Masha Lahkawng Kaw Na Nat Shaden Kau Ya Ai Lam
(Mrk 5:1-20; Luk 8:26-39)
28Ya hka nawng wora hkran Gadara ginwang de sa du ai shaloi, lup wa e sa nga ai nat kap ai masha lahkawng Yesu hte sa hkrum ma ai. Shan hta nat kap nna nachying n hkru la nga ma ai majaw, dai lam hku kadai mung n lai hkawm gwi ma ai. 29Shaloi jang shan gaw, “Karai Kasang a Kasha e, an nang hte hpa seng nga ga ta? Aten garai n du yang, an hpe ari jaw na nang sa du rin ni?,” ngu nna jahtau tsun mu ai.
30Ya shanhte tsawmra mi tsan kaw e, wa wunawng kaba langai mi kanaw sha nga ma ai. 31Dai rai nna, nat ni Yesu hpe hpyi nem ma ai gaw, “Nang anhte hpe shaden kau na rai n-yang gaw, dai wa wunawng hta anhte hpe shang shangun mi,” ngu ma ai.
32Shi gaw, “Sa wa mu” ngu shanhte hpe ngu mu ai. Shing rai shanhte pru mat wa ma yang, shanhte dai wa ni hta shang wa ma ai rai nna, dai wa wunawng yawng hte gaw n-gam mahka kaw nna nawng de gat ru bang wa ma ai hte hka hta e marit si mat ma ai.
33Wa rem ai ni chyawm gaw hprawng mat wa ma ai hte, dai mare de shang nna, byin mabyin hte hte, nat kap ai yan a lam hpe tsun dan mu ai. 34Dai majaw mare ting Yesu hte sa hkrum na matu pru sa wa ma ai rai nna, shi hte hkrum jang, shanhte a ginwang kaw na pru mat wa u ga, Yesu hpe hpyi nem ma ai.
Currently Selected:
MAHTE 8: JCLB
Highlight
Share
Copy
Want to have your highlights saved across all your devices? Sign up or sign in
Jinghpaw Common Language Bible © Bible Society of Myanmar, 2009.