2 HKAWHKAM LABAU 33
33
Yuda Hkawhkam Manashe
(2Hk 21:1-9)
1Manashe gaw Yuda hkawhkam tai wa ai shaloi shi a asak shi lahkawng ning rai nna Yerusalem mare hta manga shi manga ning up nga ai. 2Dai Madu gaw shi a amyu masha ni rawt lung wa ai shaloi shaden shapraw kau dat sai masha amyu baw ni hkan nga ai matsat shabat re ai arawn alai hta hkan let, Manashe gaw dai Madu hpe shut kau wu ai. #Yer 15:4. 3Shi a kawa Hezekia e jahten sharun kau nu ai tara maigan masha ni a nawku shara ni hta nawku na tawn hkungri ni hpe mung, Ashera karai num a hkrang sumla ni hpe mung shi galaw nna shagan ni hpe nawku wu ai. 4Shi gaw htani htana nawku daw jau hkam la na nga, dai Madu a matu san da ai Nawku Htingnu kata hta tara maigan tawn hkungri ni hpe gap bang da wu ai. #2Hl 6:6. 5Shi gaw Nawku Htingnu a wang lahkawng hta shagan nawku na matu tawn hkungri ni galaw da nga wu ai. 6Shi gaw shi a shadang sha ni hpe Hinom Kadit e wan nat hkungga shatai let nawng ya wu ai. Shi gaw shaba wawt ai, mandan lakle amu galaw nna gumhpan hpan ai ni hte san jahkrup ai amu, nat shung ai ni hte kanawn ai amu galaw nga ai. Shi gaw dai Madu hpe yubak kaba galaw shut ai hte pawt sindawng shangun wu ai. 7Shi gaw Karai Kasang e Dawi hte shi a shadang sha Shawlumon yan hpe ning ngu tsun da sai shara ngu ai Nawku Htingnu kata hta hkrang sumla hpe shadun da wu ai. “Ngai nawku daw jau na matu ndai Yerusalem mare hpe mung, ndai Nawku Htingnu hpe mung Israela amyu bawsang shi lahkawng hte a lamu ga yawng hta na ngai lata la ni ai shara rai nga ai. 8Israela amyu masha ni nye a hkang da ai ga yawng madat mara ai hte nye a shangun ma Mawshe shanhte hpe jaw ai Tara ni mahkra shadik shatup ai rai yang, shanhte a kaji kawa ni hpe jaw da sai mungdan kaw nna shaden shapraw kau hkrum na ahkang, ngai shanhte hpe jaw na n rai.” #1Hk 9:3-5; 2Hk 7:12-18. 9Dai Madu gaw shi a amyu masha ni rawt lung wa yang, mungdan shinggan de shaden shapraw kau ai masha amyu baw ni shut hpyit kau ai yubak mara ni hta grau sawng hkra pyi, Manashe gaw Yuda masha ni hpe lam woi shadam let shut kau nu ai.
Manashe Myit Malai Lu Ai
10Dai Madu gaw Manashe hte shi a amyu masha ni hpe sadi jaw ti mung shanhte n madat hkraw nga ma ai. 11Dai re ai majaw, dai Madu gaw Asuri hpyen luksuk a up hkang du ni hpe Yuda mung de sa shang gasat shangun wu ai. Shanhte gaw Manashe hpe rim la nhtawm chyinghkyi ni hte sin-yu ni hte hkang nna Babelon mung de woi mat wa ma ai. 12Shi nni nkri hkrum wu ai majaw shagrit shanem ai myit hte dai Madu shi a Karai Kasang hpang de kayin wa nhtawm hpyi nem wu ai. 13Karai Kasang mung Manashe a hpyi nem ai ga hkap la ai rai nna Yerusalem mare de bai nhtang wa shangun nga ai hte bai up hkang shangun ai hku mahtai jaw ya wu ai. Dai Madu gaw Karai Kasang rai nga ai lam Manashe hpe chye na shangun nga ai.
14Dai hpang, Manashe gaw Gihon Hka Hpawk makau na kadit nchyun kaw nna dingdung maga Nga Chyinghka du hkra, Dawi a Mare a sinpraw maga na shinggan bunghku hte Ohpela mying ai mare shara lawm hkra, jat shatsaw da wu ai. Shi gaw Yuda mung na bunghku kum ai mare shagu hta hpyen hpung ni hpe up hkang na luksuk hpyen du langai ngai san tawn da wu ai. 15Shi gaw Nawku Htingnu kaw tawn da ai maigan karai ni hpe yeng seng kau nna, dai yang e shi shadun tawn ai hkrang sumla hte Nawku Htingnu gap shatsap tawn ai kawng ntsa hte Yerusalem mare na kaga shara ni hkan na tara maigan ni a tawn hkungri ni htawm la nna mare shinggan de sa kabai kau wu ai. 16Dai Madu hpe nawku ai shara hta tawn da ai tawn hkungri hpe mung shi bai gram lajang nhtawm mahku hkungga ni hte chyeju dum hkungga ni hpe dai ntsa e nawng jau wu ai. Shi gaw dai Madu Israela a Karai Kasang hpe nawku na matu Yuda amyu masha ni yawng hpe hkang da wu ai. 17Amyu masha ni kaga nawku shara ni hkan matut nna shagu hkungga ni nawng jau ma ti mung, shanhte gaw dai Madu hpe chyu sha nawng jau nga ma ai.
Manashe Hkaw Dung Ai Hpang Jahtum Prat
(2Hk 21:17-18)
18Manashe galaw ai amu magup ngu na, shi a Karai Kasang kaw akyu hpyi ai hte dai Madu Israela a Karai Kasang a mying hta myihtoi ni shi hpe tsun ai mungga ni hpe Israela Hkawhkam ni a Labau Laika hta yawng ka matsing da nga ai. 19Hkawhkam wa a akyu hpyi ga hte dai hte seng ai Karai Kasang a mahtai, shi myit malai garai n lu yang, n hkru ai amu galaw nna shi shut hpyit kau ai yubak mara ni a lam, tara maigan masha ni nawku ai shara ni, shi tawk galaw ai Ashera karai num a hkrang sumla ni hte shi nawku ai hpara sumla ni yawng a lam hpe Myihtoi ni a Labau Laika hta ka matsing da nga ai. 20Manashe si mat sai rai nna hkawhkam htingnu hta lup makoi da ma ai; Shi a shadang sha Amon gaw shi a hkang hta hkawhkam tai wa sai.
Yuda Hkawhkam Amon
(2Hk 21:19-26)
21Amon gaw Yuda hkawhkam tai wa ai shaloi shi a asak hkun lahkawng ning rai nna Yerusalem mare hta lahkawng ning up nga ai. 22Shi gaw shi a kawa Manashe zawn dai Madu hpe shut kau nhtawm shi a kawa nawku yu sai hpara sumla ni hpe nawku wu ai. 23Rai ti mung shi a kawa hte n bung ai sha, n shagrit shanem ai hte dai Madu hpang de n kayin wa nga ai. Shi gaw kawa hta pyi grau sawng hkra yubak mara shut hpyit nga ai.
24Amon a du salang ni gaw shi hpe gumlau maw mawn nhtawm hkawhkam htingnu kata hta sat kau ma ai. 25Yuda amyu masha ni mung Amon hpe sat ai ni hpe sat kau nhtawm shi a shadang sha Yoshia hpe hkawhkam shatai da ma ai.
Currently Selected:
2 HKAWHKAM LABAU 33: JCLB
Highlight
Share
Copy
Want to have your highlights saved across all your devices? Sign up or sign in
Jinghpaw Common Language Bible © Bible Society of Myanmar, 2009.
