2 HKAWHKAM LABAU 32
32
Asuri Masha Ni Yerusalem Hpe Jahkrit Shama Ai
(2Hk 18:13-37; 19:14-19,35-37; Esa 36:1-22; 37:8-38)
1Ndai mabyin lam ni ngut ai hpang, Hkawhkam Hezekia gaw dai Madu hpe kangka ai hte daw jau nga ai; Asuri Hkawseng Senahkerib gaw Yuda mung hpe shang gasat wu ai. Shi gaw bunghku kum ai mare ni hpe wang da nhtawm bunghku hku lai shang wa nna shanhte a matu lam waw mat wa na matu shi a luksuk ni hpe hkang da wu ai. 2Senahkerib gaw Yerusalem mare hpe mung htim gasat na maw nga ai hpe Hezekia mu jang, 3-4shi hte shi a du salang ni gaw dai Asuri masha ni Yerusalem mare de shani sa wa ma ai shaloi, hka n lu lang lu hkra nga, mare shinggan e nga ai hka jaw ai shara hpe dan di kau ya na lam daw dan ma ai. Du salang ni gaw amyu masha law law woi nna hka kachyi mi mung n lwi lu hkra nga, hka hpawk yawng mayawng hte hpe pat kau ma ai. 5Hkawhkam wa gaw bungli gram lajang nna de a ntsa e langchyi ni gap ai hte shinggan bunghku ni galaw let mare a dahpran shara ni hpe shangang shakang da wu ai. Dai sha n-ga, shi gaw Yerusalem mare dingsa daw a sinpraw maga ga jahpring bang da ai ntsa e galaw da ai dahpran shara ni hpe mung gram lajang da wu ai. Shi hta galaw tawn da sai nri ni hte ninggang ni law law nga nga ai. 6Shi gaw mare kata na lasha ni yawng hpe luksuk du magam ni a npu hta tawn da nna mare chyinghka na dam ai shara e shanhte hpe jahpawng da nga ai. Shi gaw shanhte hpe, 7“Myit jahkut daw dan ai hte kam sham nga mu. Asuri Hkawseng hte shi woi awn ai hpyen luksuk hpe hkum hkrit nga myit. Anhte a maga hta rawng ai daru magam n-gun gaw shi a maga hta rawng ai hta grau nna anhte lu nga ga ai. 8Shi gaw masha a daru magam n-gun lu wu ai; rai ti mung anhte chyawm gaw anhte hpe karum la nna anhte a majan ni hpe gasat ya na dai Madu anhte a Karai Kasang hpe lu ga ai,” ngu nna tsun wu ai. Shaloi amyu masha ni gaw shanhte a hkawhkam wa tsun ai ga ni a majaw myit n-gun lu la shajang nga ma ai.
9Ya aten ram ram na mat wa ai hpang, Senahkerib hte shi a hpyen luksuk ni Lahkisha mare e naw nga nga ma yang, shi gaw ndai shiga hpe Hezekia hte Yerusalem mare e shi hte rau nga ai Yuda amyu masha ni hpang de shana dat wu ai: 10“Asuri hkawseng, Ngai Senahkerib gaw nanhte wang da hkrum ai Yerusalem mare hta amyu masha ni naw kam hpa nga hkra nanhte hpe hpa baw jaw ya ai lam san nga nngai. 11Hezekia chyawm gaw dai Madu nanhte a Karai Kasang anhte a lata kaw nna hkye la na ra ai nga nna nanhte hpe tsun ai, rai ti mung Hezekia gaw nanhte hpe masu hkalem nga nna nanhte hpe kawsi hpang gara hte si shangun na ru ai. 12Shi gaw dai Madu a nawku shara ni hte tawn hkungri ni hpe jahten sharun kau nhtawm Yuda amyu masha ni hte Yerusalem mare masha ni hpe tawn hkungri langai hta sha nawku nna manam pyaw ai baw nat nawng na matu tsun da nga ai wa rai nga ai. 13Nye a kaji kawa ni hte ngai gaw kaga amyu masha ni hpe kaning di kau ga nga ai lam nanhte n chye nga myit ni? Kaga amyu baw hta na kade a karai ni mung shanhte a masha ni hpe Asuri hkawseng wa a lata kaw nna hkye mawai la yu mu ni? 14Mungdan yawng hkan nga ai kaning re ai karai ni mung shanhte a mungdan hpe anhte a lata kaw nna galoi e hkye la yu nga ma ni? Shing re ai mi, nanhte a karai gaw hpa lam a majaw nanhte hpe hkye la lu na re ngu nna nanhte hpe myit nawn la shangun nga myit ni? 15Ya mung Hezekia gaw nanhte hpe dai zawn n hkalem kau ai hte lam n shadam kau u ga, shi hpe hkum kam nga myit! Gade a karai mung shi a amyu masha ni hpe Asuri hkawseng wa a lata kaw na galoi mung hkye la yu lu nga ai n rai. Dai re ai majaw ndai nanhte a karai mung nanhte hpe teng teng hkye la lu na n rai!”
16Asuri du salang ni chyawm gaw Madu Karai Kasang hpe mung, dai Madu a shangun ma Hezekia hpe mung grau sawng ai ga ni naw tsun jaw ma ai. 17Hkawseng wa mung dai Madu Israela a Karai Kasang hpe ninghkap ai laika ka wu ai. Dai gaw, “Amyu baw ni a karai ni shanhte a amyu masha ni hpe nye a lata kaw na hkye la lu ma ai n rai; Hezekia a karai mung shi a amyu masha ni hpe nye a lata na hkye la lu na ra ai n rai,” ngu nna tsun da nga ai. 18Du salang ni gaw Yerusalem mare hpe aloi sha gasat dang la lu na matu, dai mare bunghku ntsa nga ai Yerusalem mare masha ni hpe jahkrit shama let n-gun shadaw ya na nga, Hebre ga hte jahtau tsun ma ai. 19Shanhte gaw kaga masha amyu ni a karai ni hte masha lata hte tawk da ai hpara sumla ni a lam hpe tsun kajai ma ai hte maren Yerusalem a Karai Kasang hpe mung tsun kajai ma ai.
20Dai hpang Hkawhkam Hezekia hte Amot a kasha myihtoi Esaia gaw Karai Kasang kaw akyu hpyi ai hte karum la na matu shi hpe jahtau ma ai. 21Dai Madu gaw lamu kasa langai mi hpe shangun dat nhtawm hpyenla ni hte Asuri hpyen luksuk a du salang ni hpe sat kau wu ai. Dai rai nna hkawseng wa gaw myi man sum let Asuri mung de nhtang mat wa wu ai. Lani mi na aten hta shi a karai a nawku shara hta nga nga yang, shi a kasha nkau mi mahtang shanhte a nhtu ni hte shi hpe sat kau ma ai.
22Ndai lam hku nna, dai Madu gaw Hkawhkam Hezekia hte Yerusalem mare masha ni hpe Asuri hkawseng Senahkerib a lata kaw na mung, kaga shanhte a gumlau hpyen ni a lata kaw nna mung hkye la nga ai. Shi gaw amyu masha ni hpe htingbu mungdan ni yawng hte ngwi pyaw sim sa ai hku nga nga shangun nu ai. 23Amyu masha law law hte gaw Yerusalem de sa nna dai Madu a matu hkungga ni, Hezekia hpe kumhpa ni sa ya shajang ma ai; dai aten kaw nna amyu baw ni yawng Hezekia hpe shagrau sha-a nga ma ai.
Hezekia A Machyi Makaw Hte Gumrawng Lam
(2Hk 20:1-3,12-19; Esa 38:1-3; 39:1-8)
24Ndai aten daram hte hta, Hkawhkam Hezekia ganoi si wa na daram machyi hkrum nga ai. Shi akyu hpyi ai hte dai Madu mung shi bai mai tsai wa na kumla shi hpe jaw wu ai. 25Rai ti mung Hezekia chyawm gaw dai Madu shi a matu galaw nu ai chyeju hpe shadan dan na matu nau wa gumrawng nga wu ai. Yuda hte Yerusalem gaw de a matu nni nkri hkrum sha nga ma ai. 26Rai ti mung hpang jahtum e chyawm gaw Hezekia hte Yerusalem mare masha ni shanhte hkum hpe shagrit shanem ma ai rai nna dai Madu mung Hezekia si mat ai hpang du hkra amyu masha ni hpe ari n jaw da wu ai.
Hezekia A Sut Gan Hte Hkik Hkam Lam
27Hkawhkam Hezekia gaw sut gan grai lu su ai wa tai wa nna masha shagu shi hpe shagrau sha-a ma ai. Shi gaw aja gumhpraw, manu dan ai lung seng, manam pyaw ai baw namji namya, ninggang hte kaga manu hpu ai arung arai ni hpe tawn da na matu sut dum ni gap da nga ai. 28Dai hta kaga, shi a nai mam nsi naisi, sabyi ntsin hte tsanlun sau ni bang da na matu dum ni, dumsu hte sagu lawng ni hpe shi galaw da nga ai. 29Ndai yawng hta kaga, Karai Kasang gaw shi hpe sagu, dumsu ni hte kaga sut rai law law jaw ya wu ai majaw mare law law mung shi de da nga ai. 30Ndai gaw Gihon Hka Hpawk de lwi shang wa ai hka shi hpe pat kau nhtawm hka lawng hku Yerusalem mare a bunghku kata ang ang de shalen dat ai wa gaw Hkawhkam Hezekia rai nga ai. Hezekia gaw shi galaw ai lam shagu awng dang nga ai rai nna, 31Babelon dat kasa ni dai lamu ga kata byin ai laklai mabyin masa hte seng ai hpe sa sagawn yu ai shaloi pyi shi a arawn alai chyam yu na nga, Karai Kasang gaw Hezekia hpe shi a lam hku sha sa shangun nga ai.
Hezekia Hkaw Dung Ai Jahtum Prat
(2Hk 20:20-21)
32Hkawhkam Hezekia galaw sai amu magup hte dai Madu kaw shi a akyu hpyi ap nawng ai lam ni hpeAmot a kasha Myihtoi Esaia a Shingran Laika hte Yuda hte Israela Hkawhkam ni a Labau Laika hta ka matsing da nga ai. 33Hezekia si mat sai rai nna hkawhkam lupwa a lahta daw na shara hta lup makoi da ma ai. Yuda hte Yerusalem mare masha ni yawng mung shi si taw nga yang shi hpe grai shagrau sha-a da ma ai. Shi a kasha Manashe gaw shi a hkang hta hkawhkam tai wa sai.
Currently Selected:
2 HKAWHKAM LABAU 32: JCLB
Highlight
Share
Copy
Want to have your highlights saved across all your devices? Sign up or sign in
Jinghpaw Common Language Bible © Bible Society of Myanmar, 2009.
