1 HTESALONI 5
5
Madu Bai Du Sa Na Ten A Matu Jin jin Rai Nga Mu.
1Hpu nau ni e, ndai lam ni byin wa na ra ai aten hte ahkying ladaw galoi rai na lam nanhte hpe ka dat shara n nga ai. 2Hpa majaw nga yang, Madu bai du sa na nhtoi gaw, shana aten e sa ai lagut zawn du sa na ra ai hpe nanhte nan atsawm sha chye nga myit dai.#Mat 24:43-44; Luk 12:39-40; 2Pe 3:10; Shr 3:3. 3Masha ni gaw, “Yawng mayawng sim sa nna shim nga ai,” nga nna tsun na mara ai. Shing nga nna tsun nga ai shaloi jang, ma hkum re ai numsha hta ma shangai na matu shinggyim machyi hkrum ai zawn n myit mada ai sha dai hten bya ai gaw akajawng sha shanhte kaw du na ra ai rai nna, masha ni kadai mung lawt lu na ma ai n rai! 4Rai ti mung Hpu nau ni e, nanhte chyawm gaw nsin hta e nga nga ai ni n rai myit dai majaw, dai Madu bai du sa na shani gaw lagut zawn akajawng sha nanhte hpe dep la kau lu na n rai. 5Hpa majaw nga yang, nanhte yawng gaw nhtoi a kashu kasha ni rai nna shani a kashu kasha ni mung rai nga myit dai. Anhte gaw shana a kashu kasha ni mung n rai, nsin a kashu kasha ni mung n rai ga ai. 6Dai re ai majaw, anhte gaw kaga masha ni zawn n yup nga ai sha su hprang nna htauli htaula rai sadi maja nga ga ai. 7Masha ni gaw shana aten e yup ma ai, shana aten e chyaru nang ma ai. 8Rai ti mung anhte gaw nhtoi a kashu kasha ni rai nga ga ai majaw htauli htaula hte sadi maja nga ra ga ai. Anhte gaw makam masham hte tsaw ra ngu ai sinda magap hpe dagap nna, anhte a hkye hkrang la hkrum na hpe myit mada ai lam ngu ai hpri gupchyawp chyawp nga ga.#Esa 59:17; Ehp 6:14-17. 9Karai Kasang gaw shi a pawt sindawng ai hpe hkam sha na matu anhte hpe lata la mi ai n rai, Madu Yesu a marang e hkye hkrang la ai lam madu la lu na matu she lata la mi ai. 10Hkristu bai du sa wa ai shaloi e anhte gaw si mat sai rai ti mung, naw hkrung nga ai rai ti mung, shi hte rau asak hkrung nga lu na matu shi gaw anhte a matu si hkam ya sai. 11Ndai lam a majaw, nanhte ya e galaw nga ai hte maren, langai hte langai shada da n-gun jaw hkat ai lam, karum shingtau hkat ai lam agalaw nga mu.
Hpang Jahtum Na Matsun Ga Ni Hte Shakram Ai Ga Ni
12Hpu nau ni e, nanhte kaw magam gun hpai nga ai ni, nanhte hpe lam madun sharin achyin na matu Karai Kasang e lata san da sai ni hpe atsawm sha galaw ang ai hte maren hkungga lara nga mu, grau nna anhte shadut jahkat dat ga ai. 13Shanhte gun hpai ai magam bungli a majaw shanhte hpe grai wa di nna hkungga lara ai hte tsaw ra ai hku galaw nga mu. Nanhte a kata hta mung shada da ngwi pyaw sim sa ai hku asak hkrung nga mu.
14Bai hpu nau ni e, lagawn ai ni hpe sadi jaw mu, myit kaji ai ni hpe shadaw shalan nga mu, n-gun kya ai ni hpe karum la mu, yawng mayawng a ntsa e hkam sharang nga mu. 15Kadai mung shut ai hpe shut ai hku matai n htang ai sha, nanhte shada da hte, masha yawng mayawng a matu mai kaja ai lam galaw na hta nanhte a myit shatawng shada da mu.
16Tut nawng e kabu gara nga mu, 17N sim n sa akyu hpyi nga mu, 18Lam shagu hta chyeju dum shakawn kungdawn nga mu. Dai gaw Hkristu hta e nanhte a asak hkrung lam hte seng nna Karai Kasang a myit ra ai lam rai nga ai.
19Chyoi pra ai Wenyi hpe hkum shingdang da mu; 20Karai Kasang a Wenyi shung ya ai hte hkaw tsun ai mungga ni hpe n kaw n law hkum rai myit; 21yawng mayawng hpe jep dinglik yu nna mai kaja ai hpe hkap la shagrin da nna, 22n hkru n kaja ai lam shagu hpe koi yen kau mu.
23Anhte hpe ngwi pyaw sim sa ai lam jaw ya ai Karai Kasang gaw, nanhte hpe lam shagu hta shachyoi shapra nna, anhte a Madu Yesu Hkristu bai du sa ai shaloi e, nanhte a Wenyi, myit masin hte hkum hkrang ting gaw, mara n kap hkra bau maka nga u ga. 24Nanhte hpe shaga la ai wa gaw kangka nga ai rai nna, ndai lam hpe galaw na ru ai.
25Hpu nau ni e, anhte a matu mara mung akyu hpyi ya mi.
26Kam sham ai ni yawng hpe chyoi pra ai lailen hte shakram hkat mu.
27Ndai shagun dat ai laika hpe, kam sham ai ni yawng hpe hti dan na matu dai Madu ap ya da ai ahkang aya hte nanhte hpe ngai hkang dat made ai.
28Anhte a Madu Yesu Hkristu a chyeju gaw nanhte hte rau anga nga u ga law.
Currently Selected:
1 HTESALONI 5: JCLB
Highlight
Share
Copy
Want to have your highlights saved across all your devices? Sign up or sign in
Jinghpaw Common Language Bible © Bible Society of Myanmar, 2009.
