1 HTESALONI 4
4
Karai Kasang Hpe Sharawng Awng Shangun Ai Asak Hkrung Lam
1Jahtum e hpu nau ni e, Karai Kasang sharawng awng na matu nanhte kaning rai asak hkrung ra ai lam anhte kaw na nanhte sharin la manit dai. Nanhte dai lam masa hku nna asak hkrung hkawm sa nga manit dai. Dai hta grau nna galaw lu na matu Madu Yesu a mying nsang hta nanhte hpe anhte hpyi nem shadut jahkat dat ga ai. 2Hpa majaw nga yang, nanhte kaning rai asak hkrung hkawm sa mai na hkang da ai lam ni hpe Madu Yesu a ahkaw ahkang hte nanhte hpe anhte jaw da saga ai gaw nanhte chye nga myit dai. 3Karai Kasang gaw, nanhte hpe chyoi pra san seng shangun mayu ai hte n se n sa re ai hku asak hkrung ai lai len kaw na tsep kawp lawt na matu ra sharawng nga ai. 4Nanhte la ni langai hte langai gaw tinang a madu jan hte chyoi pra nna sari rawng tsawm htap ai hku kaning rai nga lu na lam chye ra nga ai. 5Karai Kasang hpe n chye ai maigan masha ni zawn ra kasit kayut ai myit n mai rawng ai. 6Ndai zawn re ai amu hta nanhte kadai wa mung, tinang a Hkristan hpu nau wa hpe shut hpyit ai lam shing n rai, hpu nau wa a ntsa e ahkaw ahkang la ai lam n mai galaw myit dai. Ndai lam shawng de nanhte hpe anhte tsun dan yu saga ai rai nna Karai Kasang gaw shut hpyit tawt lai ai ni hpe ari jaw na ra ai lam nanhte hpe aja awa sadi jaw dat ga ai. 7Karai Kasang gaw anhte hpe n san n seng ai asak hkrung lam hta hkrung nga na matu shaga la mi ai n rai. Chyoi pra ai asak hkrung lam hta nga na matu she shaga la mani ai. 8Dai rai nna, ndai sharin shaga ai lam hpe ningdang kau ai wa kadai mung, masha hpe n rai, Chyoi Pra ai Wenyi jaw ya ai Karai Kasang hpe mahtang ningdang kau ai wa rai nga ai.
9Nanhte a kam sham ai hpu nau ni hpe tsaw ra na lam hte seng nna ngai nanhte hpang de ka dat shara n nga sai. Shada da tsaw ra nga na lam Karai Kasang e sharin achyin ai hpe nanhte hkam la manit dai. 10Kaja wa nga yang, nanhte gaw Makedoni mung ting na Hkristan hpu nau ni yawng hpe dai hku tsaw ra ai lam hkan sa nga manit dai. Dai re ai majaw, hpu nau ni e, nanhte a tsaw ra myit grau kaba wa na matu nanhte hpe anhte hpyi nem nga ai. 11Nanhte gaw shawng e anhte tsun htet da sai hte maren, sim sa ai hku hkan sa asak hkrung nga na matu mung, kaga masha ni a lam hta n hkan chyau lau hkawm na matu mung, tinang a kan bau bungli hpe tinang dai galaw sha nga na matu mung, myit jasat da nga mu ga. 12Ndai lam hku nna, nanhte gaw kam sham ai hpung masha n re ai ni a hkungga lara ai hpe hkam la lu na rai myit dai; dai hta n ga, nanhte a ra ai lam hte seng nna kadai wa hpe mung n shamyet shanat ra na myit dai.
Madu A Bai Du Sa Na Lam
13Anhte a hpu nau ni e, myit mada shara n nga ai kaga masha ni zawn nanhte yawn hkyen n hkrum myit ga, anhte gaw si mat ai ni hte seng nna dai teng man ai lam nanhte hpe chye shangun mayu ga ai. 14Madu Yesu gaw si mat nna bai hkrung rawt wa ai hpe anhte kam nga ga yang gaw, Yesu hpe kam sham nna si mat wa ai ni hpe mung Karai Kasang gaw Yesu hte rau shi hpang de woi wa na maru ai ngu nna anhte kam sham ga ai.
15Ya e lawu de na nanhte hpe anhte sharin ya nga ai lam gaw Madu Yesu a sharin shaga ai lam rai sai. Madu bai du sa ai shani e, anhte naw hkrung nga ai ni gaw si mat ai ni a shawng numshawn de loi mi pyi shawng magang lu na ga ai n rai.#1Ko 15:51. 16Dai Madu a jahtau garu ai hte hkang da ai ga, lamu kasa agyi a nsen, Karai Kasang a pahtau nsen hte Madu shi nan sumsing lamu kaw nna yu hkrat wa na ra ai. Hkristu hpe kam sham nna si mat wa ai ni gaw shawng numshawn e hkrung rawt wa na mara ai. 17Dai hpang dai Madu hpe ka-ang ganghkau e hkrum na matu, dai aten hta anhte naw hkrung nga ai ni hpe si mat wa sai ni hte rau, sumwi ntsa de shalun la ai hkrum na raga ai. Shingrai anhte gaw galoi mung Madu hte rau anga nga na ga ai. 18Dai re ai majaw, ndai ga ni hte shada da shangwi shapyaw n-gun jaw hkat nga mu.
Currently Selected:
1 HTESALONI 4: JCLB
Highlight
Share
Copy
Want to have your highlights saved across all your devices? Sign up or sign in
Jinghpaw Common Language Bible © Bible Society of Myanmar, 2009.