Luc 24

Sesu marambuge gu dufu

1Mekyele meneni me wisi rege tsonu, begetu bende gu pesi bebege matsi mene tsulu boti me yawu bekinze. 2Neguvuduge, beragesenu dimani diroge ditsibigange ngili dyasibigu tage. 3Begetu negwingene, tumbe beseragesenu gibindi gi Fumu Sesu gu gari ngili. 4Besekunde yabange dyambu ne pundu, pikile gutsyemuge. Vane, revarugile batu bebeyi beruge tsutsudu babe ne bidwaru byavedemi. 5Begetu negugangu ne wome, betsokeme mbami vetsi. Tumbe batu bane bebambile re «Agye nwakebili vegari batu bafu mutu wumonyu?» 6Sesu segandi vave, amarambuge gudufu. Rangeminanu dyambu di yandi nwambile veyibange mbure mosi nenu gu Galile. 7Anwambile re nonge Mwane mutu asaku mu mekake me batu babi, agominu mu kurusu, wisi mureru agurambuge gu dufu. 8Vane, begetu berangemine mambu me Sesu bambilange. 9Busuge gu ngili, bende gu dimbu gwegwambile motsu mesevyoge gu digumi di bebingitsi ne mubingitsi wumosi wu Sesu ne batu benzusu. 10Begetu bende gu ngili, gube Mari yi Magedale, Sane, Mari nguye Sake, ne begetu benzusu yawu botsu bambile mambu motsu mane gu bilumbi bi Sesu. 11Tumbe bebegitsi be musamu Nyambi bepikilange re mambu me begetu be bambilange mambu megufure besemesinge. 12Tumbe Pyere negurambuge, negwende mbangu gu ngili. Neguvuduge, abandeme negulabe gu ngili ka birendi bi tsande tsi lenge. Agabuge gumbu gi andi negumamange dyambu disevyoge.

Mu nzile Emayise

13Wusye wamosi, bebingitsi be Sesu bebeyi vegari awu bendange gu dimbu dyanengure Emayus dibange gu megwere me beye me kole me mwendu ne Serisalem. 14Ve bendilange, bambilange motsu mesevyoge. 15Ve bambilange, negusosange, Sesu yandi beni bambeme nawu, bendange konge. 16Bemwenange, tumbe gube givave gi betsibigange misu nonge betsatse muyabe. 17Sesu negubivule re «A dyambu gye dinwagwene sosile munzile? Besikeme ne nyuru tsidede.» 18Wumosi vegari awu wanengure Klopas amwagule re «Ndyayu wu gwaguvike watsageni gu Serisalem wusayabi dyambu disevyoge ne tsufu tsitsi?» 19Sesu negukunde bivule re «Dyambu gye?» Bemwambile re «Disevyoge gukyelu Sesu yi Nasarete, yitsibange mubigitsi wune ndure gu mambu motsu me yandi se dyanzange ne me yandi segwambilange, ve wusu Nyambi ne ve wusu batu. 20Neve bivunde bi etu bi bevegitsi be pagu ne bivunde bimosi besemusakile, nonge bekemugomine mu kurusu akufu. 21Dutsibange ne gitu re yandi reguse gobule Iserayel. Tumbe mambu motsu mane mevyogile guke tsufu yireru. 22Negungeze, tumbe dusemame nesi nane be begetu be dibundu di etu. Besegwende mekyele meneni gu pesi. 23Beseragesenu gibindi gi Sesu gu gari ngili beruge gusedubegile tsangu re byanze bibeyi biseberugile bebambile re Sesu ayi monyu. 24Be batu be gilonge gi etu, besegwende gu pesi beragesenu motsu kanevu begetu besebambilile. Tumbe beselabe gibindi.» 25Vane, Sesu negubambile re «Yenu nusagulu nusasingi mu mirime mi enu di bebigitsi benwambile. 26Disenonge re Kirisete akengi nane nesi agwingene gu bundumbe bu andi?» 27Vane, abambile dikengi motsu mambilu gukyelu Kirisete mu bisangumu byotsu bi Nyambi pakile ve gisangumu gi Moyise kwange ne bisangumu bi bebigitsi. 28Ve bevudugile ve kodu gitsagu gi dimbu dibendange, Sesu kuvage gere mutu wagwendi tage. 29Tumbe bemusimbe, bemwambile re «Sikeme bange netu vave wisi kagwidi.» Ayingene gu ndagu, atsagene nawu. 30Negutsambe ve tavuli nawu, abonge pembi, agabusile Nyambi diboti, ayitabule abegabile. 31Vane, misu mawu metsibuge, beyabe re Sesu yinawu. Tumbe yandi atsyemuge ve misu mawu. 32Yawu ne yawu bambesenange re «Ve Sesu dunenzilange musamu Nyambi mu nzile duseyulu gere ruvi dwaluli gu mirime mi etu?»

33Vane ne vane berambuge, begabuge gu Serisalem. Beragesenu digumi di bebingitsi ne mubingitsi wumosi, besobegene ne bebingitsi benzusu. 34Bambilange re «Negungenze Fumu marambuge gu dufu. Simu asemwene.» 35Vane, bebingitsi babeyi yawu beni bambile motsu mevyoge mu nzile, neve beyabile Sesu gigumbi gi atabulile pembi.

Sesu kakwerigitsi ve wusu bebingitsi bandi

36Mbere bekyagwambili, Sesu yandi beni neguruge vegari awu negubambile re «Pembi ne polu yibi nenu.» 37Yawu botsu begangu ne mune wome, beregemange mbare beyabange re balabe ditengu. 38Tumbe Sesu negubambile re «Gye nwaregemini? Gye nune page gu mirime mi enu? 39Gengisanu mekake mami ne byeru bi ami. Negungenze menu mbembi anu. Labanu, dinyuni a sandi ne misoni, a sandi ne bivisi, neve nwanyenini. Menu, nine byoni munongu mosi ne enu.» 40Negubambile nane, aberigitse mekake mandi ne byeru bi andi. 41Neve bebingitsi be Sesu babe bebase ne mugangu, mbere besebetsi gube ne gitu. Bekemamange, Sesu negubambile re «Nune mwe givave gi guye vave?» 42Bemuvege girini gi gisonzi gyangu. 43Agibonge akiye ve misu mawu. 44Vane, negubambile re «Ve nibilange nenu labanu mambu me ninwambilange, motsu me rendu gukyelu ami mu mugage Moyise, mu bisangumu bi bebigitsi ne bisangumu bi nimbu motsu mane nonge melabeni.» 45Vane, abetsibule muru nonge bekulu dikengi motsu merendu mu musamu Nyambi. 46Abambile re «Labanu, direndu re Kirisete Mwobutsi agukenge, agurambuge gu dufu wisi mureru. 47Nonge dulonzi gu dine di andi musamu Nyambi, batu bekukaluse mutsageninu, bitsimbu bi awu biku bunzulu. Dugupakile gu Serisalem kwange ne mu melongu motsu. 48Yenu nu mbeyi tsi mambu motsu mane. 49Menu, nigunutindile di Taye ami anuvangenine. Tumbe yenu banganu gu yadi kwange ve nugubasile ne ndure yi yulu.»

Sesu mapande gu nzambi

50Vane, Sesu bevuduse gu Serisalem abege bebeli ne Betani. Vane asimbule mekake gu yulu, abevege mule. 51Ve abevegilange mwyule apasuge nawu, apande gu nzambi. 52Tumbe yawu negumane mukutemine gu gumudumise, begabuge gu Serisalem ne mugangu neni. 53Bevyosange gigumbi gyotsu gu gari ndagu Nyambi negwimbange, ne gugabusilange Nyambi diboti.

Currently Selected:

Luc 24: SWJ

Highlight

Copy