Maalʉko 16

Azyʉshe hwa Yeesu

(Mataayo 28:1-8; Luuka 24:1-12; Yoohani 20:1-10)

1Lwa lyashila isiku ɨlyɨ Sabaato, ʉMaliya ʉwa hu Magidaala, ʉSaloome nʉ Maliya ʉnyina wa Yoose nʉ Yaakobo ʉnʼdoodo, bhahakala ɨnyemba zya zinunshila shinza huje, bhabhale bhagupotozye ʉmʼvimba gwa Yeesu. 2Isiku ɨlya Pamulʉngʉ nashampwi, bhahabhala hu nkʉngwa ɨya Yeesu. Bhahafiha isanya lwa lihwanda atukule. 3Lwa bhajenda mwi‑idala, bhahanda ayangane huje, “Ɨshi, weenu anza hutefwezye iwe liila pa lyango pa nkʉngwa paala?” 4Iwe liila lyahali ligoosi tee. Lwa bhapalamiiye afishe, bhaheenya pa nkʉngwa, bhahalola iwe liila libhungulusye, lili panshɨnjɨ.

5Lwa bhatʉʉha muuhati mu nkʉngwa, bhahanʼnola ʉnʼsahaala ʉmo ʉyo akwɨte amenda amazelu, akhɨɨye hu lubhazu ʉlwa hu nyoobhe ʉlɨɨlo ʉlwɨ nkʉngwa. Abhashɨ bhaala bhahagunduha tee. 6Ɨpo ʉnʼsahaala ʉla ahabhabhʉʉzya huje, “Mugandi agundushe. Ɨmɨɨnye huje, muhumʼmwanza yʉ Yeesu ʉwa hu Nazaleeti ʉyo bhahanʼkhomelɨɨye pa shikhobheehanyo. Azyʉshɨle, saga alɨɨho ɨpa! Enyi ɨpo bhahanʼgoneleziizye. 7Ɨshi, bhalaji mumʼmʉʉzye ʉPeeteli na bhasundwe abhamwabho huje, ʉYeesu abhatagaliiye abhale hu mukowa ʉgwɨ Galilaaya. Huhuula hwa mwahayihunʼnola nanshi sha‑ahabhabhʉzɨɨzye.”#Bhaazya Maalʉko 14:28. 8Lwa bhʉmvwa ɨsho, bhahanda ayinje hu wooga, na‑aswije. Bhahafuma hwʉnzɨ, bhahasogola pa nkʉngwa paala, ʉhwu bhashɨmbɨla. Saga bhahamʼmʉʉzya ʉmuntu nʉʉmo hu nongwa ya‑aje, bhahogʉʉpe haani.

ɄYeesu ahunʼnoleshela ʉMaliya ʉwa hu Magidaala

(Mataayo 28:9-10; Yoohani 20:11-18)

9ɄYeesu lwa wazyʉha pi‑isiku ɨlya Pamulʉngʉ nashampwi, ahanʼnoleshela nasʉʉti ʉMaliya ʉwa hu Magidaala ʉyo ahamʼmwefwizye amapepo pʉnga (7). 10Wope ahabhala, ahabhabhʉʉzya bhaala bha bhahali peeka nʉ Yeesu sha‑asɨɨle afwe. Mu habhaazyo haala bhahali sha bhali mu zugumizu na‑azonde. 11Ɨpo lwa bhʉmvwa hwa Maliya ʉwa hu Magidaala huje, anʼnolile ʉYeesu mwʉmi lwene, bhahakhaana.

ɄYeesu ahubhaloleshela abhasundwe bhaakwe bhabhɨɨlɨ

(Luuka 24:13-35)

12Isiku liliila, ʉYeesu ahabhaloleshela abhasundwe bhabhɨɨlɨ. Abhasundwe bhaala bhahali mwi‑idala, bhahabhalaga hu vipanga. Bhahapootwa humʼmanye, pɨpo ʉmwene ahalolehaga ali shɨnjɨ lwene. 13Lwa bhamʼmanya, ɨpo bhahaweela hubhabhʉʉzye abhamwabho, leelo abhasundwe ɨbho saga bhahabhɨtɨɨshe.

ɄYeesu ahubhaloleshela abhasundwe bhaakwe

(Mataayo 28:16-20; Luuka 24:36-49; Yoohani 20:19-23; ɨMbombo ɨzya Bhasontwa 1:6-8)

14Hu malishilo, ʉYeesu ahabhaloleshela abhasundwe bhaakwe ishʉmi nʉ weeka bha bhahakhɨɨye peeka, bhahalyanga ɨshalye. ɄYeesu ahabhadaamila hu nongwa yɨ khome wɨ mooyo gaabho, pɨpo bhahakhɨɨne hubhɨɨtɨshe abhamwabho bhaala bha bhahanʼnolile ʉYeesu huje, azyʉshɨle afume hwa bhafwe. 15Ɨpo ahabhabhʉʉzya huje, “Bhalaji mu nsi zyonti, mubhalʉmbɨɨlɨle ɨNongwa ɨNyinza ɨzya huliinɨ abhantu bhonti. 16Ʉmuntu wowonti ʉyo ahwɨtɨha hunʼsʉʉbhɨle ʉNgʉlʉbhɨ na hwozewe, ahayifyʉlwa. Leelo, ʉmuntu wowonti ʉyo akhaana hunʼsʉʉbhɨle ʉNgʉlʉbhɨ, ahayilongwa. 17Abhantu ɨbho bhahwɨtɨha hunʼsʉʉbhɨle ʉNgʉlʉbhɨ, bhahayibhombaga ɨvimanyishizyo ɨvi. Hwi‑ikhone lyanɨ bhahayefwaga amapepo mwa bhantu, bhahayiyangaga hu njango ɨnjenu. 18Hwope nkashele bhahayikhataga ɨnzoha nɨ nyoobhe, awe hwope nkashele bhahayimwelaga ʉkʉʉla, saga vyahayibhombaga nahamo. Bhahayibhɨɨhaga ɨnyoobhe zyabho mwa bhabhinu, bhope bhahayiponaga.”

ɄYeesu abhala hu mwanya

(Luuka 24:50-53; ɨMbombo ɨzya Bhasontwa 1:9-11)

19ɄMwɨnɨ ʉYeesu lwa waamala ayanje nabho, ʉNgʉlʉbhɨ ahamʼmwega abhale hu mwanya. Ahakhala peeka nʉ Ngʉlʉbhɨ alongozye peeka nawo. 20Abhasundwe bhaakwe bhaala bhahasogola paala. Bhahabhala alʉmbɨɨlɨle ɨNongwa ɨNyinza poponti. ɄMwɨnɨ ʉYeesu ahabhapeelaga ikhone ɨlya‑abhombele ɨvimanyishizyo. Shɨnɨɨsho sha‑ahasimishizyaga amazwi ɨgo huje, gɨ lyoli.#16:9-20 Amazwi agɨ mangʼooli ɨga (16:9-20) saga galɨɨho mu nsimbo zimo ɨzyɨ mandɨ ɨzyɨ Shiyunaani.

Currently Selected:

Maalʉko 16: SBK

Highlight

Copy