Maalʉko 14

Ɨnsɨɨbho ɨzya hunʼgoje ʉYeesu

(Mataayo 26:1-5; Luuka 22:1-2; Yoohani 11:45-53)

1Zyahasyalile ɨnsiku zibhɨɨlɨ lwene huje, shibhe shikulukulu shɨ Paasaka#14:1 shikulukulu shɨ Paasaka Bhaazya izwi Paasaka hu Ngalulanyo ɨyɨ Mazwi aMajenu hu malishilo wɨ shitaabu ɨshi. nɨ shikulukulu ɨshɨ ntogito zya saga nsafu.#14:1 shikulukulu ɨshɨ ntogito zya saga nsafu Bhaazya izwi Paasaka hu Ngalulanyo ɨyɨ Mazwi aMajenu hu malishilo wɨ shitaabu ɨshi. Abhalongozi bha bhasayi bha Ngʉlʉbhɨ na bhamanyizyi abhɨ ndajizyo zya Moose bhahanzaga idala ɨlya humʼmwʉbhɨle ʉYeesu huje, bhanʼkhate hu mfiso, nka bhanʼnonje na hunʼgoje. 2Leelo, bhahayanga bhahaga, “Nasʉʉti tileshe ɨshikulukulu shishile, nka tinʼkhataje, abhantu bhasahaleete ibho.”

Ʉnʼshɨ ʉmo ahumʼpotozya ʉYeesu ɨnyemba

(Mataayo 26:6-13; Yoohani 12:1-8)

3ɄYeesu ahali hu shipanga ɨshɨ Besaniya, mu nyumba ɨya Siimoni ʉyo ahamʼponiizye amakete. Ʉhwo ahakhɨɨye, ahalyanga ɨshalye. Ahɨnza ʉnʼshɨ ʉmo wa‑ahali na hasupa ahinza ɨho hamemile ɨnyemba zya saga zisangɨɨnywe na hantu hohonti. Ɨnyemba ɨzyo bhahagaga naado. Ɨnyemba ziila zyahali zyɨ mpɨɨya ɨngoosi, zya zyahanunshilaga shinza. Ʉnʼshɨ ʉla ahabazula ahalomu hɨ nsupa, ahamʼpotozya ʉYeesu pi‑itwe abhonesye ɨtogo. 4Abhantu bhamo bha bhahali mu nyumba muula, bhahaviitwa. Bhahanda ayanje bheene na bheene huje, “Yeenu anangaanya ɨnyemba ɨnyinza nanshi ɨzi? 5Ɨnyemba ɨzi zyahakhondɨɨye akaziwe hu dinaali ashile ɨmya zitaatu#14:5 Ɨdinaali ɨmya zitaatu zyahalɨngaanaga nʉ mʼposheelo ʉgwa humʼposheezye ʉmuntu hu mwaha gweka. na hubhapeele abhapɨɨna ɨmpɨɨya zya bhaakazya.” Bhahanʼnonganyaaga haani ʉnʼshɨ ʉla. 6Leelo, ʉYeesu ahaga, “Nʼneshi, yeenu muhunʼtaamya? Ɨli ʉnʼshɨ ʉnʉ lya‑abhombile hwaliinɨ, linza haani. 7Abhapɨɨna muli nabho humwenyu ɨnsiku zyonti. Mubhajiiye hubhabhombele ɨnyinza ahabhaazyo hohonti ha mugɨɨne. Leelo anɨ, saga nahayibha peeka naamwɨ ɨnsiku zyonti. 8Ʉnʼshɨ ʉnʉ abhombile lya‑abhajiiye. Atalile hugupotozye ʉmʼbɨlɨ gwanɨ ɨnyemba ɨzi alɨngaanye asyɨlwe hwanɨ. 9Lyoli ɨhubhabhʉʉzya huje, mu nsi zyonti, poponti abhantu pa bhahayilʉmbɨlɨlaga ɨNongwa ɨNyinza ɨzya huliinɨ, bhahayiyangaga ɨli lya‑abhombile ʉnʼshɨ ʉnʉ, ahumʼmwizushe.”

ɄYuuda Sikalyoti ahwɨtɨha hunʼsambushile ʉYeesu

(Mataayo 26:14-16; Luuka 22:3-6)

10Ɨpo ʉYuuda Sikalyoti ʉmo mwa bhasundwe bhaala ishʉmi na bhabhɨɨlɨ abha Yeesu, ahabhala hunʼneneelezye hwa bhalongozi bha bhasayi bha Ngʉlʉbhɨ huje, abhalanje idala ɨlya hunʼkhate ʉYeesu. 11Abhalongozi bha bhasayi ɨbho lwa bhʉmvwa ɨnongwa ɨzyo, bhahasha haani. Bhahɨtɨɨhana nawo huje, bhanza humʼpeele ɨmpɨɨya. ɄYuuda nka‑ahanda ahwanze idala ɨlinza ɨlya hunʼsambushile mu habhaazyo ha hakhondɨɨye.

ɄYeesu alya ɨshalye ɨshɨ Paasaka na bhasundwe bhaakwe

(Mataayo 26:17-25; Luuka 22:7-14, 21-23; Yoohani 13:21-30)

12Lyahali lisiku lya hwande ɨlyɨ shikulukulu ɨshɨ ntogito zya saga nsafu. Nantele, hahali habhaazyo ɨho abhantu bhahabhoolaga ɨnyaana ngoole#14:12 ɨnyaana ngoole Bhaazya izwi Nyaana ngoole hu Ngalulanyo ɨyɨ Mazwi aMajenu hu malishilo wɨ shitaabu ɨshi. ɨyɨ Paasaka. Abhasundwe bha Yeesu nka bhahamʼmʉzɨɨlɨzya bhahaga, “Ɨshi, ʉhwanza aje, tibhale tiʼlɨnganyizizye pooshi apa‑alɨɨle ɨshalye ɨshɨ shikulukulu ɨshɨ Paasaka?” 13ɄYeesu ahabhasonteelezya abhasundwe bhabhɨɨlɨ, ahabhabhʉʉzya huje, “Bhalaji mwi‑ibooma. Mubhala‑akhomaane nʉ nʼnume ʉmo wa‑anyemuuye ɨnsonta ɨyɨ mɨnzɨ, mulondolezyaje huula hwa‑abhala. 14Pa nyumba ɨla ya‑abhala‑atʉʉshe, mubhale mumʼmʉʉzye ʉmwanɨɨsho nyumba huje, ‘ɄMʼmanyizyi abhʉzɨɨlɨzya huje, “Ɨshidampa shɨ‑ɨmbala‑akhale alɨɨle ɨshalye ɨshɨ Paasaka peeka na bhasundwe bhaanɨ shili hwi?” ’ 15Ɨpo ʉmwanɨɨsho nyumba yʉʉyo abhala hubhalanje ɨshidampa ɨshigoosi sha shili mu nyumba ɨnjeleehanye, shilɨngɨɨnywe nzɨɨla. Muula mwa mubhale, mulɨngaanye huje, tilɨɨle ɨshalye ɨshɨ Paasaka.” 16Abhasundwe bhaala bhahasogola, bhahabhala, bhahatʉʉha mwi‑ibooma ɨlyɨ Yelusaleemu. Bhahazyaga zyonti zili shishiila nanshi ʉYeesu sha‑ahabhabhʉzɨɨzye, bhahalɨngaanya ɨshalye ɨshɨ Paasaka.#Bhaazya Afume 12:3-11.

17Lwa hwabha lyabheela, ʉYeesu ahafiha pa nyumba ɨla peeka na bhasundwe bhaakwe bhaala ishʉmi na bhabhɨɨlɨ. 18Lwa bhalya, ʉYeesu ahayanga huje, “Lyoli ɨhubhabhʉʉzya huje ʉmo mwaliimwɨ wa‑alya peeka naanɨ ɨpa, ahayihunsambushila hu bhalʉgʉ.”

19Abhasundwe bhaakwe bhahanda azugumile. Ahanda weeka weeka humʼmʉzɨɨlɨzye ʉYeesu huje, “Bhʉlɨ, nɨɨnɨ ɨmbala husambushile?”

20ɄYeesu ahabhabhʉʉzya huje, “Ʉwamwenyu ʉmo mwaliimwɨ ishʉmi na bhabhɨɨlɨ, ʉyo atobheezya ɨntogito peeka naanɨ mu masʉnyu ʉmu, anza hunsambushile. 21Anɨ nɨMwana wa Muntu ɨmbala‑afwe, shiila ɨNsimbo ɨMfinjile sha ziyanga. Leelo lwakwe ʉmuntu ʉyo wa‑abhala hunsambushile anɨ nɨMwana wa Muntu! Yahali hwashi huje, ʉmuntu ʉyo nkashele saga wapapwaga lwonti.”

ƗShalye ɨShifinjile

(Mataayo 26:26-30; Luuka 22:14-20; 1 aBhakolinto 11:23-25)

22Lwa bhali alye, ʉYeesu aheega ɨntogito, ahanʼsalifya ʉNgʉlʉbhɨ, ahayimensulanya, ahabhapeela abhasundwe bhaakwe, ahaga, “Eji, mulye, ʉgu gwʉ mʼbɨlɨ gwanɨ.” 23Nantele, aheega ʉlupɨndɨ ʉlwɨ divaayi, ahasalifya hwa Ngʉlʉbhɨ, ahabhapeela abhasundwe bhaakwe, bhonti bhahamwelela mu lupɨndɨ ʉlwo. 24Ahabhabhʉʉzya huje, “Ɨli lidanda lyanɨ lya lihwitiha hu nongwa ya bhantu abhinji, ɨlyo lisimishizya ilagano#14:24 ilagano Bhaazya izwi Ilagano hu Ngalulanyo ɨyɨ Mazwi aMajenu hu malishilo wɨ shitaabu ɨshi. lya Ngʉlʉbhɨ na bhantu bhaakwe. 25Lyoli ɨhubhabhʉʉzya huje, saga ɨmbala‑amwele lwonti ɨdivaayi, afishe pi‑isiku liila lya nahayimwela ɨdivaayi ɨmpya mu wumwɨnɨ ʉwa Ngʉlʉbhɨ.” 26Ɨpo bhahateela.#14:26 bhahateela Ahabhaazyo ha bhaliiye ɨshalye ɨshɨ Paasaka, aBhayahuudi bhahali na miiho aga‑ateele ɨNsalifyo 113-118. Lwa bhaamala ateele, bhahasogola, bhahabhala hwi‑igamba ɨlyɨ Mizeyituuni.

ɄYeesu akuwa huje, ʉPeeteli abhala hunʼkhaane hataatu

(Mataayo 26:31-35; Luuka 22:31-34; Yoohani 13:36-38)

27Lwa bhali mwi‑idala, ʉYeesu ahabhabhʉʉzya abhasundwe bhaakwe huje, “Mwenti amwɨ mubhala hunshɨmbɨle, mubhala hundeshe nɨmwene hwa gaala ga ganda afumile. Gabhala‑abhe nanshi ʉNgʉlʉbhɨ sha‑ahayanjile mu Nsimbo ɨMfinjile huje, ‘Nahayihunʼgoga ʉnʼdiimi, zyope ɨngoole zyakwe zyahayinyampaana.’#Bhaazya Zakaliya 13:7. 28Leelo, lwa nazyʉha, nahayihubhatagaalila abhale hu mukowa ʉgwɨ Galilaaya.”

29Ɨpo ʉPeeteli ahamʼmʉʉzya huje, “Hwope nkashele abhamwetu bhonti bhaʼshɨmbɨle, leelo anɨ saga nahayihushɨmbɨla huje ɨʼleshe.” 30ɄYeesu ahamʼmʉʉzya ahaga, “Lyoli ɨhubhʉʉzya ɨnjiga, ʉsiku ʉwa sanyʉʉnʉ, ɨhanda shɨ‑ɨsɨɨle agʉgʉlɨɨje habhɨɨlɨ, ʉnza‑abhe wahaana anɨ hataatu huje saga ʉmɨɨnye anɨ.” 31Leelo, ʉPeeteli ahakhajilizyaga haani huje, “Hwope nkashele ɨbhe ya‑afwe peeka naawe, hwomo nka hufwe, saga nahayihukhaana aawe nka lumo.” Bhope abhasundwe bhonti abhamwabho bhahayanga shɨɨsho.

ɄYeesu apuuta mu Getisemaani

(Mataayo 26:36-46; Luuka 22:39-46)

32Lwa bhaafiha hwi‑igamba ɨlyɨ Mizeyituuni, bhahabhala hwi‑itotoobhe lya bhahagaga Getisemaani. ɄYeesu ahabhabhʉʉzya abhasundwe bhaakwe huje, “Mukhale pɨɨpa, mu habhaazyo haala anɨ hɨ‑ɨpuuta.” 33Ahamʼmwega ʉPeeteli, ʉYaakobo nʉ Yoohani, ahabhala nabho apatali hashe, ahanda azugumile haani na hweleele ʉmwoyo. 34Ahabhabhʉʉzya huje, “Ʉmwoyo gwanɨ guzugumiiye apululile afwe. Amwɨ mukhale pɨɨpa, mubhe maaso.” 35ɄYeesu ahasejeela pilongolela hashe, ahasugamila pa nsi na‑abhʉndame. Ahapuutaga huje, “Nkashele yɨtɨhanaga, ɨnsahashilile mu habhaazyo ɨha ahɨ mayɨmba.” 36Nantele, ahayanga huje, “Daada, aawe hwaliiwe zyonti zibhombeha. Ɨhulaabha ʉnefwezye ʉlupɨndɨ ʉlwu ʉlwɨ mayɨmba. Leelo, zigandi abhombeshe ziila anɨ zyɨ‑ɨhwanza lwonti, lyoli zibhombeshe ziila aawe zyʉ‑ʉhwanza.”

37Lwa waweela hwa bhasundwe bhaakwe bhataatu bhaala, ahabhaaga bhagonile ʉtulo. Ahamʼmʉʉzya ʉPeeteli huje, “Siimoni, ʉgonile ʉtulo? Wapootwa abhe maaso nkamba lisaala lyeka lwene?” 38Ɨpo ahabhabhʉʉzya huje, “Mubhanje maaso na‑apuute huje, mugandi amenwe nɨ njelo. Amooyo geenyu gasʉngwa abhombe shinza, leelo saga muli na maha.” 39Lwa waamala ayanje nabho, ʉYeesu ahasogola, ahabhala apuute panshɨnjɨ nantele, ahaweelela ayanje amazwi gagaala. 40Lwa‑aweela ʉlwa bhɨɨlɨ, ahabhaaga abhasundwe bhaakwe bhagonile ʉtulo nantele, pɨpo bhahakhɨɨtwe nʉ tulo haani. Lwa wabhadaamusya, saga bhahali nɨ lya humʼmwamule nka limo.

41Lwa wɨnza nantele ʉlwa taatu, ahabhabhʉʉzya abhasundwe bhaakwe huje, “Muli sha mugonile ʉtulo? Ɨshi, mwagona huyiiye. Ahabhaazyo ahɨ mayɨmba gaanɨ hafishile. Ɨshi, anɨ nɨMwana wa Muntu ɨnza‑akhatwe na‑abhɨɨhwe mu makhono ga bhabhomba mbiibhi. 42Ɨshi bhʉʉshi, saali! Enya, ʉmuntu ʉyo anza humbɨɨshe mu makhono ga bhalʉgʉ ali mu pɨɨpɨ, ahwɨnza.”

ɄYeesu akhatwa

(Mataayo 26:47-56; Luuka 22:47-53; Yoohani 18:3-11)

43Mu habhaazyo hahaala ʉYeesu lwa‑ali sha‑ayanga ɨzyo, ʉYuuda, ʉmo mwa bhaala ishʉmi na bhabhɨɨlɨ, ahafiha na bhantu abhinji bha bhakhɨɨte amamaajɨ agɨ lʉgʉ nɨ nduugu mu nyoobhe. Abhantu ɨbho bhahafumile hwa bhalongozi bha bhasayi bha Ngʉlʉbhɨ, abhamanyizyi abhɨ ndajizyo zya Moose na bhagoosi. 44ɄYuuda wa‑ahunʼsambushila, ahabhapeelile nzɨɨla ɨshimanyishizyo huje, “Ʉla wa nahayihunʼnyaayila, manyaji huje ya yʉʉyo mwahɨnzaje hunʼkhate na‑asogole nawo, mwahanʼdiimaje.”

45Ɨpo ʉYuuda lwa waafiha lwene paala, ahalongola, ahabhala hwa Yeesu pa‑ahali, ahayanga huje, “Wee Mʼmanyizyi!”, ahanʼnyaayila. 46Ɨpo abhantu bhaala bhahanʼkhata ʉYeesu. 47Leelo, ʉmuntu ʉmo mwa bhaala bha bhahɨmɨlɨɨye paala peeka nʉ Yeesu, ahakʉʉla imaajɨ ɨlyɨ lʉgʉ, ahanʼkhoma na hunʼdumule ikutu ʉnʼkalwe wa nʼsayi ʉnʼgoosi ʉwa Ngʉlʉbhɨ.

48ɄYeesu ahabhabhʉʉzya abhantu bhaala huje, “Yeenu leelo mwɨnzɨle na mamaajɨ agɨ lʉgʉ nɨ nduugu huje, muhate anɨ, nanshi abhantu bha bhabhala hunʼkhate ʉmuntu wa‑ali nʼnyambuda? 49Wiila lwene nahali peeka naamwɨ, nahamanyizyaga mu lubhaga lwɨ nyumba ɨmfinjile ɨya Ngʉlʉbhɨ, leelo saga mwahahataga. Ɨzi zyonti zyabhombeha nanshi sha zisimbwilwe mu Nsimbo ɨMfinjile huje, zibhombeshe.”#Bhaazya Maalʉko 14:27; Zakaliya 13:7.

50Ɨpo abhasundwe bhaakwe bhonti ishʉmi nʉ weeka bhahanʼneha, bhahashɨmbɨla. 51Hwahali nʉ nʼsahaala ʉmo wa‑ahali akwɨte igolole lwene, ahamʼmɨnjɨlɨzyaga ʉYeesu. Wope bhahajela huje, bhanʼkhate. 52Leelo, ʉmwene ahapulumuha mu nyoobhe, ahabhaleshela igolole lyakwe, ahashɨmbɨla ɨnyilo sha‑ali weleele.

Abhalongozi bha Bhayahuudi bhahunʼtaaka ʉYeesu

(Mataayo 26:57-68; Luuka 22:54-55, 63-71; Yoohani 18:13-14, 19-24)

53Ɨpo abhantu bhaala bhahanʼtwala ʉYeesu hwa nʼsayi ʉnʼgoosi ʉwa Ngʉlʉbhɨ. Bhahabhʉngaana paala abhalongozi bhonti bha bhasayi bha Ngʉlʉbhɨ, abhagoosi na bhamanyizyi abhɨ ndajizyo zya Moose. 54ɄPeeteli ahabha ahumʼmɨnjɨɨlɨzya ʉYeesu sha hutali lwene. Ahabhala, ahatʉʉha muuhati mu lubhʉngʉlʉ lwa nʼsayi ʉnʼgoosi. Ahakhala muula peeka na bhakolokolooni bha nʼsayi ʉnʼgoosi, ahabha ahwota ʉmwoto pa lubhʉngʉlʉ.

55Abhalongozi bha bhasayi bha Ngʉlʉbhɨ ni‑ikoloti#14:55 ni‑ikoloti Bhaazya izwi Ikoloti hu Ngalulanyo ɨyɨ Mazwi aMajenu hu malishilo wɨ shitaabu ɨshi. lyonti bhahanda ahwanze ʉsimishizi ʉwa hunʼtaakile ʉYeesu huje, bhanʼnonje na hunʼgoje. Leelo, saga bhahawaagaga ʉsimishizi nawumo. 56Abhantu abhinji bhahafumyaga ʉsimishizi ʉwi‑ilenga hunʼtaake ʉYeesu, leelo ʉsimishizi waabho wahaleganaga. 57Nantele, abhantu abhamwabho bhamo bhahɨmɨɨlɨla, bhahafumyaga ʉsimishizi ʉwi‑ilenga. Bhahayangaga huje, 58“Atɨ tahamʼmwʉmvwɨzye tɨɨtɨ ʉmuntu ʉnʉ lwa‑ayanga huje, ‘Anɨ nahayibhugulanya ɨnyumba ɨmfinjile ɨya Ngʉlʉbhɨ ɨnɨ abhantu ya bhahazenjile. Nantele, nahayizenga ɨyɨnjɨ hu nsiku zitaatu lwene. Ɨnyumba ɨyo saga yahayizengwa na bhantu.’ ” 59Hwope ɨsho, ʉsimishizi waabho wahaleganaga.

60Ɨpo ʉnʼsayi ʉnʼgoosi ahɨmɨɨlɨla pitagaalila pi‑ikoloti. Ahamʼmʉzɨɨlɨzya ʉYeesu huje, “Wɨlɨ, saga ʉhwamula nka limo? Wɨlɨ, saga ʉlola huje, abhantu bhonti ɨbha bhafumya ʉsimishizi ʉwa hutaake aawe?” 61Leelo, ʉYeesu ahapʉʉma myɨ, saga ahayanga izwi nka limo. Ʉnʼsayi ʉnʼgoosi ahonjela humʼmʉzɨɨlɨzye huje, “Bhʉlɨ, aawe we Mʼfyʉli, ʉMwana wa Ngʉlʉbhɨ ʉmʼfinjile?”

62ɄYeesu ahaamula ahaga, “Ena! Anɨ nɨɨnɨ. Nantele, amwɨ mwahayihundola anɨ nɨMwana wa Muntu ɨhɨɨye peeka nʉ Ngʉlʉbhɨ ʉwi‑ikhone lyonti,#Bhaazya ɨNsalifyo 110:1. ɨhwiha hu mabhɨngo aga hu mwanya.”#Bhaazya Daniyeeli 7:13.

63Ɨpo ʉnʼsayi ʉnʼgoosi ahazembula igolole lyakwe alolesye huje avitiilwe, ahaga, “Tihubhanza bhaashi abhasimishizi nantele? 64Mwʉmvwɨzye mwɨmwɨ sha‑ahunʼshenta ʉNgʉlʉbhɨ! Ɨshi amwɨ, muyiga bhʉlɨ?” Ikoloti lyonti lyahayanga lyahaga, “Ʉnʉ akhondɨɨye huje, tinʼgoje.”

65Ɨpo bhamo bhahanda hunʼswɨlɨle amatɨ, hunʼgubishe hu maaso na humʼbulinje nɨ mbuli. Bhahamʼmʉʉzya bhahaga, “Kuwa huje weenu wa‑aʼkhomile!” Bhope abhakolokolooni bha bhahali paala bhahamʼmwega, bhahanʼkhoma.

ɄPeeteli ahunʼkhaana ʉYeesu

(Mataayo 26:69-75; Luuka 22:56-62; Yoohani 18:15-18, 25-27)

66Mu habhaazyo ɨho honti, ʉPeeteli ahali pa lubhʉngʉlʉ paala. Ɨpo ahɨnza ʉnʼkalwe ʉmo ʉnʼnɨndu ʉwa nʼsayi ʉnʼgoosi ʉwa Ngʉlʉbhɨ. 67Ahanʼnola ʉPeeteli ahwota ʉmwoto, ahamʼmwina. Ahamʼmʉʉzya huje, “Nawe wahali peeka nʉ Yeesu ʉwa hu Nazaleeti.”

68Leelo, ʉPeeteli ahakhaana ahaga, “Anɨ saga ɨmʼmɨɨnye. Saga ɨhuzyaganya ɨzyo zyʉ‑ʉyanga lwonti!” Ahabhala pa lyango ʉgwɨ lubhaga. Ahabhaazyo hahaala, ɨhanda yahagʉgʉlɨɨga.

69Ʉnʼnɨndu ʉnʼkalwe ʉla ahanʼnola nantele ʉPeeteli, ahanda hubhabhʉʉzye abhantu bha bhahɨmɨlɨɨye paala huje, “Ʉmuntu ʉnʉ wope ali peeka nabho.” 70Leelo, ʉPeeteli ahakhaana nantele. Ahabhaazyo hahashila hashe lwene, abhantu bhaala bha bhahɨmɨlɨɨye paala, bhope bhahamʼmʉʉzya ʉPeeteli bhahaga, “Lyoli aawe ʉli peeka nabho, pɨpo nawe ʉfuma hu mukowa ʉgwɨ Galilaaya.”

71Leelo, ʉPeeteli ahayɨɨgaga mwene na‑alape huje, “Ʉmuntu ʉnʉ wa muhunʼnyanga, anɨ saga ɨmʼmɨɨnye.” 72Pɨnɨɨpo ɨhanda yahagʉgʉlɨɨga ʉlwa bhɨɨlɨ. Mu habhaazyo ɨho, ʉPeeteli ahiizuha izwi lya Yeesu lya‑ahamʼmʉzɨɨzye huje, “Ɨhanda shɨ‑ɨsɨɨle agʉgʉlɨɨje ʉlwa bhɨɨlɨ, ʉnza‑abhe wahaana hataatu.” ɄPeeteli lwa wasɨɨbha ɨzyo, ahalila, ahiisya amansozi gaminji.

Currently Selected:

Maalʉko 14: SBK

Highlight

Copy