Maalʉko 12

Ɨshifwani ɨsha bhalimi abhabhiibhi

(Mataayo 21:33-46; Luuka 20:9-19)

1ɄYeesu ahanda ayanje na bhalongozi bhaala bha Bhayahuudi hu vifwani. Ahayanga huje, “Hwahali nʉ muntu ʉmo wa‑ahalimile ʉnʼgʉnda ʉgwɨ zabiibu.#12:1 Ʉnʼgʉnda ʉgwɨ zabiibu shifwani sha bhantu bha Ngʉlʉbhɨ, hwa huje aBhaizilaeeli. Bhaazya Yesaaya 5:1-7. Ahazyʉngʉʉzya ʉlubhaga munshɨnjɨ, ahabana ilɨndɨ ɨlya‑asʉʉyɨle ɨzabiibu ziila. Ahazenga ɨshidunku ɨshitali#12:1 Ɨshidunku ɨshitali shahali shiwulunga sha bhahazenjɨɨye amawe, ʉtali waakwe wahali nyaayo 4.5, ʉwaazi wahali nyaayo 2. Pa mwanya pahali nɨ sheegu sha bhahatimiiye isole. Ʉnʼnɨndɨɨlɨli ahakhalaga pa nzunda atandɨɨle abhiibha, ɨhanu nɨ nyonyi. ɨsha hwenyeelezye mu nʼgʉnda. Ahapasya#12:1 Ahapasya Apasye hwa Bhayahuudi saga hulɨngaana na‑apasye hwa Bhasafwa. Abheene nkashele ʉmuntu apasiizye ʉnʼgʉnda, abhalimi ɨbho bhahagabhanaga nʉ mwanɨɨsho nʼgʉnda ɨviyabho vya bhahalimile afume mu nʼgʉnda guula. hwa bhalimi, ahabhabhɨɨha huje, bhalɨndɨlɨlaje na hwenyeelezye ɨzabiibu ziila aje, nkashele zyela, bhahagabhanaje. Ʉmwene ahashʉʉla, ahabhala hu nsi ɨyɨnjɨ ɨya hutali. 2Ahabhaazyo aha‑atʉngʉle ɨzabiibu hahafiha, ahanʼsonteelezya ʉnʼkalwe waakwe hwa bhalimi bhaala huje, bhamʼpeele ɨzabiibu ɨzya mwene afume mu nʼgʉnda gwakwe, nanshi sha bhahɨtɨhɨɨne. 3Leelo, abhalimi bhaala bhahanʼkhata ʉnʼkalwe waakwe ʉla, bhahanʼkhoma na humʼmwezye makhoono hwa mwɨnɨ waakwe. 4Ʉmwanɨɨsho nʼgʉnda ahanʼsonteelezya nantele ʉnʼkalwe waakwe ʉwamwabho hwa bhalimi bhaala. Wope bhahanʼkhoma na humʼvwalazye shaaha mwi‑itwe, na hunʼsʉfwanye. 5Ahanʼsonteelezya ʉnʼkalwe waakwe ʉwamwabho, wope abhalimi bhaala bhahanʼgoga. Ahabhasonteleziizye abhakalwe bhaakwe abhamwabho abhinji. Abhalimi bhaala bhahabhakhoma, bhamo bhahabhagoga. 6Ʉmwanɨɨsho nʼgʉnda ahasagala nʉ muntu weeka, ya‑ahali mwana waakwe ʉnʼkʉndwe. Ahanʼsonteelezya hwa bhalimi bhaala hu malishilo, ahasɨɨbha huje, ‘Bhanza‑abhe nɨ nshɨnshɨ hwa mwana waanɨ.’

7Leelo lwa waafiha, abhalimi bhaala bhahajeehana bheene bhahaga, ‘Ʉnʉ yʉ nʼgaali wɨ nʼgʉnda ʉgu. Ɨshi, ɨnzaji tinʼgoje. Ɨngaali zyakwe ɨzyɨ nʼgʉnda ʉgu nka zibhe zyetu.’ 8Ɨpo bhahanʼkhata, bhahanʼgoga, bhahanʼtaaga hwʉnzɨ yɨ nʼgʉnda.”

9Ɨpo ʉYeesu ahabhabhʉzɨɨlɨzya ahaga, “Ɨshi ʉmwanɨɨsho nʼgʉnda ʉyo ahayibhomba yeenu? Ahayɨnza, ahayihubhagoga abhalimi bhaala. Ʉnʼgʉnda guula ʉgwɨ zabiibu ahayihubhapasya abhalimi abhanjɨ. 10Saga muzisaaga ɨNsimbo ɨMfinjile ɨzi? Ziyiga,

‘Iwe lya bhahalikhɨɨne abhazenji abhɨ nyumba,#12:10 Iwe lya bhahalikhɨɨne abhazenji abhɨ nyumba Iwe ɨli yʉ Yeesu yʉʉyo.

lyɨlyo lya lyabha liwe linza ɨlya pa mpɨnga#12:10 Enya Luuka 20:17, ɨshifwani ɨshi‑iwe ɨlya pa mpɨnga.

lya linyʉmʉʉye ɨnyumba yonti.

11ɄMwɨnɨ ʉNgʉlʉbhɨ ya yʉʉyo agabhombile ɨga,

gope gaswijizya huliitɨ.’ ”#Bhaazya ɨNsalifyo 118:22-23.

12Ɨpo abhalongozi bha bhasayi bha Ngʉlʉbhɨ, abhamanyizyi abhɨ ndajizyo zya Moose na bhagoosi abhanjɨ bha Bhayahuudi bhahamanya lwene huje, ɨshifwani shiila shihubhayanga bhɨɨbho. Ɨpo bhahanzaga idala ɨlya hunʼkhate, leelo bhahoogopa ɨmpʉga ya bhantu, bhahaleha, bhahasogola.

Asombe ɨsonko hwa mwɨnɨ ʉnʼgoosi ʉKayisali

(Mataayo 22:15-22; Luuka 20:20-26)

13Ɨpo abhagoosi bha Bhayahuudi bhahabhasonteelezya aBhafalisaayo bhamo na bhaavwi bha mwɨnɨ ʉHeloode ʉAntipa huje, bhamʼmwʉbhɨle ʉYeesu alɨngaane na mazwi gaakwe yʉʉyo. 14Bhahamʼmalila ʉYeesu, bhahamʼmʉʉzya bhahaga, “Wee Mʼmanyizyi! Timɨɨnye huje, zyonti zyʉ‑ʉyanga zyɨ lyoli. Aawe saga ʉsaaga ʉgoosi wɨ mbombo ya muntu, saga nahamo hwaliiwe. Hu lyoli ʉmanyizya idala lya Ngʉlʉbhɨ. Bhʉlɨ, tihwanziwa asombe ɨsonko hwa mwɨnɨ ʉnʼgoosi ʉKayisali?#12:14 ʉKayisali Bhaazya izwi Kayisali hu Ngalulanyo ɨyɨ Mazwi aMajenu hu malishilo wɨ shitaabu ɨshi. Tisombaje awe tigandi asombe?”#12:14 ABhafalisaayo bhahasɨɨbhaga huje, bhanʼtejile ʉYeesu. Nkashele wayangaga huje, shinza asombe ɨsonko hwa mwɨnɨ ʉnʼgoosi ʉKayisali, wabhanga akhaanana nɨ ndajizyo zya Bhayahuudi zya zikhaana abhantu asombe ɨsonko hwa bhalʉgʉ. Lyɨlyo lyɨnzaga hubhabhɨɨshe aBhayahuudi abhinji bhaleshe humʼmɨnjɨɨlɨzye. Nkashele wayangaga huje, shibhiibhi asombe ɨsonko, abhantu bha bhahwɨtɨɨhana nɨ ndajizyo zya Bhaluumi, bhɨnzaga humʼmʉʉzye ʉnʼgoosi wa Bhaluumi huje, anʼkʉnje ʉYeesu mu hoobhe. 15Leelo, ʉYeesu ahamɨɨnye ʉgulugulu waabho, ahabhabhʉʉzya huje, “Muhunjela yeenu leelo? Ndeeteli ɨdinaali,#12:15 Ɨdinaali yahali mpɨɨya ya Bhaluumi. Nantele ɨmpɨɨya ɨnɨ nyeene yahabhombehaga asombe ɨsonko hwa bheene. Ɨdinaali yeeka yahalɨngaanaga nʉ mʼposheelo ʉgwa humʼposheezye ʉmuntu hwi‑isiku lyeka. ɨnjeenye!” 16Ɨpo bhahanʼtwalila, ahabhabhʉzɨɨlɨzya huje, “Ɨsheeni sha muntu wa‑ali pa mpɨɨya ɨyo, sha naanu? Nantele, itaawa ɨli lya naanu?” Bhahamʼmwamula bhahaga, “Vya mwɨnɨ ʉnʼgoosi ʉKayisali yʉʉyo.” 17ɄYeesu ahabhabhʉʉzya huje, “Ɨshi, ɨvintu vya Kayisali mumʼpeelaje ʉKayisali, nɨ vya Ngʉlʉbhɨ mumʼpeelaje ʉNgʉlʉbhɨ.” Bhonti bhahanʼswiga haani.

Azyʉshe hwa bhafwe

(Mataayo 22:23-33; Luuka 20:27-40)

18Hwahali nɨ shipʉga shimo ɨsha Bhayahuudi sha bhahagaga Bhasadukaayo.#12:18 Bhasadukaayo Bhaazya izwi Bhasadukaayo hu Ngalulanyo ɨyɨ Mazwi aMajenu hu malishilo wɨ shitaabu ɨshi. Abheene bhahagaga nahumo azyʉshe hwa bhafwe. Isiku limo, bhamo mwɨ‑ɨbho bhahabhala hwa Yeesu, bhahamʼmʉzɨɨlɨzya bhahaga, 19“Wee Mʼmanyizyi! Ʉnʼkuwi ʉMoose ahatilajiziizye huje, ‘Ʉmuntu nkashele waafwa na hunʼneshe ʉnʼshɨ waakwe sinta apaape ʉmwana, ʉholo anʼgaalaje ʉmʼfwɨle ʉla huje, amʼpaapile abhaana ʉholo waakwe wa‑ahafwiye.’#Bhaazya ɨNyiizuho 25:5-10. 20Ɨshi, hwahali na bhalume pʉnga (7) bha bhahali bhanakwabho. Ʉwa hwande aheega ʉnʼshɨ, leelo ahafwa sha‑asɨɨle apaape ʉmwana nka weeka. 21Ʉwa bhɨɨlɨ ahanʼgaala ʉnʼshɨ ʉla, leelo wope ahafwa sinta aleshe ʉmwana nka weeka. Ʉwa taatu zyahabha shɨnɨɨsho. 22Ʉla ya‑ahamʼmwejile peeka na bhaala nʼtanda bha bhahanʼgaalile ʉnʼshɨ ʉla, bhonti bhahafwiye, saga bhahaleshile ʉmwana nka weeka. Hu malishilo, ʉnʼshɨ ʉla wope ahafwa. 23Ɨshi tibhʉʉzye, isiku liila abhantu lwa bhahayizyʉha, ʉnʼshɨ ʉyo ahayibha nʼshɨ wa naanu? Tibhʉzɨɨlɨzya ɨsho hu nongwa ya‑aje, ʉnʼshɨ ʉla ahegwilwe na bhalume bhaala bhonti pʉnga (7).”

24ɄYeesu ahabhabhʉʉzya ahaga, “Amwɨ muteejile, pɨpo saga muzimɨɨnye ɨNsimbo ɨMfinjile, ni‑ikhone lya Ngʉlʉbhɨ lyope saga mulimɨɨnye lwonti. 25Pi‑isiku abhafwe lwa bhahayizyʉha, saga bhahayeega awe ahwegwe lwonti. Lyoli bhahayibha nanshi abhantumi abha hu mwanya. 26Leelo, lyoli huje, abhantu bha bhafwiye, bhazyʉha. Saga mubhaziizye mu shitaabu sha Moose, ʉNgʉlʉbhɨ sha‑ahamʼmʉzɨɨzye paala pa hatatango lwa hahaahaga ʉmwoto? Paala, ʉNgʉlʉbhɨ ahamʼmʉzɨɨzye ʉMoose ahaga, ‘Anɨ ɨndi Ngʉlʉbhɨ wa Abulahaamu,#12:26 Abulahaamu Bhaazya izwi Abulahaamu hu Ngalulanyo ɨyɨ Mazwi aMajenu hu malishilo wɨ shitaabu ɨshi. ʉwa Isaaka nʉ wa Yaakobo.’#Bhaazya Afume 3:6. 27ɄNgʉlʉbhɨ saga Ngʉlʉbhɨ wa bhafwe, lyoli Ngʉlʉbhɨ wa bhantu bha bhali bhʉʉmi. Amwɨ muteejile haani lwa muyanga huje, nahumo azyʉshe hwa bhafwe.”

Ɨndajizyo ɨngoosi ashile zyonti

(Mataayo 22:34-40; Luuka 10:25-28)

28ɄYeesu lwa‑adaliihana na Bhasadukaayo, ʉmʼmanyizyi ʉmo ʉwɨ ndajizyo zya Moose ahafiha, ahazyʉmvwa zya bhadaliihana. Lwa waalola huje, ʉYeesu waamula shinza, ahamʼmʉzɨɨlɨzya ahaga, “Mu ndajizyo zyonti, ɨlihu yɨ‑ɨli ngoosi?”

29ɄYeesu ahamʼmwamula huje, “Ɨngoosi ya yɨɨnɨ, ‘Tejeelezyi muBhaizilaeeli! ɄMwɨnɨ ʉNgʉlʉbhɨ, ʉNgʉlʉbhɨ weetu, ya yʉ Mwɨnɨ mwene. 30Ʉnʼganaje ʉMwɨnɨ ʉNgʉlʉbhɨ, ʉNgʉlʉbhɨ waaho hu mwoyo gwaho gwonti, hu wʉʉmi waaho wonti, hu njeele zyaho zyonti na hwi‑ikhone lyaho lyonti.’#Bhaazya ɨNyiizuho 6:4-5. 31Ɨndajizyo ɨngoosi ɨyamwabho ya yɨɨnɨ, ‘Ʉnʼganaje ʉmʼpalamani waaho nanshi shʉ‑ʉhwigana aawe.’#Bhaazya ɨMbombo ɨzya Bhalaawi 19:18. Ɨndajizyo ɨyɨnjɨ yɨ‑ɨli ngoosi ashile ɨzi zibhɨɨlɨ nɨɨmo.”

32Ʉmʼmanyizyi ʉla ʉwɨ ndajizyo zya Moose ahamʼmʉʉzya ʉYeesu huje, “Wee Mʼmanyizyi! Ʉyanjile zyɨ lyoli huje, ʉNgʉlʉbhɨ ali weeka mwene, saga alɨɨho ʉwamwabho, lyoli yʉʉyo mwene. 33Nantele, lyoli huje, ‘Ʉnʼganaje ʉNgʉlʉbhɨ hu mwoyo gwaho gwonti, hu wʉʉmi waaho wonti, hu njeele zyaho zyonti na hwi‑ikhone lyaho lyonti’ na ‘Ʉnʼganaje ʉmʼpalamani waaho nanshi shʉ‑ʉhwigana aawe’ zyɨ ndajizyo ngoosi haani. Lyoli, shinza abhombe ɨzyo zyonti ashile ɨmpuuto zyonti ɨzya‑afumye ɨnsangu#12:33 ɨnsangu Bhaazya izwi Nsangu hu Ngalulanyo ɨyɨ Mazwi aMajenu hu malishilo wɨ shitaabu ɨshi. ɨzya‑alʉngʉlɨzye ɨvyʉma nɨ nsangu ɨzyɨnjɨ.”

34ɄYeesu lwa waalola huje, ʉmuntu ʉla waamula hu lutinu, ahamʼmʉʉzya huje, “Ɨshi aawe ʉyandile huzyaganye shɨ‑ɨhwanziwa atʉʉshe mu wumwɨnɨ ʉwa Ngʉlʉbhɨ.” Ahwande ɨpo, saga ahabha ʉmuntu nka weeka wa‑ahasheelile humʼmʉzɨɨlɨzye nantele ʉYeesu ɨzya hunʼjele.

Ibhʉzɨɨlɨzyo hu nongwa ya Kilisiti

(Mataayo 22:41-46; Luuka 20:41-44)

35ɄYeesu lwa‑ahubhamanyizya abhantu mu lubhaga lwɨ nyumba ɨmfinjile ɨya Ngʉlʉbhɨ, ahabhabhʉʉzya huje, “Abhamanyizyi abhɨ ndajizyo zya Moose bhahabhonesyaga yeenu lwa bhahayangaga huje, ʉMʼfyʉli Mwana wa mwɨnɨ ʉDaudi? 36ɄDaudi yʉʉyo lwa‑alongozewa nʉ Mʼpepo ʉMʼfinjile, ahayanjile ahajile,

‘ɄMwɨnɨ ʉNgʉlʉbhɨ ahamʼmʉzɨɨzye ʉMwɨnɨ waanɨ#12:36 ʉMwɨnɨ waanɨ Ɨpa ɨbhonesya ʉYeesu ʉKilisiti. ahaga,

“Khala peeka naanɨ,#12:36 Khala peeka naanɨ Mu njango ɨyɨ Shiyunaani ɨsimbwilwe huje, Khala hu nʼkhono gwanɨ ʉgwa hu lɨɨlo. Hwa Bhayahuudi akhale hu nʼkhono ʉgwa hu lɨɨlo hubhonesya ɨnshɨnshɨ ni‑ikhone ɨlyɨ longozi.

afishe ɨhwavwe hubhatole abhalʉgʉ bhaaho na hubhatabhaale.” ’#Bhaazya ɨNsalifyo 110:1.   #12:36 afishe ɨhwavwe hubhatole abhalʉgʉ bhaaho na hubhatabhaale Mu njango ɨyɨ Shiyunaani ɨsimbwilwe huje, afishe ɨmbabhɨɨshe abhalʉgʉ bhaaho pa nsi yɨ manama gaaho.

37Ɨshi ʉDaudi yʉʉyo ahunʼtaha ʉKilisiti huje yʉ Mwɨnɨ waakwe. Ɨshi, ʉKilisiti agabha wɨlɨ mwana waakwe?” Ɨmpʉga ɨngoosi ɨya bhantu yahali ɨhunʼtejeelezya ʉYeesu hu nseho.

ɄYeesu asunda abhe maaso na bhamanyizyi abhɨ ndajizyo zya Moose

(Mataayo 23:1-36; Luuka 20:45-47)

38Mu manyizyo zyakwe ɨzyamwabho ʉYeesu ahabhamanyizyaga huje, “Mubhanje maaso na bhamanyizyi abhɨ ndajizyo zya Moose. Abheene bhasʉngwa ajende mwi‑idala sha bhakwɨte amagolole gaabho amatali agɨ nshɨnshɨ, na‑asʉngwe huje, abhantu bhabhalamuhaje hu nshɨnshɨ mu lembuka! 39Mwope mu nyumba ɨzya‑apuutile na‑amanyiilile bhasʉngwa akhale mu matengo aga bhɨ nshɨnshɨ aga pilongolela. Hwope nkashele bhaniilwe mu shikulukulu ɨsha‑alye ɨshalye, bhasʉngwa akhale pa bhakhɨɨye abhaanwa abhɨ nshɨnshɨ. 40Bhahubhafyʉla abhafwɨle ɨvyʉma vyabho. Nantele, hu gulugulu waabho, bhapuuta ɨmpuuto ɨntali huje abhantu bhagaje bhagolosu. Pi‑isiku ɨlya‑alongwe, ʉNgʉlʉbhɨ ahayihubhafunda ʉlufundo ʉlugoosi tee!”

Ɨnsangu ya mʼfwɨle

(Luuka 21:1-4)

41ɄYeesu ahabhala akhale pa pɨɨpɨ nɨ shɨlɨɨlo ɨsha‑afumizye ɨnsangu mu lubhaga lwɨ nyumba ɨmfinjile ɨya Ngʉlʉbhɨ. Ahenyaaga abhantu abhinji sha bhafumya ɨnsangu mu shɨlɨɨlo muula. Abhatabhazi abhinji bhahafumyaga ɨmpɨɨya zinyinji mu shɨlɨɨlo. 42Ahɨnza ʉnʼshɨ ʉmo ʉmʼfwɨle ʉmʼpɨɨna, wope ahafumya ɨmpɨɨya ʉtusenti tubhɨɨlɨ#12:42 ʉtusenti tubhɨɨlɨ Ahasenti hahali mpɨɨya ndoodo tee ashile ɨmpɨɨya zyonti ɨzyɨ habhaazyo haala. lwene. 43ɄYeesu lwa waalola ɨzyo, ahabhakwizya abhasundwe bhaakwe, ahabhabhʉʉzya ahaga, “Lyoli ɨhubhabhʉʉzya huje, ʉnʼshɨ ʉyo ʉmʼfwɨle ʉmʼpɨɨna afumiizye ɨnsangu ɨnyinji ashile bhonti zya bhafumiizye. 44Ɨnjanjile ɨsho, pɨpo abhantu abhanjɨ bhonti bhafumiizye ɨzya pa mwanya mu winji wɨ tabhazi waabho. Leelo, ʉnʼshɨ ʉmʼfwɨle ʉnʉ hwope sha mʼpɨɨna mansi, afumiizye vyonti vya‑ahali navyo vya vyahamʼmwavwaga mu wʉʉmi waakwe.”

Currently Selected:

Maalʉko 12: SBK

Highlight

Copy