Mataayo 18

Ʉnʼgoosi ʉwɨ lyoli

(Maalʉko 9:33-37; Luuka 9:46-48)

1Mu habhaazyo haala, abhasundwe bhahamʼmalila ʉYeesu, bhahamʼmʉzɨɨlɨzya bhahaga, “Wɨlɨ, weenu wa‑ali nʼgoosi ashile abhanjɨ bhonti hu wumwɨnɨ ʉwa hu mwanya?” 2ɄYeesu ahanʼkwizya ʉmwana ʉnʼdoodo, ahamʼmwɨmɨɨlɨsya paahati yaabho, 3ahabhabhʉʉzya ahaga, “Lyoli ɨhubhabhʉʉzya huje nkashele saga mugaluuhana na‑abhe nanshi abhaana abhadoodo, saga mwahayitʉʉha nka lumo mu wumwɨnɨ ʉwa hu mwanya. 4Ɨshi, ʉmuntu wowonti ʉyo ahwiyiisya nanshi ʉmwana ʉnʼdoodo ʉnʉ, ʉyo ya yʉʉyo ahayibha nʼgoosi mu wumwɨnɨ ʉwa hu mwanya. 5Nantele, ʉmuntu wowonti ʉyo ahumʼmwejeelela ʉmwana ʉnʼdoodo wa‑ali nanshi ʉnʉ hu nongwa yaanɨ, ɨpo ahunejeelela nɨɨnɨ.”

Ɨnsundo ɨzyɨ njelo

(Maalʉko 9:42-48; Luuka 17:1-2)

6“Leelo ʉmuntu wowonti ʉla ya‑ahayihumʼmwalanganya ʉwamwabho ʉmo mwɨ‑ɨbha abhadoodo bha bhanɨtɨɨshe anɨ huje abhombe ɨmbiibhi, yahali hwashi hwa mwene akʉngwe ʉlwala ʉlugoosi mu nsingo na hunʼdumbushizye pa pibhiiye mu nsʉmbi. 7Lwenyu mubhantu amwɨ mwa muli mu nsi ɨnɨ hu nongwa ya‑abhombe ɨgo gahubhalanganya abhantu abhombe ɨmbiibhi! Ɨnjelo ɨzyo zihwɨnza lwene, leelo lwakwe ʉmuntu wa‑aleeta ɨnjelo! 8Nkashele ɨnyoobhe yaaho awe ɨshinama shaaho shihuhwalanganya abhombe ɨmbiibhi, ʉshidumule na‑ataaje hutali. Hwashi ʉtʉʉshe nɨ shilema hu wʉʉmi ʉwa wiila, ashile abhe nɨ nyoobhe zyonti zibhɨɨlɨ awe amanama gonti gabhɨɨlɨ na‑ataagwe hu mwoto ʉgwa wiila gwa saga guzima nka lumo. 9Nantele, nkashele iliiso lyaho lihuhwalanganya abhombe ɨmbiibhi, ʉlifyonkole na hulitaaje hutali! Hwashi ʉtʉʉshe hu wʉʉmi nɨ shilema ɨshi‑iliiso lyeka lwene, ashile abhe na maaso gonti gabhɨɨlɨ na‑ataagwe hu mwoto ʉgwa wiila na wiila gwa saga guzima nka lumo.”

Ɨshifwani ɨshɨ ngoole ya yahateejile

(Luuka 15:3-7)

10ɄYeesu ahajendeelela ayanje ahaga, “Mubhanje maaso mugandi hunʼsyonshele nka weeka mwa bhadoodo ɨbha! Ɨhubhabhʉʉzya huje, hu habhaazyo honti abhantumi bhaabho abha hu mwanya bhali pitagaalila lya Yise waanɨ ʉyo ali hu mwanya. 11Ɨnjanjile ɨsho, pɨpo anɨ nɨMwana wa Muntu ɨnɨnzɨle mu nsi huje ɨmbafyʉle ɨbho bhateejile.#18:11 Amazwi agɨ lwoli ʉlwu saga galɨɨho mu nsimbo zimo ɨzyɨ mandɨ ɨzyɨ Shiyunaani. 12Mulola wɨlɨ? Nkashele ʉmuntu ali nɨ ngoole ɨmya yeeka, yeeka mu ngoole ziila ɨteeje, anza‑abhombe wɨlɨ? Wɨlɨ, saga ahuzileha nasʉʉti amashʉmi fundihandwɨmo na fundihandwɨmo (99) mwi‑igona na‑abhale huyanze ɨla yeeka yɨ‑ɨteejile? 13Lyoli ɨhubhabhʉʉzya, nkashele ahuyaaga, abha nʉ luseshelo tee hu nongwa yɨ ngoole yeeka ashile ɨngoole ziila amashʉmi fundihandwɨmo na fundihandwɨmo (99) ɨzyo saga zyahateejile. 14Sha shɨɨsho ʉYise weenyu ʉyo ali hu mwanya saga ahwanza huje nka weeka mu bhadoodo ɨbha ateeje.”

Ʉzingatizu ʉwa hunʼsunde wa‑ateejile

15ɄYeesu ahajendeelela ayanje ahaga, “Nkashele ʉwamwenyu ʉyo amʼmwɨtɨɨshe ʉNgʉlʉbhɨ aʼbhombɨɨye ɨmbiibhi, ʉbhale ʉnʼsunde lwa muli bhabhɨɨlɨ lwene. Nkashele mwʉmvwana, ɨpo ʉnza‑abhe ʉmʼmwajile nantele ʉwamwenyu. 16Leelo nkashele wakhaana, ʉbhale ʉmʼmweje ʉmuntu weeka awe abhantu bhabhɨɨlɨ huje mulondolezye nanshi ɨsho ɨsimbwilwe mu Nsimbo ɨMfinjile ɨzyo ziyiga, ‘Ɨnongwa yoyonti ɨsimishiziwe hu simishizi ʉwa bhantu bhabhɨɨlɨ awe bhataatu.’#Bhaazya ɨNyiizuho 19:15. 17Nkashele wakhaana hwɨ‑ɨbho bhope, ʉbhale hushibhʉʉzye ɨshibhanza. Nkashele saga ahushʉmvwa nɨ shibhanza, ɨshi, mʼmazizyaji nanshi sha muhumʼmaazizya wa saga amʼmwɨtɨɨshe ʉNgʉlʉbhɨ awe ʉnʼsomvya sonko.”

Ikhone ɨlya bhasundwe ɨlya‑apinye na‑asatule

18ɄYeesu ahonjela ayanje ahaga, “Lyoli ɨhubhabhʉʉzya, gonti ɨgo muhugapinya mwi‑itaawa lyanɨ mu nsi ʉmu, ʉNgʉlʉbhɨ wope anza hugapinye hu mwanya. Nantele, gonti ɨgo muhugasatula mwi‑itaawa lyanɨ mu nsi ʉmu, ʉNgʉlʉbhɨ wope anza hugasatule hu mwanya. 19Nantele ɨhubhabhʉʉzya lyoli huje nkashele bhabhɨɨlɨ paahati yeenyu bhɨtɨhɨɨne mu nsi ɨnɨ hwɨ‑ɨgo bhalaabha, ʉYise waanɨ ʉyo ali hu mwanya anza hubhabhombele shɨnɨɨsho. 20Ɨshi nkashele bhalɨɨho abhantu bhabhɨɨlɨ awe bhataatu ɨbho bhabhʉngɨɨne hwi‑itaawa lyanɨ, nanɨ ɨmba peeka nabho.”

Ɨshifwani ɨsha muntu wa saga akhobhoshela

21Ɨpo ʉPeeteli ahabhala hwa Yeesu, ahamʼmʉzɨɨlɨzya ahaga, “Wee Mwɨnɨ, nkashele ʉwamwetu ʉyo amʼmwɨtɨɨshe ʉNgʉlʉbhɨ ambombɨɨye ʉbhiibhi, ɨhwanziwa ɨnʼkhobhoshele halɨnga? Wɨlɨ, hwope pʉnga (7)?” 22ɄYeesu ahamʼmwamula ahaga, “Saga ɨhubhʉʉzya huje hwope pʉnga (7) lwene, lyoli ʉnʼkhobhoshelaje ʉwamwenyu hu habhaazyo honti sinta abhaazye.#18:22 sinta abhaazye Mu njango ɨyɨ Shiyunaani ɨsimbwilwe huje, 7 x 70.

23Ɨhubhabhʉʉzya ɨsho hu nongwa ya‑aje, ʉwumwɨnɨ ʉwa hu mwanya wukholana nanshi ʉmwɨnɨ ʉmo wa‑ahanzaga abhombe ɨmbaazyo na bhabhomvi bhaakwe bha bhahɨsɨwaaga. 24Ʉmwɨnɨ lwa wanda abhaazye, bhahanʼneetela ʉmʼmomvi ʉmo pitagaalila lyakwe ʉyo ahali ahwɨsɨwa ɨmpɨɨya ɨnyinji tee, ɨtalanta ɨelufu ishʉmi.#18:24 ɨtalanta ɨelufu ishʉmi Ɨtalanta yeeka yahalɨngaanaga nʉ mʼposheelo ʉgwa humʼposheezye ʉmuntu hu maaha ishʉmi na gasaanu awe ashile. Ɨpo ʉmʼmomvi ʉla ahali ahwɨsɨwa ɨtalanta ɨzya‑akwɨle hubhasombe abhantu ɨelufu ishʉmi hu maaha ishʉmi na gasaanu na‑ashile. 25Ʉmʼmomvi ʉyo ahapootwa asombe ɨmpɨɨya zya‑ahali ahwɨsɨwa. Ɨpo ʉmwɨnɨ ahabhalajizya abhalwi bhaakwe huje bhanʼkazye ʉmwene peeka nʉ nʼshɨ waakwe, abhaana bhaakwe nɨ vintu vyonti vya‑ahali navyo huje anʼsombe vya‑ahɨsɨwaaga.

26Ɨpo ʉmʼmomvi ʉla ahasugamila pitagaalila lya mwɨnɨ, ahanʼnaabha ahaga, ‘Wee mwɨnɨ, ɨhulaabha ʉngʉʉlɨle hashe, ɨnza husombe ɨvintu vyaho vyonti.’ 27Ʉmwɨnɨ ʉla ahanʼnolela ɨnkʉmbʉ ʉmʼmomvi waakwe, ahanʼkhobhoshela vyonti vya‑ahɨsɨwaaga, ahamʼmwɨtɨshɨla huje asogole. Wope ahafuma.

28Lwa waafuma hwʉnzɨ, ahakhomaana nʉ mʼmomvi ʉwamwabho ʉyo ahanʼkhopɨɨye ɨdinaali ɨmya yeeka#18:28 Ɨdinaali ɨmya yeeka zyahalɨngaanaga nʉ mʼposheelo ʉgwa humʼposheezye ʉmuntu hu meezi ganɨ. lwene. Ɨpo ahamʼbida hu nsingo, ahamʼmʉʉzya ahaga, ‘Somba ɨvyo nahaʼkhopɨɨye.’ 29Ʉmʼmomvi ʉwamwabho ʉla ahasugamila pitagaalila lyakwe, ahanʼnaabha ahaga, ‘Ʉngʉʉlɨle hashe, ɨnza husombe ɨvintu vyaho.’ 30Leelo ʉmwene ahakhaana, ahabhala nawo humʼpinye ʉwamwabho ʉla mu hoobhe afishe hu habhaazyo ɨho ahayisomba ɨvintu ɨvyo.

31Hu habhaazyo ɨho abhabhomvi abhamwabho lwa bhagalola ɨgo, bhahavwalala tee mu mooyo gaabho. Ɨpo bhahabhala hwa mwɨnɨ waabho na humʼmʉʉzye gonti ɨgo gahabhombɨɨshe. 32Ɨpo ʉmwɨnɨ ahanʼkwizya ʉmʼmomvi ʉla, ahamʼmʉʉzya ahaga, ‘Mʼmomvi, wee mʼmiibhi aawe! Enya lwa wahandaabhile huje ɨʼkhobhoshele ɨvyo ɨhuhwɨsya, nahaʼkhobhoshɨɨye vyonti ɨvyo! 33Wɨlɨ, nawe saga ʉhwanziwa hunʼnolele ɨnkʉmbʉ ʉmʼmomvi ʉwamwenyu ʉnʉ, nanshi ɨsho nanɨ nahaʼlolɨɨye ɨnkʉmbʉ aawe?’

34Ɨpo ʉmwɨnɨ ʉla ahaviitwa tee, ahabhalajizya abhalwi bhaakwe huje bhanʼkhate na humʼpinye mu hoobhe afishe hu habhaazyo ɨho ahayisomba ɨvintu vyonti ɨvyo ahwɨsɨwa.”

35Hu malishilo, ʉYeesu ahaga, “ɄYise waanɨ wa‑ali hu mwanya ahayihumʼmombela shɨnɨɨsho ʉmuntu wowonti muuhati yeenyu wa saga ahunʼkhobhoshela ʉwamwabho hu mwoyo gwakwe gwonti.”

Currently Selected:

Mataayo 18: SBK

Highlight

Copy