Mataayo 19

Ahwegane na‑alehane

(Maalʉko 10:1-12)

1Hu habhaazyo ɨho ʉYeesu lwa waamala ayanje amazwi ɨgo, ahasogola hu mukowa ʉgwɨ Galilaaya, ahabhala hu mukowa ʉgwɨ Yudeeya, hwi‑isyɨla ɨli‑isooho ɨlyɨ Yolodaani. 2Ɨshi abhantu abhinji bhahanʼnondolezya, wope ahabhaponia bhonti bha bhahali bhabhinu.

3ABhafalisaayo bhamo bhahamʼmwɨnzɨla ʉYeesu huje bhanʼjele. Bhahamʼmʉzɨɨlɨzya bhahaga, “Wɨlɨ, ɨhwɨtɨshɨlwa hu ndajizyo zyetu ʉnʼnume hunʼneshe ʉnʼshɨ waakwe hu nongwa yoyonti ɨla?” 4ɄYeesu ahabhaamula ahaga, “Wɨlɨ, saga mubhaziizye mu Nsimbo ɨMfinjile huje afume hu wandilo ‘ʉNgʉlʉbhɨ ahapelile ʉnʼnume nʉ nʼshɨ’?#Bhaazya ʉWandilo 1:27. 5ɄNgʉlʉbhɨ ahaga, ‘Hu nongwa ɨnɨ ʉnʼnume ahayihunʼneha ʉyise waakwe nʉ nyina waakwe, ɨpo ahayipatiihana nʉ nʼshɨ waakwe, bhabhɨɨlɨ ɨbho bhahayibha mʼbɨlɨ gweka.’#Bhaazya ʉWandilo 2:24. 6Ɨshi bhabhɨɨlɨ ɨbho saga bhabha bhantu bhabhɨɨlɨ nantele, lyoli bhabha mʼbɨlɨ gweka. Abhantu ɨbho ʉNgʉlʉbhɨ abhapatihɨɨnye, asahasheele ʉmuntu nkʉ‑ʉmo hubhalehanye.” 7ABhafalisaayo bhaala bhahamʼmʉzɨɨlɨzya nantele bhahaga, “Nkashele ɨga gɨ lyoli, yeenu ʉMoose ahɨtɨɨshe mu ndajizyo huje ʉnʼnume anʼsimbilaje ʉnʼshɨ waakwe ɨkalaata ɨya hunʼneshe?” 8ɄYeesu ahabhaamula ahaga, “ɄMoose ahabhɨtɨshɨɨye huje mubhalehaje abhashɨ bheenyu hu nongwa yɨ khome wɨ mooyo geenyu, leelo afume hu wandilo ʉwa‑apele, ɨzi saga zyahali nsɨɨbho zya Ngʉlʉbhɨ. 9Leelo anɨ ɨhubhabhʉʉzya huje, ʉmuntu wowonti wa‑ahunʼneha ʉnʼshɨ waakwe sinta hunʼkhate mu weegu, na hweje ʉnʼshɨ ʉwɨnjɨ, abhomba weegu.”#19:9 Ɨnsimbo zimo ɨzyɨ mandɨ ɨzyɨ Shiyunaani zihwonjeezya amazwi ɨga, Wope ʉnʼnume wa‑ahumʼmwega ʉnʼshɨ ʉyo wa‑alehwilwe abhomba weegu.

10Ɨpo abhasundwe bhaakwe bhahamʼmʉʉzya bhahaga, “Nkashele lyoli gali ɨsho hwa nʼnume na hwa nʼshɨ, shinza asinte hweje!” 11ɄYeesu ahabhaamula ahaga, “Saga bhantu bhonti ɨbho bhagakhondela hulyambɨɨlɨle izwi ɨli, lyoli bheene ɨbho ʉNgʉlʉbhɨ abhavwizye hulyambɨɨlɨle. 12Abhantu bhamo saga bhahwega hu nongwa ya huje bhahapapwilwe ɨsho. Abhamwabho saga bhahwega hu nongwa ya huje abhantu bhahabhafuusile huje bhagandi apaape. Bhalɨɨho na bhanjɨ ɨbho saga bhahwega hu nongwa ya huwubhombele ʉwumwɨnɨ ʉwa hu mwanya. Ʉmuntu wowonti wa‑abhajiiye hulyambɨɨlɨle izwi ɨli, alyambɨlɨlaje.”

ɄYeesu ahubhasaya abhaana abhadoodo

(Maalʉko 10:13-16; Luuka 18:15-17)

13Abhantu bhamo bhahanʼnetelaga ʉYeesu abhaana abhadoodo, huje abhasaye hwi‑idala ɨlya hubhabhɨɨshɨle ɨnyoobhe zyakwe pa matwe gaabho na hubhapuutile hwa Ngʉlʉbhɨ. Leelo abhasundwe bhaakwe bhahabhadaamila abhantu bhaala. 14Leelo ʉYeesu ahabhabhʉʉzya ahaga, “Bhaleshi abhaana abhadoodo bhɨnzaje huliinɨ, mugandi hubhakhaane, pɨpo ʉwumwɨnɨ ʉwa hu mwanya wa bhantu bha bhali nanshi abhaana abhadoodo ɨbha.” 15Ɨpo ʉYeesu ahabhabhɨshɨlaga ɨnyoobhe zyakwe, ahabhasaya abhaana bhaala, ahasogola paala pa‑ahali.

Ʉpala wa nʼtabhazi atʉʉshe hu wumwɨnɨ ʉwa Ngʉlʉbhɨ

(Maalʉko 10:17-31; Luuka 18:18-30)

16Ɨpo ʉnʼsahaala ʉmo ahɨnza hwa Yeesu, ahamʼmʉzɨɨlɨzya ahaga, “Wee Mʼmanyizyi, ɨmbombe hantu heenu ahinza huje ɨmbwaje ʉwʉʉmi ʉwa wiila?” 17ɄYeesu ahamʼmwamula ahaga, “Yeenu ʉhumbʉzɨɨlɨzya hu nongwa yɨ minza? Enya, ʉNgʉlʉbhɨ mwene ya‑ali mwinza! Leelo nkashele ʉhwanza atʉʉshe hu wʉʉmi ʉwa wiila, ʉzilondolezyaje ɨndajizyo zya Ngʉlʉbhɨ.” 18Ʉnʼsahaala ʉla ahamʼmʉzɨɨlɨzya ahaga, “Ndajizyo wɨlɨ?” Ɨpo ʉYeesu ahamʼmwamula ahaga, “Ʉgandi agoje, ʉgandi abhembushe, ʉgandi ahwibhe, ʉgandi ayanje ilenga. 19Ʉnʼtinihaje ʉso nʉ bhɨɨnyu, nantele ʉnʼganaje ʉmʼpalamani waaho nanshi shʉ‑ʉhwigana aawe.”#Bhaazya Afume 20:12-16; ɨNyiizuho 5:16-20; ɨMbombo ɨzya Bhalaawi 19:18. 20Ʉnʼsahaala ʉla ahaga, “Ɨndajizyo ɨzyo zyonti ɨnzikhɨɨte. Ɨmbombe hantu heenu ahamwabho ɨho habhuliiye?” 21ɄYeesu ahamʼmʉʉzya ahaga, “Nkashele ʉhwanza abhe nʼsangalusu, ʉbhale ʉkazye ɨvintu vyonti vyʉ‑ʉli navyo, ɨmpɨɨya ɨzyo zyʉ‑ʉbhala huzyaje, ʉbhapeele abhapɨɨna, nawe wahayibha nɨ mfuha hu mwanya hwa Ngʉlʉbhɨ. Ɨpo nkʉ‑ʉyɨnzaje, ʉmbɨnjɨlɨzyaje anɨ na‑abhe nʼsundwe waanɨ.” 22Hu habhaazyo ɨho ʉnʼsahaala ʉla lwa wʉmvwa ɨgo, ahasogola sha‑azugumiiye, pɨpo ahali nɨ shʉʉma ɨshinji tee.

23Ɨpo ʉYeesu ahabhabhʉʉzya abhasundwe bhaakwe ahaga, “Lyoli ɨhubhabhʉʉzya huje hwahayibha hupala tee hwa nʼtabhazi atʉʉshe mu wumwɨnɨ ʉwa hu mwanya. 24Ɨhubhabhʉʉzya nantele huje hupʉpʉʉsu tee ɨngamiya#19:24 Enya Luuka 18:25, ɨshifwani ɨshɨ ngamiya. ashile mwa hadobhooli hɨ nsenelo, ashile ʉmuntu ʉnʼtabhazi atʉʉshe mu wumwɨnɨ ʉwa Ngʉlʉbhɨ.” 25Abhasundwe bhaala lwa bhʉmvwa ɨsho, bhahaswiga tee, bhahamʼmʉzɨɨlɨzya bhahaga, “Ɨshi, nkashele sha zili, weenu wa‑agafyʉlwa?” 26ɄYeesu ahabhazyamila, ahabhabhʉʉzya ahaga, “Ɨzi saga zigabhombwa na bhantu, leelo hwa Ngʉlʉbhɨ zyonti zibhombeha.”

27ɄPeeteli ahamʼmʉʉzya ahaga, “Wee Mwɨnɨ, enya atɨ tivileshile ɨvintu vyonti, tiʼbhɨnjɨlɨzɨɨzye aawe na‑abhe bhasundwe bhaaho! Ɨshi, tɨnza huhaaje heenu?” 28ɄYeesu ahabhaamula ahaga, “Lyoli ɨhubhabhʉʉzya, hu habhaazyo ɨho anɨ nɨMwana wa Muntu ɨhɨɨye pi‑itengo lyanɨ ɨlyɨ wumwɨnɨ ʉwa hu mwamu mu nsi ɨnjenu, ɨshi amwɨ mwa mumbɨnjɨlɨɨye, mwahayikhalaga mu matengo ishʉmi na gabhɨɨlɨ hu habhaazyo ɨho mwahayihuvilonga ɨvikholo ishʉmi na vibhɨɨlɨ ɨvya mu nsi ɨyɨ Izilaeeli. 29Ɨshi ʉmuntu wowonti ʉyo aleshile ɨnyumba yaakwe, awe abhakʉlʉ bhaakwe, awe abhadoodo bhaakwe, awe abhayɨlʉmbʉ bhaakwe, awe ʉyise waakwe, awe ʉnyina waakwe, awe abhaana bhaakwe, awe amagʉnda gaakwe hu nongwa yaanɨ, ahayambɨɨlɨla vyonti hu winji tee. Ɨpo ahayihuwaaga ʉwʉʉmi ʉwa wiila. 30Leelo, abhinji bha bhatinihwa hu habhaazyo ɨha, saga bhahayitinihwa hu habhaazyo ha hahwɨnza. Nantele, abhinji bha saga bhatinihwa hu habhaazyo ɨha, bhahayitinihwa hu habhaazyo ha hahwɨnza.”

Currently Selected:

Mataayo 19: SBK

Highlight

Copy