Yoohani 9

ɄYeesu ahumʼponia ʉnʼtonko

1Isiku limo ʉYeesu lwa‑ashila, ahanʼnola ʉmuntu ʉmo ʉyo ahali nʼtonko afume apaapwe. 2Abhasundwe bhaakwe bhahamʼmʉzɨɨlɨzya bhahaga, “Wee Mʼmanyizyi, yeenu ʉmuntu ʉnʉ ahapapwilwe nʼtonko? Wɨlɨ, hu nongwa ya huje ahabhombile ɨmbiibhi awe huje abhapaafi bhaakwe bhahabhombile ɨmbiibhi?” 3ɄYeesu ahabhaamula ahaga, “Ʉwuntonko waakwe saga wufumilana hu nongwa ya huje ahabhombile ɨmbiibhi awe abhapaafi bhaakwe. Lyoli ahapapwilwe nʼtonko huje amaha ga Ngʉlʉbhɨ galoleshe hwa bhantu ashilile hwa mwene. 4Tikhondɨɨye abhombe ɨmbombo ɨya Ngʉlʉbhɨ ʉyo ahansonteleziizye lwa huli sanya. Ʉsiku wuhwɨnza ɨpo nʉʉmo ʉmuntu wa‑abhajiiye abhombe ɨmbombo. 5Hu habhaazyo lwɨ‑ɨndi mu nsi ʉmu, anɨ ɨndi nanshi ʉlukhozyo hwa bhantu bhonti.”#9:5 anɨ ɨndi nanshi ʉlukhozyo hwa bhantu bhonti hwa huje ʉYeesu ya yʉʉyo ahubhaavwa abhantu humʼmanye ʉNgʉlʉbhɨ sha‑ali, na hubhapeele ʉlukhozyo ʉlwa huzyaganye shinza ɨzya mu nsi ʉmu.

6ɄYeesu lwa wayanga ɨgo, ahaswɨla amatɨ pa nsi, ahasangaanya amatoto na matɨ, ahamʼpotozya amatoto mu maaso ʉnʼtonko ʉla. 7Ɨpo ahamʼmʉʉzya ʉnʼtonko ʉla ahaga, “Bhalaga ʉsamvye hu maaso mwi‑idiimi ɨlyɨ Silowamu.” Silowamu hwa huje, ʉyo asonteleziiwe. Ɨshi, ʉnʼtonko ahabhala asamvye hu maaso, ahapona, ahaweela hu khaaya yaakwe.

8Ɨpo abhapalamani bhaakwe na bhanjɨ ɨbho bhahali bhahunʼnola hu wandilo hu habhaazyo alaabha ɨvintu, bhahabhʉzɨlɨzanya bhahaga, “Wɨlɨ, ʉmuntu ʉnʉ saga ya yʉʉla wa‑ahali akhala na‑alaabhe ɨvintu?” 9Bhamo bhahaga, “Ʉmuntu ʉnʉ yʉʉyo.” Abhanjɨ bhahaga, “Ʉmuntu ʉnʉ saga yʉʉyo, lyoli alɨngaana nawo tee.” Leelo ʉmwene ahabhabhʉʉzya ahaga, “Nɨɨnɨ.” 10Ɨpo bhahamʼmʉzɨɨlɨzya bhahaga, “Nkashele weewe lyoli, ɨshi amaaso gaaho gandile wɨlɨ alole?” 11Ʉmwene ahabhaamula ahaga, “Ʉmuntu ʉyo itaawa lyakwe yʉ Yeesu, ahaswɨla amatɨ pa nsi, ahasangaanya na matoto, ahampotozya amaaso gaanɨ. Ɨpo ahambʉʉzya ahaga, ‘Bhalaga ʉsamvye hu maaso mwi‑idiimi ɨlyɨ Silowamu.’ Ɨpo nahabhala asamvye hu maaso, pɨnɨɨpo nahanda alole.” 12Ɨpo bhahamʼmʉzɨɨlɨzya bhahaga, “Wɨlɨ, ʉmuntu ʉyo ali hwoshi?” Ʉmwene ahabhaamula ahaga, “Anɨ saga ɨmɨɨnye ʉhwo ali.”

ABhafalisaayo bhahumʼmʉzɨɨlɨzya ʉyo ahali nʼtonko

13Ɨpo abhantu bhaala bhahanʼtwala hwa Bhafalisaayo ʉmuntu ʉla wa‑ahali nʼtonko. 14Ɨlyo lyahali lisiku lyɨ Sabaato, ɨlyo ʉYeesu ahakhanda amatoto na humʼponie ʉnʼtonko. 15Ɨpo aBhafalisaayo bhope bhahamʼmʉzɨɨlɨzya ʉmuntu ʉla bhahaga, “Wɨlɨ, amaaso gaaho gahandile wɨlɨ alole?” Ahabhaamula ahaga, “Ʉmuntu ʉmo ahampotozya amatoto mu maaso, nahasamvya hu maaso, ɨshi ɨlola.” 16Ɨpo aBhafalisaayo bhamo bhahaga, “Ʉmuntu ʉyo abhombile ɨshi saga abhajiiye afume hwa Ngʉlʉbhɨ, pɨpo abhomba ɨgo gakhɨɨnwe abhombwe mwi‑isiku ɨlyɨ Sabaato.” Leelo abhanjɨ bhahaga, “Wɨlɨ, ɨbhajiiye wɨlɨ hwa mʼmomba mbiibhi abhombe amayele ɨgo?” Ɨpo bhahatapuuhana bhɨɨbho hu bhɨɨbho. 17ABhafalisaayo bhahamʼmʉzɨɨlɨzya nantele bhahaga, “Ɨshi, ʉyiga wɨlɨ hu nongwa ya muntu ʉyo aʼponiizye amaaso gaaho?” Ʉmwene ahabhaamula ahaga, “Anɨ ɨhunʼnola ʉmuntu ʉyo huje nʼkuwi wa Ngʉlʉbhɨ.”

18Leelo abhalongozi bha Bhayahuudi saga bhahɨtɨɨshe huje ʉmuntu ʉyo ahapapwilwe nʼtonko afume apaapwe hwakwe, ɨshi alola. Ɨpo bhahabhakwizya abhapaafi bhaakwe, 19bhahabhabhʉzɨɨlɨzya bhahaga, “Wɨlɨ, ʉmuntu ʉnʉ yʉ mwana weenyu wa mwahagaga ahapapwilwe nʼtonko? Nkashele lyoli, ɨshi wanda wɨlɨ alole?” 20Ɨpo abhapaafi bhaakwe bhahabhaamula bhahaga, “Atɨ timɨɨnye lyoli huje ʉnʉ mwana weetu, nantele tisimishizya huje ahapapwilwe nʼtonko. 21Leelo saga timɨɨnye ayandile wɨlɨ alole. Nantele saga timɨɨnye hwope ʉmuntu ʉyo ahamʼponiizye amaaso gaakwe. Bhʉzɨɨlɨzyi yʉʉyo, pɨpo muntu nʼgoosi, abhajiiye ayanje yʉʉyo.” 22Abhapaafi bhaakwe bhahayanjile ɨsho hu nongwa ya huje, bhahali bhahubhoogopa abhalongozi bha Bhayahuudi. Abhalongozi ɨbho bhahɨtɨhɨɨne huje ʉmuntu wowonti ʉyo ahwɨtɨha huje ʉYeesu yʉ Mʼfyʉli, bhanza hunʼdaje mu nyumba ɨya‑apuutile na‑amanyiilile. 23Sha shɨɨsho abhapaafi bhaakwe bhahayanjile huje, “Bhʉzɨɨlɨzyi yʉʉyo, pɨpo muntu nʼgoosi.”

24Ɨpo abhalongozi bha Bhayahuudi bhahanʼkwizya nantele ʉlwa bhɨɨlɨ ʉmuntu wa‑ahali nʼtonko hu wandilo, bhahamʼmʉʉzya bhahaga, “Lapa hwa Ngʉlʉbhɨ huje ʉyanga ɨlyoli! Atɨ timɨɨnye huje ʉmuntu ʉyo ahali aʼponiizye mʼmomba mbiibhi.” 25Ɨpo ʉmuntu ʉla ahabhaamula ahaga, “Anɨ saga ɨmɨɨnye huje ʉmuntu ʉyo mʼmomba mbiibhi, leelo ɨmɨɨnye lyeka lwene huje nahali nʼtonko, leelo ɨshi ɨlola.” 26Ɨpo bhahamʼmʉzɨɨlɨzya bhahaga, “Wɨlɨ, ʉmuntu ʉyo aʼbhombɨɨye yeenu? Aʼponiizye wɨlɨ amaaso gaaho?” 27Ʉmwene ahabhaamula ahaga, “Anɨ ɨmbabhʉzɨɨzye ɨnongwa ɨzyo, leelo amwɨ saga muhwanza hunʉmvwe. Ɨshi yeenu muhwanza ɨmbabhʉʉzye nantele? Wɨlɨ, hwope namwɨ muhwanza abhe bhasundwe bhaakwe?” 28Ɨpo abheene bhahanʼniga bhahaga, “Aawe we nʼsundwe waakwe, atɨ ndaali. Leelo atɨ tili bhasundwe bha Moose. 29Timɨɨnye huje ʉNgʉlʉbhɨ ahayanjile nʉ Moose, leelo ʉmuntu ʉyo saga timɨɨnye ʉhwo afumile.” 30Ʉmuntu ʉla ahabhaamula ahaga, “Anɨ ɨswiga tee! Amwɨ saga mumɨɨnye ʉhwo afumile, leelo ʉmwene amponiizye amaaso gaanɨ! 31Timɨɨnye huje ʉNgʉlʉbhɨ saga ahwʉmvwa ɨmpuuto ɨzya bhabhomba mbiibhi,#9:31 bhabhomba mbiibhi Bhaazya izwi Bhabhomba mbiibhi hu Ngalulanyo ɨyɨ Mazwi aMajenu hu malishilo wɨ shitaabu ɨshi. Nantele, bhaazya ɨNsalifyo 34:15-16; ɨNjango 15:29. leelo ahumʼmwʉmvwa ʉmuntu wowonti ʉyo ahunʼtiniha na‑abhombe ʉkʉndwe waakwe. 32Afume ʉNgʉlʉbhɨ ahapelile ɨnsi, saga tilɨnjɨle ahwʉmvwe dumu huje ʉmuntu amʼponiizye amaaso ʉmuntu ʉyo apapwilwe nʼtonko. 33Nkashele ʉmuntu ʉyo saga ahafumile hwa Ngʉlʉbhɨ, ɨshi saga wɨnzaga‑abhombe ɨgo.” 34Abheene bhahamʼmwamula bhahaga, “Aawe wahapapwilwe na‑alelwe nanshi ʉmʼmomba mbiibhi. Wɨlɨ, ʉli ni‑ikhone wɨlɨ ɨlya hutimanyizye atɨ?” Ɨpo bhahanʼdaga afume mu nyumba ɨya‑apuutile na‑amanyiilile.

Ʉwuntonko ʉwɨ mwoyo

35ɄYeesu lwa wʉmvwa huje abhalongozi bha Bhayahuudi bhanʼdajile ʉmuntu ʉla ahali nʼtonko, ahabhala humʼmwanze. Lwa wanʼnola, ahamʼmʉzɨɨlɨzya ahaga, “Wɨlɨ, ʉhumʼmwɨtɨha ʉMwana wa Muntu?” 36Ʉmuntu ʉla ahamʼmwamula ahaga, “Wee Mwɨnɨ, ʉMwana wa Muntu yʉ naanu huje ɨmʼmwɨtɨshe?” 37ɄYeesu ahamʼmwamula ahaga, “Aawe ʉnʼnolile, nantele ʉnʉ ya yʉʉyo ʉyanga nawo.” 38Ʉmuntu ʉla ahaga, “Ɨhuhwɨtɨha, Mwɨnɨ.” Ɨpo ahasugamila pitagaalila lya Yeesu na humʼpuute. 39Ɨpo ʉYeesu ahaga, “Anɨ ɨnɨnzɨle mu nsi ɨnɨ alonje, huje abhantonko bhalole, nantele ɨbho bhayiga bhalola, bhabhe bhantonko.” 40Ɨpo aBhafalisaayo bhamo ɨbho bhahalɨɨho paala, lwa bhʉmvwa ɨnongwa ɨzyo, bhahamʼmʉzɨɨlɨzya bhahaga, “Wɨlɨ, ʉyiga, natɨ tili bhantonko?” 41ɄYeesu ahabhaamula ahaga, “Nkashele mwabhanga bhantonko saga mwabhanga bhabhomba mbiibhi. Leelo ɨshi muli nɨ mbiibhi hu nongwa ya‑aje muyiga mulola.”

Currently Selected:

Yoohani 9: SBK

Highlight

Copy