Yoohani 10

Ɨshifwani ɨsha nʼdiimi ʉmwinza ʉwɨ ngoole

1ɄYeesu ahajendeelela ayanje ahaga, “Lyoli ɨhubhabhʉʉzya, ʉmuntu wowonti ʉyo saga atʉʉha hu lyango ʉgwi‑igoma lyɨ ngoole, leelo atʉʉha ashilile apantu apanjɨ, ʉyo mwibha nantele nʼkoonya. 2Leelo wa‑atʉʉha ashilile hu lyango ʉgwi‑igoma, ʉyo yʉ nʼdiimi wɨ ngoole. 3Ʉnʼnɨndɨɨlɨli wi‑igoma ahumʼmwigulila ʉlyango ʉnʼdiimi ʉwɨ ngoole, zyope ɨngoole zihwʉmvwa izwi lya nʼdiimi. Wope ʉnʼdiimi ahuyikwizya ɨngoole yaakwe yeeka yeeka hwi‑itaawa lyakwe na huzilongozye abhale hwʉnzɨ. 4Nkashele wazifumya hwʉnzɨ ɨngoole zyakwe, atagaalila hwitagaalila, zyope zihunʼnondolezya pɨpo zilimɨɨnye izwi lyakwe. 5Ɨngoole saga zibhajiiye hunʼnondolezye ʉmuntu ʉnʼjenu, leelo zihunʼshɨmbɨla, pɨpo saga zilimɨɨnye izwi lyakwe.” 6ɄYeesu ahabhabhʉzɨɨzye aBhafalisaayo ɨshifwani ɨshi, leelo abheene saga bhahazyaganya ɨzyo ahali ahubhabhʉʉzya.

7Ɨpo ʉYeesu ahabhabhʉʉzya nantele ahaga, “Lyoli ɨhubhabhʉʉzya huje anɨ ɨndi nanshi ʉlyango ʉgwo ɨngoole zitʉʉshɨla mwi‑igoma. 8Bhonti ɨbho bhahantagaliiye abhe bhadiimi bhɨ ngoole, bhahali bhiibha nantele bhankoonya,#10:8 bhahali bhiibha nantele bhankoonya Ɨpa ʉYeesu ahubhayanga abhalongozi bhonti ɨbho bhahali saga bhahubhasaajila abhantu bha Ngʉlʉbhɨ hwi‑idala ɨlya hubhabhombele shibhiibhi na hwiyanzile ɨvintu ɨvyo vyahali vihubhaavwa abheene. leelo ɨngoole zyahali saga zihubhʉmvwa. 9Anɨ ɨndi nanshi ʉlyango ʉgwo. Ʉmuntu ʉyo atʉʉha mwi‑igoma ashilile hwaliinɨ, ahayifyʉlwa, nantele ahayibha nʉ satulwe ʉlwa‑atʉʉshe na‑afume abhale hu masole aminza. 10Ʉmwibha atʉʉha mwi‑igoma hu nsɨɨbho ɨzya hwibhe, agoje na‑anangaanye. Leelo anɨ ɨnɨnzɨle huje bhabhe nʉ wʉʉmi, nantele bhabhe nawo hu winji.

11Anɨ ɨndi nʼdiimi mwinza. Ʉnʼdiimi ʉmwinza ahuwuyazya ʉwʉʉmi waakwe, huje ɨngoole zyakwe zigandi ateeje. 12Ʉmuntu ʉwɨ mʼposheelo saga nʼdiimi wɨ ngoole, nantele ɨngoole saga zyakwe. Ɨshi nkashele waalola ɨmbwalonde ɨhwɨnza, ashɨmbɨla na huzileshe ɨngoole nyeene. Ɨpo ɨmbwalonde ɨhuzikhata ɨngoole zimo nɨ zyɨnjɨ zinyampaana. 13Ʉmuntu ʉwɨ mʼposheelo ʉla ashɨmbɨla na huzileshe ɨngoole, pɨpo saga ahuzisaajila ɨngoole ɨzyo. 14Anɨ ɨndi nʼdiimi mwinza. Ɨnzimɨɨnye shinza ɨngoole zyanɨ, zyope zimɨɨnye anɨ 15nanshi ɨsho ʉDaada amɨɨnye anɨ, nanɨ ɨmʼmɨɨnye. Nanɨ ɨhwifumiizye afwe hu nongwa ya huzifyʉle ɨngoole zyanɨ. 16Anɨ ɨndi nɨ ngoole ɨzyɨnjɨ ɨzyo nazimo mwi‑igoma ɨli, zyope ɨhwanziwa huzilongozye. Ɨngoole ɨzyo zyope zyahayimanya izwi lyanɨ. Hwi‑idala ɨlyo, yahayibha mpʉga yeeka ɨyo yahayibha nʉ nʼdiimi weeka.

17ɄDaada angɨɨne pɨpo ɨhwifumiizye afwe hu nongwa ya bhantu, huje ɨmbwaje ʉwʉʉmi nantele. 18Nʉʉmo ʉmuntu ʉyo abhajiiye hunefwezye ʉwʉʉmi waanɨ. Anɨ nɨɨnɨ ɨhwifumiizye afwe. Anɨ ɨndi ni‑ikhone ɨlya‑ayazye ʉwʉʉmi waanɨ, nantele ɨndi ni‑ikhone ɨlya‑abhe mwʉmi nantele. ɄDaada ya yʉʉyo andajiziizye abhombe ɨsho.” 19Lwa bhʉmvwa amazwi ɨgo, aBhayahuudi bhahalegana mu njango. 20Abhinji bhahayanga bhahaga, “Ʉnʉ ali ni‑ipepo ɨlyo limʼmɨɨshɨle abhe nʉ laalusi. Mu mazwi gaakwe tɨnza huhaaje heenu?” 21Leelo abhanjɨ bhahadaliha bhahaga, “Amazwi ɨga saga gafuma mwa muntu wa‑ali ni‑ipepo. Wɨlɨ, ipepo libhajiiye humʼmɨɨshe ʉnʼtonko alole?”

Abhantu abhinji bhahunʼkhaana ʉYeesu

22Ahabhaazyo ahɨ shikulukulu ɨsha Bhayahuudi ɨsha hwizushe huyisangalusye ɨnyumba ɨmfinjile ɨya Ngʉlʉbhɨ hu Yelusaleemu hahafiha. Ahabhaazyo ɨho hahali hi‑isasa. 23ɄYeesu ahazyʉngʉʉlaga mu lubhaga lwɨ nyumba ɨmfinjile ɨya Ngʉlʉbhɨ,#10:23 Enya Maalʉko 11:11, ɨshifwani ɨshɨ lubhaga lwɨ nyumba ɨmfinjile ɨya Ngʉlʉbhɨ. mwi‑ikoloti ɨlyo bhahagaga Idala Itiime ɨlya Solomooni. 24ABhayahuudi bhamo bhahanʼzyʉngʉʉla, bhahamʼmʉzɨɨlɨzya bhahaga, “Wɨlɨ, ʉnza hutitaamye mu mooyo geetu afishe ndi? Nkashele lyoli aawe we Mʼfyʉli, tibhʉʉzye pa pazelu.” 25Leelo ʉYeesu ahabhaamula ahaga, “Anɨ ɨmbabhʉzɨɨzye huje anɨ nɨ weenu, leelo amwɨ mukhaana hunɨɨtɨshe. Amayele ɨgo ɨbhomba hwi‑ikhone lya Daada waanɨ ga gɨɨgo gahunsimishizya huje anɨ nɨ weenu. 26Leelo mukhaana hunɨɨtɨshe, pɨpo amwɨ saga muli shipʉga shɨ ngoole zyanɨ. 27Ɨngoole zyanɨ zilimɨɨnye izwi lyanɨ. Anɨ ɨnzimɨɨnye shinza, zyope zihumbɨnjɨɨlɨzya. 28Anɨ ɨhubhapeela ʉwʉʉmi ʉwa wiila, bhope saga bhanza‑ateeje dumu. Nantele nʉʉmo ʉmuntu ʉwa hubhafyʉle hwi‑ikhone afume mu makhono gaanɨ. 29ɄDaada waanɨ ʉyo ampiiye ɨbho yʉ nʼgoosi ashile bhonti. Ɨshi nʉʉmo ʉmuntu ʉyo abhajiiye hubhafyʉle mu makhono gaakwe. 30Anɨ nʉ Daada waanɨ tili hantu heeka.”

31Ɨshi, aBhayahuudi bhamo lwa bhʉmvwa ɨzyo, bhahanda asebhe amawe nantele huje bhanʼkhome na hunʼgoje ʉYeesu. 32Leelo ʉYeesu ahabhabhʉʉzya ahaga, “Ɨmbalolesiizye amayele aminji aminza ɨgo ɨmbombile hwi‑ikhone ɨlya Daada. Mbombo wɨlɨ ɨyo yɨ‑ɨhubhabhomba amwɨ huhome anɨ na mawe?” 33ABhayahuudi bhahamʼmwamula bhahaga, “Saga tihwanza hukhome na mawe pɨpo ʉbhombile aminza, leelo hu nongwa ya huje ʉhunʼniga ʉNgʉlʉbhɨ. Nantele ʉhwiyanga huje we Ngʉlʉbhɨ, poshe aawe ʉli muntu lwene nanshi abhantu abhanjɨ!” 34ɄYeesu ahabhaamula ahaga, “Wɨlɨ, saga ɨsimbwilwe mu Nsimbo ɨMfinjile ɨzyɨ ndajizyo huje ʉNgʉlʉbhɨ ahajile, ‘Amwɨ muli bhangʉlʉbhɨ’?#Bhaazya ɨNsalifyo 82:6. 35Ɨsimbwilwe ʉhwo huje abhantu ɨbho bhambɨlɨɨye ɨnongwa zya Ngʉlʉbhɨ, ʉNgʉlʉbhɨ ahali ahubhakwizya huje bhangʉlʉbhɨ. Natɨ timɨɨnye huje ɨgo gasimbwilwe mu Nsimbo ɨMfinjile gɨ lyoli ɨnsiku zyonti. 36Wɨlɨ, yeenu muyanga huje anɨ ɨhunʼniga ʉNgʉlʉbhɨ, ɨpo ɨyanga, ‘Anɨ ɨndi Mwana wa Ngʉlʉbhɨ’? ɄDaada waanɨ ya yʉʉyo ansaluuye na hunsonteelezye mu nsi. 37Nkashele saga ɨbhomba ɨmbombo zya Daada, ɨpo mugandi hunɨɨtɨshe. 38Leelo nkashele ɨbhomba ɨmbombo ɨzyo ʉDaada abhomba, hwope nkashele saga muhunɨɨtɨha ɨzyo ɨyanga, ɨshi muzyɨtɨshe ɨmbombo ɨzyo. Hwi‑idala ɨlyo, ɨpo munza‑amanye huje ʉDaada ali peeka naanɨ, nanɨ ɨndi peeka nʉ Daada.” 39Ɨpo aBhayahuudi bhamo lwa bhʉmvwa ɨzyo, bhahanza hunʼkhate nantele, leelo ʉYeesu ahapulumuha mu nyoobhe zyabho.

40Ɨpo ʉYeesu ahabhala nantele hwi‑isyɨla ɨli‑isooho ɨlyɨ Yolodaani, ahafiha ɨpo ʉYoohani ahali ahubhoozya hu wandilo, ahakhala ʉhwo ɨnsiku nyishe. 41ɄYeesu lwa‑ali huhuula, abhantu abhinji bhahamʼmalila na‑ayanje bhahaga, “ɄYoohani saga ahabhombile amayele gogonti, leelo ɨnongwa zyonti ɨzyo ahali ayanga hu nongwa ya Yeesu zyɨ lyoli.” 42Ɨpo abhantu abhinji ɨbho bhahali paala bhahamʼmwɨtɨha ʉYeesu.

Currently Selected:

Yoohani 10: SBK

Highlight

Copy