Yoohani 15

ɄYeesu ali nanshi ɨzabiibu ɨyɨ lyoli

1Ɨpo ʉYeesu ahajendeelela hubhabhʉʉzye abhasundwe bhaakwe ahaga, “Anɨ ɨndi nanshi ɨzabiibu ɨyɨ lyoli ɨyo ɨhwezya amantongooni aminza, ʉDaada waanɨ ali nanshi ʉnʼnimi. 2Shila samba muuhati yaanɨ ʉwo saga wuhwezya amantongooni, ʉDaada waanɨ ahuwudumula. Leelo shila samba ʉwo wuhwezya amantongooni, ʉDaada waanɨ ahuwutenjeshezya huje wonjeelele ahwezye. 3Amwɨ muli nanshi ɨnsamba ɨzyo bhatenjesheziizye shinza, muli bhinza, pɨpo muzyɨtɨɨshe ɨmanyizyo ɨzyo nahabhamanyiziizye. 4Jendelelaji abhe peeka naanɨ, nanɨ ɨmbala‑ajendeelele abhe peeka naamwɨ. Saga mubhajiiye abhombe ɨgo gahunʼkhondeezya ʉNgʉlʉbhɨ sinta abhe peeka naanɨ, nanshi ɨsho ɨnsamba saga zibhajiiye ahwezye amantongooni sinta hwikhatiilile mu zabiibu.

5Anɨ ɨndi nanshi ɨzabiibu, amwɨ muli nanshi ɨnsamba. Ʉmuntu wa‑abha peeka naanɨ, nanɨ ɨmba peeka nawo hu habhaazyo honti, ʉyo ahayibha ahwezya amantongooni aminji, pɨpo saga mubhajiiye abhombe ga gakhondɨɨye sinta abhe peeka naanɨ. 6Ʉmuntu wowonti wa saga ali peeka naanɨ alɨngaana nanshi ʉsamba ʉwo wutaagwa na hwʉme. Ɨpo abhantu bhasebha na huwupembe mu mwoto na‑alʉngʉlɨle. 7Nkashele musyala muuhati muliinɨ na hugabhombele ɨmbombo amazwi ɨgo ɨhubhalajizya, ɨshi laabhaji hwa Daada waanɨ hohonti ɨho muhwanza, wope anza hubhapeele. 8Nkashele muhwezya amantongooni aminji, amwɨ muli bhasundwe bhaanɨ bhɨ lyoli. Hwi‑idala ɨlyo, munza‑abhe mulolesya ʉmwamu wa Daada waanɨ. 9Nanshi ɨsho ʉDaada waanɨ ahangɨɨne anɨ, ɨsho sha shɨɨsho nanɨ ɨmbagɨɨne amwɨ. Ɨshi jendelelaji akhale mu kʉndwa waanɨ. 10Nkashele mubhomba ɨgo gɨ‑ɨhubhalajizya, ɨpo mubha mu kʉndwa waanɨ nanshi ɨsho anɨ ɨbhomba ɨgo ʉDaada waanɨ ahandajiziizye na‑asyale mu kʉndwa waakwe.

11Ɨmbabhʉzɨɨzye ɨgo huje mujendelelaje abhe nʉ luseshelo nanshi anɨ, nantele mubhanje nʉ luseshelo ʉlugoosi tee. 12Ɨndajizyo yaanɨ yɨ‑ɨhubhalajizya ya yɨɨnɨ, ‘Gananaji nanshi ɨsho anɨ ɨmbagɨɨne amwɨ.’ 13Ʉmuntu ʉyo ahubhafwɨla abhamanyani bhaakwe, ali nʉ kʉndwa ashile ʉkʉndwa ʉwɨ waaji wonti. 14Nkashele mubhomba ɨgo gɨ‑ɨmbalajiziizye, mubha bhamanyani bhaanɨ. 15Ahwande ɨshi, saga ɨnza hubhakwizye nantele huje bhakalwe bhaanɨ, pɨpo ʉnʼkalwe saga amanya ɨgo ʉnʼgoosi waakwe abhomba. Leelo amwɨ ɨnza hubhakwizye bhamanyani bhaanɨ, pɨpo ɨmbabhʉzɨɨzye gonti ɨgo ʉDaada waanɨ ahambʉzɨɨzye anɨ. 16Saga mwɨmwɨ mwahansaluuye anɨ, lyoli nɨɨnɨ nahabhasaluuye amwɨ abhe bhasundwe bhaanɨ huje mwezye amantongooni ga saga gamaliha dumu. Nkashele mubhombe ɨsho, gonti ɨgo mulaabha ashilile hwi‑itaawa lyanɨ, wope ʉDaada waanɨ anza hubhapeele. 17Ɨshi ɨhubhalajizya amwɨ huje, gananaji.”

Abhantu abha mu nsi bhahubhaviitilwa abhasundwe bha Yeesu

18ɄYeesu ahajendeelela hubhabhʉʉzye abhasundwe bhaakwe ahaga, “Nkashele abhantu abhanjɨ bhahubhaviitilwa amwɨ, manyaji huje bhahatalile nasʉʉti humviitilwe anɨ. 19Nkashele mwabhanga bhantu bha mu nsi ʉmu, ɨpo abhantu ɨbho handɨ bhahubhagana nanshi ɨsho bhahubhagana abhantu bhaabho. Leelo amwɨ saga muli bha mu nsi ʉmu, pɨpo ɨmbasaluuye afume mu nsi ʉmu, sha shɨɨsho abhantu abha mu nsi ʉmu bhahubhaviitilwa. 20Mugandi ahwɨwe ɨgo nahabhabhʉzɨɨzye huje, ‘Ʉnʼkalwe saga nʼgoosi ashile ʉmwɨnɨ waakwe.’ Nkashele bhahunjɨmvya anɨ, bhahayihubhayɨmvya naamwɨ. Leelo nkashele bhahuzyɨtɨha ɨmanyizyo zyanɨ, bhahayihuzyɨtɨha nɨ zyenyu. 21Leelo bhahayibha bhahubhabhombela gonti ɨgo hu nongwa ya huje amwɨ muli bhasundwe bhaanɨ, nantele pɨpo saga bhamʼmɨɨnye ʉyo ahansonteleziizye. 22Nkashele saga nɨnzaga na‑ayanje nabho, ɨpo saga bhabhanga nɨ mbiibhi. Leelo ɨshi ɨnjanjile nabho, ɨshi saga bhabhajiiye ahwiyʉʉmɨle huje saga bhali nɨ mbiibhi. 23Ʉmuntu wowonti ʉyo ahumviitilwa anɨ, ahumʼviitilwa yʉ Daada waanɨ. 24Ɨmbombile amayele ɨgo ʉmuntu ʉwɨnjɨ saga alɨnjɨle abhombe. Nkashele saga bhagalolaga, saga bhabhanga nɨ mbiibhi. Leelo ɨshi bhagalolile gonti ɨgo ɨmbombile, peeka nɨ‑ɨsho bhasɨɨle bhahumviitilwa anɨ, nantele bhahumʼviitilwa nʉ Daada waanɨ. 25Ɨga gabhombɨɨshe huje amazwi ɨgo gasimbwilwe mu Nsimbo ɨMfinjile gabhombeshe, pɨpo gasimbwilwe huje, ‘Bhahamvitiliilwe sinta nongwa.’#Bhaazya ɨNsalifyo 35:19; 69:4.

26Nahayihunʼsonteelezya huliimwɨ ʉMwavwi, ʉyo yʉ Mʼpepo ʉMʼfinjile. Ʉmwene ahayihubhilulila abhantu bhonti ɨlyoli hu nongwa yaanɨ. Afuma hwa Daada waanɨ, nantele lwa waafiha huliimwɨ, ahayisimishizya ɨnongwa zyanɨ. 27Nantele, namwɨ mwahayisimishizya ɨnongwa zyanɨ, pɨpo muli peeka naanɨ afume hu wandilo.”

Currently Selected:

Yoohani 15: SBK

Highlight

Copy