Yoohani 14

ɄYeesu lidala lya‑abhale hu mwanya

1Ɨpo ʉYeesu ahajendeelela hubhabhʉʉzye abhasundwe bhaakwe huje, “Mugandi azugumile mu mooyo geenyu. Mumʼmwɨtɨshe ʉNgʉlʉbhɨ, munɨɨtɨshe naanɨ. 2Mu nyumba ya Daada waanɨ muli nʉ khalo ʉwinji. Nkashele saga zyabhanga ɨsho, handɨ ɨmbabhʉzɨɨzye. Ɨshi ɨmbala hubhalɨnganyizizye ʉkhalo. 3Lwa naabhala na hubhalɨnganyizizye ʉkhalo, nahayiweela hubheeje huje ɨpo ɨndi, namwɨ pa mubhanje. 4Namwɨ mulimɨɨnye idala ɨlyo lifiha ɨpo ɨmbala.”

5ɄToomasi ahamʼmʉzɨɨlɨzya ʉYeesu ahaga, “Wee Mwɨnɨ, atɨ saga timɨɨnye ɨpo ʉbhala. Ɨshi, tibhajiiye wɨlɨ hulimanye idala?” 6ɄYeesu ahamʼmwamula ahaga, “Anɨ ɨndi lidala, nɨ lyoli, nʉ wʉʉmi. Nʉʉmo ʉmuntu wowonti ʉyo abhajiiye ahwɨnze hwa Daada waanɨ sinta ashilile hwaliinɨ. 7Nkashele mwamanyaga anɨ, mwamʼmanyaga nʉ Daada waanɨ. Ahwande ɨshi, mumʼmɨɨnye ʉDaada waanɨ nantele munʼnolile.”

8Ɨpo ʉFilipo ahamʼmʉʉzya ahaga, “Wee Mwɨnɨ, tihulaabha ʉtilolesye ʉYise waaho. Nkashele watilolesya ʉbhala‑abhe ʉmalile gonti.” 9ɄYeesu ahamʼmwamula ahaga, “Wee Filipo, ɨhɨɨye naamwɨ hu habhaazyo honti ɨha, hwope ɨsho saga ʉmɨɨnye anɨ? Ʉmuntu wowonti ʉyo andolile anɨ, anʼnolile nʉ Daada waanɨ. Ɨshi yeenu ʉyanga huje, ‘Ʉtilolesye ʉYise waaho’? 10Wɨlɨ, saga ʉhwɨtɨha huje anɨ ɨndi peeka nʉ Daada waanɨ, wope ali peeka naanɨ? Amazwi ɨga gɨ‑ɨhubhabhʉʉzya saga ɨyanga hwi‑ikhone lyanɨ anɨ. ɄDaada waanɨ wa‑ali peeka naanɨ ya‑abhomba ɨmbombo zyonti ɨzi. 11Mwɨtɨshe ɨgo ɨyanga huje ɨndi peeka nʉ Daada waanɨ, wope ali peeka naanɨ. Leelo nkashele saga muhwɨtɨha ɨgo ɨyanga, ɨshi mwɨtɨshe amayele ɨgo ɨbhomba. 12Lyoli ɨhubhabhʉʉzya huje, ʉmuntu wowonti ʉyo ahunɨɨtɨha, ahayibha abhomba ɨmbombo ɨzyo nanɨ ɨbhomba. Nantele ahayibha abhomba nɨ ngoosi ashile ɨzyo ɨbhomba, pɨpo anɨ ɨmbala hwa Daada waanɨ. 13Hohonti ha mulaabha#14:13 Hohonti ha mulaabha Ɨpa ʉYeesu ayanga huje ʉmuntu alaabhe ahantu hohonti ɨho hahwɨtɨɨhana nʉ kʉndwe wa Ngʉlʉbhɨ. Bhaazya Maalʉko 14:36; 1 Yoohani 5:14-15. hwi‑itaawa lyanɨ, nanɨ nahayibhomba huje ʉDaada waanɨ amwamihwe. Hwi‑idala ɨlyo ʉmwamu wa Daada waanɨ wunza‑aloleshe ashilile huliinɨ nɨMwana waakwe. 14Nkashele mulaabha ahantu hohonti hwi‑itaawa lyanɨ, ɨnza‑abhombe.”

ɄYeesu ayanga hu nongwa ya hwɨnze hwa Mʼpepo ʉMʼfinjile

15ɄYeesu ahaga, “Nkashele mungɨɨne, munza‑alondolezye ɨndajizyo zyanɨ. 16Ɨshi nanɨ ɨnza hunʼnaabhe ʉDaada waanɨ huje abhapeele ʉMwavwi ʉwɨnjɨ, ʉyo ahayihubhaavwa na‑abhe peeka naamwɨ wiila. 17ɄMwavwi ʉyo yʉ Mʼpepo ʉMʼfinjile, ʉyo ya yʉʉyo ahubhilulila abhantu ɨlyoli. Abhantu bhonti ɨbho bhahunʼkhaana ʉNgʉlʉbhɨ, saga bhabhajiiye ahumʼmwambɨɨlɨle ʉMʼpepo ʉyo, pɨpo saga bhahunʼnola, nantele saga bhamʼmɨɨnye. Leelo amwɨ mumʼmɨɨnye ʉMʼpepo wa Ngʉlʉbhɨ, pɨpo akhala peeka naamwɨ, nantele ahayibha mu mooyo geenyu. 18Saga nahayihubhaleha mubheene nanshi abhaana abhapɨɨna, lyoli nahayɨnza nantele huliimwɨ. 19Hasyalile habhaazyo hashe ɨho abhantu saga bhahayihundola nantele, lyoli amwɨ mwahayihundola, pɨpo anɨ ɨndi mwʉmi, namwɨ mwahayibha bhʉʉmi. 20Isiku ɨlyo, mwahayimanya huje anɨ ɨndi peeka nʉ Daada waanɨ, namwɨ muli peeka naanɨ, nanɨ ɨndi peeka naamwɨ. 21Ʉmuntu wa‑ahwambɨɨlɨla ɨndajizyo zyanɨ na huzilondolezye, ʉyo wa‑angɨɨne. Ʉmuntu ʉyo wa‑angɨɨne, wope ʉDaada waanɨ anza hunʼgane. Nanɨ ɨnza hunʼgane na hwibhonesye hwa mwene.”

22Ɨpo ʉnʼsundwe ʉmo wa bhahagaga Yuuda wa saga ahali yʉ Yuuda Sikalyoti, ahamʼmʉzɨɨlɨzya ʉYeesu ahaga, “Wee Mwɨnɨ, zibhala‑abhe wɨlɨ huje ʉnza hwilolesye huliitɨ ɨsho shʉ‑ʉli, leelo saga hwa bhantu abhanjɨ bhonti?” 23ɄYeesu ahamʼmwamula ahaga, “Ʉmuntu wowonti ʉyo angɨɨne anɨ, ahayibha abhomba ɨndajizyo zyanɨ, nʉ Daada waanɨ anza hunʼgane. Anɨ nʉ Daada waanɨ tahayɨnza hwa mwene, nantele tahayikhala peeka nawo. 24Leelo ʉmuntu wowonti ʉyo saga angɨɨne anɨ, saga abhomba ɨmbombo ɨzyo ɨhunʼnajizya. Ɨndajizyo ɨzyo ɨhubhalajizya saga zyanɨ, lyoli zifuma hwa Daada waanɨ wa‑ahansonteleziizye huliimwɨ.

25Ɨmbabhʉzɨɨzye gonti ɨgo lwɨ‑ɨnsɨɨle ɨkhala peeka naamwɨ. 26Leelo ʉMwavwi ʉyo hwa huje, ʉMʼpepo ʉMʼfinjile ʉyo ʉDaada waanɨ ahayihunʼsonteelezya huliimwɨ hwi‑itaawa lyanɨ, ʉyo ahayihubhamanyizya na hubhiizusye gonti ɨgo nahabhabhʉzɨɨzye. 27Lwɨ‑ɨsogola, ɨhubhaleshela ʉtengaanu waanɨ mu mooyo geenyu. Ʉtengaanu ʉwo saga wuli nanshi ʉwo wufuma hwa bhantu ɨbho bhahunʼkhaana ʉNgʉlʉbhɨ. Mugandi azugumile mu mooyo geenyu, nantele mugandi ahwogope hohonti. 28Mwʉmvwɨzye ɨgo ɨmbabhʉzɨɨzye huje, ‘Ɨmbala, leelo nahayɨnza nantele huliimwɨ.’ Nkashele lyoli mungɨɨne, mwabhanga museshela ahwʉmvwe huje ɨmbala hwa Daada waanɨ, pɨpo ʉDaada waanɨ nʼgoosi hunshile anɨ. 29Ɨmbabhʉzɨɨzye gonti ɨgo sha gasɨɨle afumile, huje nkashele gafumila, munza hunɨɨtɨshe. 30Saga ɨmbajiiye ayanje naamwɨ hu habhaazyo ahatali, pɨpo ʉSeetano wa‑ali nʼgoosi wɨ nsi ɨnɨ ahwɨnza huhate. Hwope ɨsho saga ali ni‑ikhone huliinɨ. 31Ɨbhomba gonti ɨga nanshi ɨsho ʉDaada waanɨ ahandajiziizye huje ɨmbombe, huje abhantu bhonti bhamanye huje ɨnʼgɨɨne. Ɨshi, ɨmɨɨlɨli huje tisogole ɨpa.”

Currently Selected:

Yoohani 14: SBK

Highlight

Copy