Yoohani 13

ɄYeesu ahubhasamvya amanama abhasundwe bhaakwe

1Hu habhaazyo ɨho ɨshikulukulu ɨshɨ Paasaka shipalamiiye, ʉYeesu ahamɨɨnye huje ahabhaazyo haakwe hafishile aha‑asogole mu nsi ʉmu aweele hwa Yise waakwe. Hu habhaazyo honti lwa‑ahali mu nsi ʉmu, ahabhagɨɨne abhantu bhaakwe ɨbho bhahamʼmwɨtɨɨshe, nantele ahalolesiizye hubhagane afishe hu malishilo.

2ɄYeesu na bhasundwe bhaakwe bhahakhala alye ɨshalye ɨsha nalyabheela. Hu habhaazyo ɨho, ʉSeetano ahali atʉʉshɨle mu mwoyo gwa Yuuda, ʉmwana wa Siimoni Sikalyoti, huje anʼsambushile ʉYeesu. 3ɄYeesu ahamɨɨnye huje ʉYise waakwe ahamʼpiiye ikhone ɨlya huvilongozye ɨvintu vyonti, nantele ahamɨɨnye huje ahafumile hwa Ngʉlʉbhɨ na huje ahayiweela hwa Ngʉlʉbhɨ. 4Ɨpo ʉYeesu ahaleha alye, ahɨmɨɨlɨla, ahaawula ɨnkanzu yaakwe, aheega itawulo na hwipinye mu nʼsana. 5Aheega ikalaayi na‑abhɨɨshe amɨnzɨ. Ɨpo ahanda hubhasamvye amanama#13:5 hubhasamvye amanama Ɨpa ʉYeesu abhomba ɨmbombo ɨyo abhakalwe bhahabhombaga hwa bhagoosi bhaabho. abhasundwe bhaakwe na hugasyʉmʉle ni‑itawulo ɨlyo ahahwipinyile.

6ɄYeesu lwa waafiha ɨpo ʉSiimoni Peeteli ahali, ʉPeeteli ahamʼmʉzɨɨlɨzya ahaga, “Wee Mwɨnɨ, wɨlɨ, ʉhwanza ʉnsamvye anɨ amanama gaanɨ?” 7ɄYeesu ahamʼmwamula ahaga, “Ɨlyo anɨ ɨhulibhomba, aawe saga ʉmɨɨnye ɨshi, leelo wahayihulimanya pamandɨ.” 8ɄPeeteli ahamʼmʉʉzya ahaga, “Saga ʉbhajiiye hunsamvye dumu amanama gaanɨ!” ɄYeesu ahamʼmwamula ahaga, “Nkashele saga ɨhusamvya aawe, saga ʉbhajiiye abhe peeka naanɨ nantele.” 9Ɨpo ʉSiimoni Peeteli ahamʼmwamula ahaga, “Wee Mwɨnɨ, nkashele zili ɨsho, ɨshi ʉgandi hunsamvye amanama geene, leelo ʉnsamvye na makhono peeka ni‑itwe.” 10ɄYeesu ahamʼmwamula ahaga, “Ʉmuntu ʉyo ayoojile, saga ahwanziwa ahwoje nantele, lyoli asamvye amanama lwene. Ʉmuntu ʉyo abha mwinza. Amwɨ muli bhinza, leelo ʉmo muuhati yeenyu saga mwinza.” 11ɄYeesu ahali amʼmɨɨnye ʉmuntu ʉyo ahayihunʼsambushila mu makhono ga bhalʉgʉ, sha shɨɨsho ahajile, “Ʉmo muuhati yeenyu saga mwinza.”

12ɄYeesu lwa waamala hubhasamvye amanama abhasundwe bhaakwe, ahakwata ɨnkanzu yaakwe, ahaweela nantele akhale ɨpo ahakhɨɨye pa shalye, ahabhabhʉzɨɨlɨzya ahaga, “Wɨlɨ, muzyagɨɨnye ɨzyo ɨmbabhombɨɨye amwɨ? 13Amwɨ muhunkwizya anɨ huje, ‘Mʼmanyizyi,’ nantele muhunkwizya huje, ‘Mwɨnɨ.’ Namwɨ muyanga lyoli, pɨpo anɨ ɨndi Mʼmanyizyi nantele ɨndi Mwɨnɨ weenyu. 14Ɨshi anɨ wɨ‑ɨndi Mʼmanyizyi weenyu nantele Mwɨnɨ weenyu ɨmbasamviizye amwɨ amanama geenyu, ɨshi shɨɨsho namwɨ mukhondɨɨye asamvyanye amanama geenyu. 15Ɨmbalanjile ɨshifwani huje namwɨ mubhombelanaje nanshi ɨsho anɨ ɨhubhabhombela amwɨ. 16Lyoli ɨhubhabhʉʉzya, ʉnʼkalwe saga nʼgoosi ashile ʉmwɨnɨ waakwe, nantele wa‑asontelezewa saga nʼgoosi ashile wa‑anʼsonteleziizye. 17Nkashele mugamɨɨnye gonti ɨgo, ɨshi ʉNgʉlʉbhɨ anza hubhasaye nkashele muhugabhombela ɨmbombo ɨgo.

18Saga ɨyanga ɨnongwa zyenyu mwenti, pɨpo ɨmbamɨɨnye afume hu wandilo abhantu ɨbho ɨmbasaluuye abhe bhasundwe bhaanɨ. Leelo ɨnjanjile ɨgo huje gabhombeshe ɨgo gasimbwilwe mu Nsimbo ɨMfinjile huje, ‘Ʉmʼmanyani waanɨ ʉyo ahaliiye ɨshalye peeka naanɨ, agaluhɨɨne abhe nʼnʉgʉ waanɨ.’#Bhaazya ɨNsalifyo 41:9. 19Ɨhubhabhʉʉzya gonti ɨga hu habhaazyo ɨho gasɨɨle afumile, huje nkashele gafumila, munza hwɨtɨshe huje lyoli anɨ nɨ Mʼfyʉli. 20Lyoli ɨhubhabhʉʉzya, ʉmuntu wowonti ʉyo ahumʼmwambɨɨlɨla ʉyo ɨnʼsonteleziizye, ahunambɨɨlɨla nɨɨnɨ, wope ʉyo ahunambɨɨlɨla anɨ, ahumʼmwambɨɨlɨla yʉ Daada waanɨ ʉyo ahansonteleziizye.”

ɄYeesu ayanga hu nongwa ya muntu wa‑ahayihunʼsambushila

(Mataayo 26:20-25; Maalʉko 14:17-21; Luuka 22:21-23)

21Hu habhaazyo ɨho ʉYeesu ayanga ɨgo, ahazugumila tee mu mwoyo gwakwe, ahayanga pa pazelu ahaga, “Lyoli ɨhubhabhʉʉzya huje ʉmo mwaliimwɨ ahayihunsambushila hu bhalʉgʉ.” 22Ɨpo abhasundwe bhaakwe bhahanda ahwenyane bhɨɨbho hu bhɨɨbho, pɨpo saga bhahamɨɨnye huje ahunʼnyanga yʉ naanu. 23Pahali nʉ nʼsundwe ʉmo mu bhasundwe bhaakwe ʉyo ʉYeesu ahanʼgɨɨne tee. Ʉmwene ahakhɨɨye pa pɨɨpɨ nʉ Yeesu hu habhaazyo ɨho ali alye. 24Ɨpo ʉSiimoni Peeteli ahamʼpalisya ʉnʼsundwe ʉyo huje, “Ʉmʼmʉzɨɨlɨzye ʉYeesu aje, ahunʼnyanga yʉ naanu paahati yeetu.” 25Ɨpo ʉnʼsundwe ʉla ahasejeezya itwe lyakwe pa pɨɨpɨ nʉ Yeesu, ahamʼmʉzɨɨlɨzya ahaga, “Wee Mwɨnɨ, yʉ naanu paahati yeetu ʉyo ahayihusambushila hwa bhalʉgʉ?” 26ɄYeesu ahamʼmwamula ahaga, “Ya yʉʉla ʉyo ɨnza humʼpeele ʉtʉnji ʉlwɨ ntogito lwa natobheezya mu masʉnyu.” Ɨpo ʉYeesu aheega ʉtʉnji ʉlwɨ ntogito, ahatobheezya, ahamʼpeela ʉYuuda, ʉmwana wa Siimoni Sikalyoti. 27ɄYuuda lwa wambɨɨlɨla ʉtʉnji ʉlwɨ ntogito, nalinaali ʉSeetano ahanʼtʉʉha. Ɨpo ʉYeesu ahamʼmʉʉzya ʉYuuda ahaga, “Wee Yuuda, gabhombeshe nalinaali ɨgo ʉhwanza abhombe!” 28Leelo abhantu bhonti ɨbho bhahali paala bhalya ɨshalye, nʉʉmo wa‑ahamɨɨnye huje yeenu ʉYeesu ahumʼmʉʉzya ʉYuuda nanshi ɨsho. 29Bhamo bhahasɨɨbhaga huje ʉYeesu ahamʼmʉzɨɨzye ʉYuuda huje abhale akale ɨvyo vyahali vihwanziwa hu shikulukulu. Abhanjɨ bhahasɨɨbhaga huje ʉYeesu ahali ahunʼnajizya ʉYuuda hubhapeele ɨmpɨɨya nyishe abhapɨɨna, hu nongwa ya huje ʉYuuda ya‑ahali abhuta ɨmbuguulu ɨyɨ mpɨɨya. 30ɄYuuda lwa wambɨɨlɨla ʉtʉnji ʉlwo ʉlwɨ ntogito, nalinaali ahafuma hwʉnzɨ. Hu habhaazyo ɨho, hwahali nʉsiku.

ɄYeesu ahubhapeela abhasundwe bhaakwe ɨndajizyo ɨnjenu

31ɄYuuda lwa waafuma hwʉnzɨ, ʉYeesu ahabhabhʉʉzya abhasundwe bhaakwe ahaga, “Ɨshi anɨ nɨMwana wa Muntu ʉmwamu waanɨ wupalamiiye abhoneshe pa pazelu, nantele ʉmwamu wa Ngʉlʉbhɨ wunza‑abhoneshe pa pazelu ashilile mu mbombo zyanɨ. 32Ɨshi ʉNgʉlʉbhɨ anza‑amwamihwe ashilile anɨ, wope anza humwamishe anɨ ashilile hwa mwene yʉʉyo. Anza‑abhombe ɨsho sinta akhaabhe. 33Amwɨ mubhaana bhaanɨ, ɨnza‑abhe peeka naamwɨ hu habhaazyo hashe lwene. Nanshi ɨsho nahabhabhʉzɨɨzye abhalongozi bha Bhayahuudi, shɨɨsho ɨhubhabhʉʉzya naamwɨ ɨshi huje, munza hunanze leelo saga mubhajiiye ahwɨnze ʉhwo ɨmbala. 34Leelo ɨshi ɨhubhapeela ɨndajizyo ɨnjenu, ɨhubhalajizya huje, ‘Mugananaje nanshi ɨsho anɨ ɨmbagɨɨne amwɨ, namwɨ mugananaje shɨɨsho.’#Bhaazya Mataayo 22:36-40; Maalʉko 12:28-33. 35Nkashele muganana, ɨpo abhantu bhonti bhanza‑amanye huje amwɨ muli bhasundwe bhaanɨ.”

ɄYeesu akuwa huje, ʉPeeteli abhala hunʼkhaane hataatu

(Mataayo 26:31-35; Maalʉko 14:27-31; Luuka 22:31-34)

36Ɨpo ʉSiimoni Peeteli ahamʼmʉzɨɨlɨzya ʉYeesu ahaga, “Wee Mwɨnɨ, ʉbhala hwoshi?” ɄYeesu ahamʼmwamula ahaga, “Ʉhwo ɨmbala aawe saga ʉbhajiiye hundondolezye ɨshi, leelo wahayihundondolezya pamandɨ.” 37ɄPeeteli ahamʼmʉʉzya ahaga, “Wee Mwɨnɨ, yeenu anɨ saga ɨmbajiiye hulondolezye ɨshi? Anɨ ɨndi nzɨɨla afwe hu nongwa yaaho!” 38ɄYeesu ahamʼmwamula ahaga, “Wee Peeteli, wɨlɨ, lyoli ʉnza hwifumye ʉwʉʉmi waaho afwe hu nongwa yaanɨ? Lyoli ɨhubhʉʉzya, ɨhanda shɨ‑ɨsɨɨle agʉgʉlɨɨje, ʉnza‑abhe wahaana anɨ hataatu huje saga ʉmɨɨnye anɨ.”

Currently Selected:

Yoohani 13: SBK

Highlight

Copy