Yoohani 11

Afwe hwa Laazalo

1Ahalɨɨho ʉmuntu ʉmo ʉyo itaawa lyakwe ahali yʉ Laazalo, ʉyo ahali mʼminu. Ʉmuntu ʉyo ahali akhala hu shipanga ɨshɨ Besaniya peeka na bhadoodo bhaakwe ʉMaliya nʉ Maalita. 2ɄMaliya ʉyo ʉyɨlʉmbʉ waakwe ʉLaazalo ahali mʼminu, ya yʉʉyo ahamʼpotoziizye ʉMwɨnɨ ɨnyemba zya zinunshila na hunʼsyʉsyʉte shinza mu manama ni‑isisi lyakwe.#Bhaazya Yoohani 12:1-8. 3Ɨpo ʉMaliya nʉ Maalita bhahasonteelezya ɨntumi hwa Yeesu bhahaga, “Wee Mwɨnɨ, tihubhʉʉzya huje ʉmʼmanyani waaho ʉLaazalo mʼminu.” 4Hu habhaazyo ɨho ʉYeesu ayambɨlɨɨye ɨntumi ɨzyo, ahayanga ahaga, “Ʉbhinu ʉwo saga wa hunʼgoje ʉLaazalo, leelo wa‑alolesye ʉmwamu wa Ngʉlʉbhɨ. Abhinile huje anɨ wɨ‑ɨndi Mwana wa Ngʉlʉbhɨ ɨnambɨɨlɨle ʉmwamu hu bhantu ashilile ʉbhinu ʉwo.” 5ɄYeesu ahanʼgɨɨne tee ʉMaalita na bhanakwabho, ʉMaliya nʉ Laazalo.

6Hwope ɨsho hu habhaazyo ɨho ʉYeesu ayʉmvwɨzye huje ʉLaazalo mʼminu, ɨnsiku zibhɨɨlɨ zyahashilile sha‑asɨɨle ali papaala ɨpo ahali. 7Ɨpo lwa zyashila ɨnsiku zibhɨɨlɨ, ʉYeesu ahabhabhʉʉzya abhasundwe bhaakwe ahaga, “Saali hu mukowa ʉgwɨ Yudeeya nantele.” 8Abhasundwe bhaakwe bhahamʼmwamula bhahaga, “Wee Mʼmanyizyi, shɨnɨɨshi lwene abhalongozi bha Bhayahuudi bhahanzaga hukhome na mawe huje ʉfwe, wɨlɨ, yeenu ʉhwanza abhale nantele ʉhwo?” 9ɄYeesu ahabhaamula ahaga, “Wɨlɨ, ʉsanya saga wuli na masaala ishʉmi na gabhɨɨlɨ? Nkashele ʉmuntu ajenda mu habhaazyo ɨho, saga agabʉmɨla ɨshinama shaakwe, pɨpo ʉlukhozyo luhumʼmwavwa alole ɨvintu vyonti. 10Leelo ʉmuntu ʉyo ajenda nʉsiku agabʉmɨla, pɨpo ʉlukhozyo ʉlwa humʼmwavwe alole shinza nalumo.”

11ɄYeesu lwa waamala ayanje ɨgo, ahabhabhʉʉzya abhasundwe bhaakwe ahaga, “Ʉmʼmanyani weetu ʉLaazalo agonile, leelo ɨmbala hunʼdaamuzye.” 12Ɨpo abhasundwe bhaakwe bhahamʼmwamula bhahaga, “Wee Mwɨnɨ, nkashele agonile, anza‑adaamushe na‑apone.” 13Ɨpa ʉYeesu ahali ayanga huje ʉLaazalo afwiye, leelo abhasundwe bhaakwe bhahali bhasɨɨbha huje ahali ayanga huje ʉLaazalo agonile ʉtulo.

14Ɨpo ʉYeesu ahabhabhʉʉzya pa pazelu abhasundwe bhaakwe ahaga, “ɄLaazalo afwiye. 15Leelo anɨ ɨnsʉngwɨlwe hu nongwa ya‑aje saga nahali hu habhaazyo ɨho ʉLaazalo afwa huje munɨɨtɨshe. Ɨshi, saali hwa mwene.” 16Ʉnʼsundwe ʉmo, ʉToomasi ʉyo bhahali bhahunʼkwizya itaawa ɨlyɨnjɨ Lipasa, ahabhabhʉʉzya abhasundwe abhamwabho ahaga, “Saali naatɨ huje tifwe peeka nʉ Yeesu.”

ɄYeesu ali ni‑ikhone ɨlya hubhazyʉsye abhafwe

17Ɨshi hu habhaazyo ɨho ʉYeesu lwa waafiha hu shipanga ɨshɨ Besaniya, ahamʼmwaga ʉLaazalo amalile ɨnsiku zinɨ mu nkʉngwa. 18Ɨshipanga ɨshɨ Besaniya shahali ɨkilomeeta zitaatu lwene afume mwi‑ibooma ɨlyɨ Yelusaleemu. 19ABhayahuudi abhinji afume ʉhwo bhahali bhɨnzɨle hu Besaniya hunʼjinjizye ʉMaalita nʉ Maliya hu nongwa ɨya‑afwɨlwe nʉ yɨlʉmbʉ waabho ʉLaazalo. 20Ɨshi ʉMaalita lwa wʉmvwa huje ʉYeesu ali mwi‑idala ahwɨnza, ahafuma hwʉnzɨ na‑abhale humʼmwambɨɨlɨle, leelo ʉMaliya ahasagala mu nyumba. 21ɄMaalita ahamʼmʉʉzya ʉYeesu ahaga, “Wee Mwɨnɨ, nkashele wabhanga ɨpa, ʉyɨlʉmbʉ waanɨ handɨ saga afwiye. 22Leelo hwope ɨsho ɨmɨɨnye huje ʉNgʉlʉbhɨ anza hupeele hohonti ɨho ʉhunʼnaabha.”

23Ɨpo ʉYeesu ahamʼmwamula ʉMaalita ahaga, “Ʉyɨlʉmbʉ waaho anza‑azyʉshe na‑abhe mwʉmi nantele.” 24ɄMaalita ahamʼmwamula ahaga, “Wee Mwɨnɨ, ɨmɨɨnye huje ahayizyʉha na‑abhe mwʉmi nantele pi‑isiku ɨlya hu malishilo wɨ nsi ɨnɨ, isiku ɨlyo ʉNgʉlʉbhɨ ahayihubhazyʉsya abhafwe bhonti.” 25ɄYeesu ahamʼmwamula ahaga, “Anɨ nɨɨnɨ ɨhubhazyʉsya abhantu huje bhabhe bhʉʉmi nantele. Ʉmuntu wowonti ʉyo ahunɨɨtɨha anɨ hwope nkashele waafwa mu nsi ʉmu, anza‑abhe mwʉmi. 26Wope ʉmuntu ʉyo ali mwʉmi, nantele ahunɨɨtɨha anɨ, saga anza‑afwe dumu. Wɨlɨ, ʉhwɨtɨha ɨgo?” 27ɄMaalita ahamʼmwamula ahaga, “Lyoli Mwɨnɨ, ɨhwɨtɨha huje aawe we Mʼfyʉli, ʉMwana wa Ngʉlʉbhɨ, wa‑ahwɨnza mu nsi.”

ɄYeesu azonda

28ɄMaalita lwa wayanga ɨsho, ahabhala hunʼkwizye hu mfiso ʉnʼdoodo waakwe wa bhahagaga Maliya, ahamʼmʉʉzya ahaga, “ɄMʼmanyizyi ali hwʉnzɨ ahukwizya.” 29ɄMaliya lwa wʉmvwa ɨzyo, ahabhʉʉha nalinaali na‑abhale ɨpo ahali ʉYeesu. 30ɄYeesu ahali asɨɨle atʉʉshe mu shipanga ɨshɨ Besaniya, lyoli ahali paala ɨpo ʉMaalita ahabhalile humʼmwambɨɨlɨle. 31Abhantu bhaala, ɨbho bhahabhalile hunʼjinjizye ʉMaliya, lwa bhanʼnola abhʉʉha na‑afume hwʉnzɨ, ɨpo bhahanda humʼmɨnjɨɨlɨle, pɨpo bhahali bhasɨɨbha huje ʉMaliya abhala hu nkʉngwa huula alile.

32ɄMaliya lwa waafiha ɨpo ʉYeesu ahali, ahasugamila pa manama gaakwe, ahamʼmʉʉzya ahaga, “Wee Mwɨnɨ, nkashele wabhanga ɨpa, ʉyɨlʉmbʉ waanɨ handɨ saga afwiye.” 33ɄYeesu lwa wanʼnola ʉMaliya alila na bhantu ɨbho bhahɨnzɨle nawo bhope bhalila, ahazugumila tee mu mwoyo gwakwe. 34Ɨpo ʉYeesu ahabhabhʉʉzya ahaga, “Mwahanʼsyɨlɨle hwoshi?” Bhahamʼmwamula bhahaga, “Wee Mwɨnɨ, saali tiʼlolesye.” 35ɄYeesu ahazonda. 36Ɨpo abhantu ɨbho bhahɨnzɨle hwi‑ifuuto bhahaga, “Enya ɨsho ahanʼgɨɨne ʉLaazalo!” 37Leelo bhamo bhahaga, “Ʉmuntu ʉnʉ ya yʉʉyo ahamʼponiizye ʉnʼtonko, ɨshi yeenu saga wabhombaga lyolyonti huje ʉLaazalo asahaafwe?”

ɄYeesu ahunʼzyʉsya ʉLaazalo

38ɄYeesu lwa‑ali sha‑azugumiiye mu mwoyo gwakwe, ahafiha pa nkʉngwa ɨpo bhahanʼsyɨlɨle ʉLaazalo. Ɨnkʉngwa ɨla lyahali ligwenya ɨlyo bhahalikwinshiiye ni‑iwe igoosi hu lyango. 39ɄYeesu ahabhabhʉʉzya abhantu ɨbho bhahali paala ahaga, “Libhungulusyi iwe ɨlyo hu lyango.” Ɨshi ʉMaalita ʉyo ahali mwanakwabho ʉyo ahafwiye ahamʼmwamula ahaga, “Wee Mwɨnɨ, ʉmʼvimba gwakwe gubhala‑abhe gwandile anunshe pɨpo zishilile ɨnsiku zinɨ afume hu habhaazyo ɨho tinʼsyɨlɨle.” 40ɄYeesu ahamʼmʉʉzya ʉMaalita ahaga, “Wɨlɨ, saga ɨʼbhʉzɨɨzye huje nkashele ʉhwɨtɨha, ʉnza‑alole ʉmwamu wa Ngʉlʉbhɨ?” 41Ɨpo bhahalibhungulusya iwe liila. ɄYeesu aheenya hu mwanya, ahapuuta hwa Ngʉlʉbhɨ ahaga, “Wee Daada, ɨhusalifya, pɨpo ʉyʉmvwɨzye ɨmpuuto zyanɨ. 42Ɨmɨɨnye huje ʉhunʉmvwa ahabhaazyo honti, leelo ɨyanga ɨga hu nongwa yɨ mpʉga ya bhantu ɨbha, huje bhɨɨtɨshe huje weewe ʉnsonteleziizye.” 43Lwa wayanga ɨsho, ʉYeesu ahanʼkwizya hwi‑izwi igoosi ahaga, “Wee Laazalo, fuma hwʉnzɨ!” 44Ɨpo ʉyo ahali afwiye ahafuma hwʉnzɨ. Amanama na makhono gaakwe gazyʉngʉzɨɨwe ni‑ikɨbha lya bhahanʼsyɨlɨɨye. Nantele, ahali na henda ɨho bhahamʼpinyile hu maaso. Ɨshi ʉYeesu ahabhabhʉʉzya huje, “Mʼmwawuli ʉmwenda ʉgwo na hunʼneshe ajendaje.”

Abhalongozi bha Bhayahuudi bhahwanza idala ɨlya hunʼgoje ʉYeesu

(Mataayo 26:1-5; Maalʉko 14:1-2; Luuka 22:1-2)

45ABhayahuudi abhinji ɨbho bhahɨnzɨle hunʼzinzye ʉMaliya lwa bhagalola ɨgo ʉYeesu abhombile, bhahamʼmwɨtɨha. 46Leelo aBhayahuudi bhamo bhahabhala hwa Bhafalisaayo na hubhabhʉʉzye ɨgo ʉYeesu abhombile. 47Ɨpo abhalongozi bha bhasayi bha Ngʉlʉbhɨ na Bhafalisaayo bhahabhʉngaana pa lubhʉngaano ʉlwo bhahagaga ikoloti,#11:47 ikoloti Bhaazya izwi Ikoloti hu Ngalulanyo ɨyɨ Mazwi aMajenu hu malishilo wɨ shitaabu ɨshi. bhahabhʉzɨlɨzanya bhɨɨbho hu bhɨɨbho bhahaga, “Wɨlɨ, tibhombe yeenu? Enya, ʉmuntu ʉnʉ abhomba amayele aminji. 48Nkashele tihunʼneha lwene huje abhe abhomba amayele ɨgo, abhantu bhonti bhanza humʼmwɨtɨshe. ABhaluumi bhahayɨnza na huyinangaanye ɨnsi yeetu nɨ nyumba ɨmfinjile ɨya Ngʉlʉbhɨ.”

49Ɨpo ʉmo mu bhagoosi ʉyo itaawa lyakwe bhahagaga Kayaafa, wa‑ahali nʼsayi nʼgoosi wa Ngʉlʉbhɨ ʉmwaha ʉgwo, ahabhabhʉʉzya ahaga, “Amwɨ saga mumɨɨnye lyolyonti! 50Wɨlɨ, saga mumɨɨnye huje hwashi huliimwɨ ʉmuntu weeka afwe hu nongwa ya bhantu bhonti ashile huje ɨnsi yonti ɨyaje?” 51ɄKayaafa saga ahayanjile ɨgo hu nongwa yɨ kʉndwe waakwe yʉʉyo. Leelo hu nongwa ya huje ahali nʼsayi nʼgoosi mu mwaha ʉgwo, ahali akuwa huje ʉYeesu ahayifwa hu nongwa ya Bhayahuudi. 52Nantele ʉYeesu saga anza‑afwe hu nongwa ya Bhayahuudi bheene, leelo hu nongwa ya hubhabhʉngaanye abhaana bha Ngʉlʉbhɨ ɨbho bhanyampɨɨne mu nsi ɨzyɨnjɨ huje bhabhe peeka.

53Ɨpo ahwande isiku ɨlyo, abhalongozi bha Bhayahuudi bhahanda asɨɨbhe idala ɨlya hunʼgoje ʉYeesu. 54Afumilane nɨ‑ɨsho, ʉYeesu ahaleha ajende pa pazelu hu mukowa ʉgwɨ Yudeeya, ɨpo ahasogola na‑abhale mu pɨɨpɨ na hu lʉʉgwa, mwi‑ibooma ɨlyɨ Efulayimu na‑akhale huhuula peeka na bhasundwe bhaakwe.

55Ɨshikulukulu ɨsha Bhayahuudi ɨshɨ Paasaka shahali mu pɨɨpɨ. Ɨpo abhantu abhinji bhahafuma mu mabooma gaabho, abhale hu Yelusaleemu huje bhahwisangalusye#11:55 bhahwisangalusye ɄNgʉlʉbhɨ ahabhalajiziizye abhantu bhaakwe ahwisangalusye hu habhaazyo ɨho ɨshikulukulu ɨshɨ Paasaka shisɨɨle afishe huje bhabhe bhinza mu maaso gaakwe. Bhaazya 2 ɨMbalilo 30:17-19. hu habhaazyo ɨho ɨshikulukulu shisɨɨle afishe. 56Ɨpo abhantu bhahajendeelela humʼmwanze ʉYeesu. Hu habhaazyo ɨho bhabhʉngɨɨne peeka mu lubhaga lwɨ nyumba ɨmfinjile ɨya Ngʉlʉbhɨ, bhahanda abhʉzɨlɨzanye bhɨɨbho hu bhɨɨbho bhahaga, “Amwɨ musɨɨbha wɨlɨ? Wɨlɨ, ʉmuntu ʉyo ahwɨnza hu shikulukulu awe saga ahwɨnza?” 57Abhalongozi bha bhasayi na Bhafalisaayo bhahalajiziizye huje ʉmuntu wowonti ʉyo amɨɨnye ʉhwo ʉYeesu ali, abhale hubhabhʉʉzye huje bhanʼkhate.

Currently Selected:

Yoohani 11: SBK

Highlight

Copy