YouVersion Logo
Search Icon

ƗMbombo ɨzya Bhasontwa 9

9
ɄSauli ahumʼmwɨtɨha ʉYeesu
1Mu habhaazyo ɨho, ʉSauli ahajendelelaga hubhoogofye abhooziwa huje, bha saga bhaleha hunʼnondolezye ʉMwɨnɨ, anza hubhagoje. Ahabhala hwa nʼsayi ʉnʼgoosi ʉwa Ngʉlʉbhɨ, 2ahanʼnaabha huje, amʼpeele ɨkalaata ɨzya‑abhale nazyo hwa bhagoosi abhɨ nyumba ɨzya‑apuutile na‑amanyiilile ɨzya mwi‑ibooma ɨlyɨ Damesiki. Ɨkalaata ɨzyo zyahali zya humʼmwɨtɨshɨzye huje, nkashele ahumʼmwaga ʉmuntu wowonti wa‑alondolezya Idala ɨlya Mwɨnɨ ʉYeesu, abhalume awe abhashɨ, abhakʉngaje na hubhatwale hu Yelusaleemu.
3Mu nshʉʉla yaakwe ʉSauli lwa‑apalamila afishe hu Damesiki, lubhilo ʉlukhozyo ʉlugoosi afume hu mwanya lwahanʼkhozya hwonti. 4Ahagwa pa nsi, ahʉmvwa izwi lihumʼmʉʉzya liyiga, “Sauli! Sauli! Yeenu ʉhundavya?” 5ɄSauli ahabhʉzɨɨlɨzya huje, “Aawe we naanu, Mwɨnɨ?” Lyope izwi lyahaga, “Anɨ nɨ Yeesu wʉ‑ʉhundavya. 6Ɨshi, ɨmɨɨlɨla! Ʉtʉʉshe mwi‑ibooma, ʉmwo ʉnza humʼmwaje ʉmuntu ʉmo wa‑abhala hubhʉʉzye zyʉ‑ʉhwanziwa huzibhombe.”
7Abhantu bha bhahashʉʉlaga peeka nʉ Sauli bhahɨmɨɨlɨla, bhahapʉʉma myɨ, pɨpo bhope bhahalyʉmvwɨzye izwi ɨlyo, leelo saga bhahalyagɨɨnye. Nantele, saga bhahanʼnolile ʉmuntu wa‑ayanga. 8ɄSauli ahɨmɨɨlɨla. Lwa wiigula amaaso, ahega saga alola nka hamo. Abhamwabho bhahanʼkhata ɨnyoobhe na hunʼnongole, bhahanʼtwala hwi‑ibooma ɨlyɨ Damesiki. 9Ahamala ɨnsiku zitaatu sinta alole, nantele sinta alye na‑amwele nka hamo.
10Hu Damesiki ʉhwo, hwahali nʉ mwoziwa ʉmo, ʉyo itaawa lyakwe ahali yʉ Ananiya. ɄMwɨnɨ ʉYeesu ahanʼkwizya ʉAnaniya mu ndoleshelo ahaga, “Wee Ananiya!” Wope ahaga, “Mwɨnɨ, anɨ ɨndi ɨpa.” 11-12ɄMwɨnɨ ahamʼmʉʉzya huje, “Mu nyumba ya Yuuda yɨ‑ɨli mwi‑idala lya bhayiga Igolosu, muli nʉ muntu ʉwa mwi‑ibooma ɨlyɨ Taaso, ʉyo itaawa lyakwe yʉ Sauli. Ahalolile ɨndoleshelo. Mu ndoleshelo ɨyo ahanʼnolile ʉmuntu wa bhayiga Ananiya atʉʉha mu nyumba mwa‑ali huje, amʼmɨɨshɨle ɨnyoobhe, ayande alole nantele. Ɨshi, ahundaabha anɨ. Aawe sogolaga, ʉbhale mu nyumba ɨyo ɨya Yuuda. Ʉbhʉzɨɨlɨzye muula ʉmuntu ʉyo ʉSauli.”
13ɄAnaniya ahamʼmʉʉzya ahaga, “Wee Mwɨnɨ, ɨnʉmvwɨzye afume hwa bhantu bhinji ɨnongwa ɨzya muntu ʉnʉ, sha‑ahabhabhombɨɨye shibhiibhi abhooziwa bhaaho hu Yelusaleemu! 14Ɨshi alɨɨho ɨpa, nantele abhalongozi bha bhasayi bhaaho bhamʼmwɨtɨshɨɨye huje, abhakʉngaje bhonti bha bhahusʉʉbhɨla aawe.” 15Leelo, ʉMwɨnɨ ahamʼmʉʉzya ʉAnaniya ahaga, “Aawe bhalaga! Ʉmuntu ʉyo ɨnʼsaluuye aje, abhe mʼmomvi waanɨ huje, abhabhʉzyaje ɨnongwa ɨzyaliinɨ aBhaizilaeeli, bha saga Bhaizilaeeli na bhamwɨnɨ bhaabho. 16Anɨ nɨɨnɨ nahayihunʼnanga minji huje, ahwanziwa alabhe hu nongwa yaanɨ.”
17Ɨpo ʉAnaniya ahabhala, ahatʉʉha mu nyumba ɨyo ʉSauli ahali. Ahamʼmɨɨshɨla ɨnyoobhe, ahamʼmʉʉzya huje, “Sauli wʉ‑ʉli mwoziwa wamwetu! ɄMwɨnɨ ʉYeesu ansonteleziizye hwaliiwe huje, ʉyande alole, nantele ʉmʼmwambɨɨlɨle ʉMʼpepo ʉMʼfinjile. ɄYeesu ʉyo ya yʉʉyo wa‑ahaʼloleshɨɨye mwi‑idala hu habhaazyo haala lwa wahɨnzaga ɨpa.” 18Lubhilo ɨvintu vya vili nanshi amakooko vyahalagala afume mu maaso ga Sauli, ahanda alole nantele. Ahɨmɨɨlɨla, ahoozewa. 19Lwa waalya ɨshalye, ahabha ni‑ikhone.
ɄSauli ahumʼmombela ʉMwɨnɨ ʉYeesu mu Damesiki
ɄSauli ahakhɨɨye ɨnsiku nyishe peeka na bhooziwa mwi‑ibooma ɨlyɨ Damesiki. 20Lwʉlwo ahanda abhale mu nyumba ɨzya‑apuutile na‑amanyiilile, ahalʉmbɨlɨlaga ɨnongwa ɨzya Yeesu huje, “Ʉyo yʉ Mwana wa Ngʉlʉbhɨ.”#9:20 Mwana wa Ngʉlʉbhɨ Bhaazya izwi Mwana wa Ngʉlʉbhɨ hu Ngalulanyo ɨyɨ Mazwi aMajenu hu malishilo wɨ shitaabu ɨshi. 21Abhantu bhonti bha bhahamʼmwʉmvwɨzye ʉSauli, bhahaswiga tee. Bhahabhʉzɨlɨzanya bhahaga, “Bhʉlɨ, ʉmuntu ʉnʉ saga ya yʉʉnʉ ya‑ahabhalavyaga abhooziwa hu Yelusaleemu? Bhʉlɨ, ʉnʉ saga ayɨnzɨle huje, abhakʉngaje abhantu nanshi ɨbho pa Damesiki ɨpa na hubhatwale hwa bhalongozi bha bhasayi bha Ngʉlʉbhɨ?” 22Leelo ʉSauli ahonjeezya tee abhe nʼdandamazu. Nantele ahabhasimishizyaga aBhayahuudi bha bhahakhalaga hu Damesiki huje ʉYeesu yʉ Mʼfyʉli, na hubhamene.
23Lwa zyashila ɨnsiku ɨnyinji, aBhayahuudi ɨbho bhahajeehana huje, bhanʼgoje. 24Bhahamʼmwʉbhɨlaga mu malyango gi‑ibooma liila pasanya na nʉsiku huje, bhanʼgoje. Leelo, ɨnsɨɨbho zyabho ɨzya hunʼgoje zyahamʼfishila ʉSauli. 25Abhasundwe bhaakwe bhahamʼmɨɨha mwi‑iseje igoosi nʉsiku, bhahanʼshizya mwi‑idiliisha lya lyahali mu lubhaga ʉlwa mwi‑ibooma, bhahamʼmwisya panzɨ.
ɄSauli hu Yelusaleemu
26Ɨpo ʉSauli ahafiha hu Yelusaleemu, ahalɨngaga asangaane na bhooziwa. Leelo, bhonti bhahamʼmwogopaga, pɨpo saga bhahɨtɨɨshe huje, wabha mwoziwa. 27Leelo ʉBalinaaba#9:27 ʉBalinaaba Ʉnʉ ya yʉʉla wa‑asimbwilwe mu Mbombo ɨzya Bhasontwa 4:36-37. ahanʼtwala ʉSauli hwa bhasontwa bha Yeesu. Ahabhabhʉʉzya ʉSauli sha‑ahanʼnolile ʉMwɨnɨ ʉYeesu mwi‑idala ɨlya‑abhale hu Damesiki, nʉ Mwɨnɨ sha‑ahamʼmʉzɨɨzye ʉSauli. Ahabhabhʉʉzya ʉSauli sha‑ahabhalʉmbɨlɨɨye abhantu abhʉ‑ʉhwo ɨnongwa ɨzya Yeesu hu dandamazu.
28Ɨpo ʉSauli ahasyala peeka na bhasontwa bha Mwɨnɨ. Ahazyʉngʉʉlaga pa Yelusaleemu, sha‑ahubhalʉmbɨɨlɨla abhantu ɨnongwa ɨzya Mwɨnɨ ʉYeesu hu dandamazu. 29Ahayangaga na‑adaliihane na Bhayahuudi bhamo bha bhahayangaga ɨnjango ɨyɨ Shiyunaani, leelo abheene bhahalɨngaga huje, bhanʼgoje. 30Abhaholo mwa Kilisiti lwa bhaamanya ɨzyo, bhahanʼnoleezya, bhahamʼfisya hwi‑ibooma ɨlyɨ Kayisaliiya. Bhahanʼneha huje, abhalaje humwabho hwi‑ibooma ɨlyɨ Taaso.
31Mu nsiku ɨzyo, ɨshibhanza shahali nʉ tengaanu mwonti mu mukowa ʉgwɨ Yudeeya, ʉgwɨ Galilaaya nʉ gwɨ Samaliya. Abhantu abha hu shibhanza bhahakhamantanaga, na hunʼtinishe ʉMwɨnɨ. ɄMʼpepo ʉMʼfinjile ahabhagwɨzyaga ʉmwoyo, nʉ winji waabho wahonjelelaga.
ɄPeeteli ahumʼponia ʉAyineeya
32Mu habhaazyo hɨɨho ʉPeeteli ahashilaga ʉhwu nʉ‑ʉhwo, ahafiha hwi‑ibooma ɨlyɨ Liida huje, abhalamushe abhooziwa bha bhahakhalaga ʉhwo. 33Mwi‑ibooma ɨlyo ahamʼmwaga ʉmuntu wa‑afwiye hundwɨmo, ʉyo itaawa lyakwe ahali yʉ Ayineeya. Ahagonile mu shɨlɨlɨ hu habhaazyo ahɨ maaha naana. 34ɄPeeteli ahamʼmʉʉzya huje, “Aawe Ayineeya, ʉYeesu ʉKilisiti aponiizye. Ɨmɨɨlɨla! Zinga ɨshɨlɨlɨ shaaho.” Lubhilo ʉAyineeya ahɨmɨɨlɨla. 35Abhantu bha bhahakhalaga pi‑ibooma ɨlyɨ Liida na mwi‑ikhombe ɨlyɨ Shalooni, lwa bhanʼnola ʉAyineeya, bhonti bhahamʼmwɨtɨha ʉMwɨnɨ ʉYeesu.
ɄPeeteli ahunʼzyʉsya ʉDolikaasi
36Mwi‑ibooma ɨlyɨ Yaafa ahali ʉnʼshɨ ʉmo ʉmwoziwa, ʉyo itaawa lyakwe ahali yʉ Tabita, mu njango ɨyɨ Shiyunaani hwa huje Dolikaasi, hwa huje ɨnsya. ɄDolikaasi ahabhavwaga abhapɨɨna, na‑abhombe ɨmbombo ɨzyɨnjɨ ɨnyinza. 37Ɨnsiku ɨzyo, ʉDolikaasi ahabhina ɨmpʉngo, ahafwa. Abhantu bhahagwozya ʉmʼvimba gwakwe, bhahagulambaliha hu mpanda ɨya pa mwanya mu nyumba ɨnjeleehanye. 38Mu habhaazyo ɨho, abhooziwa bhahʉmvwa huje, ʉPeeteli ali mwi‑ibooma ɨlyɨ Liida. Bhahabhasonteelezya abhantu bhabhɨɨlɨ hwa mwene, pɨpo ibooma ɨlyɨ Liida lyahapalamɨɨne ni‑ibooma ɨlyɨ Yaafa. Abhantu ɨbho bhahanʼnamba ʉPeeteli bhahaga, “Talamba ʉyɨnze humwetu, ʉgandi akhaabhe!”
39Ɨpo ʉPeeteli ahabhala peeka nabho. Lwa bhaafiha mu Yaafa muula, bhahanʼtwala mu mpanda ɨyo ɨya pa mwanya pa nyumba ɨnjeleehanye. Abhashɨ abhafwɨle bhonti bhahamʼmʉngaanila sha bhazonda. Bhahanʼnolesya amagolole na menda aganjɨ ɨgo ʉDolikaasi ahabhasonelaga lwa‑ali mwʉmi.
40ɄPeeteli ahabhafumya bhonti hwʉnzɨ, ahasugamila pa nsi, ahanʼnaabha ʉNgʉlʉbhɨ. Aheenya hu mʼvimba guula, ahaga, “Wee Tabita, daamuha!” ɄTabita ahadaamula amaaso. Lwa wanʼnola ʉPeeteli, ahakhala. 41ɄPeeteli ahanʼkhata ɨnyoobhe, ahamʼmʉʉsya. Ahabhakwizya abhooziwa na bhashɨ abhafwɨle bhaala, ahabhabhʉʉzya huje, “Enyi, ʉTabita mwʉmi!” 42Ɨnongwa ɨzyo zyahanyampaana mwi‑ibooma lyonti ɨlyɨ Yaafa, abhantu abhinji bhahamʼmwɨtɨha ʉMwɨnɨ ʉYeesu. 43ɄPeeteli ahasyala hu Yaafa ɨnsiku zinyinji, ahakhalaga mu nyumba ya muntu wa‑ahagombaga ɨnkwembe, ʉyo itaawa lyakwe ahali yʉ Siimoni.

Highlight

Share

Copy

None

Want to have your highlights saved across all your devices? Sign up or sign in