ƗMbombo ɨzya Bhasontwa 10

ɄKolineeliyo ahunʼkwizya ʉPeeteli

1Mwi‑ibooma ɨlyɨ Kayisaliiya mwahali nʉ muntu ʉNʼnuumi, ʉyo itaawa lyakwe ahali yʉ Kolineeliyo. Ʉyo ahali nʼnongozi ʉwa bhalwi abhɨ Shiluumi. Ahalongozyaga abhalwi ɨmya yeeka afume mu shipʉga ɨshigoosi ɨsha bhalwi sha shahali Shipʉga sha Bhaitaaliya. 2Nantele, ahali muntu mwinza wa‑ahanʼtinihaga ʉNgʉlʉbhɨ, peeka na bhantu bhonti abha mu khaaya yaakwe. Ahamʼpuutaga ʉNgʉlʉbhɨ ahabhaazyo honti, na hubhaavwe haani abhapɨɨna.

3Isiku limo mu saala ɨya fundihandwɨmo (9) ɨshi ɨya pasanya, ʉKolineeliyo ahalola ɨndoleshelo. Mu ndoleshelo ɨyo, ahanʼnola ʉnʼtumi wa Ngʉlʉbhɨ ahumʼmwɨnzɨla. Ʉnʼtumi ahamʼmʉʉzya ahaga, “Wee Kolineeliyo!” 4ɄKolineeliyo ahamʼmwenya ʉnʼtumi ʉla hu wooga, ahamʼmʉzɨɨlɨzya ahaga, “Wee mwɨnɨ, huli yeenu?” Ʉnʼtumi ahamʼmʉʉzya huje, “ɄNgʉlʉbhɨ ayʉmvwɨzye ɨmpuuto zyaho, nantele alolile shʉ‑ʉhubhaavwa abhapɨɨna. Ɨgo gonti agamɨɨnye, saga ahayihugɨɨwa. 5Ɨshi leelo, ʉbhasonteelezye abhantu hwi‑ibooma ɨlyɨ Yaafa, bhanʼkwizye ʉmuntu ya bhayiga yʉ Siimoni, itaawa ɨlyamwabho bhayiga yʉ Peeteli. 6Akhala hwa muntu wa bhayiga yʉ Siimoni, wa‑agomba ɨnkwembe. Ɨnyumba yaakwe ɨli munshɨnjɨ yɨ nsʉmbi.”

7Ʉnʼtumi lwa waamala humʼmʉʉzye ʉKolineeliyo, ahasogola. ɄKolineeliyo ahabhakwizya abhabhomba mbombo bhaakwe bhabhɨɨlɨ peeka nʉ nʼnwi ʉmo mwa bhaavwi bhaakwe wa‑ahanʼtinihaga ʉNgʉlʉbhɨ. 8Ahabhamamila zyonti ʉnʼtumi zya‑ahalajiziizye, ahabhasonteelezya hu Yaafa.

Ɨndoleshelo ya Peeteli

9Isiku ɨlya bhɨɨlɨ mu saala nʼtanda ɨshi ɨya pasanya, abhantu ɨbho ʉKolineeliyo ahabhasonteleziizye, bhahapalamila hu Yaafa. Mu habhaazyo ɨho ʉPeeteli wope ahazʉbha pa mwanya pa nyumba#10:9 ABhayahuudi bhahatiimaga ɨnyumba zyabho, bhahaalaga isole pa mwanya, bhahapinyaga ʉmango, na‑azyeme ni‑itoto. Ɨpo pa bhahatʉʉyaga. Enya Maalʉko 2:4, ɨshifwani ɨshɨ nyumba ɨya Bhayahuudi. huje, amʼpuute ʉNgʉlʉbhɨ. 10Ɨnzala yahanʼnuma, ahasʉngwa alye. Lwa bhali ateleshe ɨshalye, ahalola ɨndoleshelo. 11Mu ndoleshelo ɨyo ahalola ɨmwanya nyiigule, ahantu ha hahali nanshi igolole igoosi lya likhɨɨtwe ɨmbali zyakwe zinɨ, lihwiha pa nsi. 12Muuhati yaakwe mwahali nɨ hanu nɨ vyʉma ɨvinji. Mwahali nɨ hanu nɨ vyʉma ɨvyɨ manama ganɨ, vya vikwesushila, nɨ nyonyi.#10:12 Mwahali nɨ hanu nɨ vyʉma ɨvyɨ manama ganɨ, vya vikwesushila, nɨ nyonyi Mu hanu ɨzyo, zimo ɨndajizyo zya Moose zyahakhaanaga alye.

13ɄPeeteli ahʉmvwa izwi liyiga, “Wee Peeteli, bhʉʉha! Ʉbhoole na‑alye!” 14ɄPeeteli ahaamula ahaga, “Ndaali, wee Mwɨnɨ! Saga ɨndiiye nka lumo ahantu ha hali haavu!” 15Izwi ɨlyo lyahamʼmʉʉzya ʉPeeteli lyahaga, “Ahantu hohonti ɨho ʉNgʉlʉbhɨ ahasangalusiizye, aawe ʉgandi aje haavu.” 16Ɨzyo zyahabhombɨɨshe hataatu lwonti. Ɨpo nalinaali igolole liila lyahaweela hu mwanya.

17ɄPeeteli lwa‑ahwibhʉzɨɨlɨzya huje, ɨndoleshelo ɨyo hwa huje bhʉlɨ, abhantu bhaala ʉKolineeliyo bha‑ahabhasonteleziizye, bhahabhʉzɨlɨzyaga, ɨpo bhahayimanya ɨnyumba ya Siimoni, bhahɨmɨɨlɨla pa lyango. 18Bhahiiguzya, bhahabhʉzɨɨlɨzya bhahaga, “Bhʉlɨ, ɨpa papaala akhala ʉSiimoni wa bhayiga Peeteli?” 19ɄPeeteli lwa‑asɨɨbha ɨndoleshelo ɨyo, ʉMʼpepo ʉMʼfinjile ahamʼmʉʉzya huje, “Siimoni, bhalɨɨho abhantu bhataatu bha bhahuhwanza. 20Ʉgandi asingaamwe. Iha, mubhale peeka, pɨpo anɨ nɨɨnɨ ɨmbasonteleziizye.”

21ɄPeeteli ahiiha pa nsi, ahabhabhʉʉzya abhantu bhaala huje, “Anɨ ya yʉʉla wa muhumʼmwanza. Ɨshi, muhunanzila yeenu?” 22Bhahamʼmwamula bhahaga, “Ʉnʼnongozi ʉmo ʉwa bhalwi atisonteleziizye. Itaawa lyakwe yʉ Kolineeliyo, muntu wa‑ali nʼgolosu. Ahunʼtiniha ʉNgʉlʉbhɨ, nantele aBhayahuudi bhonti bhahunʼsʉmba. Ɨshi, ʉnʼtumi wa Ngʉlʉbhɨ amʼmʉzɨɨzye huje, ahwambɨɨlɨle mu nyumba yaakwe, atejeelezye amazwi gaala ga wahayihumʼmʉʉzya.” 23Ɨpo ʉPeeteli ahabhabhʉʉzya abhantu bhaala huje, “Ɨnzaji mu nyumba.” Bhope bhahadɨɨla hwa mwene.

ɄPeeteli mu nyumba ya Kolineeliyo

Lwa hwasha, ʉPeeteli na bhantu bha Kolineeliyo bhahasogola pa Yaafa. Abhaholo bhamo mwa Kilisiti abhɨ‑ɨpo bhahabhaloleezya. 24Ɨndaabhɨ yaakwe bhahafiha hu Kayisaliiya. Bhahamʼmwaga ʉKolineeliyo abhabhʉngɨɨnye abhaholo bhaakwe peeka na bhamanyani bhaakwe, ahubhagʉʉlɨla.

25ɄPeeteli lwa waafiha panzɨ, ʉKolineeliyo ahamʼmwambɨɨlɨla, ahasugamila pa nsi pa manama gaakwe na humʼpeele ɨnshɨnshɨ. 26Leelo ʉPeeteli ahamʼmʉʉsya, ahamʼmʉʉzya ahaga, “Ɨmɨɨlɨla! Enya, anɨ ɨndi muntu nanshi aawe!” 27ɄPeeteli nʉ Kolineeliyo bhahatʉʉha mu nyumba yaakwe sha bhayanga, bhahabhaaga abhantu abhinji bhabhʉngɨɨne muula. 28ɄPeeteli ahabhabhʉʉzya ahaga, “Amwɨ mumɨɨnye shinza huje, atɨ tiBhayahuudi ɨndajizyo zyetu zihutikhaana asangaane na bhantu bha saga Bhayahuudi. Nantele, saga tihwɨtɨshɨlwa ayatilane naamwɨ. Leelo, ʉNgʉlʉbhɨ ansundile huje, ɨngandi hunʼkwizye ʉmuntu wowonti huje mwavu. 29Sha shɨɨsho lwa wankwizya, ɨnɨnzɨle sinta ahwolobhele. Ɨshi, ʉhunkwizizya yeenu?”

30ɄKolineeliyo ahamʼmwamula ahaga, “Ɨnsiku zinɨ zya zishilile mu habhaazyo nanshi ɨha aha mu saala ɨya fundihandwɨmo (9) ɨya pasanya, nahamʼpuutaga ʉNgʉlʉbhɨ mu nyumba yaanɨ. Lubhilo nahanʼnola ʉmuntu ayɨmɨlɨɨye pitagaalila lyanɨ akwɨte amenda ga galawuuhana. 31Ahaga, ‘Wee Kolineeliyo, ʉNgʉlʉbhɨ ayʉmvwɨzye ɨmpuuto zyaho, nantele alolile shʉ‑ʉhubhaavwa abhapɨɨna. 32Ɨshi, ʉbhasonteelezye abhantu bhabhale hu Yaafa, hunʼkwizye ʉSiimoni wa bhayiga Peeteli. Akhala hwa muntu, ʉyo itaawa lyakwe ahali yʉ Siimoni, wa‑agomba ɨnkwembe. Ɨnyumba yaakwe ɨli munshɨnjɨ yɨ nsʉmbi.’ 33Ɨzyo zya zimbɨɨshɨle huje, ɨmbasonteelezye abhantu lubhilo ahukwizye, nawe ʉbhombile shinza ahwɨnze. Ɨshi tenti tili pa maaso ga Ngʉlʉbhɨ, titejeelezye amazwi gonti gʉ‑ʉlajiziiwe huje, ʉtibhʉʉzye.”

34Ɨpo ʉPeeteli ahabhabhʉʉzya abhantu bhaala ahaga, “Ɨshi naamanya huje, lyoli ʉNgʉlʉbhɨ saga abhagunjiiye nka bhamo! 35Leelo, ahubhɨɨtɨha abhantu abhɨ nsi zyonti bha bhahunʼtiniha na‑abhombe ga gahwanziwa hwa mwene. 36Amwɨ mumɨɨnye huje, ʉNgʉlʉbhɨ ahasonteleziizye abhantu bhaakwe hubhalʉmbɨɨlɨle aBhaizilaeeli ɨNongwa ɨNyinza aje, bhawaaje ʉtengaanu ashilile hwa Yeesu ʉKilisiti, ʉMwɨnɨ wa bhantu bhonti. 37Mumɨɨnye zya zyahabhombɨɨshe mu nsi yonti ɨya tiBhayahuudi ahwandile hu mukowa ʉgwɨ Galilaaya. Ɨgo gonti gahabhombɨɨshe ʉYoohani lwa wabhalʉmbɨɨlɨla abhantu huje, bhoozewe. 38Mumɨɨnye huje, ʉNgʉlʉbhɨ ahanʼsaluuye ʉYeesu ʉwa hu Nazaleeti humʼpeele ʉMʼpepo ʉMʼfinjile ni‑ikhone. Wope ʉYeesu ahabhombaga ɨnyinza ʉhwu nʉ‑ʉhwo, ahabhatʉʉlaga bhonti bha bhalabha ni‑ikhone lya Seetano. Ahabhombaga ɨgo, pɨpo ʉNgʉlʉbhɨ ahali peeka nawo.

39Gonti ɨgo ʉYeesu ga‑ahabhombile mwi‑ibooma ɨlyɨ Yelusaleemu na mu nsi yonti ɨya tiBhayahuudi, atɨ tili bhasimishizi bhaakwe. Pamandɨ bhahanʼgoga hwi‑idala ɨlya hunʼkhomeele pa shikhobheehanyo. 40Leelo, isiku ɨlya taatu ʉNgʉlʉbhɨ ahanʼzyʉsyɨzye, ahanʼnolesya hwa bhantu. 41Saga ahalolɨɨshe hwa bhantu bhonti, leelo ahalolɨɨshe hwaliitɨ atɨ ta tisaluliilwe nʉ Ngʉlʉbhɨ huje, tibhe bhasimishizi bhɨ‑ɨzyo. ɄYeesu lwa wazyʉha hwa bhafwe, atɨ tɨɨtɨ tahaliiye na‑amwele peeka nawo. 42Ahatilajiziizye huje, tibhalʉmbɨlɨlaje abhantu na‑asimishizye huje, ʉmwene yʉʉyo ʉNgʉlʉbhɨ ya‑amʼmɨɨshɨle huje, abhalongaje abhʉʉmi na bhafwe. 43Abhakuwi bha Ngʉlʉbhɨ bhonti bhahasimishiziizye hu nongwa ya Yeesu huje, shila muntu wa‑ahumʼmwɨtɨha, ahayikhobhoshelwa ɨmbiibhi ashilile hwa mwene ʉYeesu.”

Bha saga Bhayahuudi bhahumʼmwambɨɨlɨla ʉMʼpepo ʉMʼfinjile

44ɄPeeteli lwa‑ayanga amazwi ɨgo, ʉMʼpepo ʉMʼfinjile ahabhiishila bhonti bha bhahatejelezyaga. 45ABhayahuudi abhooziwa bha bhahanʼnoleziizye ʉPeeteli bhahaswiga tee lwa bhaalola huje, ʉMʼpepo ʉMʼfinjile abhishiiye bhope abhantu bha saga Bhayahuudi. 46Bhahaswiga, pɨpo bhahabhʉmvwɨzye bhayanga hu njango ɨnjenu na humʼmwamishe ʉNgʉlʉbhɨ.

ɄPeeteli ahaga, 47“Abhantu ɨbha bhope bhamʼmwambɨlɨɨye ʉMʼpepo ʉMʼfinjile, nanshi atɨ sha tahamʼmwambɨlɨɨye. Nʉʉmo wa‑agakhaana huje, bhagandi ahwozewe na mɨnzɨ!” 48Ɨpo ahalajizya huje, ʉKolineeliyo na bhamwabho bhoozewe hwi‑itaawa lya Yeesu ʉKilisiti. Pamandɨ bhahanʼnaabha ʉPeeteli huje asyale peeka nabho hu nsiku nyishe.

Currently Selected:

ƗMbombo ɨzya Bhasontwa 10: SBK

Highlight

Copy