ƗMbombo ɨzya Bhasontwa 3

ɄPeeteli ahumʼponia ʉmuntu wa‑alemɨɨye amanama

1Isiku limo, ʉPeeteli nʉ Yoohani bhahabhalaga hu nyumba ɨmfinjile ɨya Ngʉlʉbhɨ mu saala ɨya fundihandwɨmo (9) ɨya nʉsanya, ya yahali saala ya Bhayahuudi humʼpuute ʉNgʉlʉbhɨ. 2Pa nyumba ɨmfinjile ɨyo, pahali nʉ muntu ʉmo wa‑ahalemɨɨye amanama afume apaapwe hwakwe. Ahanyemulwaga wiila na bhantu. Bhahamʼmɨɨhaga mu pɨɨpɨ ni‑ilyango lya bhayiga ɨLinza, pɨɨpo ahalaabhaga ɨmpɨɨya hwa muntu wowonti wa‑atʉʉha mu lubhaga lwɨ nyumba ɨmfinjile ɨya Ngʉlʉbhɨ.

3Ʉmuntu ʉyo lwa wanʼnola ʉPeeteli nʉ Yoohani bhatʉʉha mu lubhaga lwɨ nyumba ɨmfinjile ɨya Ngʉlʉbhɨ, ahabhalaabha ɨmpɨɨya. 4Ɨpo ʉPeeteli nʉ Yoohani bhahanʼzyamila. ɄPeeteli ahamʼmʉʉzya ahaga, “Teenye atɨ!” 5Ʉmuntu ʉla ahabheenya, ahasʉbhɨlaga huje, bhali na hantu ha bhabhala humʼpeele.

6Leelo, ʉPeeteli ahamʼmʉʉzya ahaga, “Anɨ saga ɨndi nɨ mpɨɨya awe ɨzahaabu nka zimo, leelo lyɨ‑ɨmbajiiye hulibhombe, ɨnza hubhombele. Ɨhubhʉʉzya hwi‑ikhone lya Yeesu ʉKilisiti ʉwa hu Nazaleeti, ɨmɨɨlɨla, jendaga!” 7Ɨpo ʉPeeteli ahanʼkhata ʉmuntu ʉla ʉnʼkhono ʉgwa hu lɨɨlo, ahamʼmwɨmɨɨlɨsya. Pɨnɨɨpo lwene ɨnyaayo na mafugamo agɨ manama ga muntu ʉla vyahabha ni‑ikhone. 8Ahatomoohana, ahanda ajende yʉʉyo. Ahatʉʉha mu lubhaga lwɨ nyumba ɨmfinjile ɨya Ngʉlʉbhɨ peeka nʉ Peeteli nʉ Yoohani, ahajendaga ʉmwo, ahatomohanaga na hunʼsalifye ʉNgʉlʉbhɨ. 9Abhantu bhonti bhahanʼnola ʉmuntu ʉla ajenda na manama gaakwe yʉʉyo, ahunʼsalifya ʉNgʉlʉbhɨ. 10Bhahamanya huje, ya yʉʉla wa‑ahakhalaga pi‑ilyango ɨlyɨ lubhaga lwɨ nyumba ɨmfinjile ɨya Ngʉlʉbhɨ lya bhayiga ɨLinza, ahalaabhaga ɨvintu paala. Bhonti bhahaswiga haani lwa bhaalola zya zyabhombeha hwa mwene.

ɄPeeteli ahubhamanyizya abhantu ɨnongwa ɨzya Yeesu

11Ahabhaazyo hahaala, ʉmuntu ʉla ahanʼnililaga ʉPeeteli nʉ Yoohani. Abhantu bhonti bhahaswigaga haani, bhahabhashɨmbɨɨlɨla afishe ɨpo pa bhayiga Idala Itiime ɨlya Solomooni. Idala ɨlyo lyahali mu lubhaga lwɨ nyumba ɨmfinjile ɨya Ngʉlʉbhɨ. 12ɄPeeteli lwa wabhalola abhantu ɨbho, ahabhabhʉzɨɨlɨzya ahaga, “Mubhalume amwɨ mubha mu Izilaeeli, yeenu ɨzi zihubhaswijizya? Yeenu muhutizyamila? Ʉmuntu ʉnʉ aponile hu lwɨtɨho. Saga aponile hwi‑ikhone lyetu awe hu nongwa ya‑aje, atɨ tikhondɨɨye pa maaso ga Ngʉlʉbhɨ! 13ɄNgʉlʉbhɨ ʉwa bhamaama bheetu, hwa huje ʉNgʉlʉbhɨ ʉwa Abulahaamu,#3:13 Abulahaamu Bhaazya izwi Abulahaamu hu Ngalulanyo ɨyɨ Mazwi aMajenu hu malishilo wɨ shitaabu ɨshi. ʉwa Isaaka nʉ wa Yaakobo ahamʼmwamiishe ʉmʼmomvi waakwe ʉYeesu. Amwɨ mwahamʼmɨɨshɨle ʉYeesu mu makhono ga bhalʉgʉ huje, bhanʼgoje. Wope ʉPilaato ahanzaga huje, abhigulile ʉYeesu, leelo amwɨ mwahakhɨɨne. 14Mwahalaabha huje, ʉnʼgoji ya bhamʼmwigulile! Mwahanʼkhaana ʉYeesu wa‑ali nʼsangalusu, nantele nʼgolosu. 15Wa‑ali Mbwiwi ɨyɨ Wʉʉmi, amwɨ mwahanʼgoga. Leelo ʉNgʉlʉbhɨ ahanʼzyʉsya mu bhafwe, natɨ tili bhasimishizi bha‑azyʉshe hwakwe. 16Ʉmuntu ʉnʉ wa muhunʼnola na humʼmanye, aponile pɨpo timʼmwɨtɨɨshe ʉYeesu. ɄYeesu nʉ lwɨtɨho lwa tambɨlɨɨye afume hwa mwene, vya vimʼponiizye lwonti ʉmuntu ʉnʉ, nanshi mwenti sha muhunʼnola.

17Ɨshi amwɨ mubhaholo bheetu, ɨzyo zyonti zya mwahamʼmombɨɨye ʉYeesu, peeka na bhalongozi bheenyu, ɨmɨɨnye huje, mwahabhombile sinta amanye. 18Leelo, ɨzyo zyahabhombɨɨshe huje, ʉNgʉlʉbhɨ amalɨɨzɨzye amazwi ga‑ahayanjile ɨmandɨ ashilile hwa bhakuwi bhaakwe bhonti huje, ʉMʼfyʉli ahayilabha.

19Ɨshi mulambaje, munʼgalushile ʉNgʉlʉbhɨ huje, abhakhobhoshele ɨmbiibhi zyenyu, nka hɨnze ahabhaazyo aha hwobhoshe afume hwa Mwɨnɨ ʉNgʉlʉbhɨ. 20ɄNgʉlʉbhɨ ahanʼsaluuye ʉMʼfyʉli afume halɨ hu nongwa yeenyu. ɄMʼfyʉli ʉyo yʉ Yeesu. Wope ʉNgʉlʉbhɨ ahayihunʼsonteelezya nantele huliimwɨ. 21ɄYeesu akhondɨɨye asyale hu mwanya afishe hu habhaazyo ɨho ʉNgʉlʉbhɨ ahayigalulanya ɨvintu vyonti abhe vipya, nanshi sha‑ahayanjile afume halɨ ashilile hwa bhakuwi bhaakwe abhafinjile. 22Yɨ nongwa ɨyo ʉMoose#3:22 ʉMoose Bhaazya izwi Moose hu Ngalulanyo ɨyɨ Mazwi aMajenu hu malishilo wɨ shitaabu ɨshi. ʉnʼkuwi wa Ngʉlʉbhɨ ahakuwile aje, ‘Afume mwaliimwɨ mwʉmwo, ʉMwɨnɨ, ʉNgʉlʉbhɨ weenyu ahayihubhasalulila amwɨ ʉnʼkuwi wa‑alɨngɨɨne naanɨ. Amazwi gonti ʉnʼkuwi ʉyo ga‑ahayihubhabhʉʉzya, mwahagatejelezyaje shinza. 23Nkashele ʉmuntu wowonti asinta hunʼtejeelezye ʉnʼkuwi ʉyo, ʉNgʉlʉbhɨ anza humʼmwefwe mwa bhantu bhaakwe, na hunʼgoje.’#Bhaazya ɨNyiizuho 18:15, 18, 19. 24Abhakuwi bha Ngʉlʉbhɨ bhonti, ahwande hwa nʼkuwi ʉSamweli na bhanjɨ bha bhahamʼmɨnjɨlɨɨye, bhahayanjile zya zibhombeha mu nsiku ɨzi. 25Amwɨ muli bhaana bha bhakuwi mwi‑ilagano#3:25 mwi‑ilagano Bhaazya izwi Ilagano hu Ngalulanyo ɨyɨ Mazwi aMajenu hu malishilo wɨ shitaabu ɨshi. lya Ngʉlʉbhɨ lya‑ahafinjile na bhamaama bheenyu, nanshi sha‑ahamʼmʉzɨɨzye ʉAbulahaamu aje, ‘Ashilile hu mpaapo yaaho, ɨvikholo vyonti ɨvya mu nsi vyahayisayiwa.’#Bhaazya ʉWandilo 22:18; 26:4. 26ɄNgʉlʉbhɨ lwa wanʼzyʉsya ʉmʼmomvi waakwe ʉYeesu,#3:26 ɄNgʉlʉbhɨ lwa wanʼzyʉsya ʉmʼmomvi waakwe ʉYeesu Abhamanyiihanyi abhanjɨ abhi‑Ibhangili bhayiga, ɄNgʉlʉbhɨ lwa wanʼsalula ʉmʼmomvi waakwe ʉYeesu. ahanʼsonteleziizye nasʉʉti huliimwɨ huje, abhasaye hwi‑idala ɨlya humʼmwefwe shila muntu mu mbiibhi zyakwe.”

Currently Selected:

ƗMbombo ɨzya Bhasontwa 3: SBK

Highlight

Copy