ƗMbombo ɨzya Bhasontwa 15

Ʉlubhʉngaano hu Yelusaleemu

1ɄPaulo nʉ Balinaaba lwa bhali mwi‑ibooma ɨlyɨ Antiyokiya ɨlya mu mukowa ʉgwɨ Siiliya, abhantu bhamo bhahafiha afume hu mukowa ʉgwɨ Yudeeya. Bhahanda hubhamanyizye abhooziwa aje, “Nkashele saga mutendiilwe ɨngoola ɨzya hwitagaalila ɨzyɨ lume alɨngaane nɨ ndajizyo zya Moose zya‑ahatileshɨɨye, saga mubhajiiye afyʉlwe.” 2Bhope ʉPaulo nʉ Balinaaba saga bhahɨtɨɨhana na bhantu bhaala, ɨpo bhahanda adaliihane nabho haani. Hu malishilo, abhooziwa abha pi‑ibooma ɨlyɨ Antiyokiya bhahafumya ʉlugamulo huje, bhamo bhabhale hwi‑ibooma ɨlyɨ Yelusaleemu peeka nʉ Paulo nʉ Balinaaba. Ʉhwo bhabhale hubhabhʉzɨɨlɨzye ɨlya‑abhombe hu bhasontwa na hu bhagoosi abhɨ shibhanza hu nongwa yɨ mazwi ɨgo. 3Ɨpo abhooziwa abhɨ shibhanza ɨsha mwi‑ibooma ɨlyɨ Antiyokiya bhahanʼsonteelezya ʉPaulo na bhamwabho hwi‑ibooma ɨlyɨ Yelusaleemu. Bhope bhahashila hu mukowa ʉgwɨ Foyiniike nʉ gwɨ Samaliya, bhahabhabhʉzyaga abhooziwa, shiila abhantu bha saga Bhayahuudi sha bhamʼmwɨtɨɨshe ʉYeesu. Ɨnongwa ɨzyo zyahabhagwɨzyaga amooyo haani abhooziwa bhonti.

4ɄPaulo na bhamwabho lwa bhaafiha mwi‑ibooma ɨlyɨ Yelusaleemu, abhasontwa, abhagoosi abhɨ shibhanza na bhooziwa bhonti bhahabhambɨɨlɨla shinza. Ɨpo bhahabhabhʉʉzya zyonti ɨzyo ʉNgʉlʉbhɨ zya‑ahabhombile ashilile hwa bheene. 5Leelo, abhooziwa bhamo abha mu shipʉga ɨsha Bhafalisaayo bhahɨmɨɨlɨla, bhahaga, “Bha saga Bhayahuudi bhope bhahwanziwa huje, bhatendwaje ɨngoola ɨzya hwitagaalila ɨzyɨ lume, na‑akhate ɨndajizyo zyonti zya Moose.”

6Ɨpo abhasontwa na bhagoosi abhɨ shibhanza bhahabhɨɨha ʉlubhʉngaano huje, bheenye shinza izwi ɨlyo. 7Abhantu ɨbho lwa bhajeehana hu habhaazyo ahatali, ʉPeeteli ahɨmɨɨlɨla, ahabhabhʉʉzya ahaga, “Mwɨ bhooziwa bhamwetu, amwɨ mumɨɨnye huje, hu habhaazyo hamo ha hashilile, ʉNgʉlʉbhɨ ahansaluuye afume huliimwɨ. Ahansaluuye alʉmbɨɨlɨle ɨNongwa ɨNyinza ɨzya Yeesu huje, bha saga Bhayahuudi bhope bhʉmvwe ashilile huliinɨ, na humʼmwɨtɨshe ʉMwɨnɨ ʉYeesu ʉKilisiti.#Bhaazya ɨMbombo ɨzya Bhasontwa 10. 8ɄNgʉlʉbhɨ wa‑amɨɨnye zyonti zya zili mu mooyo ga bhantu, abhɨtɨshɨɨye bha saga Bhayahuudi na‑alolesye ɨgo hwi‑idala ɨlya hubhapeele ʉMʼpepo ʉMʼfinjile, nanshi sha‑atipiiye atɨ. 9Nantele, ʉNgʉlʉbhɨ saga ahalegɨɨnye atɨ na bheene, nɨ‑ɨshi hwope saga alegɨɨnye atɨ na bheene. Lyoli nɨ leelo ahubhasangalusya bhope amooyo gaabho hwi‑idala ɨlya humʼmwɨtɨshe ʉMwɨnɨ ʉYeesu. 10Ɨshi! Amwɨ muhubhatwiha abhooziwa izigo ɨlya‑akhate ɨndajizyo zya Moose, ɨlyo bhope abhamaama bheetu naatɨ tipotiilwe. Ʉhwo hwa hunʼjele ʉNgʉlʉbhɨ. 11Lyoli ɨsahabhe ɨsho. Atɨ tihwɨtɨha huje, tifyʉlwa hu mpyana ya Mwɨnɨ weetu ʉYeesu nanshi abhooziwa ɨbho.”

12Ɨpo abhantu bhonti bha bhahali pa lubhʉngaano paala bhahapʉʉma myɨ! Abhantu ɨbho bhahanʼtejelezyaga ʉPaulo nʉ Balinaaba lwa bhahabhabhʉzyaga shiila ʉNgʉlʉbhɨ sha‑ahabhombaga ɨvimanyishizyo na mayele hwa bha saga Bhayahuudi, ashilile hwa bheene. 13Lwa bhaamala ayanje, ʉYaakobo wope ahaga, “Mwɨ bhooziwa bhamwetu, tejeelezyi! 14ɄSiimoni#15:14 ɄSiimoni Ɨli litaawa lyɨnjɨ ɨlya Peeteli. atibhʉzɨɨzye ʉNgʉlʉbhɨ sha‑ahabhatendɨɨshe ɨbho bha saga Bhayahuudi hwisinda huje, mwɨ‑ɨbho abhasalule bhabhe bhantu bhaakwe. 15Ɨnongwa ɨzyo zihwɨtɨɨhana nɨ zya zisimbwilwe mu vitaabu vya bhakuwi bha Ngʉlʉbhɨ abhɨ mandɨ huje,

16‘ɄMwɨnɨ ʉNgʉlʉbhɨ ayanjile huje,

“Lwa gaashila ɨgo, anɨ nɨMwɨnɨ nahayiweela

ahwɨmɨɨlɨsye nantele ʉwumwɨnɨ ʉwa mwɨnɨ ʉDaudi wa wahagwiye.

Nahayihuwugomba shipya na huwɨmɨɨlɨsye, abhe wi‑ikhone tee.

17Ɨpo abhantu bhonti abhanjɨ,

bha saga Bhayahuudi, bhaala bhɨ‑ɨmbakwiziizye huje bhabhe bhaanɨ,

bhahayihumbɨnjɨɨlɨla anɨ.”

Ɨsho sha‑ayanga ʉMwɨnɨ ʉNgʉlʉbhɨ, wa‑abhombile huje,

18ɨzyo zyonti zyahamanyiishe afume halɨ.’ ”#Bhaazya Aamosi 9:11-12.

19ɄYaakobo ahajendeelela ayanje huje, “Anɨ ɨhwamula ɨshi, saga ɨkhondɨɨye huje, tibhatamyaje abhantu bha saga Bhayahuudi bha bhɨtɨɨshe abhe bhantu bha Ngʉlʉbhɨ. 20Lyoli tikhondɨɨye huje, tibhasimbile ɨkalaata ɨya hubhabhʉʉzye huje, bhagandi alye ɨshalye ɨsho bhafumiizye nsangu hwa bhangʉlʉbhɨ hu nongwa ya‑aje, shaavu, bhasahabhombaje ʉweegu, bhagandi alye ɨnyama zya bhanionjile#15:20 ɨnyama zya bhanionjile ABhayahuudi bhahali nɨ ndajizyo huje, lwa bhagoga ɨvyʉma, bhabhoolaje na madanda gitihaje. Bhaazya ɨMbombo ɨzya Bhalaawi 17:13-14. awe alye idanda. 21Ɨnjanjile ɨsho hu nongwa ya‑aje, afume halɨ bhahamanyizyaga ɨndajizyo zya Moose mu mabooma gonti na huzibhaazye mu nyumba zyonti ɨzya‑apuutile na‑amanyiilile shila lisiku ɨlyɨ Sabaato.”

Ɨkalaata hu bhooziwa bha saga Bhayahuudi

22Ɨpo abhasontwa, abhagoosi abhɨ shibhanza na bhooziwa bhonti abha pi‑ibooma ɨlyɨ Yelusaleemu bhahaamula huje, bhasalule bhamo mwɨ‑ɨbho abhalongozi bha bhanza‑abhale peeka nʉ Paulo nʉ Balinaaba hwi‑ibooma ɨlyɨ Antiyokiya. Ɨpo bhahabhasalula abhalongozi bhabhɨɨlɨ, ʉmo ahali yʉ Yuuda wa bhahagaga Balisaaba, ʉwamwabho ahali yʉ Siila. Bhahabhasonteelezya nɨ kalaata yɨ‑ɨsimbwilwe huje,

23“Atɨ tibhasontwa peeka na bhagoosi abhɨ shibhanza, tibhamwenyu tihubhalamuha amwɨ mubhamwetu mwa saga muli Bhayahuudi mwa muli mwi‑ibooma ɨlyɨ Antiyokiya, mu mukowa ʉgwɨ Siiliya nʉ gwɨ Kilikiya. 24Tʉmvwɨzye huje, bhamo afume huliitɨ bhahabhabhʉzɨɨzye ɨnongwa ɨzya hubhalanganye, gope amooyo geenyu geleela, leelo saga tɨɨtɨ tahabhasonteleziizye. 25Ɨshi afumilane nɨ‑ɨzyo, tahɨtɨɨhana huje, tisalule abhantu, bhɨnze peeka na bhakʉndwe bheetu ʉBalinaaba nʉ Paulo. Bha bhɨɨbho bha tihubhasonteelezya huliimwɨ. 26Ɨbho bhahwifumiizye haani hu nongwa ya humʼmombele ʉMwɨnɨ weetu ʉYeesu ʉKilisiti, hwope ɨbhe hufwe.

27Ɨshi leelo, bha tihubhasonteelezya huliimwɨ, yʉ Yuuda nʉ Siila. Abheene bhanza hubhabhʉʉzye zya tibhasimbiiye. 28Ɨli linʼkhondezɨɨzye ʉMʼpepo ʉMʼfinjile naatɨ huje, tigandi hubhatwinshe izigo igoosi ɨlya‑alondolezye ɨndajizyo zya Moose, ashile ɨga. 29Mugandi alye ɨshalye sha bhahafumiizye nsangu hwa bhangʉlʉbhɨ, mugandi alye idanda awe ɨnyama zya bhanionjile, nantele mugandi abhombe ʉweegu. Nkashele mwakhaana mwɨmwɨ abhombe ɨzyo, ɨpo mwahayibha mubhombile shinza. Mutilamushile abhamwetu.”

30Lwa bhalagana na bhaala bha bhabhasonteleziizye, ʉPaulo na bhamwabho bhahabhala hwi‑ibooma ɨlyɨ Antiyokiya. Bhahabhabhʉngaanya abhooziwa, ʉhwo bhahabhapeela ɨkalaata ɨla. 31ɄPaulo na bhamwabho lwa bhahubhabhaazizya ɨkalaata ɨla, yahabhagwɨzya haani abhooziwa na hubhajinjizye amooyo. 32ɄYuuda nʉ Siila bhahali bhakuwi bha Ngʉlʉbhɨ. Abheene bhahabhabhʉʉzya abhooziwa abhamwabho ɨnongwa ɨnyinji ɨzya hubhagwɨzye na hubhajinjizye amooyo hu habhaazyo ahatali. 33Lwa bhaakhala ʉhwo hu habhaazyo, abhooziwa abha mu Antiyokiya bhahabhɨtɨshɨla huje, bhaweelaje hu tengaanu hwa bhaala bha bhahabhasonteleziizye. 34Leelo ʉSiila ahalola huje, shinza asyale hwʉhwo.#15:34 Amazwi agɨ lwoli ʉlwu saga galɨɨho mu nsimbo zimo ɨzyɨ mandɨ ɨzyɨ Shiyunaani. 35ɄPaulo nʉ Balinaaba bhahasyala hu Antiyokiya. Abheene na bhantu abhanjɨ abhinji bhahamanyizyaga na‑alʉmbɨɨlɨle ɨNongwa ɨNyinza ɨzya Mwɨnɨ ʉYeesu.

ɄPaulo nʉ Balinaaba bhalehana

36Ahabhaazyo lwa haashila, ʉPaulo ahamʼmʉʉzya ʉBalinaaba huje, “Tiweele mu mabooma gaala tahalʉmbɨlɨɨye ɨNongwa ɨNyinza ɨzya Mwɨnɨ ʉYeesu huje, tibheenye abhaholo bheetu sha bhajendeelela.” 37ɄBalinaaba ahanzaga huje, bhabhale peeka nʉ Yoohani wa bhahagaga Maalʉko. 38Leelo, ʉPaulo ahakhaana huje bhabhale peeka nʉ Maalʉko abhombe ɨmbombo nawo hu nongwa ya‑aje, ʉmwene ahabhaleshile hu mukowa ʉgwɨ Pamfiliya, saga ahajendelɨɨye abhombe ɨmbombo nabho.#Bhaazya ɨMbombo ɨzya Bhasontwa 13:13. 39Ɨpo gahafumila amadali haani, bhahalehana. ɄBalinaaba ahamʼmwega ʉYoohani Maalʉko, bhahatʉʉha mu meeli, bhahabhala peeka hu nsi yɨ‑ɨli paahati yɨ nsʉmbi ya bhayiga ɨKiipulo. 40ɄPaulo ahamʼmwega ʉSiila. Lwa bhasɨɨle asogole, abhooziwa abhamwabho bhahanʼnaabha ʉMwɨnɨ ʉYeesu huje, ajendelelaje hubhapeele ɨmpyana yaakwe. 41Ahabhala hu mukowa ʉgwɨ Siiliya nʉ gwɨ Kilikiya, ʉhwo ahabhajinjizyaga abhooziwa.

Currently Selected:

ƗMbombo ɨzya Bhasontwa 15: SBK

Highlight

Copy