ƗMbombo ɨzya Bhasontwa 14

Abhantu abha mwi‑ibooma ɨlyɨ Ikoniya bhatapuuhana ɨmpʉga zibhɨɨlɨ

1ɄPaulo nʉ Balinaaba lwa bhali mwi‑ibooma ɨlyɨ Ikoniya, bhahatʉʉha mu nyumba ɨya‑apuutile na‑amanyiilile ɨya Bhayahuudi, nanshi amiiho gaabho sha gahali. Ʉmwo bhahabhamanyizya abhantu ɨnongwa ɨzya Yeesu hu dandamazu. ABhayahuudi abhinji, peeka na bhantu abhinji bha saga Bhayahuudi bhahamʼmwɨtɨha ʉYeesu. 2Leelo, aBhayahuudi bhamo bha bhahakhɨɨne humʼmwɨtɨshe ʉYeesu, bhahanda hubhasonsheelezye bha saga Bhayahuudi huje, bhabhaviitilwe abhooziwa. 3Hwope ɨsho, ʉPaulo nʉ Balinaaba bhahakhala ɨnsiku zinyinji pa Ikoniya. Bhahabhabhʉzyaga abhantu ɨNongwa ɨNyinza ɨzyɨ mpyana ya Mwɨnɨ ʉYeesu sinta wooga. ɄMwɨnɨ ahalolesyaga huje, amazwi gaabho gɨ lyoli, hwi‑idala ɨlya hubhapeele ikhone ɨlya‑abhombele ɨvimanyishizyo na mayele. 4Abhantu abha mwi‑ibooma liila bhahatapuuhana, bhamo bhahabha hu Bhayahuudi, bhamo bhahabha hu bhasontwa bhabhɨɨlɨ bhaala, ʉPaulo nʉ Balinaaba.

5Hu malishilo, aBhayahuudi na bhagoosi bhaabho, peeka na bhantu bha saga Bhayahuudi bhahɨtɨɨhana hubhabhombele shibhiibhi na hubhakhome na mawe ʉPaulo nʉ Balinaaba. 6ɄPaulo nʉ Balinaaba lwa bhaamanya ʉlwʉmvwano ʉlwo, bhahashɨmbɨɨlɨla hu mukowa ʉgwɨ Likooniya. Mwʉnʉʉmwo bhahabhala mwi‑ibooma ɨlyɨ Lisitila, Deelibe na mu mabooma aganjɨ aga mu pɨɨpɨ. 7Poponti bhahabhalʉmbɨlɨlaga abhantu ɨNongwa ɨNyinza ɨzya Yeesu.

ɄPaulo nʉ Balinaaba mu Lisitila

8Mwi‑ibooma ɨlyɨ Lisitila, hwahali nʉ muntu ʉmo wa‑ahalemɨɨye afume apaapwe hwakwe. Ahali nʼnemazu wɨ manama, saga ahajendaga nka lumo. 9ɄPaulo lwa‑ali ayanje, ʉmuntu ʉla wope ahakhɨɨye paala, ahanʼtejelezyaga. ɄPaulo ahamʼmwenya ʉmuntu ʉla hu maaso, ahalola huje, ali nʉ lwɨtɨho lwa lugamʼponia. 10ɄPaulo ahayanga hwi‑izwi igoosi ahaga, “Bhʉʉha! Ʉyɨmɨɨlɨle hu manama gaaho!” Ɨpo ʉmuntu ʉla ahɨmɨɨlɨla nalinaali, ahanda ajende yʉʉyo.

11Ɨmpʉga ɨngoosi yahabhʉngɨɨne paala. Ɨmpʉga ɨyo lwa yanʼnola ʉPaulo sha wamʼponia ʉmuntu ʉla, yahanda abwaje ibwago mu njango yaabho ɨyɨ Shilikooniya yahagaga, “Abhangʉlʉbhɨ bhatɨnzɨɨye hu holanyo ɨzya bhantu!” 12Bhahabhapeela amataawa ga bhangʉlʉbhɨ bhaabho. ɄBalinaaba bhahaga yʉ Zewu. ɄPaulo bhahanʼtaha itaawa ɨlya Helime#14:12 Zewu ... Helime Mu bhangʉlʉbhɨ bha Bhayunaani, ʉZewu ahali nʼgoosi ashile abhamwabho bhonti, wope ʉHelime ahatwalaga ɨnongwa. hu nongwa ya‑aje ʉPaulo ahayangaga tee. 13Ɨnyumba ɨmfinjile ɨya Zewu yahali hwʉnzɨ yi‑ibooma. Ɨpo ʉnʼsayi wa Zewu ahaleeta ɨhambakʉ zibhɨɨlɨ nɨ vyʉbhalo vya bhahatabhile nʉ weezya pi‑ilyango ɨli‑ibooma. Ʉnʼsayi ʉyo peeka na bhantu ɨbho bhahanzaga humʼmoolele ʉPaulo nʉ Balinaaba ɨhambakʉ ɨzyo, zibhe nsangu.

14Leelo, abhasontwa ɨbho ʉBalinaaba nʉ Paulo lwa bhʉmvwa ɨzyo, bhahazembula amenda gaabho abhonesye sha bhavitiilwe. Bhahashɨmbɨla, bhahatʉʉha mu mpʉga ɨya bhantu, bhahonjela ayanje bhahaga, 15“Mubhantu amwɨ! Yeenu mubhomba ɨshi? Natɨ tili bhantu nanshi amwɨ! Tilɨɨho ɨpa alʉmbɨɨlɨle ɨNongwa ɨNyinza ɨzya Yeesu huje, muleshe apuute abhangʉlʉbhɨ abhi‑ilenga, mubhe bhantu bha Ngʉlʉbhɨ ʉwa nalyoli. Ʉmwene ya yʉʉyo ya‑ahapelile ɨmwanya, ɨnsi, ɨnsʉmbi, nɨ‑ɨvyo vyonti vya vili mu nsi ʉmu. 16Ɨmandɨ ʉNgʉlʉbhɨ ahabhaleshile abhantu bhonti bha saga Bhayahuudi bhajendelelaje abhombe zyonti zya bhahwanza bhɨɨbho. 17Hwope, saga ahalehaga abhonesye huje, ali peeka naamwɨ. Ʉmwene ahabhabhombelaga aminza hwi‑idala ɨlya hubhapeele ɨmvula huje, mubhanje nɨ viyabho hu habhaazyo ha hakhondɨɨye, nantele mubhanje nɨ shalye ɨsha‑akwɨlane. Gope amooyo geenyu gahashanga.” 18Hwope ʉPaulo nʉ Balinaaba bhahayanjile amazwi ɨgo na hubhakhaane abhantu huje, bhasahafumyaje ɨnsangu hwa bheene, hwope hwahali hukhome hubhakhaane.

19Ɨpo pamandɨ bhahɨnza aBhayahuudi bhamo bha bhahafumile hu mabooma agɨ Antiyokiya nɨ Ikoniya. Bhahabhasonsheelezya abhantu bhabhe peeka nabho, bhonti bhahanʼkhoma ʉPaulo na mawe. Bhahanʼdendemula, bhahanʼtwala hwʉnzɨ yi‑ibooma, pɨpo bhahasɨɨbhaga huje, afwiye. 20Leelo, abhooziwa bha bhahali paala lwa bhahanʼzyʉngʉʉla, ahazingimuha, ahaweela mwi‑ibooma. Lwa hwasha, ahasogola paala, ahabhala peeka nʉ Balinaaba hwi‑ibooma ɨlyɨ Deelibe.

ɄPaulo nʉ Balinaaba bhaweela hwi‑ibooma ɨlyɨ Antiyokiya ɨlya mu mukowa ʉgwɨ Siiliya

21ɄPaulo nʉ Balinaaba lwa bhali mu Deelibe, bhahalʉmbɨlɨlaga abhantu ɨNongwa ɨNyinza ɨzya Yeesu, abhinji bhahamʼmwɨtɨha ʉYeesu. Ɨpo pamandɨ, bhahaweela hwi‑ibooma ɨlyɨ Lisitila, Ikoniya nɨ Antiyokiya hu mukowa ʉgwɨ Pisidiya. 22Ʉhwo, poponti pa bhahabhalaga, bhahabhajinjizyaga amooyo abhooziwa, bhahabhamanyizyaga huje, bhadandamalaje mu lwɨtɨho. Bhahabhabhʉzyaga huje, “Atʉʉshe mu wumwɨnɨ ʉwa Ngʉlʉbhɨ, tihwanziwa ashilile mu malabha aminji.” 23Mu shila shibhanza ʉPaulo nʉ Balinaaba bhahabhasaluuye abhagoosi bha hushenyeelezye. Bhahabhabhɨɨhaga hu mpuuto na hwiyiime alye hwa Mwɨnɨ ʉYeesu wa bhahamʼmwɨtɨɨshe.

24Ɨpo pamandɨ, ʉPaulo nʉ Balinaaba bhahashila mu mukowa ʉgwo ʉgwɨ Pisidiya, bhahatʉʉha mu mukowa ʉgwɨ Pamfiliya. 25Bhahafiha hwi‑ibooma ɨlyɨ Pelige. Ʉhwo bhahamanyizya ɨNongwa ɨNyinza ɨzya Yeesu ʉKilisiti. Ɨpo bhahabhala mwi‑ibooma ɨlyɨ Ataaliya. 26Afume ɨpo bhahashʉʉla nɨ meeli, bhahaweela hwi‑ibooma ɨlyɨ Antiyokiya ɨlya mu mukowa ʉgwɨ Siiliya. Ʉhwo abhooziwa hwa bhahamʼputiiye ʉPaulo nʉ Balinaaba ɨmpyana ya Ngʉlʉbhɨ hu mbombo ɨla, ya bhahabha bhamalile huyibhombe. 27Lwa bhaafiha hu Antiyokiya, bhahabhabhʉngaanya abhantu abha hu shibhanza. Bhahabhabhʉʉzya zyonti ɨzyo ʉNgʉlʉbhɨ zya‑ahabhombile ashilile hwa bheene. Nantele, bhahabhabhʉʉzya shiila sha‑ahabhiguliiye bha saga Bhayahuudi ʉlyango ʉgwa humʼmwɨtɨshe ʉYeesu. 28Bhahakhala ɨnsiku zinyinji pa Antiyokiya peeka na bhooziwa.

Currently Selected:

ƗMbombo ɨzya Bhasontwa 14: SBK

Highlight

Copy