પ્રેરિતોનાં ક્રત્યો 14

ઇકુનિયુમ સેર મ પાવલુસ અનેં બરનબાસ

1ઇકુનિયુમ સેર મ એંમ થાયુ કે પાવલુસ અનેં બરનબાસ યહૂદી મનખં ના ગિરજા મ જ્યા, અનેં તાં એંવું ભાષણ આલ્યુ કે યહૂદી અનેં બીજી જાતિ ન મનખં મહં ઘણંવેં વિશ્વાસ કર્યો. 2પુંણ વિશ્વાસ નેં કરવા વાળં યહૂદી મનખંવેં બીજી જાતિ ન મનખં નેં વિશ્વાસી મનખં ના વિરુધ મ સુહકાર્ય અનેં વેર ઘાલ દેંદો. 3અનેં પાવલુસ અનેં બરનબાસ તાં ઘણં દાડં તક રુંકાયા, અનેં વેયા પ્રભુ ઇપેર ભરુંહો રાખેંનેં હિમ્મત થી પરસાર કરતા હેંતા, કેંમકે પરમેશ્વરેં હેંનં દુવારા સમત્કાર અનેં ગજબ ન કામં કરાવેંનેં સાબિત કર્યુ કે એંના અનુગ્રહ ના બારા મ હેંનનું ભાષણ હાસું હેંતું. 4પુંણ સેર ન મનખં મ ફૂટ પડેં ગઈ હીતી, હેંનેં મ અમુક મનખં તે વિરોધ કરવા વાળં યહૂદી મનખં મએં અનેં અમુક પસંદ કરેંલં સેંલં મએં થાએંજ્ય. 5તર બીજી જાતિ ન મનખં અનેં યહૂદી મનખં પુંતાનં અગુવં નેં હાતેં મળેંનેં, પસંદ કરેંલં સેંલં નું અપમાન અનેં હેંનં ઇપેર પત્થરમારો કરવા નું કાવતરું કર્યુ. 6તે વેયા હેંનં ના કાવતરા ના બારા મ જાણેંજ્યા, અનેં લુકાઉનિયા ઇલાકા ના લુસ્ત્રા અનેં દિરબે સેરં મ અનેં આજુ-બાજુ ન પરદેશ મ નાહેં જ્યા. 7અનેં તાં તાજા હમિસાર નો પરસાર કરવા મંડ્યા.

લુસ્ત્રા અનેં દિરબે સેર મ

8લુસ્ત્રા સેર મ એક માણસ બેંઠેંલો હેંતો, વેયો સાલેં નેં સક્તો હેંતો કેંમકે વેયો જલમ થીસ લંગડો હેંતો. 9વેયો પાવલુસ નેં પરસાર કરતં હામળેં રિયો હેંતો, પાવલુસેં હેંનેં એક નજરેં ભાળ્યુ કે હેંનેં હાજો થાવા નો વિશ્વાસ હે. 10અનેં જુંર થી સિસાએં નેં કેંદું, “તારં પુંતાનેં પોગેં હિદો ઇબો થા.” તર વેયો કુદેંનેં ઇબો થાએંજ્યો, અનેં હરવા ફરવા મંડ્યો. 11તર મનખંવેં પાવલુસ નું આ કામ ભાળેંનેં, લુકાઉનિયા ભાષા મ જુંર થી સિસાએં નેં કેંદું, “દેંવતા મનખં ના રુપ મ આપડી કન ઉતરેં આયા હે.” 12હેંનવેં બરનબાસ નેં જ્યુસ દેંવતા અનેં પાવલુસ નેં હિરમેસ દેંવતા કેંદું, કેંમકે પાવલુસ મુખી વક્તા હેંતો. 13સેર નેં બારતં એક જ્યુસ દેંવતા નું મંદિર હેંતું. હેંના મંદિર નો પુજારી ઢાહા અનેં ફૂલં ના હાર લેંનેં સેર ના મુંટા દરવાજા કન આવેંજ્યો, વેયો હેંનં મનખં નેં હાતેં મળેંનેં ભુંગ કરવા સાહતો હેંતો. 14પુંણ પસંદ કરેંલં સેંલં બરનબાસ અનેં પાવલુસેં ઝર ઇયુ હામળ્યુ તે વેયા ઘણા પરેશાન થાએંજ્યા અનેં હેંનવેં પુંતાનં સિસરં ફાડ દડ્ય અનેં દોડેંનેં મનખં ના ટુંળા મ ભરાએંજ્યા. અનેં સિસાએં નેં કેંવા મંડ્યા, 15“હે મનખોં તમું હું કરો હે? હમું તે તમારી જુંગ દુઃખ-સુખ ભુંગવવા વાળા માણસ હે, અનેં તમનેં તાજો હમિસાર હમળાવજ્યે હે, કે તમું ઇની બેકાર વસ્તુવં થી અલગ થાએંનેં જીવતા પરમેશ્વર કન આવો, ઝેંને આકાશ, ધરતી, દરજ્યા અનેં ઝી કઇ હેંનં મ હે બદ્દુંસ બણાયુ હે. 16હેંને જુંના જમાના મ બદ્દી જાતિ ન મનખં નેં પુંત-પુંતાનેં રસ્તે સાલવા દેંદં. 17તેં હુંદો વેયો પુંતાનં તાજં કામં દુવારા પુંતાના બારા મ ગવાહી આલતો રિયો, વેયો આકાશ થી વરહાત અનેં ટાએંમેં-ટાએંમેં દરેક ફસલ ઉગાડેંનેં તમનેં ખાવાનું આલેંનેં આનંદ થી ભરપૂર કરતો રિયો.” 18એંમ કેં નેં પાવલુસ અનેં બરનબાસેં મનખં નેં ઘણી મુશ્કિલ થી રુંક્ય કે હેંનં હારુ ભુંગ નેં કરે.

19પુંણ અમુક યહૂદી મનખંવેં અંતાકિયા અનેં ઇકુનિયુમ સેર થી આવેંનેં મનખં નેં પુંતાના પક્ષા મ કર લેંદં, અનેં પાવલુસ ઇપેર પત્થરમારો કર્યો, અનેં હેંનેં મરેંજ્યો એંમ હમજેંનેં સેર નેં બારતં ઘહેંડેંનેં લેંજ્ય. 20પુંણ ઝર વિશ્વાસી સેંલા હેંનેં સ્યારેં મેર આવેંનેં ભેંગા થાએંજ્યા, તે વેયો ઇબો થાએંનેં સેર મ જ્યો. અનેં બીજે દાડે બરનબાસ નેં હાતેં દિરબે સેર મ જાતોરિયો.

સિરિયા પરદેશ ના અંતાકિયા સેર મ પાસું આવવું

21અનેં હેંનવેં હેંના સેર ન મનખં નેં તાજો હમિસાર હમળાયો, અનેં ઘણા બદા સેંલા બણાવેંનેં, લુસ્ત્રા અનેં ઇકુનિયુમ અનેં પિસિદિયા ઇલાકા ના અંતાકિયા સેરં મ પાસા વળેં આયા. 22અનેં વેયા દરેક સેરં મ વિશ્વાસી સેંલંનેં ઉત્તેજન આલતા રિયા અનેં એંમ ભાષણ આલતા હેંતા, કે વિશ્વાસ મ બણેં રો, અનેં એંમ હુંદા કેંતા હેંતા, કે “આપડે ઘણું દુઃખ વેંઠેંનેં પરમેશ્વર ના રાજ મ જાવું પડહે.” 23અનેં હેંનવેં દરેક મંડલજ્ય મ હેંનં હારુ વડીલ નિઇમા અનેં ઉપવાસ હાતેં પ્રાર્થના કરેંનેં હેંનનેં પ્રભુ ઇસુ ના હાથ મ હુઇપા ઝેંનેં ઇપેર હેંનવેં વિશ્વાસ કર્યો હેંતો. 24હેંનેં પસી વેયા પિસિદિયા ઇલાકા મ થાએંનેં પંફૂલિયા પરદેશ મ પોત્યા. 25પમ્ફૂલિયા ઇલાકા ના પિરગા સેર મ પરમેશ્વર ના વસન નો પરસાર કરેંનેં અત્તલિયા સેર મ જ્યા. 26અનેં તાંહાં જહાંજ મ બેંહેંનેં અંતાકિયા સેર મ પાસા વળેં જ્યા, ઝાં હેંનનેં પરમેશ્વર ના અનુગ્રહ મ હુંપેંનેં, હેંના કામ હારુ મુંકલવા મ આયા હેંતા, ઝેંનેં વેયા પૂરુ કરેંનેં વળેં આયા હેંતા. 27અંતાકિયા સેર મ પોતેંનેં, હેંનવેં મંડલી ન મનખં નેં ભેંગં કરેંનેં વતાડ્યુ કે પરમેશ્વરેં હેંનનેં હાતેં રેંનેં, કેંવં મુંટં-મુંટં કામં કર્ય, અનેં કેંકેંમ પરમેશ્વરેં બીજી જાતિ વાળં મનખં હારુ વિશ્વાસ કરવા નો રસ્તો કાડ્યો. 28અનેં પાવલુસ અનેં બરનબાસ સેંલંનેં હાતેં ઘણં દાડં તક અંતાકિયા સેર મ રિયા.

Currently Selected:

પ્રેરિતોનાં ક્રત્યો 14: GASNT

Highlight

Copy