Fil 4
4
Rekomandasion
1Mo bann frer e ser, mo bien kontan zot, e mo pe atann zot avek inpasians. Zotmem mo lazwa; res fidel dan zot lavi avek Bondie. 2Mo inplor Evodi ek Sintik pou viv anakorite dan Lesegner. 3Mo pe osi dimann twa, mo partner, fidel pou ed sa bann fam la parski zot finn konbat ansam avek mwa pou propaz Bonn Nouvel parey kouma Kleman ek leres bann kolaborater finn fer. Zot nom finn ekrir dan liv lavi.
4Rezwir zot toultan dan Lesegner. Mo repete; rezwir zot. 5Les tou dimoun konn zot bonte. Lesegner pe vini biento. 6Napa bizin zot trakase ditou, me dan ninport ki sitiasion, avek enn leker rekonesan, ofer zot lapriyer ek siplikasion Bondie. 7Lape Bondie ki depas tou lintelizans, pou gard zot lekor ek zot lespri dan Zezi Kris.
8Finalman, mo bann frer e ser, pans bien lor tou seki vre, onorab, zis, pir, admirab ek tou seki merit nou louanz. 9Kontigne fer tou seki zot finn aprann ek resevwar ar mwa, seki zot finn tande e trouv mwa fer. Bondie lape pou res avek zot.
Rekonesans pou kado ki finn resevwar
10Asterla mo ena enn gran lazwa dan Lesegner ki zot finn montre lintere pou mwa. Zot tou deza ena sa lintere la pou mwa, me zot pa ti ena lokazion pou exprim li. 11Pa lakoz mo dan bezwin ki mo koz koumsa, non, mo finn aprann ki dan ninport ki leta mo ete mo bizin kontan. 12Mo konn viv dan lamizer ek dan labondans, kan mo ena ou kan mo pena nanye pou manze. 13Mo kapav fer fas avek tou sa bann sitiasion la parski Lekris li fortifie mwa.
14Kanmemsa, zot finn bien fer pou siport mwa dan mo bann difikilte. 15Zot, bann Filipien bien kone ki depi komansman ler mo ti kit Masedwann, apart zot okenn legliz pa ti partisip dan mo bann depans, 16mem ler mo ti dan Tesalonik, zot ti avoy mwa led. 17Mo pa zis anvi rod enn donasion ki pou mo prop benefis. 18Mo finn resevwar tou, mem plis ki seki mo pou bizin. Epafrodit finn aport mwa zot bann don kouma enn sakrifis kifer plezir Bondie. 19Mo Bondie pou donn zot seki zot bizin dapre so larises dan laglwar Zezi Kris. 20Laglwar pou Bondie papa, asterla e pou touzour, amenn.
Salitasion final
21Fer konpliman tou bann pep Bondie dan Zezi Kris. Bann kamarad ki avek mwa fer zot osi konpliman. 22Tou pep Bondie e spesialman bann desandan Sezar fer zot konpliman.
23Ki lagras sorti kot Zezi Kris, res avek zot.
Currently Selected:
Fil 4: NTKM2009
Highlight
Share
Copy
Want to have your highlights saved across all your devices? Sign up or sign in
Mauritian Kreol New Testament © Bible Society of Mauritius, 2009.
