2 Tes 2
2
Retour Lesegner
1Frer ek ser, konsernan retour nou Segner Zezi Kris ek nou rasanbleman avek li, nou sipliy zot, 2pa tro boulverse, oubien trakase, ni par bann fos let swadizan sorti kot nou, ki dir ki zour Lesegner li deza la. 3Dan ninport ki fason, pa les personn anbet zot parski sa zour la pa pou arive avan ki gran rebelion kont Bondie arive e sef rebel ki finn destine pou detrir pou aparet. 4Li pou lev kont tou seki dimoun priye ek adore. Li pou instal so tronn dan tanp Bondie apre sa deklar limem kouma Bondie. 5Zot pa rapel ki mo ti dir zot tou letan ki mo ti ankor avek zot? 6Asterla zot kone ki pe tini li pouki li paret selman ler so letan vini. 7Sa pwisans sekre mesanste la, li deza pe travay, me selman kan sa kikenn ki pe tini la, les li fer; 8lerla move rebel la pou paret e Segner Zezi pou touy li, li pou detrir li avek lafors so retour. 9Lemesan pou vini avek lafors Satan, ki pou servi tou pouvwar, tou bann sign pou anbet dimoun. 10Li pou servi tou fason pou fer bann ki pe deperi perdi lespwar parski zot pe refiz aksepte lamour ki sov zot. 11Akoz samem Bondie avoy zot enn fos pwisans pou fer zot krwar dan seki fos. 12Alor, tou dimoun ki pa krwar dan laverite e pran plezir dan seki mal, li pou kondane.
Bizin tini ferm
13Nou bizin touzour pe rann gras Bondie pou zot bann frer ek ser, parski Bondie finn swazir zot depi komansman mem pou sov zot par pouvwar Lespri e par zot krwayans dan laverite, pou fer zot vinn enn pep sin. 14Atraver Bonn Nouvel ki nou finn anons zot, Koumsamem Bondie finn apel zot pou ete. Li finn apel zot pouki zot gagn zot par dan laglwar nou Segner Zezi Kris. 15Mo bann frer ek ser, tini ferm avek sa tradision ki nou finn montre zot la, ki li par parol ou par let. 16Ki nou Segner Zezi Kris limem ek Bondie nou Papa ki kontan nou e finn donn enn rekonfor eternel ek enn bon lesperans par so lagras, 17li ranpli zot leker avek kouraz e li akord zot lafors pou touzour pratik seki bien, par zot aksion ek zot parol.
Currently Selected:
2 Tes 2: NTKM2009
Highlight
Share
Copy
Want to have your highlights saved across all your devices? Sign up or sign in
Mauritian Kreol New Testament © Bible Society of Mauritius, 2009.