2 Tes 1
1
Salitasion
1Pol, Silvin ek Timote pe ekrir legliz Bondie Papa ek Lesegner Zezi Kris dan Tesalonik: 2Nou souete ki Bondie nou Papa ek Segner Zezi Kris donn zot lagras ek lape.
Aksiondegras e lapriyer
3Nou bann frer ek ser, nou bizin touzour rann gras Bondie pou zot. Li bien ki nou fer sa, parski zot lafwa pe boukou grandi, e lamour ki sakenn ena ant zot pe osi grandi. 4Akoz samem nou koz lor zot avek boukou fierte dan legliz Bondie. Zot pe tini ferm dan zot lafwa malgre tou bann persekision ek detres ki zot ankor pe siporte.
5Samem prev ki zizman Bondie li drwat, e seki zot pe siporte la, li pou rann zot dign Rwayom Bondie, pou ki zot pe soufer. 6Ofet, Bondie li zis; seki fer zot soufer, li pou soufer li osi. 7Bondie pou soulaz zot, ki pe soufer, e parey nou osi. Li pou fer sa kan Lesegner Zezi retourne depi dan lesiel avek so bann anz bien pwisan, 8zot pou vini avek enn laflam dife, pou vanz kont bann ki pa konn Bondie e ki pa obeir Bonn Nouvel nou Segner Zezi Kris. 9Zot pinision pou detrir zot pou touzour e pou separ zot avek prezans Bondie ek pwisans so laglwar. 10Letan li vini zour so glorifikasion parmi tou so pep, li pou admire par bann dimoun ki finn krwar dan li e zot osi zot pou parmi akoz zot temwagnaz. 11Akoz samem nou priye pou zot, nou dimann Bondie ki zot reste fidel ar so lapel e ki so lagras permet zot realiz zot dezir pou fer seki bien e rann zot lafwa aktif. 12Alor, nom Segner Zezi pou glorifie dan zot, e zot dan li, dapre lagras Bondie e nou Segner Zezi Kris.
Currently Selected:
2 Tes 1: NTKM2009
Highlight
Share
Copy
Want to have your highlights saved across all your devices? Sign up or sign in
Mauritian Kreol New Testament © Bible Society of Mauritius, 2009.