Luk 23

1Agum̃aṉi waôdu, agèndye Yesu g’ôzô wi Pilatu.

2N’avakilyi waô gô sozizè inè: Azw’alèng’ôma wiṉo e sokolya iṉongo nyazô, alege Sezar gô pô mpagô, mbulyaga inè, ayèmè ne Krist. 3N’aṽambyô yè ne Pilatu inè: Awè n’ôga w’Iju? Awiṉizô yè ne Yesu inè: Èñ, nte bulyo.

4N’awulinyi Pilatu imiṉisè impôlô n’aṉaga inè: Mi pa dèng’ôgara gôr’ôma wiṉo. 5Ndô w’ayoli vyagaṉô, awulya inè: E sokoly’aṉaga, nènjaga gô Yuda yôdu, avila gô Galile, mbôra y’avakilyi yè, kwanga guṉu. 6Ndô gw’ayogyô Pilatu g’ômwanja wi Galile, aṽambyi twa pa ôma wiṉo mwô’Galile; 7na gw’amyeṉi yè inè, avili gw’ipangiṉa s’Erod, arôm̃yè yè gôr’Erod, avegagi ayèmè kè gô Yerusalèm gw’intyugu mèsoṉo.

8Gw’ayeṉi Erod Yesu, ayeṉi mbya mpôlô; konde aṽelagi ôling’ôla gô jeṉè, konde aliwô ajogyô g’ômwanji wè, aleṽiṉi kè gô jeṉ’elemba zi dendô yè. 9N’aṽambyè yè ikotè sijenge, ndô Yesu e pa fwiṉize yè igamba. 10Imiṉisè n’irèndisi w’avegagi vovo, w’azozizi yè ni ngulu mpôlô. 11Erod n’isozè sè kè w’avèdyi yè, azèlyè; n’awori waô yè ngoy njombwi awizè gôre Pilatu. 12Gô ntyugu mèyoṉo, Pilatu n’Erod w’arweṉi ndegô, konde avila gw’alônga aṽya gw’egômbe mèziṉo w’avegagi ndôṽa.

13N’alatizi Pilatu imiṉisè impôlô, n’ivangiṉi n’aṉaga, awulinya waô inè: 14Aṉwè abag’ôma wiṉo gôre myè g’ôma wi sokoly’aṉaga. Na vônaṉi my’are yè kotiza pa gw’azô maṉi, ndô mi pa dèngè n’ôgara gw’isam̃u mèyo yi soziza ṉwè na yè. 15Vangaṉ’Erod kè, konde awizi yè gôre zwè, na vônaṉi, e zel’ôsam̃u wi re yè denda pa wi re yè n’inyanga ny’ijuwa. 16Sambô mi be siṽè, arigè dyè.

17[Gô fèty’edu avegagi ni ntyale gô tigiṉa waô ôkôt’ôm̃ori dyè.] 18Ndô w’awôgiṉi waôdu ta inè: Yôṉiza wiṉo, ko dèkiza zwè Barabas dyè. 19Barabas yiṉo avegagi fwelô pa gô ntyôgô g’ômwanja w’edungu z’ayiṉô yè gô nkala, na g’ômwanja w’ijôṉ’aṉaga. 20N’arô kambi Pilatu na waô, mbelaga gô tige Yesu dyè. 21Ndô w’arôngi nè: Ṽanyè gô krosi, ṽanyè gô krosi! 22N’awulinyô waô ne Pilatu gô nyongo yi ntyarô inè: Ntiṉa nde, mbe nde yi re yè denda pa? Mi pa dènge ntiṉa yi re yè n’inyanga ny’ijuwa. Sambô mi be siṽè, arigè dyè. 23Ndô w’aṽangatyi yè ni mbôgiṉa mpôlô, mbambyaga inè, e ga ṽanyô gô krosi. Ni mbôgiṉi yaô y’ageṽi: 24Areṉizi Pilatu inè, ga lendô nt’abambya waô. 25N’arigi yè dyè ayè y’aṽambyô waô avegagi fwelô pa gô ntyôgô g’ômwanja w’edungu na g’ômwanja w’ijôṉ’aṉaga; n’aveṉi yè Yesu gô ntondiṉi yaô.

26Gw’agèndi waô na yè, w’awongi mwô’Sirèn, ini nyè ne Simôn, aṽyeṉigi avila g’ômpindi, n’agumbizi waô yè krosi, gôre yè gô twaṉa yô gô, nyum̃a yi Yesu.

27N’azôngyô yè ne nkondo mpôlô y’aṉaga, na y’antô w’awôlag’intôṉô saô aleṉa g’ômwanji wè. 28Ndô Yesu agegwi gôre waô, awulya inè: Awaṉ’antô wi Yerusalèm, aleṉiṉaṉi myè; ndô leṉiṉaṉi g’ômwanja w’ikuṽi yaṉi na g’ômwanja w’awaṉi waṉi. 29Konde vônaṉi, intyugu si be bya si be bulyô waô inè: Ôzaviṉô gôr’inkelenkele, ôzaviṉô gw’ambum̃u mi re mi pa jaṉa ni mori, na gw’ambèṉè mi re mi pa jonj’awaṉa! 30Egômbe mè wi be pakilya gô buliny’inômba inè: Vôswaṉi gôre zwè! na gô sanômba inè: Vugaṉi zwè! 31Konde ja w’adend’isam̃u yiṉo gw’erer’eṽezô, gambèṉè e be twa sèṉi g’ôkôlôngô?

32Aṉag’awèṉè aṽaṉi, iyanjisi y’ibe, w’agèndizô egômbe mè gô jôṉô ta ni Yesu.

33Gw’aṽyeṉi waô gô mbôra yi fweyô inè, nkèli, w’aṽanyi yè vovo gô krosi, n’aṉag’aṽe mèwoṉo kè aṽaṉi, ôm̃ori g’ôgo ôṉôm̃yè n’ôm̃ori g’ôgo ônyantwè. 34N’awulyi Yesu inè: Rera, nyeza waô, konde wi pa mya nte denda waô. N’avungi ezôga gôre waô gô ker’ingoy sè.

35Aṉaga w’agum̃aṉi vovo, avônaga. Ivangiṉi kè y’azèlyagi Yesu, awulya inè: Azungiṉ’am̃ori; e ga zungiṉ’ôkuṽi wèmè, j’ayè ne Krist yi re Anyambyè pinja pa! 36Isozè kè s’azèlyagi yè, aṽya gôre yè, aṽele pè vinègre, awulya inè: 37J’awè n’ôga w’Iju, zungiṉ’ôkuṽi womè!

38Irèndo y’avegagi tèndô pa gw’igôṉô ny’ewônjô zè nè: Wiṉo n’ôga w’Iju.

39N’ôm̃ori w’aṉag’aṽe, w’aṽanyô na yè gô krosi, aroṽi yè, awulya inè: Awè arange Krist? Zungiṉ’ôkuṽi womè, ko sungiṉa zwè kè! 40Ndô ôm̃ori awiṉizi nsèmbègè, awulya inè: Ô pa ty’Anyambyè du, awè yi re pô p’ôgara mèmô? 41Gôre zwè re kwèkwè, konde azwè dendiṉô ga nt’ar’ijanji sazô ibe, ndô wiṉo e zele denda pe ndaga mbe du. 42N’awulinyi yè Yesu inè: Yônginya myè gô be byo gw’iṉongo nyo. 43N’awiṉizô ne Yesu inè: Giligili mi bulinyo inè: Ṉèṉo wiṉo ô be dwaṉa na myè gô Paradi.

44Avegagi pyèrè n’agwèr’ôrôṽa mi nkola, n’arweṉi mpiri gô ntye yôdu, kwanga gw’agwèr’eṉôgôm̃i. 45Nkômbe y’ayilangaṉi bogubogu, n’ôṉamba w’avegagi diṽiṉô pa gô nagô y’Anyambyè w’ayarwi mbwa gô garegare.

46N’arôngi Yesu n’inyôy ivôlô, awulya inè: Rera, mi piṉ’iṉiṉi nyam̃ gw’ago mo. Na gw’awulyagi yè agamba miṉo azuli ômwèy.

47Gw’ayeṉi ewônjô z’isozè nt’arweṉi, azum̃inyi Anyambyè, awulya inè: Giligili ôma wiṉo apegaga ôma w’ôgôre.

48Na waôdu w’alataṉi n’aṉaga gô pôna, waô jeṉa pa nt’arweṉi w’awinyi mbôlag’intôṉô saô. 49Waôdu w’amyeṉi Yesu, n’antô w’aliwô w’asôngi yè avila gô Galile, w’agum̃aṉi davadavye avônag’isam̃u y’arweṉi.

50Avegagi vovo ôma, ini nyè ne Yôsèf, ôṉèro gôre waô, ôm’ombya n’ôgôre, 51are e pa diwô ajiviri mondo yaô n’ijanji saô; alwaṉagi gw’Arimate, nkala yi Yuda, ayè kè awôndag’iṉongo ny’Anyambyè. 52Ôṉôm̃e wiṉo agèndi gôre Pilatu, aṽamby’ôkuṽa wi Yesu. 53N’azônyi yè ebende avila gô krosi, avinga zô n’ivèl’iṽya, awela zô g’ôrôngiṉô w’arôkyô gw’idô, wi pa diwô w’afwelyô ebende ni mori. 54Y’avegagi ntyugu y’ikekiza, ni ntyugu yi soṉo y’avegagi pyèrè gô jenja.

55N’antô w’avili ni Yesu gô Galile w’azôngi Yôsèf, ayeṉ’ôrôngiṉô nt’are ôkuṽa wi Yesu gô dimbiṉô gôgô; 56n’awinyi waô, agekize yom̃a yi nkangô mbya. N’ayowi waô gô ntyugu yi soṉo, ga nt’ar’ivanga.

Currently Selected:

Luk 23: MYE

Highlight

Copy