Luk 22

1Fèti yi mpèmba yi re levèn fo, yi fweyô inè, Paki, y’arweṉi pyèrè. 2Imiṉisè impôlô n’irèndisi w’awutagi mpoṉo yi re waô ko jôṉe Yesu; konde w’aryeṉi aṉaga.

3N’ayingiṉi Satan gôre Yudas, aweyôgô inè, Iskaryot, avegagi ôm̃ori gôr’igôm̃i n’aṽaṉi. 4N’agèndi Yudas agamba n’imiṉisè impôlô ni gogi, nt’are yè ko kôtizè gôre waô. 5Ayeṉi waô mbya, avangaṉa gô pè sika. 6Waô pangaṉa pa, awuti egômb’eṽya gô kôtize Yesu ko aṉaga w’amye igamba.

7Gw’aṽyeṉi ntyugu yi mpèmba yi re levèn fo, wi re mw’idombè wi Paki gô jôṉô, 8arôm̃i Yesu Pyère ni Yôan, awulya inè: Gèndaṉi gô kekiza zwè Paki, ko zwè nya yô. 9Awulinyi waô yè inè: Ô bela zwè gô kekiza yô na gweṉi? 10Awiṉizi yè waô inè: Vônaṉi, gô be jingiṉa ṉwè gô nkala, aṉwè be dataṉa n’ôma wi twaṉe ntyuga y’aṉingô; zôngaṉi yè gô nagô yi be jingiṉô yè, 11ko bulinyaṉi ôṉivi wi nagô inè: Ôṉènji e bulinyo inè: Nontye yi re gweṉi yi be nya myè n’iṉèngi yam̃ Paki? 12Gambèṉè e be teva ṉwè nontye mpôlô y’igôṉô, kekizô pa: vo kekizaṉi Paki vovo. 13N’agèndi waô, aliṽinye yom̃a ga nt’aliwô yè abulinyi waô, n’agekizi waô Paki.

14Gw’aziṽ’igwèra, alwaṉi baru gw’inya, ayè n’iṉèngi yè. 15N’awulinyi yè waô inè: My’are jônguṉa pa gô bela gô nye Paki yiṉo na ṉwè, myè yuwaga ro; 16konde mi bulinya ṉwè inè, mi be tô nya yô nyèṉè, kaô gô be dendô yô rèti gw’iṉongo ny’Anyambyè. 17N’awongi yè imogi, n’ayè pa p’akeṽa, awulyi nè: Wongaṉ’imogi nyiṉo, ko keraṉi nyô aṉwè n’aṉwè; 18konde mi bulinya ṉwè inè, avila vèṉo mi ze tô jonge nyèṉè ilônda y’ôgoli, kaô iṉongo ny’Anyambyè ny’abya.

19N’awongi yè mpèmba, n’ayè pa p’akeṽa, am̃oguṉi yô, awulya inè: Wiṉo n’ôkuṽi wam̃, wi re pô pa g’ômwanji waṉi; lendaṉi yeṉo gô jônginya myè. 20N’awongi yè kè imogi, inya vya, ava nyô waô, awulya inè: Imogi nyiṉo ne njeka nyoṉa gô ntyiṉi yam̃, yi re pôvizô pa g’ômwanji waṉi.

21Ndô vônaṉi, ôgo w’ôma wi kôtiza myè wi re na myè gô tavulu yiṉo. 22Konde rèti Ômwaṉa w’ôma e kènda ga nt’are kenjô pa. Ndô azile gôr’ôma mè e kôtizè! 23N’avakilyi waô gô bambyaṉa inè, mande gôre waô e be dende ndaga yiṉo.

24N’alôṽaṉi kè rôm̃i mpaga inè: Mande gôre waô e bongô inè, ar’ômpôlô? 25N’awulinyô waô ne Yesu inè: Aga w’aṉongo wi pangiṉa waô ni ngulu, na waô wi re n’anyanga gôre waô, wi fweyô inè, iyanjisi y’isam̃u imbya. 26Ndô alwaṉe yeṉo gôre ṉwè, ndô ayè yi r’ômpôlômè gôre ṉwè, e ga lwaṉ’egolaṉi ga mw’erumbe, n’ayè yi re gw’ewônjô, e ga lwaṉ’egolaṉi g’ôma wi janja. 27Konde ômpôlô mande, ayè yi re baru gô tavulu y’inya mbè ayè yi pengiṉe tavulu? Arang’ayè yi re baru gô tavulu y’inya? Ndô my’are gô garegare yaṉi g’ôma wi pengiṉe tavulu. 28Aṉwè, aṉw’are dwaṉa pa na myè gw’idembô sam̃; 29yeṉo mi kenjiṉa ṉwè iṉongo, ga nt’agenjiṉi Reri yam̃ agenjiṉa myè, 30ko ṉwè nya ayonga gô tavulu yam̃ gw’iṉongo nyam̃, ko ṉwè dwaṉa baru gô ka, gô jèkèly’ôṉambaṉi w’imbuṽe s’Israèl.

31N’awulyi Rerè inè: Simôn, Simôn, vôna, Satan aṽeli gô saga ṉwè egolaṉi ga frômènte. 32Ndô my’are kambiṉa pa g’ômwanji wo inè, ibekelyi so s’amaṉa; na gô be tô kalwo, yoliz’awareri yo. 33N’awulinyô yè ne Pyère inè: Rera, my’are keka pa gô kènda na wè, gô ntyôgô na gw’ijuwa. 34N’awulyi Yesu inè: Pyère, mi bulinyo inè, njogoṉi yi ze kôge ṉèṉo wiṉo kaô w’adande nyongo ntyarô inè, w’amye myè.

35N’arô bulinyi yè waô inè: Gw’arôm̃i myè ṉwè sika fo, ni puka fo, n’intyôzô s’atanga fo, aṉwè aziliṉô ezom̃a? Awiṉizi waô inè: E zele. 36N’awulinyi yè waô inè: Ndô vèṉo, ayè yi re ni sika e ga wonge yô, n’ayè yi re ni puka e ga wonge yô kè, n’ayè yi re e zele n’ôkwara e ga ṽalize ngoy yè gô kôla yô, ko yè dèng’ezom̃a zi kôlè n’ôkwara. 37Konde mi bulinya ṉwè inè, igamba nyiṉo nyi re tèndô pa nyi ga lendô gôre myè inè: Arangyô gô ntangô y’ivavisi. Konde isam̃u g’ômwanji wam̃ y’atweṉi pyèrè gô twa. 38N’awulyi waô inè: Rera, vôna, vèṉo r’ikwar’imbaṉi. N’awulinyi yè waô inè: Yiṉo yi re kwèkwè.

39Ayè kogwa pa, ga nt’avegagi ntyale yè, agèndi gô nômba yi yôlivi. N’azôngyô yè n’iṉèngi yè.

40Gw’aziṽi yè gô mbôra mèyoṉo, awulinyi yè waô inè: Gambiṉaṉi nè, aṉwè agweṉa gw’isoryô. 41N’azanjiṉi yè avila gôre waô vo ntyanjô yi r’ôma ko pung’idô, n’alôṽi yè akotolo, agambiṉa, awulya inè: 42Rera, j’aw’ajivira, rômb’imogi nyiṉo avila gôre myè! Ndô aranga gô ntondiṉi yam̃, ndô iyo yi ga lendô. 43N’awôm̃unyi yenjèl gôre yè avila g’ôrôṽa, ayolizè. 44N’agambiṉi yè ni ngulu mpôlô, konde avegagi n’añandi ampôlô, n’ejuku z’arweṉi egolaṉi g’adodo ampôlô mi ntyiṉa ntwagaga gô ntye. 45Ayè kambiṉa pa, agum̃aṉi yè, aṽya gôr’iṉèngi yè, aliṽinya waô wi dèw’antyôviṉô g’ômwanja w’ekèṽa, n’awulinyi yè waô inè: 46Ntiṉa nde yi dèwa ṉwè? Ṉongwaṉi ko kambiṉaṉi, ko ṉwè agweṉa gw’isoryô.

47Gw’agambagi yè, vôna, aṽyeṉ’aṉag’awenge, n’ayè y’aweyôgô inè Yudas, ôm̃ori gôr’igôm̃i n’aṽaṉi, nkèndaga gô bôsô yaô. N’azusi yè pyèrè gôre Yesu gô sombè. 48Ndô Yesu awulinyi yè inè: Yudas, ô kôtiz’Ômwaṉa w’ôma n’isomba?

49Gw’ayeṉi waô w’avegagi vingôvingô gôre Yesu ayeṉa nte be twa, w’awulyi nè: Rera, azwè ga gwère n’ikwara? 50N’ôm̃ori gôre waô agwèri nyôngô yi miṉisè mpôlô azèr’ôrôy wè ôṉôm̃yè nkwe. 51Ndô Yesu awiṉizi, awulya inè: Lèkizaṉi vovo! N’awati yè ôrôy w’ôma mèwoṉo, ayingè.

52Awulinyi Yesu imiṉisè impôlô, n’ivangiṉi yi nagô y’Anyambyè, n’aṉèro w’aṽyeṉi gô kôtè inè: Aṉwè abya n’ikwara n’iviso egolaṉi ga gô kôt’ôgwèrisi. 53My’avegagi ntyugw’edu na ṉwè gô nagô y’Anyambyè, ko ṉwè anyonyuṉ’ago maṉi gô kôta myè. Ndô nyiṉo n’igwèri nyaṉi, ni ngulu yi mpiri.

54Waô kôta pe Yesu, w’agèndi na yè ayinginyè gô nagô yi miṉisè mpôlô. Ndô Pyère azôngi davadavye.

55Aṽakizi waô ôgôṉi gw’evungu, n’alwaṉi waô barugebaru vovo. Pyere alwaṉi baru kè na waô. 56Nyôngô nyantô y’avengiṉagi nagô ayeṉi yè baru swaswo n’ôgôṉi, azilyè yè mbyambye, awulya inè: Ôṉôm̃e wiṉo kè avegagi na yè. 57Ndô alandi awulya inè: Ômwantô, my’amye yè. 58Kwè vim̃ô, ôm̃ori ayeṉi yè, awulya inè: Awè kè ôm̃ori gôre waô. Ndô Pyère awulyi nè: Ôṉôm̃e, e zele. 59Pyèrè n’igwèra nyi nkola pyagaṉa pa, ômwèṉè awulyi buku inè: Giligili ôṉôm̃e wiṉo kè avegagi na yè, konde ayè mwô’Galile. 60Ndô Pyère awiṉizi nè: Ôṉôm̃e, mi pa mya nte kambo. Na gw’agambagi yè, njogoṉi y’agôgi pelè. 61N’agegwi Rerè avône Pyère. N’ayônginyi Pyère igamba mè ny’awulinyô yè ne Rerè inè: Njogoṉi gôgaga ro ṉèṉo wiṉo, ô be danda myè nyongo ntyarô. 62N’agogwi Pyère aleṉa n’ekèṽ’evôlô.

63N’aṉaga w’azimbyi Yesu mbem̃eṉe w’azèlyagi yè, awôlègè. 64N’aliṽiṉi waô antyo mè, aṽambyè inè: Voga, mande bôlo? 65N’agambiṉi waô yè isam̃u imyèṉè imyenge ntoṽègè.

66Gw’ayenj’ôwenja, ôvagô w’aṉèro w’aṉaga, n’imiṉisè impôlô, n’irèndisi w’alataṉi ta, n’aviṉi waô Yesu g’ôvagô waô. 67Awulyi waô inè: J’awè ne Krist, wulinya zwè. Ndô Yesu awiṉizi waô inè: Ja my’abulinya ṉwè, aṉwè ze bekelye; 68na ja my’abambya ṉwè, aṉwè ze fwiṉize myè igamba. 69Ndô avila vèṉo ômwaṉa w’ôma e be dwaṉa baru g’ôgo ôṉôm̃yè wi ngulu y’Anyambyè. 70N’awulyi waôdu inè: Sambô awè, ômwaṉa w’Anyambyè? Awiṉizi yè waô inè: Nt’abulya ṉwè, myè ne yè. 71N’awulyi waô inè: Azwè p’are n’isolo nde ny’iyeṉi? Konde azwèmè, azw’are jogo pa avila g’ôgwaṉi wèmè.

Currently Selected:

Luk 22: MYE

Highlight

Copy