Luk 12

1Egômbe mè, gw’avegag’intozèny s’aṉaga dataṉa pa ta, ko waô jaraṉa, Yesu avakilyi gô buliny’iṉèngi yè inè: Gw’alônga gelim̃aṉi gô levèn y’ifarisi, yi r’ômbyagwaṉa. 2E zel’ezom̃a pugô pa zi re z’awôm̃unyô, ge jumbuṉô pa zi re z’amyô. 3Yeṉo isam̃u edu yi re ṉwè kamba pa gô mpiri yi be jogaṉô g’ôzange, n’isam̃u yi re ṉwè bulya pa g’ôrôy gô nontye yi be kambô gw’imyanjamyanja y’inagô. 4Mi bulinya ṉwè indegô sam̃ inè: Aryaṉi waô wi jôṉ’ôkuṽa, ndô avila vovo w’ayolye dend’ezom̃’ezèṉè. 5Mi be myeza ṉwè ôma wi be tyô ṉwè. Ryaṉi yè yi re, ayè jôṉa pa, are ni ngulu yi punga gw’elôngô z’ôgôṉi; èñ, mi bulinya ṉwè inè, ryaṉi yè. 6Nkèṉe ôtaṉè si pa kôlô ni vintè mbaṉi? Na gô sô e zele mori yi deṽaṉô g’ôzô w’Anyambyè. 7Vangaṉe itwe si wônjô yaṉi sôdu si re tangô pa. Sambô aryaṉi: aṉw’are njôni vyagaṉô n’inkèṉe sinyenge.

8Mi bulinya ṉwè inè: Ôm’edu e be mèma myè gw’azô m’aṉaga, ayè be mèmô kè n’Ômwaṉa w’ôma gw’azô m’iyenjèl s’Anyambyè; 9ndô ayè yi be danda myè gw’azô m’aṉaga, e be dandô kè gw’azô m’iyenjèl s’Anyambyè.

10N’ôm’edu e be kamb’igamb’iṽe nyi sir’Ômwaṉa w’ôma nyi be nyezô yè; ndô ayè yi be pèdy’Iṉiṉ’Iṽya e ze nyezô.

11Gô be dur’aṉaga alura ṉwè gw’inagô si soṉo, na gôr’ivangiṉi na gôre mongi w’anyanga, ayeṉaṉi añandi nte be fwiṉiza ṉwè, ge nte be kamba ṉwè; 12konde Iṉiṉ’Iṽya nyi be nènja ṉwè gw’igwèra mè nt’are kwèkwè gôre ṉwè gô kamba.

13N’ôm̃ori avila gôr’aṉaga awulinyi Yesu inè: Ôṉènji, wulinye mwô’ngi yam̃ inè, e ga geriṉe myè ijigi sazô. 14Ndô Yesu awiṉizi yè inè: Ôṉôm̃e, mande alôṽyi myè ôyèkèli, ge ôma wi kera gôre ṉwè? 15N’awulinyi yè waô inè: Venjavenjaṉ’ikuṽi yaṉi avila g’ôgasô w’aṉiva wôdu, konde em̃èṉo z’ôma zi pa dwaṉa gw’ibuṉa si yom̃a yi nivô yè. 16N’agôviṉi yè waô nkôgô yiṉo inè:

Ntyaga y’ekiti z’ôma y’ayaṉagi mbyambye. 17N’avikilyi yè g’ôrèm̃i wè inè: Mi be denda sèṉi? Konde mi zele ni mbôra yi kenj’ôwongo wam̃. 18N’awulyi yè inè: Ziṉo zô be dendô myè: mi be saz’inagô sam̃, arô nôg’impôlô, gambèṉè mi be kenj’ôwongo wam̃ wôdu n’aṉivi mam̃ môdu vovo; 19vovo mi be buliny’iṉiṉi nyam̃ inè: Iṉiṉa, ô re n’igumb’inyenge kenjô pa gw’impum̃’imyenge, yoware, nya, yonga, ko jeṉe mbya. 20Ndô Anyambyè awulinyi yè inè: Ôgegende! iṉiṉi nyo nyi be bambyô wè ôgwèra wiṉo; sambô yom̃a yiṉo yi re wè kenja pa, yi be dwaṉa ya mande? 21Yeṉo re ayè yi kenjiṉ’ôkuṽi wèmè igumba, ndô e zele n’ipaga gôr’Anyambyè.

22Yesu arô buliny’iṉèngi yè inè: Yeṉo mi bulinya ṉwè inè: Ayeṉaṉi añandi g’ômwanja wi m̃èṉo yaṉi, ez m̃a zi be nyô ṉwè, ge g’ômwanja w’ikaṽi yaṉi ezom̃a zi be borô ṉwè. 23Em̃èṉo zi re vyagaṉô n’inya, n’ôkuṽa vyagaṉô n’ingoy. 24Vikilyareṉ’inyoṉi: si pa bèṉa, ge teṉa, sô kè si zele n’inagô s’igumba ge s’inya; ndô Anyambyè e nyeza sô. Njôni nde mpôlô yi re ṉwè pyagaṉa p’inyoṉi! 25Mande gôre ṉwè ko jolye kund’ereṉe z’ôgo gw’elaviṉi zè n’añandi? 26Sambô j’aṉw’ayolye dende vangaṉ’ezom̃’ezangômè, ntiṉa nde yi jeṉa ṉwè añandi g’ômwanja w’isam̃u im̃ori? 27Vikilyareṉi nte pôm̃’alanga: mi pa janja ge pèṉ’igoli; ndô mi bulinya ṉwè inè, vangaṉe Salômôn gw’ivendi nyè nyôdu e re borege ga im̃ori avila gô miṉo. 28J’Anyambyè abory’am̃aṉi mi re gw’itôve yeṉo mi re ṉèṉo, mèṉè mi falô gw’inu, ko pôrô ṉwè, aworye ṉwè, aṉwè y’ibekely’ijangô? 29N’aṉwè, awutaṉi yom̃a yi be nyô ṉwè ge yom̃a yi be jongô ṉwè, ko ayeṉaṉi añandi. 30Konde yom̃a yiṉo yôdu yi butô na mongi wi ntye gô ntye yiṉo; Reri yaṉi avôrô inè, aṉw’are n’isolo nyi yom̃a yiṉo. 31Ndô wutaṉ’iṉongo ny’Anyambyè; gambèṉè isam̃u yiṉo yôdu yi be kundô gôre ṉwè.

32Arya, mw’ôlemba; konde Reri yaṉi are jeṉa pe mbya gô pa ṉwè iṉongo.

33Gôlaṉi yom̃a yi re na ṉwè, ko paṉi mpagaga. Vangiṉaṉ’ikuṽi yaṉi ipuka si sika si re s’arwe inungu, igumba g’ôrôṽa nyi re ny’am̃aṉe du, gôr’ôfwe wi pa bya pyèrè, ge intyèlèlè si bundakaṉa. 34Konde mbôra yi dwaṉ’igumbi nyaṉi, vovo be dwaṉ’irèm̃i yaṉi kè.

35Ini yaṉi yi ga lwaṉe diryô pa, n’ilambi saṉi mbam̃iṉaga. 36Ko ṉwèmè dwaṉa g’aṉaga wi pengiṉe reri yaô gô fwinyè avila g’ôgeṽe w’ijômbaṉa, inè, gô byè, alôka, ko waô nunguṉa gôre yè pelè. 37Ôzaviṉô gôr’inyôngô mèsoṉo si be diṽinyô ne rerè si pengiṉa gô byè! Giligili mi bulinya ṉwè inè, e be kômb’ôṉambi wè, alwaṉiza waô barugebaru gô tavulu, ko yè bya avengiṉa waô. 38J’abya ôgwèra ṉengeṉenge, ge agwèr’ararô, ko yè diṽinya waô mbèmbaga, ôzaviṉô gôr’inyôngô mèsoṉo! 39Myaṉi mbyambye inè, arwe nè rerè yi nagô aliwô amyeṉ’igwèra nyi r’ôfwe gô bya, gavoṉo arô bèmbi, ko arige nagô yè gô pôduṉô. 40Lwaṉaṉi ṉwè kè keka pa, konde Ômwaṉa w’ôma e be bya gw’igwèra nyi re ṉwè e pa pikilya.

41Awulinyô yè ne Pyère inè: Rera, ô kôve nkôgô yiṉo gôre zwè, mbè gôr’aṉaga waôdu? 42N’awulyi Rerè inè: Nyôngô mè mbya y’ibekelyô na y’ôkeli ne mande yi be dôṽyô ne reri yè gw’ewônjô z’aṉagi wè, gô pa waô inya gw’egômbe? 43Ôzaviṉô gôre nyôngô mè yi be diṽinyô ne reri yè e denda yeṉo gô byè! 44Giligili mi bulinya ṉwè inè, e be dôṽyè gw’ewônjô zi yom̃i yè yôdu.

45Ndô je nyôngô mè abulya g’ôrèm̃i wè inè: Reri yam̃ e pa twa gô bya, ko yè pakilya gô bôl’inyôngô iṉôm̃e n’inyôngô inyantô, na gô nya, na gô jonga, ko yè bongô timbili, 46gambèṉè rerè yi nyôngô mè e be bya gô ntyugu yi re yè pa bôndè na gw’igwèra nyi re yè pa mya, azèrè nkwe, avè mbôra gôre waô wi r’ibekelyô fo. 47Nyôngô mè y’amyeṉi ntondiṉi ya reri yè, ko yè agekiza ge denda nt’are ntondiṉi yè, e be siṽô n’iziṽô imyenge. 48Ndô ayè yi re e pa mya, ko yè dend’isam̃u yi re n’inyanga nyi siṽô, e be siṽô n’ôziṽô wa kwè. Ayè yi re pô pa pôlô, e be bambyô kè pôlô, na gôre yè yi jegiṉô pôlô, e be bambyô kè vyagaṉô.

49My’aṽyeṉi gô pung’ôgôṉi gô ntye, n’ezom̃a zi belô myè ja w’atweṉi mbam̃iṉaga! 50Ar’ibatiza si re myè gô batizô, n’añandi nde mi jeṉô myè ja s’akeki! 51Aṉwè pikilya inè, my’are bya pa gô piṉ’am̃ènjè gô ntye? Mi bulinya ṉwè inè, nyawè, ndô ndôṽa. 52Konde avila vèṉo e be dwaṉ’aṉag’ataṉè gô nagô mô keraṉa pa, ararô g’ôzamba n’aṽaṉi g’ôzamba; 53rerè e be sir’ômwaṉa, n’ômwaṉa kè e be sire rerè; ngwè e be sir’ômwaṉi wè ômwantô, n’ômwaṉ’ômwantô e be sire ngi yè; ngwè e be sir’ômwantô w’ômwaṉi wè, n’ômwantô w’ômwaṉa e be sire ngwè y’ôṉôm̃u wè.

54N’arô bulinyi yè aṉaga inè: Gô jeṉa ṉwè evindi zi bya avila gô nkôṽa yi kènda ni nkômbe, aṉwè bulya pelè inè: Ningô yi bya. Na yeṉo twa. 55Na gô jeṉa ṉwè ômpunga wi pila gô Sud wi pèviṉa, aṉwè bulya inè: E be dwaṉe mpyô mpôlô. Na yeṉo twa. 56Aṉwè imbyagwaṉa! aṉw’avôrô gô bènguṉ’ôzô wi ntye na w’ôrôṽa; ndô ezom̃a nde zi re ṉwè e pa mya gô bènguṉ’egômbe ziṉo?

57N’aṉwè, aṉwè pa jèkèlya nt’are kwèkwè sèṉi? 58Gô kèndo n’ôlôvalôvi wo gôr’ôyèkèli, gèṉiza pôlô gô maz’igamba gô mpoṉo, ôlôvalôvi wo e vende duro gôr’ôyèkèli, ko ôyèkèli po gôr’ôma wi pengiṉa, ko yè fwelo gô ntyôgô. 59Mi bulinyo inè, w’agogwe vovo, kaô w’ape vinte num̃uṉa.

Currently Selected:

Luk 12: MYE

Highlight

Copy