Yôan 3

1Avegag’ôma gôr’ifarisi, ini nyè ne Nikôdèmô, ôm̃ori avila gôr’ivangiṉi y’Iju. 2Ayè mèwoṉo aṽyeṉi gôre Yesu ôgwèra, awulinyè inè: Rabi, azw’avôrô inè, awè n’ôṉènji w’avili gôr’Anyambyè; konde zel’ôma re ko jolye dende lemba yiṉo yi dendô wè, kaô Anyambyè adwaṉa na yè. 3Awiṉizyô yè ne Yesu inè: Giligili mi bulinyo inè, kaô ôma ajaṉô ijaṉô ijoṉa, ayolye jeṉ’iṉongo ny’Anyambyè. 4Nikôdèmô awulinyi yè inè: Ôma ko jolye jaṉô sèṉi j’atweṉi mbôlô? Ayè ko jolye tô jingiṉa gw’iwum̃u nyi ngi yè nyongo yi mbaṉi ayaṉô? 5Awiṉizi Yesu inè: Giligili mi bulinyo inè, kaô ôm’ajaṉô n’aṉingô n’Iṉiṉa ayo lye jingiṉe gw’iṉongo ny’Anyambyè. 6Ezom̃a zi re jaṉô pa n’ôzôṉe zô n’ôzôṉe, n’ezom̃a zi re jaṉô pa n’Iṉiṉa zô n’iṉiṉa. 7Am̃ama konde my’abulinyo inè: Aṉwè ga yaṉô ijaṉô ijôna. 8Ômpunga wi pèviṉa gô nkôṽa yi bela wô, ô jogo kè inyôy nya wô; ndô w’amye nkôṽa yi pila wô, ge nkôṽa yi kènda wô. Yeṉo r’ôm’edu are jaṉô pa n’Iṉiṉa. 9Awulinyô yè ne Nikôdèmô inè: Isam̃u yiṉo ko dwaṉa sèṉi? 10Awiṉizyô yè ne Yesu inè: Awè n’ôṉènji w’Israèl ko w’amya isam̃u yiṉo! 11Giligili mi bulinyo inè, azwè buly’isam̃u yi myô zwè, arakily’isam̃u yi re zwè jeṉa pa; ndô aṉwè pa bong’agambi mazô. 12Ja my’abulinya ṉwè isam̃u yi ntye yiṉo, ko ṉw’aṽekelya, aṉwè be bekelya sèṉi, ja my’abulinya ṉwè isam̃u y’ôrôṽa? 13E zel’ôma re panda pa g’ôrôṽa, kaô ayè y’azum̃iṉi avila g’ôrôṽa, ayè n’Ômwaṉa w’ôma re g’ôrôṽa. 14Na ga nt’arômbiṉi Môsès ôm̃amba gw’itôve, yeṉo kè Ômwaṉa w’ôma e ga rômbiṉô, 15inè, ôm’edu e bekelyè e ga lwaṉe n’em̃èṉo za koṉako. 16Konde itonda s’arondi Anyambyè aronde ntye yiṉo s’avangi yè gô p’Ômwaṉi wè w’ikika inè, ôm’edu e bekelyè avere, ndô e ga lwaṉe n’em̃èṉo za koṉako. 17Konde Anyambyè e pa tôm̃’Ômwaṉi wè gô ntye yiṉo inè, e ga yekelye ntye, ndô inè, ntye yi ga zungiṉô vo yè. 18Ayè yi bekelyè e pa pô ôgara; ndô ayè yi re pa bekelya, are pô p’ôgara, konde e pa bekely’ina ny’Ômwaṉa w’ikika w’Anyambyè. 19Ni mpeṉi y’ôgara mè ye yiṉo inè, ôzange wi re bya pa gô ntye, ko aṉaga tonde mpiri vyagaṉô n’ôzange, konde ijanji saô s’avegagi s’ibe. 20Konde ôm’edu e dende mbe e bik’ôzange, e pa bya kè g’ôzange, ijanji sè si vende dènge ntyèmbo; 21ndô ayè yi dend’ôrèti e bya g’ôzange, ko ijanji sè jeṉaṉa, konde si re janjô pa gôr’Anyambyè.

22Isam̃u yiṉo vya, aṽyeṉi Yesu n’iṉèngi yè gô ntye yi Yuda; alwaṉi yè vovo na waô, aṽatizaga. 23Yôan kè aṽatizagi gw’Enon, pyèrè ni Salim, konde vovo avegagi aṉingô am̃enge; n’aṽyeṉi aṉaga vovo gô batizô. 24Konde Yôan e pa diwô afwelyô gô ntyôgô.

25N’alôṽaṉ’iṉèngi yi Yôan mpaga na mwô’Ju g’ômwanja w’ijombunya. 26Aṽyeṉi waô gôre Yôan, awulinyè inè: Ôṉènji, ayè y’avegagi na wè gô ntye mori yi Yoridan, arakilyô wè g’ômwanji wè, vôna, e batiza, n’aṉaga waôdu wi bya gôre yè. 27Awiṉizi Yôan inè: Ôm’ayolye dèng’ezom̃a kaô z’apô yè avila g’ôrôṽa. 28Aṉwèmè, aṉw’arakilyi g’ômwanji wam̃ inè, my’awulyi nè: Myè arange Krist, ndô mi re tôm̃ô pa gô bôsô yè. 29Ayè yi re n’ômwantô wi jômbô ne ôṉôm̃e wi jômba; ndô ndegô y’ôṉôm̃e wi jômba, e kum̃aṉa vovo, e jogw’agambi mè, e jeṉe mbya mpôlô g’ômwanja w’inyôy ny’ôṉôm̃e wi jômba: sambô mbyi yam̃ yiṉo y’akeki. 30E ga vende mpendaga, ndô myè, mi ga gonge. 31Ayè yi pila gw’igôṉô are gw’ewônjô za waôdu; ayè yi pila gô ntye ayè ezom̃a zi ntye, e kamba kè g’ezom̃a zi ntye. Ayè yi pila gw’igôṉô are gw’ewônjô za waôdu, 32e takilya g’ômwanja w’isam̃u yi re yè jeṉa pa na yi re yè jogo pa, ndô e zel’ôma wi bong’agambi mè. 33Ayè yi re bonga p’agambi mè are jivira p’igamba nyiṉo inè, Anyambyè ayè ôma w’ôrèti; 34konde ayè yi re tôm̃ô pa n’Anyambyè e kamb’agamba m’Anyambyè, konde Anyambyè e pa pè Iṉiṉa n’egèṉizô. 35Rerè e tond’Ômwaṉa, are pa pa kè yom̃a yôdu gw’ago mè. 36Ayè yi bekely’Ômwaṉa are n’em̃èṉo za koṉako, ndô ayè yi re pa bekely’Ômwaṉa ayeṉ’em̃èṉo, ndô eguṉu z’Anyambyè zi dwaṉa gôre yè.

Currently Selected:

Yôan 3: MYE

Highlight

Copy