Yôan 2

1Ntyugu ntyarô vyagaṉô avegag’ijômbaṉa gô Kana. Ni ngwè yi Yesu avegagi vovo; 2Yesu n’iṉèngi yè kè w’aweyô gw’ijômbaṉa. 3Gw’amaṉ’ivè, ngwè yi Yesu awulinyi yè inè: Wi zele n’ivè. 4N’awulinyô yè ne Yesu inè: Ômwantô, ezom̃a nde zi re myè na wè? Igwèri nyam̃ nyi pa twa. 5N’awulinyi ngi yè inyôngô si pengiṉa inè: Lendaṉi ôsam̃u edu wi be bulinyè ṉwè. 6Ṽovo avegagi dôlô akôpa m’adô ôrôṽa mi fwelô aṉingô, ga nt’avegagi ntyale y’ijôvuṉa s’Iju, mi re ko keka ikôpy edu gèṉizô ṽaṉi ntyo rarô. 7Awulinyô waô ne Yesu inè: Yônyaṉi akôpa miṉo n’aṉingô. N’ayônyi waô mô guguru. 8N’awulinyi yè waô inè: Gulaṉi, ko twaṉaṉi mô gôr’ôma re gw’ewônjô z’ôgeṽe. N’arwaṉi waô mô. 9Na gw’alembi ewônjô z’ôgeṽe aṉingô m’aliwô m’akalunyô ivè, ko yè amya mbôra y’apil’ivè mè, ndô inyôngô si pengiṉe tavulu s’aguli aṉingô waô amyeṉi, 10aweyi yè ôṉôm̃e wi jômba, awulinyè inè: Ôm’edu e dônge dôṽ’iv’iṽya, na gô diwô aṉaga w’abongyô, vovo dôṽyô iv’iṽe; ndô ô re penjavenja p’iv’iṽya kwanga egômbe ziṉo.

11Siṉo n’ipakilya si lemba lônga y’alendyô ne Yesu gô Kana yi Galile. N’arum̃inyi yè ivendi nyè, n’iṉèngi yè y’aṽekelyi yè.

12Avila vovo azum̃iṉi yè gô Kapèrnaum, ayè ni ngi yè, n’awôngi yè n’iṉèngi yè, n’alwaṉi waô vovo intyugu sa kwè.

13Paki y’Iju y’arweṉi pyèrè, n’avandi Yesu gô Yerusalèm. 14N’aliṽinyi yè mongi w’agôlag’inyare, n’adombè n’amenga, na mongi w’avendakaṉagi sika barugebaru gô nagô y’Anyambyè. 15N’avangi yè ôkasa w’igoli, n’azugi yè waôdudu avila gô nagô y’Anyambyè, n’adombè n’inyare kè; n’avazangaṉi yè sika ya mongi wi pendakaṉa gô ntye, n’awôṉi yè itavulu saô bundu; 16n’awulinyi yè mongi w’agôlag’amenga inè: Rômbaṉi yom̃a yiṉo vèṉo, avangaṉi nagô ya Reri yam̃ nagô y’ôkita. 17Ayônginy’iṉèngi yè inè, are tèndô pa inè: Mpyô yi nagô yo yi nya mye.

18Awiṉiz’Iju, awulinyè ine: Elemba nde zi tum̃inyo zwè, gô dendo isam̃u yiṉo? 19N’awiṉizyô waô ne Yesu inè: Zazaṉi nagô y’Anyambyè yiṉo, gambèṉè mi be tô nongunya yô ni ntyugu ntyarô. 20Awuly’Iju inè: Nagô y’Anyambyè yiṉo y’aṉôgyô n’agôm̃i m’impum̃’anay n’impum̃’ôrôṽa, ko wè tô nongunya yô ni ntyugu ntyarô! 21Ndô agambi g’ômwanja wi nagô y’Anyambyè y’ôkuṽi wèmè. 22Yeṉo gw’arôngunyô yè avila gw’ijuwa, iṉèngi yè y’ayônginyi nè, aliwô akambi yeṉo, n’aṽekelyi waô Irèndo n’igamba ny’aliwô bulyô Yesu.

23Gw’avegagi Yesu gô Yerusalèm gô fèti yi Paki, aṉag’awenge w’aṽekely’ini nyè gw’ayeṉi waô lemba y’alendyô yè. 24Ndô Yesu e pa bekelya waô, konde amyeṉi waôdudu, 25konde e re pegege n’isolo nyi bulinyô n’ôm’edu g’ômwanja w’ôma; konde ayèmè amyeṉi nt’are gôr’aṉaga.

Currently Selected:

Yôan 2: MYE

Highlight

Copy