Ipakilya 39

1Ndô Yôsèf aṽagyô gw’Egipt; ni Pôtifar, yôfisyè yi Faraô, egogi z’isozè, mwô’Egipt, agôli yè ni mongi Yismaèl w’aṽagi yè gôgô. 2N’alwaṉi Yeôva ni Yôsèf, n’isam̃u y’agèndi mbyambye na yè; n’alwaṉagi yè gô nagô ya reri yè, mwô’Egipt. 3N’ayeṉi reri yè inè, Yeôva are na yè, na inè, Yeôva avang’ezom̃y’edu z’alendyô yè gô kènda mbyambye gw’ago mè. 4N’alèngi Yôsèf imèpiṉô gw’antyo ma reri yè, y’alôṽyi yè gô janjiṉè, avangè ôvenjavenji gô nagô yè, n’avenyè yè ezom̃y’edu z’avegagi na yè gô pangiṉa zô. 5Avila gw’egômbe z’alôṽyô yè ne Pôtifar gô dwaṉ’ôvenjavenji gô nagô yè, na gw’ezom̃y’edu z’avegagi na yè, Yeôva azaviṉi nagô ya mwô’Egipt gw’inyanga nyi Yôsèf, n’ôzaviṉô wi Yeôva w’alwaṉi gw’ezom̃y’edu z’avegagi na yè gô nagô na gw’intyaga. 6N’arigi yè ezom̃y’edu z’avegagi na yè gw’ago mi Yôsèf, n’ayè e re tô pegege n’isolo gô pône yom̃a yèṉè kaô dadyè inya s’anyenyô yè. Ndô Yôsèf avegag’eranga ni mèpe jeṉô.

7N’arweṉi isam̃u yiṉo vya, ômwantô wa reri yè arômbiṉ’antyo mè gôre Yôsèf, awulya inè: Lèwa na myè! 8N’aṽiki yè, awuliny’ômwantô wa reri yè inè: Vôna, reri yam̃ amye yom̃a yi re na myè gô nagô, n’ezom̃y’edu zi re na yè are pa pa zô gw’ago mam̃. 9E zel’ôma wi r’ômpôlô gô nagô yiṉo vyagaṉô na myè, e zele simbya pa kè ezom̃a gôre myè kaô awè, konde awè ômwantu wè. Ntiṉa nde yi re myè ko denda kè mbe mpôlô yiṉo ko myè fwem̃a gôr’Anyambyè? 10N’arweṉi gw’agambagi yè ntyugw’edu gôre Yôsèf, Yôsèf aṽiki gô dèwa na yè, ge gô dwaṉa pyèrè na yè. 11Ntyugu mori gw’ayingiṉi yè gô nagô gô janj’eṽilô zè, e re pegege vovo kè ôma gôre mongi wi nagô. 12N’agôtyô yè n’ômwantô gô ngoy yè, awulya inè: Lèwa na myè! N’alèkizi yè ngoy yè g’ôgo w’ômwantô, awanga gw’igala. 13N’arweṉi gw’ayeṉi yè inè, alèkizi ngoy g’ôgo wè, ko yè fanga gw’igala, 14aweyi yè aṉaga wi nagô, awulinya waô inè: Yeṉaṉi, are baga pa zwè mwô’Ebèr gô sèlya zwè. Ôma wiṉo abya gôre myè gô dèwa na myè, ndô my’abôgiṉa n’inyôy ivôlô. 15Na gw’ajogo yè myè e tômbiṉ’inyôy ko mi bôgiṉa, adèkizè ngoy yè na myè, kô yè fanga gw’igala. 16N’alimbiṉi yè ngoy yi Yôsèf pyèrè na yè, kwanga gw’aṽyeṉi reri yè, ayingiṉa gô nagô. 17N’agambi yè kè gôre yè inè: Ôsaka w’Ebèr w’aṽagyô wè gôre zwè abya gôre myè gô sèlya myè. 18Na gw’atômbiṉa myè inyôy ko mi bôgiṉa, adèkizè ngoy yè gôre myè ko yè fanga gw’igala. 19Ayè jogo p’agamba m’ômwantô wè, m’awulinyè yè inè: Vôna, nt’ar’ôsaku wo dendiṉa pa myè! aṽendi rerè yi Yôsèf. 20N’agôti yè Yôsèf, awelè gô ntyôgô, gô mbôra y’avegag’ikôte y’ôga nunjô pa. N’alwaṉi yè vovo gô ntyôgô.

21N’alwaṉi Yeôva ni Yôsèf, n’arum̃inyi yè nkèngo gôre yè. N’aveṉi yè imèpiṉô gw’antyo m’ôvenjavenji wi nagô yi ntyôgô. 22N’ôvenjavenji wi nagô yi ntyôgô aveṉ’ikôte yôdu y’avegagi gô nagô yi ntyôgô gôre Yôsèf, wi pa dend’ezom̃a vovo kaô vo yè. 23Ôvenjavenji wi nagô yi ntyôgô e pa tô pôn’ezom̃’edu z’avegagi g’ôgo wi Yôsèf, konde nè Yeôva avegagi na yè. Ni Yeôva avang’ezom̃y’edu z’alendyô ne Yôsèf gô kènda mbyambye.

Currently Selected:

Ipakilya 39: MYE

Highlight

Copy