Ipakilya 38

1Gw’egômbe mèzoṉo Yuda alubwi avila gôr’awareri yè agènda gôr’ôma w’Adulam, ini nyè ne Ira. 2N’ayeṉi Yuda vovo ômwaṉ’ômwantô wi Kanaan, ini nyè ne Sua, n’ayômbyè yè, n’alèwi yè na yè. 3N’arweṉi yè inyem̃e, n’ayaṉi yè ômwaṉ’ôṉôm̃e, n’aṽètyè yè ini nyè inè, Èr. 4N’arô tweṉi yè inyem̃e, ayaṉ’ômwaṉ’ôṉôm̃e, n’aṽètyè yè ini nyè inè, Ônan. 5N’arô jaṉi yè ômwaṉ’ôṉôm̃e ômwèṉè, aṽèt’ini nyè inè, Sèla. Ndô Yuda avegagi gô Kezib gw’ayanyè yè.

6Ni Yuda ayômbaṉi Èr, yi njalyè, ômwantô ini nyè ne Tamar. 7Èr yi njalyè yi Yuda, avegagi ôm’ombe gw’antyo mi Yeôva, n’ayônyô yè ne Yeôva. 8N’awulinyi Yuda Ônan inè: Gènda gô dèwa n’ômwantô wa mwô’ngi yo, yômbè, ko jaṉ’awaṉa gôre mwô’ngi yo. 9Ndô Ônan amyeṉi nè, awaṉa wiṉo wi ze dwaṉ’iwè, n’arweṉi gw’alèwi yè n’ômwantô wa mwô’ngi yè, ayiri aṉôm̃yè gô ntye, ayè vende p’awaṉa gôre mwô’ngi yè. 10Ndô ôsam̃u mèwoṉo w’alendyô yè w’avegag’ômbe gw’antyo mi Yeôva: yeṉo ayônyè yè. 11N’awulinyi Yuda Tamar, y’ômwantô w’ômwaṉi wè ôṉôm̃e, inè: Lwaṉ’ôtika gô nagô ya reri yo, kaô Sela, y’ômwaṉi wam̃ ôṉôm̃e apôm̃a. Agambagi kè n’itya inè: Sela e vende juwa ga awareri yè. N’agèndi Tamar, n’alwaṉi yè gô nagô ya reri yè.

12Intyugu sinyenge pyagaṉa pa, ayuwi ômwaṉ’ômwantô wi Sua, y’ômwantô wi Yuda. Gw’azindyô Yuda, avandi yè gô Timnat, gôre mongi w’areṉag’ômwa w’adombè mè, ayè ni ndeg’wè Ira, ya mwô’Adulam. 13N’amyezô Tamar, awulinyô inè: Vôna, rerè y’ôṉôm̃u wo e panda gô Timnat, gô teṉ’ômwa w’adombè mè. 14N’arômbi yè iṉambi yè y’ôtika, n’avugiṉi yè evèlèsè aliṽiṉ’ôkuṽi wè, n’alwaṉi yè baru g’ômpômbala w’Enayim, gô mpoṉo yi Timnat, konde ayeṉi nè Sela apôm̃i, ndô e pa jômbizô gôre yè.

15N’ayenyô yè ne Yuda, n’avikilyi yè inè, ayè evôvevôve, konde aliwô diṽiṉa p’ôzô wè. 16N’agegwi yè gô mpoṉo, awulya inè: Riga myè gô dèwa na wè; konde e pa mya inè, ayè ne ômwantô w’ômwaṉi wè. N’awulyi yè inè: Ô be pa myè ande gôre wè gô dèwa na myè? 17N’awiṉizi yè inè: Mi be twazo ômwaṉa wi mbôṉi avila g’ôlembi wam̃. N’awulyi yè inè: Ô be pa myè puṉu, kaô w’atwaza wô. 18N’awulyi yè inè: Puṉu nde yi be pa myè wè? N’awulyi yè inè: Ôm̃ôrô wo, mpangi yo, ni ntôngô yi re na wè g’ôgo. N’aveṉi yè yô gôre yè. Avila vovo alèwi yè na yè, n’arweṉi yè inyem̃e vo yè. 19N’agum̃aṉi yè, agènda, n’arômbi yè evèlèsè, aṉwaṉ’iṉambi yè y’ôtika.

20N’arwaṉizi Yuda ômwaṉa wi mbôṉi ni ndeg’wè, ya mwô’Adulam, gô danduṉe puṉu avila gw’ago m’ômwantô. Ndô e pa jeṉè. 21N’aṽambyi yè aṉaga wi mbôra mè inè: Evôvevôve mè z’avegagi gw’Enayim gô mpoṉo zi re gweṉi? Awiṉizi waô inè: Vèṉo e pa diwô evôvevôve. 22N’awinyi yè gôre Yuda, awulya inè: Mi pa jeṉè, n’aṉaga wi mbôra kè w’abulya nè: Vèṉo e pa diwô evôvevôve. 23N’awulyi Yuda inè: E ga ṽandam̃iṉe yom̃a yi re na yè. Azwè vende jeṉe ntyoṉi. Vôna, my’atwaz’ômwaṉa wi mbôṉi wiṉo, ko wè ayeṉè.

24Pyèrè n’agwèli ararô pyagaṉa pa, Yuda amyezô inè: Tamar, y’ômwantô w’ômwaṉi wo atweṉ’evôvevôve, na vôna kè atweṉ’inyem̃e vo evôvevôve zè. N’awulyi Yuda inè: Gogunyaṉi yè, ko yè pezô. 25Gw’agogunyôgô yè gw’igala, awulinyi rerè y’ôṉôm̃u wè inè: Ôma w’aṉivi yom̃a yiṉo ayè aweli myè inyem̃e; kokolo, mya ôma w’aṉivi ôm̃ôrô wiṉo, impanga siṉo ni ntôngô yiṉo. 26N’amyenyô yô ne Yuda, awulya inè: My’ar’ôgara vyagaṉô na yè, konde nè mi pa yè gôre Sela, y’ômwaṉi wam̃ ôṉôm̃e, ndô e pa mye yè nyèṉè.

27N’arweṉi gw’egômbe z’azuṉô yè izongo, vôna, avegag’ampaza gw’iwum̃u nyè. 28N’arweṉi gw’ayaṉi yè, ôm̃ori awôm̃unyi ôgo wè, n’agôtyô wô ne ômwantô wi jaṉiza, n’aliri yè nyongè yi kiramwazi gô wô, awulya inè: Wiṉo ayè adônge kogwa. 29Ndô gw’aluri yè ôgo wè, n’agogwi mwô’ngi yè. N’awulyi ômwantô wi jaṉiza inè: Ivôgô nde ny’apangô wè! Ivôgô nyi ga lwaṉe gôre wè. N’aṽètyè yè ini nyè inè, Farèz. 30Avila vovo agogwi mwô’ngi yè, avegagi ni nyongè yi kiramwazi g’ôgo wè, n’aṽètyô yè ini nyè inè, Zarak.

Currently Selected:

Ipakilya 38: MYE

Highlight

Copy