Ipakilya 21

1N’aṽyeṉi Yeôva gôre Sara ga nt’awulyi yè; n’alendi Yeôva gôre Sara ga nt’avangaṉi yè. 2N’arweṉi Sara inyem̃e, n’ayaṉi yè ômwaṉ’ôṉôm̃e gôr’Abraam gô mbôlô yè, gw’egômbe z’aretyô Anyambyè na yè. 3N’aṽèti Abraam ina ny’ômwaṉi wè ôṉôm̃e w’ayanyô gôre yè, w’ayanyô ne Sara, inè: Izaak. 4N’agèri Abraam Izaak y’ômwaṉi wè ôṉôm̃e, ayè jaṉô pa, ntyugu eṉanay ga nt’azômbyô yè n’Anyambyè. 5Abraam avegagi nkam̃a y’impum̃a g’ôṉèro, gw’ayanyô Izaak y’ômwaṉi wè ôṉôm̃e. 6N’awulyi Sara inè: Anyambyè are panga pa myè joṉa, na waôdu wi be jogo nyô wi be joṉa myè. 7N’agundi yè gô bulya inè: Mande arô bulinyi Abraam inè: Sara e be jonj’awaṉa? Ndô rèti my’are jaṉa pa gôre yè ômwaṉ’ôṉôm̃e gô mbôlô yè.

8N’ayoli ômwaṉa, arômbô gw’iwèṉè, n’avangi Abraam ôgeṽe ômpôlô gô ntyugu y’arômbyô Izaak gw’iwèṉè. 9N’ayeṉi Sara ômwaṉa w’Agar, y’Egipt, w’ayanyô gôr’Abraam, e joṉa. 10N’awulinyi yè Abraam inè: Rômbe nyôngô nyantô yiṉo n’ômwaṉi wè ta, konde ômwaṉa wi nyôngô nyantô yiṉo ayige ta n’ômwaṉi wam̃ Izaak. 11Ndô igamba nyiṉo ny’ayeṉizi Abraam ekèṽa g’ômwanja w’ômwaṉi wè. 12Ndô awulinyi Anyambyè Abraam inè: Ayeṉ’ekèṽa g’ômwanja w’ômwaṉa na g’ômwanja wi nyôngô yo nyantô; gw’isam̃u yôdu yi re wè bulinyô pa ne Sara, vôganyô inyôy nyè, konde awaṉi womè wi be pila gôr’Izaak.

13Ndô mi be pang’iṉongo avila gôr’ômwaṉa wi nyôngô yo nyantô, konde ayè ômwaṉi wo. 14N’aṉongwi Abraam ibanga sôdu, awong’inya ni mbute y’aṉingô ko yè pa yô gôr’Agar, aralya yô g’ôṽegi wè; n’avenyè yè kè ômwaṉa n’agèndizyè yè. N’agèndi yè, awôlangaṉaga gw’itôve si Beèrseba. 15Gw’amaṉ’aṉingô gô mbute, arigi yè ômwaṉa gô ntiṉa ya mw’erere. 16N’agèndi yè alwaṉa baru swaswo na yè, vo ntyanjô yi pungô n’elendiṉa; konde awulyi nè: Mi pa bele jeṉ’ômwaṉi wam̃ n’iyuwa! Yeṉo alwaṉi yè swaswo na yè, n’arômbiṉi yè inyôy nyè aleṉa. 17N’ayogyô Anyambyè inyôy ny’ômwaṉa, na yenjèl y’Anyambyè y’aweyi Agar avila g’ôrôṽa, awulinyè inè: Ezande zi tyô wè, Agar? Arya du, konde Anyambyè are jogo p’inyôy ny’ômwaṉa gô mbôra yi re yè. 18Gum̃aṉa, ko bong’ômwaṉa, agôtè n’ôgo wo, konde mi be pangè iṉongw’ivôlô. 19N’Anyambyè aṉunguṉi yè antyo, n’ayeṉi yè everô z’aṉingô, n’agèndi yè, ayônye mbute n’aṉingô, ayonj’ômwaṉa. 20N’alwaṉ’Anyambyè n’ômwaṉa, ko yè pôm̃a, alwaṉa gw’itôve, n’arweṉi yè ôma w’elendiṉa. 21N’alwaṉi yè gw’itôve si Paran, ni ngi yè ayômbiṉi yè ômwantô avila gô ntye y’Egipt.

22N’arweṉi gw’egômbe mè inè, Abimelèk ni Pikol, y’egogi zi mbèli yè, agambi n’Abraam inè, Anyambyè are na wè g’ôsam̃u edu wi dendô wè. 23Ndô rangiṉa my’ôrangô vèṉo, vo ina ny’Anyambyè inè, w’aremize myè, ge awaṉi wam̃, ko wè dwaṉa ni nkèngo gôre myè na gô ntye yi re wè dwaṉa pa ga nt’are myè denda pa gôre wè. 24N’awulyi Abraam inè: Mi be tanga wô. 25N’azèmbi Abraam Abimelèk g’ômwanja w’everô z’aṉingô z’avaruṉô ne inyôngô s’Abimelèk n’ôpitapitè. 26N’awiṉizi Abimelèk inè: My’amye ôma w’alendi ôsam̃u mèwoṉo, awè kè ô pa myeza myè, ndô myè, mi pa jogo nyô kaô ṉèṉo wiṉo dadyè ge kambo nyô. 27N’awongi Abraam adombè n’inyare, ava yô gôr’Abimelèk, n’ayeki waô aṽaṉi njeka. 28N’alôṽyi Abraam awaṉa w’adombè antô ôrwageṉô gô mbôra ni yaô. 29N’awulinyi Abimelèk Abraam inè: Awaṉa w’adombè antô wiṉo ôrwageṉô wi re sè, wi re wè dôṽya pe mbôra ni yaô? 30N’awiṉizi yè inè: Ô be bong’adombè miṉo ôrwageṉô avila g’ôgo wam̃, ko mô dwaṉ’elingilyô gôre myè inè, my’arumbi everô ziṉo. 31Yeṉo aweyi yè mbôra mèyoṉo inè: Beèr‐Seba, konde w’arangaṉi vovo ôrangô. 32Yeṉo ayeki waô njeka gô Beèr‐Seba; n’agum̃aṉi Abimelèk, ni Pikal, y’egogi zi mbèli yè, n’awinyi waô gô ntye yi Filiste. 33N’aṽèṉi Abraam rere gô Beèr‐Seba, n’aweyi yè vovo ina nyi Yeôva, Anyambyè y’egômbe zôdu. 34N’alwaṉi Abraam ôling’ôla gô ntye yi Filiste.

Currently Selected:

Ipakilya 21: MYE

Highlight

Copy