Ipakilya 18
18
1N’awôm̃unyi Yeôva gôre yè gw’imbilinga si Mamre gw avegagi yè dwaṉa pa baru g’ômpômbala wi nagô yè y’ikuku gô mpyô y’ôwenja. 2N’arômbiṉi yè antyo ayeṉa, ndô vôna, aṉôm̃e ararô w’avegagi kum̃aṉa pa pyèrè na yè, na gw’ayeṉi yè waô avali mangô gô dataṉa na waô avila g’ômpômbala wi nagô yè, n’alèmbi yè mbè gô ntye. 3N’awulyi yè inè: Reri yam̃, ja my’adèng imèpiṉô gw’antyo mo, kokolo, avyagaṉa avila gôre nyôngô yo. 4Yom̃’aṉingô yi ga vagô gô jôvuṉ’intyôzô saṉi, ko ṉwè jowiz’ikuṽi yaṉi gô ntiṉa y’erere ziṉo. 5Mi be kènda gô bong’ereṉe zi mpèmba, ko sokaṉ’irèm̃i yaṉi: avila vovo vanga ṉwè akombiz’ôgèndo waṉi: konde gô ntiṉa yiṉo apyagaṉa ṉwè pyèrè gôre nyôngô yaṉi. N’awiṉizi waô inè: Lenda ga nt’are wè bulya pa.
6N’azunge kèndi Abraam gô nagô yè y’ikuku gôre Sara, awulya nè: Zunge kekize gèṉizô rarô yi farinya mbya, ko binda yô, avanga yô idega. 7N’avali Abraam mangô g’ôlembi wè, awongi yè ômwaṉa wi nyare ôvôm̃i n’ômbya, n’aveṉi yè wô gôre nyôngô yè, n’azunge bazi yè wô. 8N’arô bongi yè botolo, n’ambèṉingô, n’ômwaṉa wi nyare w’aṽazô yè, n’alôṽyi yè yô gw’azô maô; n’agum̃aṉi yè ayèmè pyèrè na waô gô ntiṉa y’erere, n’anyeṉi waô.
9N’awulinyi waô yè inè: Sara y’ômwantô wo are na gweṉi? Awiṉizi yè inè: Are gô nagô. 10N’ôm̃ori gôre waô awulyi nè: Mi be tô fwinya gôre wè gw’egômbe mèziṉo; na vôna, Sara, y’ômwantô wo, e be jaṉ’ômwaṉ’ôṉôm̃e. N’ayogyô Sara g’ômpômbala wi nagô y’ikuku, y’avegagi gô nyum̃i yè.
11Ndô Abraam ni Sara w’avegagi dômbiṉa pa, dômbiṉa pa pôlô; ni Sara e pa tô dwaṉe nyèṉè n’igum̃u gô jaṉ’ômwaṉa. 12N’ayoṉi Sara g’ôrèm̃a inè: Myè dômbiṉa pa yeṉo, myè ko jeṉe mbya? Reri yam̃ kè atweṉ’ôṉèro. 13N’awulinyi Yeôva Abraam inè: Ntiṉa nde y’ajoṉe Sara, inè, mi be jaṉa, myè dômbiṉa pa yeṉo? 14Ar’ôsam̃u edu ko dwaṉe jola gôre Yeôva? Gw’egômbe zi re tetô pa mi be tô fwinya gôre wè, na gw’egômbe mèziṉo Sara e be jaṉ’ômwaṉ’ôṉôm̃e. 15N’alandi Sara inè: Mi pa joṉa, konde aryeṉi. N’awulyi yè inè: Nyawè, w’ajoṉa.
16N’agum̃aṉi aṉôm̃e avila vovo, avôna gô nkôṽa yi Sôdoma; n’agèndi Abraam na waô gô jira waô.
17N’awulyi Yeôva inè: Mi ga yumbuṉe gôr’Abraam ôsam̃u wi ke dendô miè? 18Konde giligili Abraam e be dwaṉa iṉongw’ivôlô ni ngulu, n’aṉongo mi ntye môdu mi be saviṉô gôre yè. 19Konde my’are yè pinja pa, ko yè sômbya awaṉi wè ni nagô yè gô nyum̃i yè gô bandam̃iṉe mpoṉo yi Yeôva, gô dend’ôrèti n’ôgôre, ko Yeôva dwaṉiza g’ômwanja w’Abraam impangaṉô y’avangaṉô yè gôre yè. 20N’awulyi Yeôva inè: Edingô zi Sôdoma ni Gômora z’apendi, n’ibe saô s’adiri pôlô. 21Yeṉo mi be sum̃iṉa ko myè jeṉa twa pa wi re denda p’egolaṉi z’itôngi saô s’aṽyeṉi gôre myè; ndô ja si zele yeṉo ko mi mya.
22N’alubw’aṉôm̃e avila vovo agènda gô Sôdoma; ndô Abraam arigaṉi kum̃aṉa pa g’ôzô wi Yeôva. 23N’azusi Abraam pyèrè awulya nè: Ô be jiliz’ agôre n’arègo? 24Vendetwa ar’agôm̃i m’aṉag’aṽya ataṉè gô nkala, ô be jiliza waô kè, ko wè anyeza du nkala gw’inyanga ny’agôm̃i m’aṉag’aṽya ataṉè wi re gô yô? 25Ô be jôṉ’agôre n’arègo; e be dwaṉ’egolaṉi mèmô gôr’agôre n’arègo! are bô gôre wè gô dende ndaga yiṉo; are bô gôre wè! Ayè yi teṉiz’isam̃u yi ntye yôdu alende ga nt’are gôre? 26N’awulyi Yeôva inè: Ja my’adènga gô Sôdoma agôm̃i m’aṉag’aṽya ataṉè gô nkala, gambèṉè mi nyeze nkala yôdu gw’inyangi nyaô.
27N’awiṉizi Abraam awulya inè: Vôna, mi re pakilya pa gô kamba ni Yeôva, ndô, myè ne ntyèngè n’ômbu dadyè. 28Vendetwa ataṉè lubu avila gôr’agôm̃i m’aṉag’aṽya ataṉè. Ô be jilize nkala yôdu gw’inyanga ny’ataṉè? N’awulyi Yeôva inè: My’ayilize yô ja my’adènga vovo agôm̃i m’aṉag’aṽya anay n’aṉag’aṽya ataṉè.
29N’arô kambi Abraam na yè, awulya inè: Vendetwa e be dèngô vovo agôm̃i m’aṉag’aṽya anay. N’awulyi Yeôva inè: My’ayilize du gw’inyanga ny’agôm̃i anay mèmoṉo.
30N’awulyi Abraam inè: Rera, aṽenda du, mi be kamba. Vendetwa e be dèngô vovo agôm̃i m’aṉag’aṽya ararô. N’awulyi Yeôva inè: My’ayilize du ja my’adènga vovo agôm̃i m’aṉag’aṽya ararô.
31N’awulyi Abraam inè: Vôna, my’are pakilya pa gô kamba gôre Rerè. Vendetwa e be dèngô vovo agôm̃i m’aṉag’aṽya ambaṉi. N’awulyi Yeôva inè: My’ayilize yô gw’inyanga ny’agôm̃i ambaṉi mèmoṉo.
32N’awulyi Abraam inè: Rera, aṽenda du, my’arô kambe nyèṉè kaô nyongo yiṉo dadyè. Vendetwa e be dèngô vovo igôm̃i ny’aṉag’aṽya. N’awulyi Yeôva inè: My’ayilize yô gw’inyanga ny’igôm̃i mènyoṉo.
33Gw’am̃èṉizi Yeôva gô kamba n’Abraam agèndi yè. N’awinyi Abraam gô mbôri yè.
Currently Selected:
Ipakilya 18: MYE
Highlight
Share
Copy
Want to have your highlights saved across all your devices? Sign up or sign in
Published by the British and Foreign Bible Society in 1927.
