Ipakilya 19

1N’aṽyeṉi yenjèl mbaṉi gô Sôdoma nkôlô, ndô Lot avegagi dwaṉa pa baru g’ômpômbala wi Sôdoma. Gw’ayenyô waô ne Lot, agum̃aṉi yè gô kènda gô dataṉa na waô, n’avuraṉi yè mbè gô ntye. 2Avila vovo awulyi yè inè: Vônaṉi, ireri sam̃, kokoloṉi, yingiṉaṉi gô nagô yi nyôngô yaṉi, ko dwaṉaṉi ôgwèra wôdu gô yô; yôvuṉaṉ’intyôzô saṉi; ko ṉwè nôngwe ntaṽanga agombiz’ôgèndo waṉi. Awiṉizi waô inè: Nyawè, azwè be dèwa gw’igala. 3Ndô aṽègi yè waô pôlô n’awinyi waô gôre yè, ayingiṉa gô nagô yè. N’avangiṉi yè waô ôgeṽe, n’aviki yè mpèmba yi re levèn fo; n’anyeṉi waô.

4Waô dèwaga ro, aṉôm̃e wi nkala, n’aṉôm̃e wi Sôdoma w’agombiṉi nagô vingôvingô, avila gôr’awangô kwanga gôr’aṉèro, aṉaga waôdu avila gô mbôry’edu. 5N’aweyi waô Lot, awulinyè inè: Aṉôm̃e w’abya gôre wè ôgwèra wiṉo wi re na gweṉi? Gogunya waô gôre zwè, ko zwè mya waô. 6N’agogwi Lot gôre waô g’ômpômbala wi nagô, n’aṉunji yè iguge gô nyum̃i yè. 7N’awulyi yè inè: Awareri yam̃, kokoloṉi, alendaṉi mbe. 8Vôna, my’are n’awaṉ’antô aṽaṉi wi re wi pa mya du ôṉôm̃e; mi be kogunya ṉwè waô gw’igala, ko dendaṉi na waô ga nte be tonda ṉwè, kaô du gôr’aṉôm̃e wiṉo alendaṉi mpongo, konde wi re bya pa gw’iviri ny’ômwanjamwanji wam̃. 9N’awulyi waô inè: Lubwa vovo, n’arô bulyi waô inè: Ôṉôm̃e wiṉo aṽyeṉi ga ôgènda, ndô vèṉo e bela gô teṉiz’impungu! Ndô azwè be dendiṉo mbe vyagaṉô na waô. N’avitakaṉi waô pôlô Lot, azusa pyèrè gô jôṉ’iguge. 10Ndô aṉôm̃e w’alaṽiṉi ago maô, alure Lot gô nagô, aṉunj’iguge. 11N’avangi waô aṉaga w’avegagi g’ômpômbala gô dwaṉa g’apoku, avila gôr’awangô kwanga gôr’aṉèro, yeṉo ayasizi waô ikuṽi yaô gô but’ômpômbala.

12N’awulinyi aṉôm̃e Lot inè: Mande e p’are na wè vèṉo? Aṉôm̃e w’awaṉi wo antô, n’awaṉi wo aṉôm̃e, n’awaṉi wo antô, n’ezom̃’edu zi re na wè gô nkala, gogunya zô avila gô mbôra yiṉo. 13Konde azwè be jilize mbôra yiṉo, konde itônga s’alwaṉi wa yô s’apendi pôlô g’ôzô wi Yeôva; Yeôva atôm̃a zwè gô jiliza yô. 14N’agogwi Lot gw’igala agamba n’aṉôm̃e w’ayômbi awaṉi wè antô inè: Gum̃aṉaṉi, ko kogwaṉi avila gô mbôra yiṉo, konde Yeôva e be jilize nkala. Ndô avegagi gw’antyo m’agoy mè g’ôma wi sèlya.

15Ndô gw’ayenj’ôwenja iyenjèl s’aṉegizi Lot inè: Gum̃aṉa, wong’ômwantô wo, n’awaṉi wo awantô aṽaṉi, wi re wè dènga pa vèṉo, awè vende juwa gw’ijilizô si nkala. 16Na gw’alingagi yè, aṉom̃e w’agôti yè n’ôgo, ayè, ômwantu wè n’awaṉi wè aṽaṉi, konde Yeôva aṽeli gô sungiṉè; n’agogunyi waô yè, arigè gw’igala nyi nkala.

17Waô kogunya pa waô, ôm̃ori gôre waô awulyi nè: Wanga, ko sungiṉ’em̃èṉo zo, avôna gô nyum̃i yo, agum̃aṉa g’ôdèdè wôdu; ko fanga gô nômba, awè vende juwa. 18N’awulinyô waô ne Lot inè: Aranga yeṉo, Rera! 19Vôna, my’are dènga p’imèpiṉô gw’antyo mo, n’awè ô re tum̃inya pe mpendiṉi yi nkèngo yo gôre myè, gô tôliz’em̃èṉo zam̃; ndô my’ayolye gô fanga gô nômba, mi vende kôtô ne ôsam̃u ômbe ko mi juwa. 20Vône nkala yiṉo yi re pyèrè gôre myè gô sômbuṉa gô yô, na yi re nyangô; kokolo, mi ga wange gô yô; ... yi zele nyangô? ... ko em̃èṉo zam̃ tôla. 21N’awulinyè yè inè: Vôna, mi tô po imèpiṉô siṉo, inè, my’ayilize du nkala y’akambô wè. 22Negiza gô fanga gô yô, konde my’ayolye gô dend’ezom̃a kaô w’asiṽa gôgô. Yeṉo ina nyi nkala mèyoṉo ny’aweyôgô inè: Sôar.

23Nkômbe tongwa pa gô ntye. Lot ayingiṉi gô Sôar. 24N’aṉogizi Yeôva avila g’ôrôṽa ningô yi sufur na y’ôgôṉi gô Sôdoma na gô Gômora avila gôre Yeôva. 25N’ayilizi yè inkala mèsoṉo, ôdèdè wôdu n’alwaṉi waôdu w’inkala, ni yom̃a yi pôm̃a gô ntye. 26N’avôn’ômwantô wi Lot gô nyum̃a, n’agalwi yè ezimba z’ezanga.

27N’aṉongwi Abraam ntaṽanga gô kènda gô mbôra y’avegagi yè kum̃aṉa pa g’ôzô wi Yeôva. 28N’avôni yè gô nkôṽa yi Sôdoma na yi Gômora, na gô ntye y’ôdèdè yôdu ayeṉa; ndô vôna, ôtutu w’avandi avila gô ntye ga ôtutu w’ebeke z’ôgôṉi.

29N’arweṉi gw’ayilizi Anyambyè inkala s’ôdèdè, Anyambyè ayônginyi Abraam, n’avangi yè Lot gô fanga avila gô garegare y’ôjili, gw’ayilizi yè inkala s’alwaṉôgô ne Lot.

30N’alubwi Lot avila gô Sôar avanda gô dwaṉa gô nômba, n’awaṉi wè awantô aṽaṉi na yè: konde aryeṉi gô dwaṉa gô Sôar; n’alwaṉi yè g’ômpulungu, ayè n’awaṉi wè antô aṽaṉi. 31N’awuliny’ ôṉèro ômwaṉ’erumbe inè: Reri yazô atweṉi mbôlô, ndô e zel’ôma gô ntye wi re ko jingiṉa gôre zwè ga nt’are mpaṉi yi ntye yôdu. 32Yôgô, azwè ga yonje reri yazô ivè, alèwa na yè, kô zwè dèng’awaṉa avila gôre reri yazô. 33N’ayonji waô reri yaô ivè ôgwèra mè, n’agèndi ômwaṉ’ôṉèro, alèwa na reri yè; ndô rerè e pa mya du gw’alèwi ômwaṉa na yè, ge gw’aṉongwi yè. 34Bunya ômwaṉ’ôṉèro w’awuliny’ômwaṉ’erumbe inè: Vôna, ôgwèra w’apila, my’adèwa na reri yam̃; azwè ga rô jonje yè ivè ôgwèra wiṉo, ko wè dèwa na yè, ko zwè dèng’awaṉa avila gôre reri yazô. 35N’arô jonji waô reri yaô ivè ôgwèra mè, n’agèndi ômwaṉ’erumbe alèwa na yè; ndô rerè e pa mya du gw’alèwi ômwaṉa na yè, ge gw’aṉongwi yè. 36Yeṉo awaṉ’antô aṽaṉi wi Lot w’avundigi anyem̃e avila gôre reri yaô. 37Ômwaṉ’ôṉèro ayaṉi ômwaṉ’ôṉôm̃e, n’aṽètyè yè ini nyè inè: Môab; ayè ne rerè ya mongi Môab, kwanga ṉèṉo wiṉo. 38N’ayaṉi ômwaṉ’erumbe kè ômwaṉ’ôṉôm̃e, n’aṽètyè yè ini nyè inè: Bèn‐Ami; ayè ne rerè ya mongi Amon, kwanga ṉèṉo wiṉo.

Currently Selected:

Ipakilya 19: MYE

Highlight

Copy