Ipakilya 16

1Ndô Sarai, y’ômwantô w’Abram, e pa jaṉa du awaṉa gôre yè; ndô avegagi ni nyôngô nyantô y’Egipt, ini nyè ne Agar. 2N’awulinyi Sarai Abram inè: Vôna, Yeôva are panga pa myè nkele; kokolo, yôgô gôre nyôngô yam̃ nyantô, vendetwa mi be dèng’awaṉa vo yè. N’avôganyô Abram inyôy nyi Sarai. 3Vovo Sarai, y’ômwantô w’Abram, awongi Agar y’Egipt, yi nyôngô yè nyantô n’avenyè yè gôr’Abram, y’ôṉôm̃u wè, gô jômba yè, Abram dwaṉa pa igôm̃i ny’impum̃a gô ntye yi Kanaan.

4N’alèwi yè n’Agar, n’arweṉi yè inyem̃e, ndô gw’ayeṉi Agar inè, atweṉi n’inyem̃e, avèdyi ngi yè. 5N’awulinyi Sarai Abram inè: Ifwem̃i sam̃ si re gôre wè; my’aveṉi nyôngô yam̃ nyantô gôre wè na gw’ajeṉè inè, atweṉi n’inyem̃e, gambèṉè are pèdya pa myè. Yeôva e ga yèkèlye ntyo myè ntyo wè. 6N’awiṉizi Abram Sarai inè: Vôna, nyôngô yo nyantô yi re gô ngulu yo; lenda gôre yè ga nte be tondo. N’arugô yè ne Sarai pôlômè, n’averi Agar bô avila gôre yè.

7Ndô yenjèl yi Yeôva y’alèngi yè pyèrè n’ôgèy w’aṉingô gw’itôve, pyèrè n’ôgèy wi re gô mpoṉo yi kènda gô Sur. 8N’awulyi yenjèl inè: Agar, nyôngô yi Sarai, ô pila na gweṉi? Ô kènda gweṉi? N’awiṉizi yè inè: Mi pera avila gôre Sarai, yi ngi yam̃. 9Yenjèl yi Yeôva y’awulinyi yè inè: Winya gôre ngi yo, ko sôny’ôkuṽi wo gw’ago mè. 10Yenjèl yi Yeôva y’awulinyi yè inè: Mi be buṉiz’awaṉi wo, wi be buṉa pôlô ko w’ayolye tangô. 11Ndô yenjèl yi Yeôva y’awulinyi yè inè: Vôna, w’atweṉi n’inyem̃e, n’awè ô be jaṉ’ômwaṉ’ôṉôm̃e ko wè bèt’ini nyè inè, Yismaèl, konde Yeôva are jogo pe njuke yo. 12E be dwaṉa ga buru y’iga, ôgo wè wi be dwaṉa gôr’ôm’edu, n’ôgo w’ôm’edu wi be dwaṉa gôre yè, n’ayè e be dwaṉa gw’azô m’awôngi yè aṉôm̃e waôdu. 13N’aṽèti yè ina nyi Yeôva y’agambi na yè inè: Ataèlroy. (Awè ne Anyambyè yi jeṉa myè); konde awulyi nè: Rigare, my’are jeṉa pa vèṉo ayè yi jeṉa myè? 14Yeṉo aweyô everô inè: Lakayroy. Zi re ntyo Kadès ntyo Berèd.

15N’ayaṉi Agar ômwaṉ’ôṉôm̃e gôr’Abram; ndô Abram aṽèti ina ny’ômwaṉa w’ayanyô ne Agar, inè: Yismaèl. 16Ndô Abram avegag’agôm̃i m’impum̃’eṉanay n’impum̃’ôrôṽa g’ôṉèro, gw’ayaṉi Agar Yismaèl gôr’Abram.

Currently Selected:

Ipakilya 16: MYE

Highlight

Copy