Ipakilya 15

1Isam̃u yiṉo pyagaṉa pa aṽyeṉ’igamba nyi Yeôva gôr’Abram gô nyinô inè: Arya du, Abram, myè ne nguṽi yo, n’ipi so si be dwaṉ’ipôlômè. 2N’awiṉizi Abram inè: Rera Yeôva, ô be pa myè ande? Konde mi zele n’ômwaṉa, n’ôyigisi wi nagô yam̃ ne Eliezèr yi Damas. 3N’awulyi Abram inè: Vôna, we zele pa pa myè ômwaṉa, ndô ayè yi re gô nagô yam̃, ayè be jiga myè.

4N’aṽyeṉ’igamba nyi Yeôva gôre yè inè: Ôma wi be jigo aranga wiṉo, ndô ayè yi be kogwa avila gw’iwum̃u nyo ayè be jigo. 5N’agogunyè yè gw’igala, awulya inè: Vôna g’ôrôṽa ko tang’igègèṉi, ja w’ajolya gô tanga yô. N’awulinyè yè inè: Awaṉi wo kè wi be dwaṉa yeṉo. 6N’aṽekelyi Abram Yeôva, ko sô tangiṉô yè g’ôgôre.

7N’arô bulinyô yè ne Yeôva inè: Myè ne Yeôva, y’agogunyo avila gô Ur yi Kalde gô po ntye yiṉo gô niva yô. 8N’awiṉizi Abram inè: Rera Yeôva, mi be mya sè inè, mi be niva yô? 9N’awulinyô yè ne Yeôva inè: Wong’ezombi zi nyare z’impum̃’irarô, n’ezombi zi mbôṉi z’impum̃’irarô, n’idomb’iṉôm̃e ny’impum̃’irarô, n’ibembe, ni menga. 10N’awongi Abram inyam̃a siṉo sôdu areṉa sô gô garegare, n’alimbiṉi yè ereny’edu swaswo n’em̃ori, ndô e pa kera du inyoṉi. 11N’azum̃iṉ’inkungu gô bende, n’ayugyô sô ne Abram.

12Ndô gw’avôswi nkômbe Abram agôtyô n’antyôviṉô ampôlô; ndô vôna, ererya ni mpiri ya doṽadoṽa y’avôswi gôre yè. 13N’awulinyi Yeôva Abram inè: Mya inè, imbambi so si be dwaṉ’agènda gô ntye yi re arang’iyaô; wi be dwaṉ’asaka gô yô, ko waô tugizô vo inkam̃a s’impum̃a nay. 14Ndô mi be jèkèlya iṉongo mènyoṉo nyi be dwaṉô waô asaka, n’avila vovo wi be kogwa n’igumb’inyenge. 15N’awè, we be kènda n’am̃ènjè gôr’ireri so, we be bèṉô gô mbôlô mpôlô. 16Ndô gw’ivôm̃a nya nay, wi be tô fwinya vèṉo; konde ibe s’Amori si pa jônya du. 17Ndô gw’avôswi nkômbe arweṉi mpiri ya doṽadoṽa, ndô vôna, inyogo ny’ôtutu, n’ibam̃iṉa s’ôgôṉi s’avyagaṉi gw’anyanganyanga m’inyam̃a s’avegagi kerô pa.

18Ntyugu mèyoṉo Yeôva ayeki njeka n’Abram, awulya inè: Mi pe ntye yiṉo gôr’awaṉi wo, avila g’ôrèmbo w’Egipt kwanga g’ôrèmb’ômpôlô, g’ôrèmbo wi Ferat; 19ntye yi Keni, na yi Kenizi, na yi Kadmoni; 20na yi Èt, na yi Ferèzi, na yi Refain; 21na y’Amori, na yi Kanaan, na yi Girgasi, na yi Yebusi.

Currently Selected:

Ipakilya 15: MYE

Highlight

Copy