Rôm̃i 14

1Gw’Ikônyum arweṉi nè, Pol ni Barnabas w’ayingiṉi mpo mô gô nagô yi soṉo y’Iju, n’agambi waô igamba ny’avangi awenge gôr’Iju na gôre Grèk gô bekelya. 2Ndô Iju wi re wi pa bekelya w’azory’irèm̃a y’aṉongo avanga waô gô bik’awarerè. 3N’alingi waô ôling’ôla gw’Ikônyum, nkambag’igamba itya fo, na gô ngulu ya Rerè y’ayoliz’igamba ny’imèpiṉô sè na gô nunguṉa waô gô pange lemba n’isam̃u yi mamô n’ago maô. 4Aṉaga wi nkala w’ayarwaṉi: nkumba mori y’aliṽi gôr’Iju, ni nkumba mori gôre rôm̃i. 5Aṉongo n’Iju, waô n’ivangiṉi yaô, w’am̃og’erungu gô pugiza waô na gô punga waô adô; 6Pol ni Barnabas w’amyeṉ’igamba, awangi waô gw’inkala si Likaônya, na gô Listra, na gô Dèrba, na gô ntye vingôvingô. 7N’agambiṉagi waô ntyangô mbya gôgô.

8Gô Listra, avegag’ôṉôm̃e dwaṉa pa baru, ngulu fo gw’agôlô mè, ebôke avila gw’ayanyô yè, e pa diwô akèndi ni mori. 9Avôganyô yè gw’agambagi Pol. N’azindinyô yè ne Pol ngolongolo ayeṉa nè, are n’ibekelya gô jingô, 10arôngi yè n’inyôy ivôlô inè: Gum̃aṉa gôre n’agôlô mo. N’agazangaṉi yè agènda.

11Gw’ayeṉ’aṉaga nt’alendi Pol, w’arômbiṉ’anyôy maô, awulya ni nkambiṉi yi Likaônya inè: Inyambyè si re sum̃iṉa pa gôre zwè n’egolaṉi z’aṉaga. 12N’aṽèti waô Barnabas inè, Yupitèr, ni Pol inè, Mèrikure, konde ayè avegagi gw’ewônjô z’ikamb’igamba. 13Miṉisè yi Yupitèr, avegagi g’ômpômbala wi nkala, aṽagi yè inyare n’ikôrôṽa s’ijavi g’ômpômbala wi nkala, aṽeli gô jire ntyagô, ayè n’aṉaga. 14Ndô gw’ayogyô rôm̃i Barnabas ni Pol ayogo yeṉo, ayôkuṉ’ingoy saô, agènda ni mangô gô garegare y’aṉaga, arônga inè: 15Aṉôm̃e, ntiṉa nde yi denda ṉwè isam̃u yiṉo? Azwè kè azw’aṉaga mbela mèmô ga ṉwè, n’azwè kwena ṉwè inkolo inè, rigaṉ’isam̃u y’enyalè yiṉo, ko ṉwè kegwa gôr’Anyambyè ya bo, y’avangi ôrôṽa, ni ntye, ni mbeṉe, n’ezom̃’edu zi re gô yô. 16Anyambyè yiṉo, gw’ampôm̃a mi re pyagaṉa pa, arigi aṉongo môdu gô sông’intyale saômè, 17ndô e pa tig’ôkuṽi wèmè ôyeṉi fo, konde alendi mbya, nogizaga ṉwè ningô avila g’ôrôṽa n’impum̃a y’ôwong’ômwenge, mpagaga ṉwè iny’ijenge ni njônyag’irèm̃i yaṉi n’igeṽa. 18Ndô vangaṉe n’agamba miṉo, wi pa jolya gô simby’aṉaga gô jire ntyagô gôre waô.

19Vovo avyeṉ’Iju avila gw’Antyok n’avila gw’Ikônyum, azory’aṉaga, na waô punga pe Pol adô, w’aluri yè avila gô nkala, mpinkilyaga inè, ajuwi. 20Ndô gw’agum̃aṉ’iṉèngi vingôvingô gôre yè, Pol agum̃aṉi gôre, ayingiṉa gô nkala.

Bunya alubwi vovo agènda ni Barnabas gô Dèrba. 21Gw’agambiṉi waô ntyangô mbya gô nkala mèyoṉo avang’iṉèng’imyenge, w’awinyi gô Listra, na gw’Ikônyum, na gw’Antyok, 22njolizag irèm̃a y’iṉèngi, arevuṉa waô gô dwaṉa n’isoliṉa gw’ibekelya, mbulyaga inè, azwè be jingiṉa gw’iṉongo ny’Anyambyè n’injuke sinyenge. 23N’alôṽyi waô aṉèro gô mandô edu, na waô kambiṉa pa ni penga p’esônge, w’arigi waô gôre Rerè, y’aṽekelyô waô. 24N’avyagaṉi waô gô Pizidya, aṽya gô Pamfilya, 25n’agambiṉi waô igamba gô Pèrga, azum̃iṉa gw’Atalya. 26Avila vovo aluli waô n’ôwatanga agènda gw’Antyok, mbôra y’aṽambyô waô imèpiṉô s’Anyambyè gw’eṽilô z’alendôgô waô.

27Waô bya pa, w’alatizi mandô, arakilya isam̃u yôdu y’alendyô n’Anyambyè vo waô, ni nt’aṉunguṉi yè iguge ny’ibekelya gôr’aṉongo. 28N’alwaṉi waô vovo ôling’ôla n’iṉèngi.

Currently Selected:

Rôm̃i 14: MYE

Highlight

Copy