Rôm̃i 13

1Avegagi gô mandô y’Antyok ivogisi n’iṉèngi inè: Barnabas, ni Simeôn, y’aweyôgô inè, Nigèr, ni Lusyus y’avili gô Kirèni, ni Manaèn, y’avôm̃yô n’Erod yi Tetrark, ni Sol. 2Gw’ayanjiṉagi waô Rerè gw’eṽilô zaô na gô peng’esônge, Iṉiṉ’Iṽya ny’awulinyi waô inè: Vinjiṉaṉi myè Barnabas ni Sol gw’eṽilô zi re myè fweya pa waô. 3Waô penga p’esônge agambiṉa, w’ aralyi ago maô gôre waô, arôm̃a waô.

4Barnabas ni Sol tôm̃ô pa n’Iṉiṉ’Iṽya, w’azum̃iṉi gô Selekya, n’avila vovo agèndi waô n’ôwatanga gô nenge yi Kiprus.

5Gw’aziṽi waô gô Salamine, w’agambiṉ’igamba ny’Anyambyè gw’inagô s’isoṉo s’Iju. Ni Yôan kè avegagi na waô gô nunguṉa waô.

6Waô pyagaṉa pe nenge yôdu kwanga gô Pafos, alèngi waô ntyèṉi, ôvogisi w’inôka wa mw’Iju, ini nyè ne Bar‐Yesu; 7avegagi ni Sèrgyus Pôlus, yi prôkonsul, ôma w’ikôtiza. Ayè mèwoṉo aweyi Barnabas ni Sol, awuta gô jogw’igamba ny’Anyambyè. 8Ndô Elimas, yi ntyèṉi, (konde ini nyè nyi pivya yeṉo) avugizi waô, mbutaga gô kegunye prôkonsul avila gw’ibekelya. 9Vovo Sol, aweyôgô kè inè, Pol, avegagi ralye n’Iṉiṉ’Iṽya, azindiṉi yè ngolongolo, awulya inè: 10Awè, ôma re n’avôṉô môdu n’itemiza ralye, ômwaṉa wi Satan, n’ôlôvalôvi w’ôgôre wôdu, awè ze tige gô sokoly’impoṉo sa rèti sa Rerè? 11Vôna vèṉo, ôgo wa Rerè wi re gôre wè, ô be dwaṉ’ipoku, ko w’ayeṉe nkômbe v’egômbe. N’avôswi pelè gôre yè ôlumbôtôṽa ni mpiri, n’agèndi yè mbwatawataga gô but’aṉaga wi kèndyè. 12Vovo prôkonsul, gw’ayeṉi yè nt’arweṉi, aṽekelyi mèmag’inènja sa Rerè.

13N’alubwi Pol ni nkumbi yè alubwa n’ôwatanga avila gô Pafos agènda gô Pèrga gô ntye yi Pamfilya. N’alubwi Yôan avila gôre waô, awinya gô Yerusalèm.

14Gw’aluli waô avila gô Pèrga w’agombizi ôgèndo waô, aṽyeṉi waô gw’Antyok yi Pizidya. Na gô ntyugu yi soṉo ayingiṉi waô gô nagô yi soṉo, alwaṉa baru. 15Waô tanguṉa p’ivanga n’ivogisi, ivangiṉi yi nagô yi soṉo y’arôm̃i gôre waô, awulya inè: Awarera, j’aṉw’are n’igamba ny’ôrevuṉô gô kamba gôr’aṉaga, gambaṉi.

16N’agum̃aṉi Pol avèpa waô ôgo, awulya inè:

Aṉw’aṉôm̃e w’Israèl, n’aṉwè yi ty’Anyambyè, vôganyôṉi! 17Anyambyè y’iṉongo ny’Israèl avinj’ireri sazô. N’alubi yè iṉongo nyiṉo gw’alwaṉagi waô gô ntye y’Egipt, agogunya waô avila gô yô n’ôgo wè wi ngulu. 18Anyezagi yè waô pyèrè n’agôm̃i m’impum̃’anay gw’itôve; 19na gw’ayilizi yè aṉongo ôrwageṉô gô ntye yi Kanaan, aveṉ’iṉongo nyè ntye y’aṉongo mèmoṉo gô niva yô. 20Isam̃u yiṉo vya, pyèrè ni nkam̃a s’impum̃a nay n’agôm̃i m’impum̃’ataṉè, aveṉi waô iyèkèli, kwanga gôre Samuèl y’ôvogisi. 21Vovo w’aṽambyi ôga. N’avenyô waô n’Anyambyè Saul, y’ômwaṉa wi Kis, ôma wi mbuṽe yi Benyamin, vo agôm̃i m’impum̃’anay; 22na gw’arômbi yè, aṉongunyi gôre waô David, gô dwaṉ’ôgi waô, n’arakilyi yè kè g’ômwanji wè inè: My’are dènga pe David, y’ômwaṉa wi Yisa, ôṉôm̃e wi tondô n’ôrèm̃i wam̃, e be dende ntondiṉi yam̃ yôdu.

23Avila gôr’awaṉa wi David, ga nt’ar’ômpangaṉô wè, Anyambyè are nongunya pa gôr’Israèl Ôzungè, wô ne Yesu. 24Ayè ṽyagaga ro, Yôan aliwô akambiṉ’ibatiza s’iniga si nkôndi gôr’aṉaga waôdu w’Israèl. 25Na gw’am̃azi Yôan gô janj’eṽilô zè, awulyi nè: Myè arang’ayè yi pikilyô ṉwè, ndô vônaṉi, e by’ôma gô nyum̃i yam̃ are mi ze n’inyanga nyi soduṉ’intyôzô sè s’atanga avila gw’agôlô mè.

26Awarera, awaṉa wi mbuṽe y’Abraam, n’aṉwè yi ty’Anyambyè, igamba nyiṉo ny’isungiṉô nyi re tôm̃a pa gôre ṉwè. 27Konde alwaṉi wi Yerusalèm, n’ivangiṉi yaô, gô re nè wi pa mye Yesu, w’aveṉi yè ôgara, w’alwaṉiz’agamba mè m’ivogisi mi tanguṉô waô soṉo edu. 28Vangaṉe wi pa dènga gôre yè ntiṉa yi re yè n’inyanga nyi juwa, w’aṽambyi Pilatu inè, e ga yôṉô. 29Na waô denda p’isam̃u yôdu yi re tèndô pa g’ômwanji wè, w’azônyi yè avila gô krosi, awelè g’ôrôngiṉô. 30Ndô Anyambyè arôngunyi yè avila gw’ijuwa. 31Awôm̃uny’intyugu sinyenge gôre waô w’avandi na yè avila gô Galile agènda gô Yerusalèm, na vèṉo wi r’iyeṉi yè gôr’aṉaga.

32N’azwè, azwè bunguṉa ṉwè ntyangô mbya y’ômpangaṉô w’avanganyô gôr’ireri sazô, 33nt’alwaṉizô wô n’Anyambyè gôre zwè awaṉi waô inè, gw’arôngunyi yè Yesu, ga nt’are tèndô pa g’Ôwembô wi mbaṉi inè: Awè n’ômwaṉi wam̃, ṉèṉo wiṉo ajaṉa myè wè. 34Na ga nt’are yè tôngunyè pa avila gw’ijuwa, ko yè arô fwinya gw’iboṉa, yeṉo re yè takilya pa inè: Mi be pa ṉwè imèpiṉô si nkèrè s’ômpangaṉô gôre David, imèpiṉô siṉo si re rèti. 35Yeṉo tô bulyè kè gô mbôra nyèṉè inè: Awè ze tige Ômi wo w’ôrunda gô jeṉ’iboṉa. 36Konde David, ayè denda pe môndo y’Anyambyè gw’egômbe zèmè, ayuwi, alatizô gôr’ireri sè, ayeṉ’iboṉa. 37Ndô ayè y’arôngunyô n’Anyambyè e pa jeṉ’iboṉa.

38Sambô myaṉi, awarera, inè, inyeza s’ibe si kambiṉô gôre ṉwè vo yè, 39na vo yè ôm’edu e bekelya tômbô avila g’ôgara w’isam̃u yôdu yi pô ṉwè ôgara n’ivanga nyi Môsès. 40Sambô ṽandam̃inaṉi nè, igamba ny’agambyô n’ivogisi ny’aṽya gôre ṉwè inè: 41Vônaṉi, aṉwè ivèdisi, ko mamaṉi ayila; konde mi be dend’eṽilô gw’intyugu saṉi, eṽilô zi r’aṉw’aṽekelye vangaṉ’ôma abulinya ṉwè.

42Gw’agogwi waô, w’agwen’inkolo inè, isam̃u mèyoṉo yi ga rô kambiṉô gôre waô soṉo mori kè; 43gw’avazangaṉi mandô, awenge gôr’Iju n’Aṉongam̃a w’avegagi mpyô gw’eṽilô z’Anyambyè, w’azôngi Pol ni Barnabas; w’agambi na waô, arevuṉa waô gô dwaṉa ngèngèngè gw’imèpiṉô s’Anyambyè.

44Soṉo mori, pyèrè ni n ala yôdu y’alataṉi gô jogw’igamba ny’Anyambyè. 45Ndô gw’ayeṉ’Iju aṉag’awenge, w’ayônyi ralye ni ñandi, azir’isam̃u y’awulyô Pol, avugiza yô, aroṽa yô. 46Ndô Pol ni Barnabas w’agambi na waô ni nkagandè inè: Avegag’isolo inè, igamba ny’Anyambyè nyi ga lônge kambiṉô gôre ṉwè; ndô gô re nè aṉwè bika nyô, ko ṉwè jèkèly’ikuṽi yaṉi mè inè, aṉw’aze n’inyanga ny’em̃èṉo za koṉako, vônaṉi, azwè kegwa gôr’aṉongo. 47Konde yeṉo re zwè sômbyô pa ne Rerè inè: My’are dôṽio pa gô dwaṉ’ôzange gôr’aṉongo, na gô bag’isungiṉa kwanga gw’intyay si ntye.

48Gw’ayogyô aṉongo igamba mènyoṉo w’ayeṉi mbya, azum̃iny’igamba nya Rerè, na waôdu w’alôṽyô gw’em̃èṉo za koṉako w’aṽekelyi.

49Igamba nya Rerè ny’ayagayagi gô ntye mèyoṉo yôdu. 50Ndô Iju s’azoryi antô w’ôlubô n’aṉaga w’anyanga wi nkala; n’aṉonguny’ikombiza gôre Pol ni Barnabas, azuga waô avila gô ntye yaô. 51Pol ni Barnabas w’aval’iroy y’agôlô maô gôre waô, agènda gw’lkônyum, 52n’ayôny’iṉèngi ni mbya n’Iṉiṉ’Iṽya.

Currently Selected:

Rôm̃i 13: MYE

Highlight

Copy