LUKASI 4
4
I Yesu nakelo i Majaʼa
4:1-13
(Mat. 4:1-11, Mrk. 1:12-13)
1I Yesu nakuasai Inosa mPue Ala, malai ungka ri wingke ngKoro Yarade. Inosa mPue Ala mawawanaka Sira njoʼu ri pada bone. 2Ganamo patampuyu mbengi patampuyu ndeme i Yesu bareʼe mangkoni pai bareʼe manginu, Ndaepe maoromo kompo-A. Setumo i Majaʼa da mampebutuka Sira.
3Natoʼo i Majaʼa ri Sira, “Ara banya siko Ana i mPue Ala? Mewali, pokaumo watu seʼi napewali roti!”
4 #
Paw. 8:3
Mesono i Yesu ndatoʼo, “Lau ndaʼuki ri Sura Magali, ‘Tolino bareʼe nakoto tuwu ane podo roti.’ ”
5Nakeni mpandake i Majaʼa i Yesu, podo sampompida mata natujuka Sira pura-pura poparenta ri sambawo lino seʼi. 6Natoʼo i Majaʼa ri Yesu, “Pura-pura kuasa pai kakoreʼe seʼi da kuwaika siko, maka pura-pura setu roo ndawaika yaku, pai yaku kukoto da mampepombaika ri sema anu kupokono ndaya mawaika. 7Pura-pura setu sikomo da mampotumpu, ane nupokono manyomba ri yaku.”
8 #
Paw. 6:13
Mesono i Yesu ndatoʼo, “Lau ndaʼuki ri Sura Magali, ‘Panyombamo i Pue Ala puemu, pai podo Sira anu nuporiokoi.’ ”
9Nepa nakeni woʼu i Majaʼa i Yesu njoʼu ri Yerusale, nadika Sira ri wumbu Banua i mPue, nepa natoʼoka Sira, “Siko lawi Ana mPue Ala? Mewali, posompomo ungka ireʼi. 10#Pol. 91:11 Maka lau ndaʼuki ri Sura Magali, ‘I Pue Ala da mampokau waʼa malaʼeka-A da mangajagai Siko mpodago-dago.’ 11#Pol. 91:12 Pai waʼa malaʼeka setu da mangancama Siko da naka sako witimu bareʼe tonduu ri watu.”
12 #
Paw. 6:16
Mesono i Yesu ndatoʼoka i Majaʼa, “Ri raya Ncura Magali lau ndaʼuki, ‘Neʼe nupebutuka i Pue Ala, puemu!’ ”
13Puramo raya i Majaʼa mampebutuka i Yesu, napalaikamo Sira, pai natunda-tundani ri tempo anu madago.
I Yesu mantepuʼu tetala ri Galilea
4:14-15
(Mat. 4:12-17, Mrk. 1:14-15)
14Ungka lairia mewalili i Yesu njoʼu ri Galilea; Sira nakuasai Inosa mPue Ala. Bambari kakononya Sira tebambarimo ri samalele daera setu. 15Sira mompaguru ri waʼa banua mpekakai, pai pura-pura tau mangaunde Sira.
I Yesu bareʼe natarima nto Nasare
4:16-30
(Mat. 13:53-58, Mrk. 6:1-6)
16I Yesu njoʼu woʼu ri Nasare, inceʼemo lipu mpearia. Ewa anu ndapobiasa ri eo Umapo njoʼu Sira ri banua mpekakai. Mekakore Sira mangabasa Sura Magali. 17Ndawaika Sira sura i Nabi Yesaya. Ndabulere yuyu ncura setu, ndarata jayanya anu mantoʼo ewaseʼi,
18 #
Yes. 61:1-2
“Inosa mPue Ala reʼe ri Yaku,
maka roomo ndalanti Yaku da mampobambarika
Nuntu ngKatuwu ri tau kaasi-asi.
Yaku ndapokau da mampetumbuka
tau ndatawani katelapasaka,
pai kaʼosa ri tau buta;
pai katelapa ntau anu ndajeani,
19pai mampetumbu tempo ngkajela i mPue Ala
da mancorepaka waʼa ntau-A.”
20Roo mobasa, ndakoyuyu muni sura seʼe ndawaika muni majalisi, nepa motunda muni Sira; pura-pura tau ri banua mpekakai setu meole ri Sira. 21Nepa mompau Sira ri tau seʼe ndatoʼo, “Ri padongemi Nuntu anu kubasaka komi roo, sandeme seʼi kobanganimo.”
22Jingki raya pai naʼaku ntau seʼe madonge kadago pompau-A pai kaʼalusu ngkasowanya. Natoʼo ntau seʼe, “Ara banya siʼa ana i Yusu?”
23Ndatoʼoka tau seʼe, “Sangaya-ngaya da nditoʼoka Yaku parumbasa anu mantoʼo, ‘Sando pakaʼosamo koromu ngkaliomu. Kadonge maria powiamu anu ndapojingki ri lipu Kapenau, koisa powia woʼu ri lipu-Mu ngkalio-Mu.’ ” 24#Yoh. 4:44 Ndasumparaka i Yesu pau-A, “Neʼe ndikalingani, bareʼe da reʼe nabi anu ndatubunaka ri lipunya. 25#1 Raj. 17:1 Paikanya ndipedongeka: sindara mpotetala i Elia, tepewali poreme bangke tatogo ntaʼu santongo kasaenya, painaka bareʼemo tuwu pinamuya, da yogamo tau sambawo ntana. Tempo setu maria weʼa bemba anu mapari katuwunya ri oyo nto Isaraeli. 26#1 Raj. 17:8-16 Mau ewanceʼe i Nabi Elia bareʼe ndapokau i mPue Ala da mantulungi sambaʼa ri oyo waʼa bemba nto Isaraeli, paikanya siʼa ndapokau da mantulungi weʼa bemba nto Sarepati ri tana nto Sidoni. 27#2 Raj. 5:1-14 Ewanceʼe seʼe sindara mpotetala i Nabi Elisa, maria tau ketangga ri oyo nto Isaraeli, pai bareʼe napakaʼosa, waʼanya podo i Naʼama to Siria setu.”
28Madonge pompau i Yesu ewanceʼe, majaʼa kojo raya ntau pura-pura. 29Meoko tau pura-pura, nairi ntau seʼe i Yesu rata ri sambaliku lipu, nakeni ntau i Yesu ri apa buyu anu tindo, tinako ndaya ntau seʼe njairia da napantumbalaka Sira ri yaa. 30Paikanya mekarioyo i Yesu ri oyo ntau sondo, ndapalaika tau seʼe.
Tau anu napesuaki inosa majaʼa
4:31-37
(Mrk. 1:21-28)
31Ungka njairia malaimo i Yesu njoʼu ri lipu Kapenau ri Galilea. Ri eo Umapo mompaguru Sira ri waʼa ntau setu. 32#Mat. 7:28-29 Benge raya ntau mangkita pai madonge pompaguru i Yesu, maka naepe ntau seʼe reʼe kuasa ri pompaguru-A. 33Ri banua mpekakai reʼe tau sambaʼa anu nakuasai inosa majaʼa, maboo-boo tau setu marimbo oninganganya. 34“Ee, Yesu to Nasare, ara da maʼi nukuja kami? Siko da maʼi magero kami? Yaku kuincani isema Siko, Sikomo suro magali anu ungka ri Pue Ala.”
35Ndapokarau i Yesu inosa majaʼa setu ndatoʼo, “Ponjii! Palai ungka ri tau setu!” Narompotaka inosa majaʼa setu tau setu ri suara ntau seʼe pura-pura, roo setu mesuwu ungka ri tau setu. 36Jingki raya ntau setu pura-pura, napombepeoasika ntau seʼe, “Makuasa kojo pau-Nya. Ua pau pai kuasa, nasongka waʼa inosa majaʼa mesuwu, mesuwu tau seʼe.” 37Tebambarimo ri tana setu kono i Yesu.
Maria tau ndapakaʼosa i Yesu
4:38-41
(Mat. 8:14-17, Mrk. 1:29-34)
38Malaimo i Yesu ungka ri banua mpekakai, njoʼu ri banua i Ncimo. Ndarata mania i Ncimo anu weʼa ntongo nawembe; pai reʼemo tau anu mampetumbuka i Yesu kono kajuʼanya setu. 39Njoʼumo i Yesu madadu ibu setu ri poturu-turunya, ndairi juʼa wembe setu, liu-liu osamo ibu setu, membangu napolinggonamo tau seʼe.
40Ri kalauka ndeme, pura-pura tau anu reʼe kasangkomponya anu majuʼa mpengaya-ngaya nakeni ntau seʼe ri Yesu. Pura-pura tau setu ndadonco i Yesu painaka osa juʼanya. 41Maria tau anu napesuaki i majaʼa ndapakaʼosa; mesuwu waʼa i majaʼa setu seʼi meboo-boo natoʼo, “Komimo Ana i mPue Ala!”
Paikanya ndapokarau i Yesu waʼa i majaʼa setu, bareʼe maya da mantoʼo-ntoʼo inceʼe, maka waʼa i majaʼa setu naincani ka-Siranya Mokole Tadungkadago.
I Yesu motuntu ri raya waʼa banua mpekakai
4:42-44
(Mrk. 1:35-39)
42Butu mebetemo reme malaimo i Yesu ungka ri kota setu njoʼu ri sambalikunya ri kabareʼenya reʼe tau. Waʼa ntau sondo mampepali Sira, jabutu narata ntau seʼe, napari-pari ntau seʼe da naka neʼe ndapalaika tau seʼe. 43Paikanya mompau i Yesu ndatoʼo, “Nuntu ngKatuwu ungka ri Pue Ala pai poparenta-A sangaya-ngaya da ndapobambarika woʼu ri kota-kota ntaninya, maka inceʼe puʼunya painaka ndapokau i mPue Ala Yaku maʼi ri lino.”
44Inceʼe puʼunya painaka motuntu i Yesu ri raya waʼa banua mpekakai anu reʼe ri tana Yudea.
Currently Selected:
LUKASI 4: LAIPMF
Highlight
Share
Copy
Want to have your highlights saved across all your devices? Sign up or sign in
