LUKASI 3

Tuntuka i Yohane Topopariu

3:1-20

(Mat. 3:1-12, Mrk. 1:1-8, Yoh. 1:19-28)

1Ri taʼu kasampuyu pai alima poparenta i Datu Tiberiu pai i Pontiu Pilatu mewali Petoro ri Yudea, pai i Herode moparenta ri Galilea, kasangkomponya i Pilipu moparenta ri wilaya Iturea Tarakoniti, pai i Lisania moparenta ri Abilene. 2Anu mewali tadu mpanyomba bangke inceʼemo i Anasi pai Kayapa. Ri taʼumo setu i Pue Ala mompau ri Yohane, ana i Ncakaria ri pada bone. 3Melinjamo i Yohane ri waʼa lipu anu ri wingke ngKoro Yarade, mamparata bambari ungka ri Pue Ala. Meboo, Yohane natoʼo, “Ndikajeamo ungka ri waʼa ncalaani, pai komi sangaya-ngaya da ndariu da naka bareʼemo ndakitanaka i mPue Ala komi.” 4#Yes. 40:3-5 Inceʼe silulu pai anu lau ndaʼuki ri sura i Nabi Yesaya:

“Reʼe tau meboo-boo ri pada bone,

‘Ndipatokakamo i Pue jaya-A,

ndipalenekamo Sira jaya-A.

5Waʼa ngoyo da ndabuketi,

waʼa buyu pai pongku ntana da ndapapewali rato,

jaya anu modenggo-denggo da ndapakayoa

pai jaya anu motabiloke da ndapakalori.

6Waʼa ntau ri sambawo lino da mangkita.

I Pue Ala da mancorepaka tolino!’ ”

7 # Mat. 12:34, 23:33 Maria tau rata ri Yohane da mekiriu. Natoʼoka i Yohane ri tau seʼe, “Komi tau majaʼa! Isema anu mantoʼo kakominya ndikoto lapa ungka ri popahuku i mPue Ala anu da rata? 8#Yoh. 8:33 Nditujumo ri powiami kakominya majeamo ungka ri waʼa ncalaami! Neʼe boi nditoʼo i Burahima ineʼemo ngkaimi. Da ndipaincani: Ungka ri waʼa mbatu seʼi ndakoto i mPue Ala mampapewali muli i Burahima! 9#Mat. 7:19 Tokamo uase da ndatowoka kaju pai ndarantasi ngkekale-kalenya. Pura-pura kaju anu bareʼe madago powuanya da ndatowo pai da ndatendeka ri apu.”

10Mompeoasi tau seʼe ri Yohane natoʼo, “Mewali, nunjaamo anu sangaya-ngaya da kapowia.”

11Mesono i Yohane natoʼo, “Tau anu mampotumpu radua baju, sangaya-ngaya sambaʼa da nawaika tau anu bereʼe bajunya; pai tau anu mampotumpu pangkoni, sangaya-ngaya da napotilaka.”

12 # Luk. 7:29 Maʼi woʼu waʼa ntoponduru asele da mekiriu ri Yohane. Meoasi tau seʼe natoʼo, “Guru, nunjaa anu da kapowia?” Mesono i Yohane, 13“Komi mampesingaraka asele neʼe meruu ri gori anu ndapakanoto!”

14Reʼe woʼu surodado anu mompeoasi natoʼo, “Ewambeʼimo kami seʼi? Nunjaa anu sangaya-ngaya da kapowia?”

Mesono i Yohane natoʼo, “Neʼe boi reʼe tau ndiparini pai neʼe ndipareʼe waʼa mpetuluri anu bareʼe monco da ndipaleʼo marampa doi. Da ndipoganamo gajimi!”

15Ri tempo setu waʼa ntau montepuʼu mombepeoasi, bara i Yohanemo seʼi Mokole Tadungkadago anu napopopea ntau seʼe. 16Inceʼe painaka mompau i Yohane ri tau seʼe pura-pura natoʼo, “Yaku mariu komi pai ue, paikanya maʼi da rata tau anu meruu ngkabangke pai yaku. Sako malede wayaa ntalupaa, yaku bareʼe sintinaja. Sira da mangariu komi pai Inosa mPue Ala pai apu. 17Pale-A mantangke duku mpontapi da ndatapika gandu rantani maiti. Gandu da ndapariala paikanya pura-pura ota da ndapanowa ri apu anu bareʼe mate-mate!”

18Maria totoraka anu natoʼo i Yohane ri tau seʼe, ri sindara pampetumbunya Nuntu ngKatuwu. 19#Mat. 14:3-4, Mrk. 6:17-18 Paikanya i Herode anu mewali Mokole ri Galilea, naseko i Yohane, maka siʼa mamporongo i Herodia rongo ngkasangkomponya, pai maria woʼu powianya anu majaʼa. 20Sawanya da majea i Herode, napokau tau mancoko i Yohane, nepa napari ntarunggu.

I Yesu ndariu

3:21-22

(Mat. 3:13-17, Mrk. 1:9-11)

21Karoonya nariu i Yohane waʼa ntau sondo, nariu woʼu i Yesu. Pai ntongo mekakai Sira, teloka yangi, 22#Pal. 22:2, Pol. 2:7, Yes. 42:1, Mat. 3:17, Mrk. 1:11, Luk. 9:35 pai metudumo Inosa mPue Ala ri wawo ntanoana-A motaʼa ewa tonci putiʼa. Nepa ndadonge oni nganga mPue Ala mantoʼo, “Sikomo Ana-Ku anu Kupotowe. Siko mampakawongko raya-Ku.”

Posuncu anu mampomulika i Yesu

3:23-38

(Mat. 1:1-17)

23Mosumo da gana togompuyu ntaʼu tinuwu i Yesu ri pontepuʼua mompaguru; malulu pantoʼo ntau Sira ana i Yusu, ana i Eli, 24ana i Matati, ana i Lewi, ana Maleki, ana i Yanai, ana i Yusu. 25Ana i Matica, ana i Amosi, ana i Naini, ana i Eseli, ana i Nagai. 26Ana i Maʼati, ana i Matica, ana i Simei, ana i Yoseki, ana i Yoda. 27Ana i Yohanani, ana i Resa, ana i Serubabeli, ana i Salatie, ana i Neri. 28Ana i Maleki, ana i Adi, ana i Kosami, ana i Elimoda, ana i Eri. 29Ana i Yesua, ana i Eliese, ana i Yorimi, ana i Matati, ana i Lewi, 30ana i Simeo, ana i Yahuda, ana i Yusu, ana i Yunani, ana i Eliaki, 31ana i Melea, ana i Mina, ana i Matata, ana i Nata, ana i Daudi, 32ana i Isai, ana i Obe, ana i Boasi, ana i Salamo, ana i Nahaso, 33ana i Aminada, ana i Adimini, ana i Arami, ana i Esero, ana i Paresi, ana i Yahuda, 34ana i Yako, ana i Saki, ana i Burahima, ana i Tera, ana i Nahori, 35ana i Saruhi, ana i Rahu, ana i Peleki, ana i Eberi, ana i Salomo, 36ana i Kenani, ana i Arapasa, ana i Semu, ana i Noho, ana i Lame, 37ana i Metusala, ana i Eno, ana i Yaresi, ana i Mahalale, ana i Kenani, 38ana i Enosi, ana i Seti, ana i Adama, ana i mPue Ala.

Currently Selected:

LUKASI 3: LAIPMF

Highlight

Copy