PALABURU 37

I Yusupu pai waʼa ngkasangkomponya

37:1-11

1Maroo-roomo i Yako ri tana Kanaʼa, ri kareʼe mpeari mpapanya, 2ewaseʼi tuntukanya sombori i Yako:

Ri tempo i Yusupu ana i Yako, tinuwu sampuyu pai papitu ntaʼu, njoʼumo siʼa melulu mangkambi pinatuwu mpapanya sangkani-ngkani pai waʼa ntukakanya, inceʼemo waʼa ana i Biliha pai Silipa inceʼe radua rongo piara mpapanya. Siʼa anu mampepetumbuka papanya waʼa mpowia waʼa ntukakanya anu majaʼa.

3I Yusupu lawi meruu napampokapuru i Yako painaka waʼa ananya anu ntaninya, maka i Yusupu ndapoana ri tempo ngkamatuʼanyamo. Ri anu sandeme napowiaka i Yusupu sambaʼa juba anu maʼai ngkadolidinya. 4Butu nakita waʼa ntukakanya papa ntau seʼe meruu ndapampomawo i Yusupu painaka tau seʼe, napobanciikamo ntau seʼe i Yusupu, painaka bareʼemo napokono ntau seʼe mampompauka mpodago siʼa.

5Ri anu sambengi mangipi i Yusupu, pai ri pampaukanya waʼa ntukakanya pangipinya setu maʼaimo napampobanciika ntau seʼe siʼa. 6Ewaseʼi pompau i Yusupu ri tau seʼe natoʼo, “Koisa ndipedongeka! 7Kupangipika kita pura-pura njau ri bonde ntongo mengasoʼo gandu anu roo ndapota, gandu anu kusoʼa tepatunda ri tongonya. Waʼa gandu anu ndisoʼo mantolilimi anuku nepa manyomba ri anuku.”

8Naseko waʼa ntukakanya siʼa natoʼo, “Mewali pantoʼomu siko mewali mokole pai da ngkuasa kami?” Painaka maʼaimo ndapampobanciika siʼa ua waʼa mpangipinya pai ua waʼa mpaunya.

9Ungkalairia mangipi woʼu i Yusupu, natoʼoka woʼu waʼa ntukakanya, “Kupangipika woʼu, kukita ogu eo, wuya pai sampuyu pai sambaʼa betuʼe manyomba ri yaku.”

10Pangipinya setu napauka woʼu papanya, painaka naseko mpapanya siʼa, ndatoʼo, “Pangipi nunjaa anu ewanceʼe? Ara nunawa-nawa yaku, inemu pai waʼa ngkasangkompomu da njoʼu manyomba ri siko?” 11#Pwn. 7:9 Painaka makodimo raya waʼa ntuakakanya ri siʼa, paikanya papanya manawa-nawa mpaliu pangipi setu.

I Yusupu ndapobalu pai ndakeni ri tana Masiri

37:12-36

12Ri anu sandeme sindara waʼa ntukaka i Yusupu njoʼu ri Sikemi mangkambi waʼa mbula pai bimba mpapa ntau seʼe, 13natoʼoi Yako ri Yusupu, “Kanjoʼumo ri Sikemi, ri kanjau waʼa ntukakamu mangkambi waʼa mbula pai bimbata.” Mesono i Yusupu natoʼo, “Madago, papa.”

14Natoʼo mpapanya, “Akomo njoʼu peole bara ewambeʼi katedikanakanya waʼa ntukakamu, mbula pai bimbata, ane roo pewalili maʼi petumbu kaku.” Napapalaimo i Yusupu ungka ri Yombo Heberoni.

Bareʼe masae ratamo i Yusupu ri Sikem. 15Ntongo mpelinja siʼa wainjoʼu-waimaʼi ri pada, momberatamo pai siʼa sambaʼa tuama anu meoasi ri siʼa natoʼo, “Nunjaa anu nupepali?”

16Mesono i Yusupu natoʼo, “Yaku mampepali waʼa ntukakaku. Tau seʼe mangkambi waʼa mbula pai bimba. Bara ndiincani ri mbeʼi kareʼe ntau seʼe?”

17Natoʼo ntau setu, “Tau seʼe malaimo ungka ireʼi. Kudonge natoʼo ntau seʼe, tau seʼe da njoʼu ri Dotani.” Inceʼe painaka malai i Yusupu maluluwaka waʼa ntukakanya, nepa narata tau seʼe ri Dotani.

18Ntongo lawa-lawa nakitamo ntau seʼe i Yusupu, pai kabareʼepanya rata ri tau seʼe, nasintuwunakamo ntau seʼe da mampepate siʼa. 19Natoʼo ntau seʼe, “Peole, tumaʼimo i topangipi. 20Iomo tapampepate siʼa pai wata ngkoronya da tanawu ri raya ntibubu anu otimo uenya. Nepa da tatoʼo siʼa nasempati mpinatuwu anu masii. Nepa da takita naini ewambeʼi peola mpangipinya setu.”

21Nadonge i Rube gombo-gombo ntau seʼe setu, inceʼe painaka napepalika jayanya napantuwuri i Yusupu. Natoʼo, “Neʼe ndapepate siʼa.” 22“Moruana tanawumo siʼa ri raya ntibubu anu ri pada bone seʼi, paikanya neʼe tawombo bara tawelai siʼa.” Ewanceʼe pompaunya maka tinako ndayanya da mancorepaka i Yusupu, nepa da napokau mewalili ri banua. 23Butu ratamo i Yusupu ri waʼa ntukakanya, liu-liu nalambesi ntau seʼe juba i Yusupu anu maʼai ngkalese setu. 24Nepa nanoʼo ntau seʼe siʼa nanawu ri raya ntibubu anu otimo uenya.

25Sindara mpangkoni ntau seʼe, rasaka nakita ntau seʼe santibura to Sumaila ntongo mpelinja ungka Gilea da njoʼu ri tana Masiri. Waʼa unta ntau seʼe ndaʼulayaka waʼa rampa pai soga. 26Natoʼo i Yahuda ri waʼa ngkasangkomponya, “Nunjaamo yowenya ane tapepate tuaʼita setu nepa tasambunika pampepate setu? 27Moruana tapobalumo siʼa ri to Sumaila setu. Neʼe tajeani siʼa. Mau bara ewambeʼi siʼa setu tuaʼita ngkaliota.” Nasintuwunaka waʼa ngkasangkomponya, 28#Pwn. 7:9 ri poliu waʼa ntopobalu-balu nto Mijea setu, ndaoremo i Yusupu ungka ri raya ntibubu setu, nepa ndapobalu ri to Sumaila setu, olinya rua mpuyu ngkomba doi salaka. Ungkalairia nakenimo waʼa ntopobalu-balu setu siʼa njoʼu ri tana Masiri.

29Sindara mpewalili i Rube ri tibubu setu, nakita bareʼemo njau i Yusupu njairia, nasempati rengkonya nakeni ngkapari ndayanya. 30Mewalili siʼa ri waʼa ngkasangkomponya natoʼo, “Bareʼemo njau ananggodi setu ri raya ntibubu! Nunjaa anu da kupowia seʼi-seʼi?”

31Nepa nasambale ntau seʼe sambaʼa mbula, naome ntau seʼe juba i Yusupu ri daa mbula setu. 32Ungkalairia ndapokaumo njoʼu ndawawaka papa ntau seʼe, pai patuu ewaseʼi, “Juba seʼi karata i jaya. Bara anami Papa tumpunya seʼi?”

33Naincani mpodago i Yako juba setu, nepa natoʼo, “Monco inceʼi juba anaku! Manoto siʼa roo nasempati mpinatuwu anu masii. Odee, anaku i Yusupu matemo nasempati mpinatuwu setu!” 34Nasiati i Yako rengkonya ua kapari ndayanya, napake rengko mpongkabalusi. Maria ndeme napangkukuousi ananya setu. 35Ratamo pura-pura ananya anu tuama pai weʼa mampalindo rayanya, paikanya bareʼe napokono ndapalindo. Natoʼo, “Rantani mate da kupangkukuousi anaku.” Ewanceʼemo napangkabalusi mpaliu kamate ananya i Yusupu.

36Sindara setu, ri tana Masiri, waʼa nto Mijea setu mampobalumo i Yusupu ri Potipa, sambaʼa tadulako ncurodado i Datu anu mewali tadulako ntopojaga ri langkanae.

Currently Selected:

PALABURU 37: LAIPMF

Highlight

Copy