PALABURU 35

I Yako pai waʼa ntaunya njoʼu ri Beteli

35:1-8

1 # Pal. 28:11-17 Ri anu sandeme ndatoʼo i mPue Ala ri Yako, “Yakumo Pue Ala anu mampapamara koroku ri siko ri tempo mpalaimu ua mampokaeka tukakamu i Esau. Mewali palaimo njoʼu maliga-liga ri Beteli. Karoo-roomo njairia, pai wangumo sambaʼa lampaʼani mpanyomba ri yaku.”

2-3Ungkalairia natoʼa i Yako ri waʼa rongo pai waʼa ananya, pai ri pura-pura tau anu njau sangkani-ngkani pai siʼa, “Kita da malai ungka ireʼi da njoʼu ri Beteli. Njairia yaku da mawangu lampaʼani mpanyomba ri Pue Ala anu mantulungimo yaku ri tempo ngkapariku pai anu mangkarianimo yaku ri mbeʼi-mbeʼi ntano palaiku. Mewali da nditajikamo waʼa nturuki lamoa ntaninya anu reʼe ri komi; da ndiwianakamo pampakagali koromi pai da ndipakemo rengko anu magali.” 4Nepa napepombaika ntau seʼe pura-pura turuki lamoa anu nadika-dika ntau seʼe, ewanceʼe seʼe waʼa jali ntau seʼe. Pura-pura setu natana i Yako ri ara mpuʼu ngkaju bangke mosu ri kota Sikemi.

5Ri tempo mpalai i Yako pai waʼa bangani ncomborinya, ndaekasi i mPue waʼa ntau waʼa bangani ngkota anu mosu pai kareʼe i Yako, painaka bareʼe naduduki ntau seʼe i Yako pai waʼa ntaunya. 6Ratamo tau seʼe ri tana Kanaʼa ri kota Beteli anu i owi toʼonya Lusi. 7Njairia nawangu i Yako lampaʼani pai napapotoʼoka tampa setu “Eli-Beteli”, maka i Pue Ala mepatongawamo ri siʼa njairia, ri tempo mpolonconya ua mampokaeka tukakanya. 8Njairia woʼu i Debora topotiana i Ribeka, mate nepa nadayo ntau seʼe ri ara mpuʼu ngkaju bangke tondo selata ngkota setu. Inceʼe painaka puʼu ngkaju setu ndapapotoʼoka, “Puʼu ngkaju mPotumangi.”

I Pue Ala mangadonco i Yako ri Beteli

35:9-15

9Ri pewalili i Yako ungka ri Mesopotamia, mepatongawa woʼu i Pue Ala ri siʼa pai mangadonco siʼa. 10#Pal. 32:28 Ndatoʼo i mPue Ala ri siʼa, “Siko bareʼemo da ndatoʼo i Yako, paikanya Isaraeli.” Ewanceʼemo ndapampapotoʼo i mPue Ala siʼa Isaraeli. 11#Pal. 17:4-8 Nepa ndatoʼo woʼu i mPue Ala, “Yakumo Pue Ala Anu Makuasa. Mbolimo siko da sondo mulimu! Siko da mampomulika waʼa banca pai da mewali ngkai waʼa mokole. 12Tana anu roo kuwai ri Burahima pai i Saki, da kuwaika siko pai waʼa mulimu.” 13Roo setu ndapalaikamo i mPue Ala i Yako. 14#Pal. 28:18-19 Ri tampa mpompau i mPue Ala ri Yako setu, napatunda sambaʼa watu anu mewali patiendo. Watu setu napanyombaka ri Pue Ala nabubusika anggoro pai lana saitu. 15Tampa setu napapotoʼoka “Beteli”.

Kamate i Raheli

35:16-22a

16Roo setu malai i Yako pai waʼa ntaunya ungka ri Beteli. Sindara tau seʼe ntongo lawapa nepa da rata ri Eparata, jelamo tempo da poana i Raheli. Paikanya mapari poananya seʼe. 17Butu maʼaimo kajuʼa ngkomponya da moana, natoʼomo bidani anu mampapoana ri siʼa, “Pakarosoka rayamu Raheli, anamu tuama woʼu.” 18Paikanya mosumo janji i Raheli, pai ri da kapuramo inosanya, napapotoʼoka ananya setu i Beni-Oni, paikanya papanya mampapotoʼoka i Benyami.

19Wata ngkoro i Raheli, ndadayo ri wiwi njaya anu da njoʼu i Eparata, anu wawaseʼi toʼonya Beteleme. 20Napomuya i Yako sambaʼa watu mpaʼesa njairia, pai rantani wawaseʼi dayo i Raheli setu ntongo natandai watu mpaʼesa setu. 21Roo setu nepa melinja mpaliu i Yako, nepa nawangu kemanya ri sambali Menara Ederi. 22a#Pal. 49:4 Sindara ngkanjau ntau seʼe njairia setu i Rube mamperouka i Biliha, rongo piara mpapanya. Padonge i Yako anu mewali setu, majaʼa kojo rayanya.

Waʼa ana i Yako

35:22b-26

(1 Taw. 2:1-2)

22bI Yako mampotumpu ana tuama sampuyu pai radua. 23Waʼa ana i Lea inceʼemo i Rube (ana uyue i Yako), i Simeo, i Lewi, i Yahuda, Isakari pai Sebulo. 24Waʼa ana i Raheli inceʼemo iYusupu pai Benyami. 25Waʼa ana i Biliha, anamayunu i Raheli setu inceʼemo i Daa pai Natali. 26Waʼa ana i Silipa, anamayunu i Lea inceʼemo i Gati pai Asere. Waʼa ananggodi setu ndapoana ri Mesopotamia.

Kamate i Saki

35:27-29

27 # Pal. 13:18 Ratamo i Yako ri papanya i Saki, ri kareʼe mpearinya ri Mamire mosu ri Heberoni. (I owi ngkainya i Burahima woʼu maroo-roo njairia). 28-29Maʼaimo kojo kamatuʼa i Saki, saatu uayu mpuyu ntaʼu tinuwunya, mate siʼa, wata ngkoronya nadayo i Esau pai Yako pai waʼa ananya.

Currently Selected:

PALABURU 35: LAIPMF

Highlight

Copy