PALABURU 33
33
Kasimanago muni i Yako pai Esau
33:1-20
1Nakita i Yako maʼimo i Esau sangkani pai aopo atu taunya. Inceʼe painaka natila-tila ananya ri oyo i Lea pai i Raheli pai ri radua rongo piaranya. 2Nadika rongo piaranya radua setu sangkani pai waʼa ananya ri suara, natonda i Lea pai waʼa ananya, nepa i Raheli pai Yusupu ri taliku mpodago. 3i Yako melinja ri suara ntau seʼe pura-pura, seʼi melinja mantimosuki tukakanya seʼi metutu manyomba papitu ngkani. 4Paikanya molonco i Esau madadu i Yako, nasokowaka nepa naeki i Yako. Mombetangisimo tau radua setu. 5Pangkita i Esau pura-pura weʼa pai waʼa ananggodi setu, meoasi siʼa natoʼo, “Isema waʼa ntau anu sangkani-ngkani pai siko seʼi?”
Mesono i Yako natoʼo, “Tau seʼemo waʼa anaku. I Pue Ala mawaimo ri yaku waʼa ananggodi setu.” 6Roo setu njoʼumo waʼa rongo piara i Yako setu sangkani pai waʼa ananya, mombukotu ri suara i Esau. 7Nepa njoʼu i Lea pai waʼa ananya, kapusanya metimosukimo i Yusupu pai Raheli nepa mombukotu pura-pura.
8Meoasi i Esau natoʼo, “Nunjaa tinako ndayamu pai waʼa ntibura anu kupetomu ngena?”
Mesono i Yako natoʼo, “Inceʼe kupowie da naka mapuru rayamu ri yaku.”
9Paikanya natoʼo i Esau, “Ganamo karia aga-agaku, mau bareʼemo nuwaika yaku bara nunjaa-njaa.”
10Natoʼo i Yako, “Neʼe ewanceʼe! Maka ane monco kojo yaku seʼi mampakawongkomo rayamu Tukaka, da nusabemo pombaiku seʼi. Ri yaku mangangkita siko Tukaka siwia ewa kumangkita lio mPue Ala, maka madago rayamu ri yaku Tukaka. 11Mewali kuperapi da mabuya rayamu mantarima pesumboʼo anu kukeni seʼi. Maka mapurumo raya i mPue Ala ri yaku pai mangawaikamo yaku mpengaya-ngaya anu da kupoyoweka.” Nakanarasi mpaliu i Yako painaka ri purinya napokono i Esau mantarima pombainya setu.
12Nepa natoʼo i Esau, “Maʼimo tapompatikali malai, yaku anu da mamporiuka siko.”
13Mesono i Yako natoʼo, “Nuincani Tukaka waʼa ananggodi seʼi bareʼepa maroso, pai yaku woʼu da mantaeri waʼa mpinatuwu anu ntongo mampancusu ananya. Maka ane maliga pangkeni, mau podo sandeme, manoto da mate waʼa mpinatuwu setu. 14Mewali akomo siko mesindiu, nepa kutondaraka malengi-lengi. Da meliga-liga pelinjaku pai pinatuwu pai waʼa anaku seʼi da naka kurata muni siko ri Edomi.”
15Natoʼo i Esau, “Ane ewanceʼe, da kudika bara tesangkuja tauku.”
Paikanya mesono i Yako, “Neʼemo nupomasusa, podoia kuincanimo nupampokapuru yaku Tukaka. 16Ewanceʼemo ri reme setu i Esau mewalili ri Edomi. 17Paikanya i Yako njoʼu ri Sukoti, nepa nawangu banuanya njairia, pai kuani da pemou waʼa mpinatuwunya. Inceʼe painaka tampa setu napapotoʼoka Sukoti.
18Ri raya mpelinjanya ungka ri Mesopotamia, ratamo i Yako madago-dago ri Sikemi ri tana Kanaʼa, nepa nawangu kemanya ri tongo mpada mosu ri kota. 19#Yos. 24:32, Yoh. 4:5 Pada kareʼe mpokemanya setu naoli ungka ri muli i Hemori, papa i Sikemi, saatu ngkomba doi salaka olinya. 20Ungkalairia nawangu lampaʼani njairia pai napapotoʼo, “Eli, Pue Ala pue nto Isaraeli.”
Currently Selected:
PALABURU 33: LAIPMF
Highlight
Share
Copy
Want to have your highlights saved across all your devices? Sign up or sign in
