PALABURU 31

Palai mbongo i Yako ungka ri manianya i Laba

31:1-21

1Nadonge i Yako pompau waʼa ana i Laba mengantoʼo,: “Roomo natima i Yako waʼa aga-aga mpapata. Pura-pura kakoreʼenya paka ungka ri aga-aga mpapata.” 2Nakita woʼu i Yako, siʼa bareʼemo ntani napomajulea i Laba ewa i owi. 3Nepa ndatoʼo i mPue ri Yako, “Pewalilimo ri lipu mpapamu pai ri waʼa ngkasangkompomu. Yaku da mangkantawi siko.”

4Roo setu napokau i Yako tau mampetumbuka i Raheli pai i Lea da mampomberataka siʼa ri pada ri kareʼe mbula pai bimbanya. 5Nepa natoʼo i Yako ri tau seʼe, “Kukita papami bareʼemo mampomajulea yaku ewa i owi; paikanya i Pue Ala anu ndapanyomba mpapaku mampompasambiraka yaku. 6Komi radua woʼu ndiincani ewambeʼi potetalaku ri papami anu kuwianaka ri gori-gori pangkotoku. 7Mau ewanceʼemo yaku roomo ndatengosi pai sampuyu ngkanimo ndapabali-balisaka saroku. Paikanya bareʼe ndapapaliuka i mPue Ala powia anu majaʼa setu ri yaku. 8Ri tempo ndapantoʼo mpapami, ‘Mbula anu bukito inceʼe anu da mewali saroku,’ waʼa mpinatuwu setu mampoana waʼa anu bukito. Ri tempo ndapantoʼo, ‘Mbula anu loba inceʼemo da saroku,’ waʼa mpinatuwu setu mampoana anu loba. 9Ewanceʼemo ndapatima i mPue Ala waʼa mpinatuwu mpapami, nepa ndawaika yaku.

10Pai ri tempo mperongo waʼa mpinatuwu setu, nakita mpangipiku pura-pura mbula laki anu ntongo mperongo setu, buriko, bukito pai loba. 11Pai i Pue Ala ewa taʼa malaeka mompau pai yaku ri raya mpangipi setu, ndatoʼo, ‘Yako!’ Mesono yaku, ‘Njaa’. 12Mompau woʼu malaeka setu, ndatoʼo, ‘Peole pura-pura mbula laki anu ntongo mperongo setu buriko, bukito pai loba. Kuʼoakamo mampowiaka siko ewanceʼe maka kukitamo pura-pura anu napowia i Laba ri siko. 13#Pal. 28:18-22 Yakumo Pue Ala anu mepatongawa ri siko ri Beteli. Njairia roo nupomuya watu petondoni nupanyombaka, nububuka lana saitu ri wawonya. Njairia seʼe siko mosumpa ri Yaku. Mewali seʼi-seʼi pompatikalimo pai pewalilimo ri tana pebete ntanoanamu.’ ”

14Nepa mesono i Lea pai i Raheli, “Bareʼemo reʼe mau santila kodi ungka ri aga-aga mpapa mami anu da kapopanta. 15Maka kami jamo ndapeole ewa tau ntaninya. Sira mampobalumo kami pai nunjaa anu roo ndatarima setu roomo woʼu ndapapurasi. 16Kamonconya, pura-pura aga-aga anu roo ndatima i mPue ungka ri papa mami inceʼe lawi tila mami pai tila waʼa ana mami. Mewali wianakamo nunjaa anu roo ndasongkaka i mPue Ala ri siko.”

17-18Mompakorokamo i Yako da mewalili ri papanya ri tana Kanaa. Napapeponemo ri unta waʼa rongonya pai ananya, pai natondarimo pura-pura mbula pai bimbanya sangkani pai waʼa mpandatanya ri Mesopotamia. 19Sindara setu i Laba njau ri pada magunci wuyu bimbanya, pai ri tempo setumo napampelima i Raheli turuki lamoa anu mangkariani sombori anu napapakoroka mpapanya. 20Napelilimika i Yako ri Laba, bareʼe napokono mantoʼoka da palainya. 21Natima pura-pura aga-aganya, mondadusi malai. Mowote ri kore ue Eparata nepa melinja mpaliu natotoka buyu mongkodo ri Gilea.

I Laba maduduki i Yako

31:22-42

22Tatogo ndememo ungka ri palai i Yako, nepa reʼe tau Mantoʼoka i Laba kapayamo i Yako. 23Inceʼe painaka napasambaka i Laba waʼa ntaunya, malai tau seʼe maduduki i Yako, papitu ndeme pelinja ntau seʼe nepa narata ri buyu mongkodo ri Gilea. 24Butu mawengi, mampojaya pangipi i Pue rata ri Laba, mantoʼoka siʼa, “Endo-endo, neʼe boi reʼe mau sanjumi paumu da mampokarau i Yako.” 25Sindara setu i Yako njaumo mokema ri wawo sambaʼa pongkuntana. Ungka lairia i Laba woʼu pai waʼa ntaunya mokema ri pongkuntana anu ntaninya sampotenginya.

26Ungka lairia, natoʼo i Laba ri Yako, “Wenu painaka siko malai ngkaroo mangkeni waʼa anaku, tau seʼe jamo ewa tau ndatawani? 27Wenu painaka nupelilimika yaku, siko malai mponjii-njii bareʼe sako metompa? Ane rapanya metompa siko, manoto bareʼe da kupetangani da kupapoiwo pai ngayu, musiki, rebana pai kecapi! 28Seʼi woʼu bareʼemo nuwai ri yaku tempo da mangaeki waʼa anaku pai makumpuku ri tempo mpogaʼa-gaʼa. Maʼai ngkatengo kojo powiamu seʼi! 29Kamonconya, gana karosoku da mampowia jaʼa ri siko, paikanya i Pue Ala anu napanyomba mpapamu mampatiendo yaku sambengi ngena da naka neʼe mampokarau siko. 30Kuincani painaka malai mbongo siko maka da rayamu kojo mewalili. Paikanya wenu painaka siko mampelima turuki lamoaku?”

31Nepa mesono i Yako natoʼo, “Painaka malai mponjii-njii yaku maka maeka rayaku boi nditaʼamaka waʼa anami. 32Kono turuki lamoa setu, ane ndirata tau anu mampelima ireʼi, tau setu da ndahuku mate. Ndiparesamo, bara reʼe aga-agami ireʼi. Ane reʼe ndirata mbolimo nditima. Pai waʼa ntauta anu da mewali sabi.” Bareʼe naincani i Yako turuki lamoa setu i Raheli mampelima.

33Mesuamo kojo i Laba momparesa ri raya ngkema i Yako; roo setu ri kema i Lea pai kema anamayununya weʼa radua, paikanya bereʼe narata turuki lamoa setu. Kapusanya mesua siʼa ri raya ngkema i Raheli. 34Ntanoka turuki lamoa setu roomo mapia nawunca i Raheli ri kosika lampi unta, nepa motunda siʼa ri lampi setu. Naparesa i Laba juku-juku kema i Raheli paikanya bereʼe narata turuki lamoa setu. 35Natoʼo i Raheli ri papanya, “Neʼe ndipokarau yaku papa bareʼe kukoto meoko mantomu komi, maka yaku keritopi.” Timama kojo pompepali i Laba, paikanya bereʼe narata turuki lamoa setu.

36Masengkemo raya i Yako pai napantoʼo, “Ara jaʼa nunjaa anu roo kupowia? Pai nunjaa salaku painaka yaku ndiduduki? 37Seʼi-seʼi puramo ndibualetaka waʼa aga-agaku, ara reʼe ndirata aga-agami? Ndisuwurakamo aga-aga setu da ndidika ri suarata da napangkita waʼa ntauta da ndapabotusi ntau seʼe isema ri kita radua anu mayoa. 38Radua mpuyu ntaʼu kasaenya karoo-rooku ri komi tama. Waʼa bimbami pai waʼa mbulami teranganimo karianya, pai bepa reʼe mau sambaʼa mbulami anu laki anu kukoni. 39Anu mate nasoko mpinatuwu masii bareʼe kukenika komi, paikanya yaku ngkalioku anu mancawani. Anu napangangka ntau mareme bara mawengi pura-pura ndipapakoyoka yaku mancawani. 40Maria ngkani pindongo yaku nadele-delengi ndeme ri tongo mpada, pai mantodosaka ranindi mposambengi. Pai teasaoyo bareʼe kuleʼo yore. 41Ewanceʼemo katedikanaka ngkatuwuku sindara mpotetalaku ri komi ri raya anu radua mpuyu ntaʼu kasaenya. Sampuyu pai aopo ntaʼu kasaenya yaku motetala da kupaleʼo anami radua setu, pai aono ntaʼu woʼu da kupaleʼo waʼa mbula pai bimba saretu. Pai sangkasae setu sampuyu ngkani woʼu ndibali-balisaka kono saroku. 42Ane banya i Pue Ala anu ndapanyomba waʼa ntau tuʼaku inceʼemo Pue Ala anu ndapanyomba i Burahima pai i Saki anu mangkariani yaku, manoto da ndipangairi yaku malai soe-soe pale. Paikanya i Pue Ala mampetiro kapariku pai waʼa ntetalaku anu roomo kuwianaka, pai sambengi ngena roomo ndabotusi.”

Pojanji i Yako pai i Laba

31:43-55

43Nepa mesono i Laba natoʼoka i Yako, “Weʼa radua setu anaku; ana ntau seʼe yaku tumpunya, waʼa bimba saretu yaku tumpunya. Kamonconya pura-pura anu nukita ireʼi paka yaku seʼe tumpunya. Paikanya bareʼe da kukoto mantaʼamaka waʼa ana pai makumpuku. 44Inceʼe painaka maʼimo tapampareʼe pojanji, da taogu waʼa mbatu anu da mewali petondoni mpojanji setu.”

45Ungka lairia natima i Yako saogu watu napatunda mewali petondoni mpojanji. 46Nepa napokau waʼa ntaunya mampasambaka watu, nepa naogu. Roo setu molimbu tau seʼe mangkoni sangkani-ngkani ri sori mbatu ndaogu setu. 47Watu ndaogu setu napapotoʼo i Laba: Yagari Sahaduta, paikanya i Yako mampapotoʼoka: Galedi. 48Natoʼo i Laba ri Yako, “Watu anu ndaogu seʼi da mewali patiendo ri kita radua.” Inceʼe puʼu painaka tana setu ndapapotoʼoka Galedi. 49Natoʼo woʼu i Laba, “Mbolimo i Pue mampetiro kita sangkasae ngkatuwuta mombelawa-lawa.” Inceʼe puʼunya painaka tana setu ndapapotoʼoka woʼu Misipa. 50Natoʼo woʼu i Laba, “Ane majaʼa powiamu ri waʼa anaku, bara morongo woʼu siko pai waʼa mbeʼa ntaninya, mau bareʼe naincani ntau, neʼe tekalinga, i Pue Ala mampepetiro kita. 51Seʼimo watu anu roo kuogu, pai watu seʼi da mewali patiendo. 52Madago watu anu ndaogu seʼi, bara watu anu ndapomuya mewali petondoni mpojanji setu; bareʼe maya kulumpaʼi da mampoʼiwalika siko, pai siko woʼu bareʼe maya malumpaʼi watu seʼi da mampoʼiwalika yaku. 53I Pue Ala anu ndapanyomba i Burahima pai ndapanyomba mpapaku i Nahori da mewali topobotusi ri oyota.” Nepa montandokoro i Yako mamposabi toʼo i Pue Ala anu ndapanyomba mpapanya i Saki, kasiʼanya da mabangani pojanjinya. 54Nasambale sambaʼa pinatuwu napanyombaka ri wawo pongkuntana setu. Nepa napeboo waʼa ntaunya mangkoni sangkani-ngkani. Roo mangkoni sambengimo tau seʼe ri wawo pongkuntana setu. 55Bangke reme mowuro-wuro mpodago, mompalakanamo i Laba pai waʼa ananya pai makumpunya, naeki pai nadonco tau seʼe nepa mewalili siʼa ri lipu mpearinya.

Currently Selected:

PALABURU 31: LAIPMF

Highlight

Copy